Jesu agathiĩ na mbere kũrutana ma cia bata arĩ o Jerusalemu Gĩathĩ-inĩ gĩa Ithũnũ. Ayahudi amwe arĩa marĩ gĩkũngũĩro-inĩ kĩu makorũo mamwĩra: “Ithuĩ tũrĩ rũciaro rwa Iburahimu na tũtirĩ twakorũo twĩ ngombo.” Jesu akamacokeria: “Nĩ njũĩ atĩ mũrĩ rũciaro rwa Iburahimu. No mũracaria ũrĩa mũngĩnjũraga tondũ mũtiĩtĩkagĩra kiugo gĩakwa. Niĩ maũndũ marĩa nyonete hĩndĩ ĩrĩa tũrĩ na Awa nĩmo njaragia, no inyuĩ mwĩkaga maũndũ marĩa mũiguĩte kuuma kũrĩ ithe wanyu.”​—Johana 8:​33, 37, 38.

Ũrĩa Jesu aroiga nĩ atĩ: Ithe na ithe wao nĩ ngũrani. Tondũ matirataũkĩrũo nĩ ũrĩa Jesu aroiga, Ayahudi acio magacokera o ũrĩa mekugĩte: “Ithe witũ nĩ Iburahimu.” (Johana 8:39; Isaia 41:8) O nĩ njiarũa cia Iburahimu, kwoguo marona ta Ngai wa Iburahimu arĩ o we Ngai wao.

No Jesu akameera ũndũ wa kũmakania: “Korũo mũrĩ ciana cia Iburahimu, mũngĩreeka ciĩko cia Iburahimu.” Hatarĩ nganja, mwana atũkagia ithe. Jesu agathiĩ na mbere akameera: “No rĩu mũracaria ũrĩa mũngĩnjũraga, o niĩ ndĩmwĩrĩte ũhoro wa ma ũrĩa ndaiguire kuuma kũrĩ Ngai. Iburahimu ndeekaga ũguo.” Agacoka akameera ũndũ ũyũ wa kũgegania: “Inyuĩ mũreka ciĩko cia ithe wanyu.”​—Johana 8:​39-41.

Ayahudi matirĩ marataũkĩrũo Jesu araria ũhoro wa ũ. Makoiga ũũ makĩonania atĩ o nĩ ciana cia Ngai: “Tũticiarĩtwo kuumana na ũmaraya; tũrĩ a Ithe ũmwe, nĩwe Ngai.” No hihi Ngai nĩwe Ithe wao? Jesu akameera: “Korũo Ngai nĩwe Ithe wanyu, no mũnyende, nĩ gũkorũo ndokire nyumĩte kũrĩ Ngai na rĩu ndĩ haha. Ndiũkĩte ndĩĩtũmĩte niĩ mwene, no Ũcio nĩwe wandũmire.” Jesu akoria kĩũria agacoka agecokeria, akoiga: “Nĩ kĩĩ kĩratũma mwage gũtaũkĩrũo nĩ ũrĩa ndĩroiga? Nĩ tondũ mũtiretĩkĩra kũigua kiugo gĩakwa.”​—Johana 8:​41-43.

Jesu nĩ ageretie kuonania moimĩrĩro ma kwaga kũmwĩtĩkĩra. No rĩu akameera ũũ ĩmwe kwa ĩmwe: “Inyuĩ muumĩte kũrĩ ithe wanyu Mũcukani, na merirĩria ma ithe wanyu nĩmo mwendaga gwĩka.” Ithe wao ahaana atĩa? Jesu agataarĩria ũrĩa ahaana akoiga: “Ũcio aarĩ mũũragani kuuma o kĩambĩrĩria, na ndeehandire wega ũhoro-inĩ ũrĩa wa ma.” Agathiĩ na mbere akoiga: “Mũndũ ũrĩa umanĩte na Ngai nĩ athikagĩrĩria ciugo cia Ngai. Kĩu nĩkĩo gĩtũmaga mwage gũthikĩrĩria, tondũ mũtiumanĩte na Ngai.”​—Johana 8:​44, 47.

Ciugo icio ikarakaria Ayahudi, makoiga: “Hihi no tũkorũo tũhĩtĩtie tũkiuga atĩ, ‘Wee ũrĩ Mũsamaria na ũrĩ na ndaimono’?” Mareta Jesu “Mũsamaria,” kuonania ũrĩa mamũnyararĩte. No Jesu akaaga gũtindanĩra na inyũrũri ciao, akameera: “Niĩ ndirĩ na ndaimono, no nĩ heete Awa gĩtĩo, na inyuĩ mũtiheete gĩtĩo.” Jesu akagweta ciugo cia kuonania ũritũ wa ũndũ ũcio, akoiga: “Mũndũ o wothe angĩathĩkĩra kiugo gĩakwa, gũtirĩ hĩndĩ akoona gĩkuũ.” Ndaroiga atĩ atũmwo na andũ angĩ arĩa mamũrũmagĩrĩra matigakua. No nĩ atĩ matikaaninwo tene na tene, ũguo nĩ kuuga “gĩkuũ kĩrĩa gĩa kerĩ,” matarĩ na kĩĩrĩgĩrĩro gĩa kũriũkio.​—Johana 8:​48-51; Kũguũrĩrio 21:8.

No Ayahudi makaaga gũtaũkĩrũo nĩ ciugo cia Jesu makoiga: “Rĩu nĩ twamenya atĩ ũrĩ na ndaimono. Iburahimu nĩ aakuire, o na anabii, no wee ũroiga atĩ, ‘Mũndũ o wothe angĩathĩkĩra kiugo gĩakwa, gũtirĩ hĩndĩ agaacama gĩkuũ.’ Kaĩ wee ũrĩ mũnene gũkĩra ithe witũ Iburahimu, na we nĩ aakuire? . . . Kaĩ wee arĩ we ũ?”​—Johana 8:​52, 53.

Hatarĩ nganja Jesu aronania atĩ we nĩwe Mesia. No handũ ha kũmacokeria kĩũria kĩao ĩmwe kwa ĩmwe kĩgiĩ we nĩwe ũ, akameera: “Niĩ mwene ingĩĩgoocithia, rũgooco rũu nĩ rwa tũhũ. Awa nĩwe ũngoocithagia, o ũcio mũroiga atĩ nĩwe Ngai wanyu. No mũtirĩ mwamũmenya, ĩndĩ ũcio niĩ nĩ ndĩmũũĩ. Na ingĩoiga ndimũũĩ, ingĩakorũo ndĩ mũheenania o ta inyuĩ.”​—Johana 8:​54, 55.

 Jesu rĩu akaria ũhoro wa kĩonereria kĩa ithe wao ũrĩa warĩ mwĩhokeku akoiga: “Ithe wanyu Iburahimu nĩ aakenagĩra mũno kĩĩrĩgĩrĩro gĩa kuona mũthenya wakwa, na nĩ aawonire na agĩkena.” Tondũ nĩ eetĩkĩtie kĩĩranĩro kĩa Ngai, Iburahimu nĩ eerĩgagĩrĩra gũka kwa Mesia. Ayahudi makaga gwĩtĩkia makamwĩra: “Wee ũroiga nĩ wonete Iburahimu na ndũkinyĩtie nginya mĩaka mĩrongo ĩtano?” Nake Jesu akameera: “Ngũmwĩra atĩrĩ o ma o ma, o na Iburahimu atanaciarũo, ndaarĩ o kuo.” Araria ũhoro wa ũtũũro wake kũrĩa igũrũ arĩ kĩũmbe kĩa roho kĩrĩ na hinya atanoka gũkũ thĩ.​—Johana 8:​56-58.

Ayahudi makarakara mũno nĩ ũndũ wa Jesu kuuga atĩ aatũraga mbere ya Iburahimu, makehaarĩria kũmũhũũra na mahiga. No Jesu agathiĩ atarĩ mũgurarie.