Jesu nĩ amenyekete nĩ andũ aingĩ mĩaka ĩrĩa akoretwo akĩhunjia kuuma abatithio. Ayahudi ngiri nyingĩ nĩ meyoneire ciama ciake, na ũhoro wĩgiĩ ciama icio ũgatherema kũndũ guothe. Kwoguo, Gĩkũngũĩro-inĩ gĩkĩ gĩa Ithũnũ thĩinĩ wa Jerusalemu, andũ aingĩ nĩ maramũcaria.

Andũ marĩ na mawoni matiganĩte mũno megiĩ Jesu. Amwe maroiga, “Nĩ mũndũ mwega.” Angĩ nao makoiga: “Ti mwega. Nĩ ahĩtithagia kĩrĩndĩ.” (Johana 7:12) Andũ makahehanĩrĩra ndeto icio mĩthenya ya mbere ya gĩkũngũĩro kĩu. No gũtirĩ mũndũ ũrahota kwĩyumĩria atetere Jesu, tondũ andũ nĩ maretigĩra ũrĩa atongoria a Kĩyahudi megwĩka.

O gĩkũngũĩro gĩgĩthiaga na mbere, Jesu agakinya hekarũ-inĩ. Andũ aingĩ makagega nĩ ũndũ wa ũhoti wake mũnene wa kũrutana. Ndarĩ athiĩ cukuru cia kĩndini cia Ayahudi, kwoguo Ayahudi acio makeyũria: “Gũthiĩte atĩa mũndũ ũyũ agakorũo na ũũgĩ ta ũyũ wa Maandĩko na ndarĩ cukuru athiĩte?”​—Johana 7:15.

Jesu akoiga: “Maũndũ marĩa ndutanaga ti makwa, ĩndĩ moimĩte kũrĩ ũrĩa wandũmire. Mũndũ o wothe angĩĩrirĩria gwĩka wendi wa Ũcio, no amenye kana ũrutani ũcio uumĩte kwĩ Ngai kana ndĩraria maũndũ marĩa ndĩĩrĩte.” (Johana 7:​16, 17) Morutani ma Jesu nĩ maringaine na Watho wa Ngai, kwoguo nĩ magĩrĩirũo kuona atĩ ndarenda kwĩgoocithia no arenda kũgoocithia Ngai.

Jesu agacoka akoiga ũũ: “Githĩ Musa ndaamũheire Watho? No gũtirĩ o na ũmwe wanyu wathĩkagĩra Watho ũcio. Mũrenda kũnjũraga nĩkĩ?” Andũ amwe thĩinĩ wa kĩrĩndĩ, hihi ageni arĩa moimĩte taũni ingĩ, matiũĩ ũndũ ta ũcio. Matirona ta kũrĩ mũndũ ũngĩenda kũũraga mũrutani mwega ũguo. Kwoguo makoiga atĩ harĩ ũndũ mũhĩtanu harĩ Jesu nĩkĩo araria ũguo. Makoiga: “Ũrĩ na ndaimono wee, nũ ũrenda gũkũũraga?”​—Johana 7:​19, 20.

Ma nĩ atĩ, mwaka ũmwe na nuthu mũhĩtũku, atongoria a Kĩyahudi meendaga kũũraga Jesu rĩrĩa aahonirie mũndũ mũthenya wa Thabatũ. Jesu akagweta ũndũ ũkũguũria mwĩcirĩrie wao mũũru. Akoiga atĩ thĩinĩ wa Watho, kaana ga kahĩĩ kagĩrĩire kũruithio mũthenya wa kanana, o na angĩkorũo nĩ mũthenya wa Thabatũ. Agacoka akoria ũũ: “Angĩkorũo mũndũ no aruithio mũthenya wa thabatũ atĩ nĩguo Watho wa Musa ndũkoinwo-rĩ, mũrakĩndakarĩra na marũrũ maingĩ ũguo nĩkĩ atĩ tondũ nĩ ndĩrahonirie mũndũ mũthenya wa thabatũ? Tigai gũtuanagĩra na maũndũ marĩa monekaga na maitho, ĩndĩ tuanagĩrai na ũthingu.”​—Johana 7:​23, 24.

Aikari a Jerusalemu arĩa moĩ njama ya kũũraga Jesu makoiga: “Githĩ ũyũ tiwe mũndũ ũrĩa [atongoria] marenda kũũraga? Atĩrĩrĩ, rĩu araaria mbere ya andũ, na gũtirĩ ũndũ maramwĩka. Kaĩ atongoria mamenyete kũna atĩ ũyũ nĩwe Kristo?” No nĩ kĩĩ kĩratũma andũ maage gwĩtĩkia atĩ Jesu nĩwe Kristo? Maroiga ũũ: “Nĩ tũĩ kũrĩa mũndũ ũyũ oimĩte; ĩndĩ rĩrĩa Kristo agooka, gũtirĩ mũndũ o na ũmwe ũkaamenya kũrĩa agaakorũo oimĩte.”​—Johana 7:​25-27.

Jesu arĩ o kũu thĩinĩ wa hekarũ akamacokeria akameera: “Nĩ mũnjũĩ na nĩ mũĩ kũrĩa nyumĩte. Na ndiũkĩte ndĩĩtũmĩte niĩ mwene, ĩndĩ Ũrĩa ũndũmĩte nĩ wa ma, na inyuĩ mũtimũĩ. Ũcio nĩ ndĩmũĩ, tondũ niĩ njũkĩte ndũmĩtwo Nĩwe ndĩmũrũgamĩrĩre.” (Johana 7:​28, 29) Nĩ ũndũ wa Jesu kuuga ũguo, makageria kũmũnyita nĩguo mamũikie njera kana mamũũrage. No makaremwo tondũ ihinda rĩa Jesu rĩa gũkua ti ikinyu.

O na kũrĩ ũguo, andũ aingĩ magetĩkia Jesu, o ta ũrĩa kũngĩrĩgĩrĩrũo meke. Gĩtũmi nĩ tondũ anathiĩra maĩ igũrũ, akahoreria rũhuho, akahũnia  andũ ngiri nyingĩ na njĩra ya kĩama akĩhũthĩra mĩgate mĩnini na thamaki, akahonia arĩa arwaru, cionje, akahingũra maitho ma atumumu, akahonia arĩa marĩ na mangũ, o na akariũkia arĩa akuũ. Nĩ ũndũ ũcio marĩ na gĩtũmi kĩega gĩa kũũria ũũ: “Rĩrĩa Kristo agooka-rĩ, no anga akaaringa ciama nyingĩ gũkĩra iria mũndũ ũyũ aringĩte?”​—Johana 7:31.

Afarisai maigua kĩrĩndĩ gĩkiuga maũndũ macio, makanyitanĩra na athĩnjĩri-Ngai arĩa anene magatũma thigari ithiĩ ikanyite Jesu.