Jesu, Petero, Jakubu, na Johana moima kĩrĩma-inĩ, magacemania na kĩrĩndĩ kĩnene. Nĩ harĩ ũndũ mũhĩtanu. Andĩki-Watho marigicĩirie arutwo magĩkararania nao. Andũ magakena nĩ kuona Jesu, na magateng’era kũrĩ we makamũgeithie. Akamoria: “Nĩ kĩĩ mũrakararanĩria nao?”​—Mariko 9:16.

Mũthuri ũmwe thĩinĩ wa kĩrĩndĩ agaturia maru mbere ya Jesu akamwĩra: “Mũrutani, ngũkũreheire mũrũ wakwa tondũ akoragwo na roho mũru ũtũmaga aremwo nĩ kwaria. Rĩrĩa rĩothe wamũnyita, ũmũtungumanagia thĩ, akaruta mũhũyũ na kanua, akahagarania magego na agathirũo nĩ hinya. Njũririe arutwo aku maũingate, no matinahota.”​—Mariko 9:​17, 18.

No kũhoteke andĩki-Watho marokĩrĩra arutwo nĩ ũndũ wa kũremwo kũhonia kamwana kau, hihi makamanyũrũria. Kwoguo handũ ha kwamba gũcokeria mũthuri ũcio ũroneka agĩtangĩka, Jesu akeera kĩrĩndĩ ũũ: “Inyuĩ rũciaro rũrũ rũtarĩ wĩtĩkio na rũhĩtanu, ngũtũũra hamwe na inyuĩ ndĩmũkiragĩrĩria nginya rĩ?” Hatarĩ nganja ciugo icio cierekeirio andĩki-Watho arĩa makoretwo magĩthĩnia arutwo Jesu atarĩ ho. Jesu agacoka akeera ithe wa kamwana kau: “Rehe mũrũguo haha.”​—Luka 9:41.

Kamwana kau gakuhĩrĩria Jesu, ndaimono ĩrĩa ĩrĩ thĩinĩ wako ĩgakagũithia thĩ na ĩgagatugutania. Gakagaragara thĩ gakĩrutaga mũhũyũ na kanua. Jesu akoria ithe: “Ũndũ ũyũ ũkoretwo ũgĩkĩka harĩ we kuuma rĩ?” Nake akamũcokeria: “Kuuma arĩ o mwana, na nĩ ũmũikagia mwaki-inĩ na maĩ-inĩ maita maingĩ nĩguo ũmũniine.” Mũthuri ũcio agathaitha Jesu akamwĩra: “Angĩkorũo no ũhote gwĩka ũndũ, tũiguĩre tha ũtũteithie.”​—Mariko 9:​21, 22.

 Ithe wa kamwana kau nĩ aratangĩka mũno tondũ nginya arutwo a Jesu matinahota kũmũteithia. Jesu akeera mũthuri ũcio ciugo cia kũmwĩkĩra ngoro akoiga: “Nĩ kĩĩ gĩatũma ũnjĩre angĩkorũo no hote? Maũndũ mothe nĩ mahotekaga harĩ mũndũ ũrĩ na wĩtĩkio.” O hĩndĩ ĩyo ithe wa kamwana kau akanĩrĩra akoiga: “Ndĩ na wĩtĩkio! Ndeithia ngĩe na wĩtĩkio makĩria!”​—Mariko 9:23, 24.

Jesu akona kĩrĩndĩ gĩgĩũka kũrĩ we gĩteng’erete. Agakũũma ndaimono ĩyo andũ acio othe makĩyonagĩra akamĩĩra: “Wee roho ũyũ ũtũmaga mũndũ aremwo nĩ kwaria na kũigua, ndakwĩra uume na ndũkanaingĩre thĩinĩ wake rĩngĩ!” Ndaimono ĩyo ĩkiuma thĩinĩ wa kamwana kau, ĩgatũma gakae na ĩgagatugutania mũno. Gagakoma hau gatekwĩnyagunyia. Andũ aingĩ mona ũguo makoiga: “Nĩ akua!” (Mariko 9:​25, 26) Thutha wa Jesu gũkanyita guoko, gagokĩra na ‘kuuma hĩndĩ ĩyo gakahona.’ (Mathayo 17:18) Andũ makagegio mũno nĩ ũrĩa Jesu areka.

Mbere ĩyo rĩrĩa Jesu aatũmire arutwo makahunjie, nĩ maahotaga kũingata ndaimono. Nĩ ũndũ ũcio, marĩ oiki nyũmba makamũũria atĩrĩ: “Tũremirũo nĩ kũingata ndaimono ĩyo nĩkĩ?” Jesu akamataarĩria atĩ nĩ tondũ wao kwaga wĩtĩkio, akameera: “Mũthemba ũcio no uumire na njĩra ya mahoya tu.” (Mariko 9:​28, 29) Wĩtĩkio mũrũmu na kũhoya Ngai ũteithio nĩ gũkũbataranagia nĩguo arutwo mahote kũingata ndaimono ĩyo yuuma na hinya.

Jesu akarĩkĩrĩria na ciugo ici: “Ngũmwĩra atĩrĩ na ma, Mũngĩrĩ na wĩtĩkio ũigana mbegũ ya karatarĩ, no mũhote kwĩra kĩrĩma gĩkĩ, ‘Ehera haha ũthiĩ haarĩa,’ nakĩo kĩehere, na gũtirĩ ũndũ ũngĩmũrema.” (Mathayo 17:20) Wĩtĩkio no wĩke maũndũ manene mũno!

Mĩhĩnga na moritũ marĩa magiragia tũthiĩ na mbere ũtungata-inĩ wa Jehova no moneke ta marĩ manene na marũmĩte o ta kĩrĩma. No tũngĩgĩa na wĩtĩkio, no tũtoorie mĩhĩnga na moritũ macio mahaana kĩrĩma.