Jesu akoretwo akĩgeria njĩra nyingĩ nĩguo ateithie andũ mecirie ũhoro wa ũkuruhanu wao na Ngai. Rĩu ũndũ ũngĩ ũkoimĩra akĩaranĩria na andũ nja ya nyũmba ya Mũfarisai ũmwe.

Amwe makagweta ũhoro wa gĩcanjama gĩekĩkire. Gĩkoniĩ “Agalili arĩa [Ngavana Mũroma Pontio] Pilato oragithĩtie na agatukania thakame yao na magongona mao.” (Luka 13:1) Hihi andũ acio marenda kuuga atĩa?

No kũhoteke Agalili acio nĩ arĩa mooragirũo rĩrĩa Ayahudi aingĩ maarũrũnganire makĩregana na Pilato kũhũthĩra mbeca kuuma kĩgĩna kĩa hekarũ gwaka mũberethi wa kũingĩria maĩ Jerusalemu. No gũkorũo nĩguo Pilato one mbeca icio, aanyitanĩire na arĩa maarũgamagĩrĩra hekarũ. Arĩa maraheana ũhoro ũcio no kũhoteke mareciria atĩ Agalili acio moonire thĩna ũcio nĩ ũndũ wa maũndũ moru meekĩte. Jesu akaga gwĩtĩkania nao.

Akamoria ũũ: “Mũgwĩciria atĩ Agalili acio nĩo maarĩ ehia gũkĩra Agalili arĩa angĩ othe nĩ ũndũ nĩ maanyamaririo na maũndũ macio?” Agacokia akoiga tiguo, na akahũthĩra ũndũ ũcio kũhe Ayahudi mũkaana ũyũ: “Mũngĩaga kwĩrira, o na inyuĩ inyuothe mũkaniinwo o taguo.” (Luka 13:​2, 3) Jesu agacoka akagweta gĩcanjama kĩngĩ hihi kĩrĩgĩte gwĩkĩka na kwahoteka nĩ kĩahutanĩtie na gwakwo kwa mũberethi ũcio, akoria:

“Kana arĩa ikũmi na anana maagwĩrĩirũo nĩ nyũmba ndaya Siloamu, na ĩkĩmoraga-rĩ, mũgwĩciria atĩ maarĩ ehia gũkĩra andũ arĩa angĩ othe maikaraga Jerusalemu?” (Luka 13:4) No kũhoteke kĩrĩndĩ kĩreciria atĩ andũ acio maakuire tondũ wa maũndũ moru meekĩte. O rĩngĩ Jesu akaga gwĩtĩkania nao. Nĩ oĩ atĩ no kuumĩre “ihinda na ũndũ ũterĩgĩrĩirũo,” na no kũhoteke nĩkĩo gĩcanjama kĩu kĩonekire. (Kohelethu 9:​11, New World Translation) O na kũrĩ ũguo, andũ acio nĩ mabatiĩ kwĩruta kuumana na gĩcanjama kĩu. Jesu akameera: “Mũngĩaga kwĩrira, o na inyuĩ inyuothe mũkaniinwo o tao.” (Luka 13:5) No nĩ kĩĩ kĩratũma atĩtĩrithie ũndũ ũcio ihinda rĩrĩ?

Nĩ tondũ wa ihinda rĩrĩa rĩtigarĩte rĩa ũtungata wake, na akonania ũndũ ũcio na ngerekano akoiga: “Mũndũ ũmwe aarĩ na mũkũyũ wahandĩtwo mũgũnda-inĩ wake wa mĩthabibũ, na agĩthiĩ gũcaria maciaro harĩ guo akĩaga. Agĩcoka akĩra mũruti wĩra mũgũnda-inĩ wa mĩthabibũ, ‘Rĩu nĩ mĩaka ĩtatũ ngoretwo ngĩũka gũcaria maciaro mũkũyũ-inĩ ũyũ, no ngaaga. Ũteme! Ũragĩte mũgũnda nĩkĩ?’ Nake akĩmũcokeria akĩmwĩra, ‘Mwathi wakwa, reke ũikare mwaka ũngĩ ũmwe nginya nyambe ndĩũrĩmĩre na ndĩwĩkĩre thumu. Ũngĩkaagĩa na maciaro thutha-inĩ, nĩ wega; no ũngĩkaaga gũciara, hĩndĩ ĩyo no ũũteme.’”​—Luka 13:​6-9.

Kwa ihinda rĩa makĩria ma mĩaka ĩtatũ, Jesu akoretwo akĩgeria gũteithia Ayahudi gũkũria wĩtĩkio. Ĩndĩ no anini matuĩkĩte arutwo arĩa mangĩrũo nĩo maciaro ma wĩra wake. Rĩu, mwaka-inĩ wa kana wa ũtungata wake, akongerera kĩyo o na makĩria. Nĩ ta ararĩmĩra na agekĩra thumu mũkũyũ, ũrĩa ũrũgamĩrĩire Ayahudi, na njĩra ya kũhunjia na kũrutana thĩinĩ wa Judea na Perea. Hihi moimĩrĩro nĩ marĩkũ? No Ayahudi anini tu maronania wĩtĩkio. Ĩndĩ rũrĩrĩ rũrĩ ruothe rũkaaga kwĩrira, na rĩu rũrorete kũniinwo.

 Mwerekera ũcio wa andũ aingĩ kwaga kuonania wĩtĩkio ũkoneka o rĩngĩ kahinda kanini thutha ũcio mũthenya wa Thabatũ. Jesu arĩ thunagogi-inĩ akĩrutana, akona mũtumia ũrĩ na roho ũtũmĩte akorũo eyunĩte ihinda rĩa mĩaka 18. Akamũiguĩra tha na akamwĩra: “Mũtumia ũyũ, nĩ wohorũo kuuma harĩ mũrimũ waku.” (Luka 13:12) Jesu akamũigĩrĩra moko, na o hĩndĩ ĩyo mũtumia ũcio akarũngara na akambĩrĩria kũgooca Ngai.

Ũndũ ũcio ũkarakaria mũrũgamĩrĩri wa thunagogi na akoiga: “Wĩra wagĩrĩirũo kũrutwo matukũ matandatũ; kwoguo ũkagai matukũ macio nĩguo mũhonio, no ti mũthenya wa Thabatũ.” (Luka 13:14) Mũrũgamĩrĩri ũcio ndararega atĩ Jesu arĩ na ũhoti wa kũhonania, ĩndĩ aramenereria andũ nĩ ũndũ wa gũka kũhonio mũthenya wa Thabatũ. Jesu akoiga ũndũ ũyũ ũngĩmateithia gwĩciria: “Hinga ici, githĩ o ũmwe wanyu ndohoraga ndegwa kana ndigiri yake kuuma kiugũ mũthenya wa Thabatũ agathiĩ kũmĩhe maĩ? Kaĩ gũtekwagĩrĩire mũtumia ũyũ, mwarĩ wa Iburahimu o we Shaitani atũũrĩte ohete mĩaka ikũmi na ĩnana, ohorũo kĩoho-inĩ gĩkĩ mũthenya wa Thabatũ?”​—Luka 13:​15, 16.

Arĩa marokĩrĩra Jesu magaconoka, no kĩrĩndĩ gĩgakena nĩ ũndũ wa maũndũ ma magegania marĩa Jesu areka. Arĩ o kũu Judea, Jesu agacokera ngerekano igĩrĩ cia ũrathi ciĩgiĩ Ũthamaki, iria aaheanĩte hau kabere arĩ gatarũ-inĩ Iria-inĩ rĩa Galili.​—Mathayo 13:​31-33; Luka 13:​18-21.