Andũ maraiyũkia maũndũ marĩa Jesu aroiga na ageeka na njĩra ngũrani, kũringana na ũrĩa ngoro ciao ihaana. Ũndũ ũcio ũkoneka wega mũciĩ-inĩ ũmwe itũũra rĩa Galili. Mũfarisai wĩtagwo Simoni akanyita Jesu ũgeni gwake mũciĩ hihi nĩguo eyonere wega mũndũ ũcio ũreka maũndũ ma magegania. Jesu hihi akona ũcio ũrĩ mweke mwega wa kũhunjĩria arĩa megũkorũo kuo, agetĩkĩra gũthiĩ o ta ũrĩa anetĩkĩra hau kabere kũnyitwo ũgeni na akarĩanĩra na etia a mbia cia igooti na ehia.

O na kũrĩ ũguo, Jesu akaga kũnyitwo ũgeni na njĩra njega ta mũtugo. Mũndũ ekĩrĩte iratũ cia mĩkwa angĩgera njĩra cia Palestina iria irĩ rũkũngũ, magũrũ nĩ mahiũhaga na makagĩa gĩko, kwoguo andũ marĩ mũtugo wa gũthambia ageni magũrũ na maĩ mahehu ĩrĩ ta njĩra ya kũmanyita ũgeni. No Jesu akaga gwĩkwo ũguo. O na akaga kũmumunywo, ta ũrĩa arĩ mũtugo. Mũtugo ũngĩ nĩ gũitĩrĩria njuĩrĩ ya mũgeni maguta ĩrĩ ta njĩra ya ũtugi na kũmũnyita ũgeni. O naguo ũndũ ũcio ũkaga gwĩkwo. Jesu ndananyitwo ũgeni na njĩra njega.

Makambĩrĩria kũrĩa hamwe na ageni maikarĩte metha-inĩ. O makĩrĩaga, mũtumia ũtarĩ mũnyite ũgeni akaingĩra o kahora. Mũtumia ũcio ‘oĩkaine itũũra-inĩ rĩu atĩ nĩ mwĩhia.’ (Luka 7:37) Andũ othe matarĩ akinyanĩru nĩ ehia, ĩndĩ kũroneka ta mũtumia ũcio atũũraga ũtũũro ũtarĩ mwega, hihi arĩ mũmaraya. No gũkorũo nĩ aiguĩte morutani ma Jesu, hamwe na rĩĩtana rĩake harĩ ‘arĩa othe manogete na magatitikithio mĩrigo, moke nĩguo amahurũkie.’ (Mathayo 11:​28, 29) No kũhoteke nĩ ũndũ wa kũhutio nĩ ciugo na ciĩko cia Jesu, akoya ikinya rĩa kũmwetha.

Agoka thutha wa Jesu metha-inĩ, na agaturia maru magũrũ-inĩ make. Akarĩra maithori magaitĩkĩra magũrũ ma Jesu, na akamahuura na njuĩrĩ yake. Akamumunya magũrũ ma Jesu na njĩra ya wororo na akamaitĩrĩria maguta maranunga wega marĩa egũkuuĩte. Simoni akerorera ũndũ ũcio ategũkenio nĩguo, akeĩra ũũ: “Korũo mũndũ ũyũ kũna nĩ mũnabii, nĩ angĩramenya mũtumia ũyũ ũramũhutia nũ na nĩ wa mũthemba ũrĩkũ, atĩ nĩ mwĩhia.”​—Luka 7:39.

Jesu amenya ũrĩa Simoni areciria, akamwĩra ũũ: “Simoni, nĩ harĩ ũndũ ngwenda gũkwĩra.” Nake akamwĩra: “Mũrutani, njĩĩra!” Jesu agathiĩ na mbere akamwĩra: “Nĩ kwarĩ andũ erĩ maarĩ na thiirĩ wa mũndũ ũngĩ; ũmwe aarĩ na thiirĩ wa dinari magana matano, no ũcio ũngĩ dinari mĩrongo ĩtano. Maremwo kũmũrĩha thiirĩ ũcio, akĩmarekera erĩ eyendeire. Nĩ ũndũ ũcio-rĩ, nĩ ũrĩkũ ũngĩenda mũndũ ũcio mũno?” Simoni agacokia ũũ ategũkenio nĩ ũhoro ũcio: “Nguona ta arĩ ũcio warekeirũo thiirĩ mũnene.”​—Luka 7:​40-43.

Jesu agetĩkania nake. Agacoka akeera Simoni ũũ arorete mũtumia ũcio: “Nĩ ũrona mũtumia ũyũ? Nyingĩrire nyũmba gwaku; ndũnahe maĩ ma gwĩthamba magũrũ. Ĩndĩ mũtumia ũyũ athambia magũrũ makwa na maithori make na amagiria na njuĩrĩ yake. Wee ndũnamumunya, no mũtumia ũyũ, kuuma hingo ĩrĩa nyingĩrire gũkũ, ndarĩ aratigithĩria kũmumunya magũrũ makwa. Ndũnanjitĩrĩria maguta mũtwe, ĩndĩ mũtumia ũyũ nĩ aitĩrĩria magũrũ makwa maguta manungi wega.” Jesu nĩ arahota kuona atĩ mũtumia ũcio nĩ erirĩte kuuma ngoro nĩ ũndũ wa mũtũũrĩre wake ũtarĩ mwega. Nĩ ũndũ ũcio akarĩkĩrĩria na kuuga ũũ: “Ngũkwĩra atĩrĩ, o na gũtuĩka mehia make nĩ maingĩ, nĩ oherũo tondũ nĩ onania wendo mũnene. No ũrĩa wohagĩrũo mehia manini, onanagia wendo mũnini.”​—Luka 7:​44-47.

Jesu ti kũhũthia arahũthia mĩtugo ya waganu. Handũ ha ũguo, aronania ũcayanĩri kwerekera andũ arĩa mekĩte mehia maritũ no makonania atĩ nĩ maherete na magetha ũhurũko harĩ Kristo. Mũtumia ũcio akaigua ahurũka Jesu amwĩra ũũ: “Nĩ woherũo mehia maku. . . . Wĩtĩkio waku nĩ wakũhonokia; thiĩ na thayũ.”​—Luka 7:​48, 50.