Ũyũ nĩ mweri wa kana Mariamu arĩ na nda. Ririkana atĩ mĩeri-inĩ yake ya mbere arĩ na nda, aathiĩte gũceerera Elizabethi ũrĩa wa mbarĩ ciao mwena wa mũhuro irĩma-inĩ cia Judea. No rĩu Mariamu nĩ acoka mũciĩ kwao Nazarethi. Thutha wa ihinda inini andũ nĩ mekũmenya atĩ arĩ na nda. Ta hũũra mbica ũrĩa ũndũ ũcio ũramũthumbũra!

Gũthũkia mũno, Mariamu nĩ marĩkanĩire na bundi wa mbaũ wĩtagwo Jusufu atĩ nĩ mekũhikania. Na nĩ aramenya atĩ kũringana na Watho ũrĩa Ngai aaheete Aisiraeli, mũtumia ũrĩ na kĩrĩko na mũthuri atĩ nĩ mekũhikania acoke akomanie na mũthuri ũngĩ na kwĩyendera, abatiĩ kũhũũrũo na mahiga akue. (Gũcokerithia Maathani 22:​23, 24) Nĩ ũndũ ũcio, o na gũtuĩka Mariamu ndeingĩrĩtie mĩtugo-inĩ mĩũru, no kũhoteke nĩ ararigwo ũrĩa egũtaarĩria Jusufu kũrĩa arutĩte nda ĩyo na ũrĩa gũgũcoka gũthiĩ.

Mariamu akoretwo atarĩ kuo mĩeri ĩtatũ, kwoguo no tũkorũo na ma atĩ Jusufu nĩ arerirĩria mũno kũmuona. Macemania, Mariamu hihi akeera Jusufu ũrĩa ahaana, na akageria ũrĩa wothe angĩhota kũmũtaarĩria atĩ nda ĩyo yake yumanĩte na roho mũtheru wa Ngai. O na kũrĩ ũguo, o ta ũrĩa ũngĩĩrĩgĩrĩra, ũyũ nĩ ũndũ mũritũ mũno harĩ Jusufu gwĩtĩkia na gũtaũkĩrũo.

Jusufu nĩ oĩ atĩ Mariamu nĩ mũirĩtu mwega na wĩ ngumo njega. Na nĩ amwendete mũno. Ĩndĩ o na Mariamu ageria kũmũtaarĩria, Jusufu arona ta nda ĩyo ĩrĩ ya mũthuri ũngĩ. Jusufu ndarenda Mariamu ahũũrũo na mahiga akue kana aconorithio, kwoguo agatua itua rĩa kũmũtiga  na njĩra ya hitho. Mahinda-inĩ macio, andũ marĩ na kĩrĩko gĩa kũhikania monagwo ta mahikanĩtie, kwoguo mũndũ angĩendire kũniina kĩrĩko, aabatiĩ gũcaria marũa ma gũtigana.

Thutha ũcio, o Jusufu agĩĩciragia maũndũ macio, agathiĩ toro. Mũraika wa Jehova akamumĩrĩra kĩroto-inĩ akamwĩra: “Ndũgetigĩre kũhikia mũtumia waku Mariamu, tondũ nda ĩyo arĩ nayo yumanĩte na roho mũtheru. Nĩ agaaciara mwana wa kahĩĩ, nawe nĩ ũkaamũhe rĩĩtwa Jesu, tondũ nĩ akaahonokia andũ kuuma mehia-inĩ mao.”​—Mathayo 1:​20, 21.

Jusufu okĩra, agakena mũno nĩ gũtaũkĩrũo wega nĩ ũhoro ũcio! Ageka o ta ũrĩa mũraika ekũmwĩrĩte atekũrĩa marĩĩgu. Agatwara Mariamu gwake mũciĩ. Ũndũ ũcio ũgekĩrũo mbere ya andũ ũhaana ta igongona rĩa ũhiki, na ũkonania atĩ kuuma rĩu Jusufu na Mariamu megũikarania ta mũthuri na mũtumia. O na kũrĩ ũguo, Jusufu akaga gũkomania na Mariamu ihinda-inĩ rĩu arĩ na nda ya Jesu.

Thutha wa mĩeri ĩigana ũna, Jusufu na Mariamu, ũrĩa rĩu ũrĩ hakuhĩ kũgĩa mwana, nĩ mekwĩhaarĩria gũthiĩ rũgendo rũraihu kuuma kwao mũciĩ Nazarethi. Nĩ kũ marabatara gũthiĩ o rĩrĩ Mariamu akuhĩrĩirie kũheo mwana?