Thutha wa kĩoneki gĩa kũgarũrũka na kũhonia kamwana karĩa koima na ndaimono gĩcigo-inĩ gĩa Kaisarea Filipi, Jesu agathiĩ Kaperinaumu. Agathiĩ arĩ hamwe na arutwo ake tu, nĩgetha kĩrĩndĩ ‘gĩtikamenye.’ (Mariko 9:30) Ũndũ ũcio ũkamũhe mweke wa kũhaarĩria arutwo ake nĩ ũndũ wa gĩkuũ gĩake na wĩra ũrĩa makaaruta thutha ũcio. Akamataarĩria atĩ, “Mũrũ wa mũndũ nĩ egũkunyanĩrũo aneanwo moko-inĩ ma andũ, na nĩ mekũmũraga, na mũthenya wa gatatũ ariũkio.”​—Mathayo 17:​22, 23.

Ũndũ ũcio ndwagĩrĩirũo gũkorũo ũrĩ mũgeni harĩ arutwo ake. Jesu nĩ oigĩte hau kabere atĩ nĩ angĩgakua, o na gũtuĩka Petero nĩ aaregire gwĩtĩkia atĩ ũndũ ũcio nĩ ũgeekĩka. (Mathayo 16:​21, 22) Ningĩ atũmwo atatũ nĩ moonire Jesu akĩgarũrũka na makĩigua ndeereti ĩgiĩ “gũthiĩ” gwake. (Luka 9:31) Arũmĩrĩri ake rĩu ‘makagĩa na kĩeha kĩnene’ nĩ ũndũ wa ũndũ ũcio Jesu aroiga, o na gũtuĩka matirataũkĩrũo wega biũ nĩ ũrĩa arenda kuuga. (Mathayo 17:23) No nĩ maretigĩra kũmũũria amataarĩrie makĩria.

Thutha wa ihinda magakinya Kaperinaumu, kũrĩa Jesu aikaraga mũno na kũrĩa atũmwo amwe moimĩte. Marĩ kũu, andũ arĩa monganagia igooti rĩa hekarũ magoka kũrĩ Petero. Makĩenda hihi gũthitanga Jesu nĩ ũndũ wa kwaga kũrĩha igooti, makoria: “Mũrutani wanyu nĩ arĩhaga igooti rĩa drakma igĩrĩ?”​—Mathayo 17:24.

Petero akameera: “Ĩĩ.” Jesu arĩ nyũmba ĩrĩa araikara nĩ aramenya ũrĩa gwekĩka. Kwoguo handũ ha gweterera Petero amũhe ũhoro ũcio, Jesu akamũũria: “Ũgwĩciria atĩa, Simoni? Athamaki a gũkũ thĩ monganagia mbeca cia igooti kuuma kũrĩ a? Nĩ kuuma kũrĩ ariũ ao-ĩ, kana nĩ kuuma kũrĩ andũ arĩa angĩ?” Petero akoiga: “Nĩ kuuma kũrĩ andũ arĩa angĩ.” Jesu akamwĩra: “Kwoguo, ariũ a mũthamaki matiagĩrĩirũo kũruta mbeca cia igooti.”​—Mathayo 17:​25, 26.

Ithe wa Jesu nĩwe Mũthamaki wa igũrũ na thĩ na Ũrĩa ũthathayagio thĩinĩ wa hekarũ. Kwoguo Mũrũ wa Ngai ndabatiĩ kũrĩha igooti rĩa hekarũ. Jesu akoiga: “No nĩ getha tũtikamahĩnge, thiĩ iria-inĩ, ũikie ndwano, na woe thamaki ĩrĩa ũgũtega mbere, wamĩhingũra kanua, nĩ ũgũkora mbeca ya betha ho. Ũmĩoe, ũkarĩhe igooti nĩ ũndũ wakwa na nĩ ũndũ waku.”​—Mathayo 17:27.

Thutha ũcio arutwo magakorũo marĩ hamwe na makoria Jesu kĩũria kĩgiĩ nũ mũnene thĩinĩ wa Ũthamaki. Arutwo acio ica ikuhĩ nĩ maretigĩrire kũũria Jesu ũhoro wĩgiĩ gũkua gwake, no rĩu matiretigĩra kũmũũria ũhoro wĩgiĩ ihinda rĩao rĩrĩa rĩũkĩte. Jesu akamenya ũrĩa mareciria. Nĩ megũkararanĩirie ũndũ ũcio marĩ thutha wake rũgendo-inĩ rwao rwa gũcoka Kaperinaumu. Kwoguo akamoria: “Nĩ ũndũ ũrĩkũ mũgũkararanagĩria njĩra-inĩ?” (Mariko 9:33) Magakira nĩ ũndũ wa gũconoka, tondũ megũkararanagia igũrũ rĩgiĩ nũ mũnene gatagatĩ kao. Thutha-inĩ, atũmwo acio makoria Jesu kĩũria kĩrĩa megũkararanagĩria, makamũũria: “Nũ kũna mũnene thĩinĩ wa Ũthamaki wa igũrũ?”​—Mathayo 18:1.

Mũndũ ndangĩĩrĩgĩrĩra atĩ arutwo no makararanĩrie ũndũ ta ũcio thutha wa gũkorũo na Jesu ihinda rĩa mĩaka ta ĩtatũ. O na kũrĩ ũguo, ti akinyanĩru. Ningĩ marereirũo ndini-inĩ ĩkĩrĩire mũno ũnene na kũgĩa igweta. Makĩria ma ũguo, Petero nĩ erĩgĩte kwĩrũo nĩ Jesu atĩ nĩ akaaheo “cabi” cia Ũthamaki. Hihi ũndũ ũcio nĩ ũratũma  eyone arĩ mũnene? No gũkorũo Jakubu na Johana marĩ o na mawoni ta macio, tondũ nĩ meeyoneire Jesu akĩgarũrũka.

O ũrĩa mangĩkorũo magĩciria, Jesu akaingĩrĩra nĩguo arũnge mwerekera ũcio wao. Ageta kaana, agakarũgamia gatagatĩ ka arutwo ake na akameera ũũ: “Mũngĩaga kũgarũrũka mũhaane ta twana, gũtirĩ hĩndĩ mũkaingĩra Ũthamaki-inĩ wa igũrũ. Kwoguo-rĩ, mũndũ o wothe ũkenyihia o ta kaana gaka, nĩwe ũrĩa mũnene thĩinĩ wa Ũthamaki wa igũrũ, na ũrĩa wothe ũkaamũkĩra kaana kamwe ta gaka nĩ ũndũ wa rĩĩtwa rĩakwa nĩ anyamũkĩrĩte o na niĩ.”​—Mathayo 18:​3-5.

Na githĩ njĩra ĩyo ya kũrutana ti njega mũno! Jesu ndaigana kũrakarĩra arutwo ake kana kũmeera nĩ mendete ũnene na igweta. Handũ ha ũguo, akahũthĩra ngerekano ya ũndũ marona kũmaruta. Twana tũtiĩyonaga tũrĩ twa bata kana tũgecarĩria igweta o na hanini. Kwoguo Jesu akonania atĩ arutwo ake magĩrĩirũo gũkorũo na muonere ta ũcio kwĩyerekera. Jesu akarĩkĩrĩria ũrutani wake harĩ arũmĩrĩri ake akameera: “Ũrĩa wĩyonaga arĩ mũnini mũno gatagatĩ-inĩ kanyu inyuothe nĩwe mũnene.”​—Luka 9:48.