Jesu amenya atĩ Afarisai na arũmĩrĩri a Herode marabanga kũmũũraga, e hamwe na arutwo ake magathiĩ Iria-inĩ rĩa Galili. Kĩrĩndĩ kĩnene gĩgoka kũrĩ we kuuma kũndũ na kũndũ​—gĩkoima Galili, taũni-inĩ iria irĩ gĩcũa-inĩ cia Turo na Sidoni, mwena wa irathĩro wa Rũĩ rwa Jorodani, Jerusalemu, na Idumea ĩrĩa ĩrĩ kũraya mwena wa mũhuro. Jesu akahonia aingĩ. Nĩ ũndũ ũcio, arĩa othe marĩ na mĩrimũ mĩũru makahatĩkanĩra harĩ we. O na mategweterera Jesu amahutie, makageria ũrĩa wothe mangĩhota kũmũhutia.​—Mariko 3:​9, 10.

Kĩrĩndĩ kĩu nĩ kĩingĩ mũno nginya Jesu akeera arutwo ake mamũrehere gatarũ nĩguo ehehere rũteere-inĩ gĩtige kũmũhatĩka. Ningĩ no amarute arĩ gatarũ-inĩ kana ahote gũthiĩ handũ hangĩ o kũu rũteere-inĩ nĩguo ateithie andũ angĩ.

Mũrutwo Mathayo oigĩte atĩ maũndũ macio Jesu eekaga maahingirie “ciugo iria ciaaririo kũgerera mũnabii Isaia.” (Mathayo 12:17) Nĩ ũrathi ũrĩkũ Jesu arahingia agĩka maũndũ macio?

“Ũyũ nĩwe thuurĩte arĩ ndungata yakwa, ũrĩa nyendete, na nĩ ngenagio nĩwe! Nĩ ngaamũhe roho wakwa, nake nĩ akaamenyithia ndũrĩrĩ ũrĩa kĩhooto kĩa ma gĩtariĩ. Ndagaakorũo na ngarari kana anĩrĩre; na gũtirĩ mũndũ ũkaigua mũgambo wake barabara-inĩ iria nene. Ndakoina ithanjĩ igonyoku, na ndakaahoria rũtambĩ rũratoga, o nginya rĩrĩa agakorũo ahotete kũhanda kĩhooto wega. Ndũrĩrĩ nĩ ikaiga mwĩhoko wacio harĩ rĩĩtwa rĩake.”​—Mathayo 12:​18-21; Isaia 42:1-4.

Hatarĩ nganja, Jesu nĩwe ndungata ĩyo yendetwo na ĩgetĩkĩrĩka harĩ Ngai. Jesu nĩ onanĩtie cararũkũ kĩhooto kĩa ma nĩ kĩrĩkũ, kĩrĩa kĩhithanĩtio nĩ morutani ma maheeni ma ndini. Afarisai mahũthagĩra Watho wa Ngai na njĩra yao ene ĩtarĩ ya kĩhooto, nginya matingĩteithia mũndũ mũrwaru mũthenya wa Thabatũ! Jesu nĩ aronania kĩhooto kĩa Ngai na atĩ roho wa Ngai ũrĩ igũrũ rĩake, na njĩra ya kwehereria andũ mũrigo wa morutani matarĩ ma kĩhooto. Nĩkĩo atongoria a ndini marenda kũmũũraga. Ũcio nĩ ũndũ wa kĩeha mũno!

Ciugo “ndagaakorũo na ngarari kana anĩrĩre; na gũtirĩ mũndũ ũkaigua mũgambo wake barabara-inĩ iria nene” ciugĩte atĩa? Jesu akĩhonania ndaretĩkĩria andũ, o na kana ndaimono ‘ciĩre andũ ũhoro wake.’ (Mariko 3:12) Ndarenda andũ mamũmenye na njĩra ya kũigua akĩanĩrĩrũo  barabara-inĩ, kana kũgerera ndeto cia nginyanĩrio ciĩkĩrĩtwo cumbĩ.

Ningĩ, Jesu nĩ aratwara ndũmĩrĩri ya kũũmĩrĩria kũrĩ arĩa mahaana ta ithanjĩ igonyoku, rĩinamĩte na rĩgakinyĩrĩrio thĩ. Mahaana ta rũtambĩ rũratoga, rũtigĩtie hanini mũno rũhore. Jesu ndaroina ithanjĩ igonyoku, kana akahoria rũtambĩ rũratoga. Handũ ha ũguo, we nĩ gũũkĩria arokĩria arĩa ahoreri arĩ na ũcayanĩri na wendo. Hatarĩ nganja, ndũrĩrĩ no cige mwĩhoko wacio harĩ Jesu!