Jesu nĩ arĩkia gwĩta arutwo ana, Petero, Andrea, Jakubu, na Johana matuĩke ategi a andũ. Rĩu marĩ othe magathiĩ thunagogi-inĩ kũu Kaperinaumu mũthenya wa Thabatũ. Jesu akarutana thĩinĩ wa thunagogi, na o rĩngĩ andũ makagegio nĩ mũrutanĩre wake. Ararutana ta mũndũ ũrĩ na wathani, no ti ta andĩki-Watho.

Mũthenya-inĩ ũyũ wa Thabatũ kũrĩ na mũndũ ũrĩ na ndaimono. Arĩ kũu thunagogi-inĩ mũndũ ũcio akanĩrĩra na mũgambo mũnene akoiga: “Tũrorania kĩĩ nawe, Jesu Mũnazarini? Hihi woka gũtũniina? Nĩ ngũĩ wega, wee nĩwe Ũrĩa Mũtheru wa Ngai!” No Jesu agakũũma ndaimono ĩyo ĩratongoria mũndũ ũcio, akamĩĩra: “Kira, na uume thĩinĩ wake!”​—Mariko 1:​24, 25.

O hĩndĩ ĩyo roho ũcio mũrũ ũgatungumania mũndũ ũcio thĩ, na ũgakayũrũrũka na mũgambo mũnene mũno. No ndaimono ĩyo ĩkoima thĩinĩ wa mũndũ ũcio “ĩtekũmũgera ngero.” (Luka 4:35) Andũ arĩa mamũthiũrũrũkĩirie kũu thunagogi-inĩ makamaka! Makoria atĩrĩ: “Ĩ nĩ atĩa ũũ? . . . Arĩ na ũhoti nginya wa kũingata ndaimono, na ikamwathĩkĩra.” (Mariko 1:27) Ũhoro wĩgiĩ ũndũ ũcio wa magegania ũgatamba Galili guothe.

Moima thunagogi, Jesu na arutwo ake magathiĩ mũciĩ gwa Simoni ũrĩa wĩtagwo Petero. Magakora nyina wa mũtumia wa Petero arwarĩte mũno mũrimũ wa kũhiũha mwĩrĩ. Magathaitha Jesu amũteithie. Kwoguo Jesu agathiĩ, akamũnyita guoko, na akamũũkĩria. O hĩndĩ ĩyo akahona na akambĩrĩria gũtungata Jesu na arutwo acio arĩ nao, hihi akamarugĩra irio.

Hwaĩ-inĩ wakinya andũ kuuma kũndũ na kũndũ magoka mũciĩ gwa Petero marĩ na andũ ao arwaru. Thutha wa kahinda gũkahana ta itũũra rĩothe rĩrĩ hau mũrango-inĩ. Nĩkĩ? Marenda kũhonio. ‘Arĩa othe marĩ na andũ arwaru mĩrimũ ĩtiganĩte makamarehe kũrĩ we. Nake akamahonia na njĩra ya kũigĩrĩra o mũndũ moko.’ (Luka 4:40) Gũtekũmakania mĩrimũ ĩrĩa marĩ nayo, Jesu akamateithia, o ta ũrĩa kwarathĩtwo. (Isaia 53:4) O na akaingata ndaimono ciume thĩinĩ wa andũ. Maroho macio moru matua kuuma makanĩrĩra makoiga: “Wee nĩwe Mũrũ wa Ngai.” (Luka 4:41) No Jesu akamakũũma na akaaga kũmetĩkĩria marie rĩngĩ. Nĩ moĩ atĩ Jesu nĩwe Kristo, na ndarenda maroho macio metue atĩ matungatagĩra Ngai ũrĩa wa ma.