Thutha wa ũhiki taũni-inĩ ya Kana, Jesu agathiĩ Kaperinaumu. Arĩ hamwe na nyina na ariũ a nyina, nĩo Jakubu, Jusufu, Simoni, na Judasi.

No Jesu arathiĩ Kaperinaumu nĩkĩ? Taũni ĩno ĩrĩ handũ hega gũkĩra Nazarethi kana taũni ya Kana, na no kũhoteke nĩ nenanene. Ningĩ, aingĩ a arutwo erũ a Jesu maikaraga kũu kana hakuhĩ na taũni ĩyo. Kwoguo Jesu no amamenyerie marĩ gĩcigo-inĩ gĩa kwao.

Ningĩ Jesu ageka maũndũ manene arĩ kũu Kaperinaumu. Kwoguo andũ aingĩ a taũni ĩyo na matũũra marĩa marigicĩirie makaigua maũndũ marĩa ekĩte kuo. Na tondũ Jesu na arutwo ake nĩ Ayahudi meyamũrĩire Ngai, no mũhaka mathiĩ Jerusalemu magakũngũĩre Pasaka ya mwaka wa 30.

Marĩ thĩinĩ wa hekarũ Jerusalemu, arutwo a Jesu makona ũndũ wa mwanya mũno wĩgiĩ Jesu, matonete hau kabere.

Watho wa Ngai woigĩte Aisiraeli marutage magongona ma nyamũ hekarũ-inĩ, na ageni arĩa mokĩte nĩ mabataraga irio ihinda rĩu marĩ kũu. Kwoguo Watho nĩ wetĩkĩrĩtie arĩa mokaga Jerusalemu kuuma kũndũ kũraihu makuue mbeca nĩguo magũre “ndegwa, kana ndũrũme” na indo ingĩ iria mangĩbatara marĩ taũni-inĩ ĩyo. (Gũcokerithia Maathani 14:​24-26) Nĩ ũndũ ũcio ahũri biacara a Jerusalemu marenderia nyamũ na nyoni thĩinĩ wa nja nene ya hekarũ. Na amwe ao maratunya andũ na njĩra ya kũmenderia goro mũno.

Arĩ na marakara, Jesu akahurunja mbeca cia arĩa marakũũrania mbeca, akang’aũrania metha ciao, na akamarutũrũra nja. Agacoka akoiga ũũ: “Eheriai indo ici gũkũ! Tigai gũtua nyũmba ya Awa nyũmba ya biacara!”​—Johana 2:16.

Arutwo a Jesu mona ũguo, makaririkana ũrathi ũyũ wĩgiĩ Mũrũ wa Ngai: “Kĩyo kĩa nyũmba yaku nĩ gĩkaandĩa.” No Ayahudi makamũũria: “Nĩ kĩmenyithia kĩrĩkũ ũngĩtuonia tũmenye atĩ ũrĩ na wathani wa gwĩka maũndũ maya?” Jesu akamacokeria: “Thariai hekarũ ĩno, na nĩ ngũmĩaka rĩngĩ na thikũ ithatũ.”​—Johana 2:​17-19; Thaburi 69:9.

Ayahudi magatua atĩ Jesu araria ũhoro wĩgiĩ hekarũ ĩyo ĩrĩ Jerusalemu, kwoguo makamũũria: “Hekarũ ĩno yaakirũo na mĩaka mĩrongo ĩna na ĩtandatũ, nawe ũroiga ũkũmĩaka na mĩthenya ĩtatũ?” (Johana 2:20) No Jesu nĩ mwĩrĩ wake areta hekarũ. Mĩaka ĩtatũ thutha ũcio, arutwo ake makaririkana ciugo icio ariũkio.