Thutha wa Jesu kũriũka, akabanga macemanie hamwe na atũmwo ake 11 kĩrĩma-inĩ thĩinĩ wa Galili. O nao arutwo angĩ ta 500 magoka, na amwe ao hau kabere maarĩ na nganja. (Mathayo 28:17; 1 Akorintho 15:6) No rĩu ũndũ ũrĩa Jesu ekuga ũgateithia o ũmwe wao gwĩtĩkia atĩ na ma nĩ ariũkĩte.

Jesu agataarĩria atĩ Ngai nĩ amũheete wathani wothe igũrũ na thĩ. Akameera atĩrĩ: “Nĩ ũndũ ũcio-rĩ, thiĩi mũgatue andũ a ndũrĩrĩ ciothe arutwo akwa, mũkĩmabatithagia thĩinĩ wa rĩĩtwa rĩa Ithe witũ, na rĩa Mũriũ, na rĩa roho mũtheru, mũkĩmarutaga kũrũmia maũndũ marĩa mothe ndĩmwathĩte.” (Mathayo 28:​18-20) Jesu kũna arĩ muoyo, ningĩ no arenda ũhoro ũrĩa mwega ũhunjio.

Jesu aheete arũmĩrĩri ake othe, athuri, atumia, na ciana wĩra ũcio wa gũtua andũ arutwo. Thũ ciao no igerie kũrũgamia wĩra wao wa kũhunjia na kũrutana, ĩndĩ Jesu akamomĩrĩria akameera: “Nĩ heetwo wathani wothe kũrĩa igũrũ o na gũkũ thĩ.” Ũndũ ũcio ũrĩ na ũguni ũrĩkũ harĩ arũmĩrĩri ake? Akameera: “Na rĩrĩ, niĩ ndĩkoragwo hamwe na inyuĩ mĩthenya yothe nginya ithirĩro rĩa mũtabarĩre ũyũ wa maũndũ.” Jesu ndaroiga atĩ arĩa othe marĩrutaga wĩra wa kũhunjia ũhoro mwega nĩ marĩhotaga kũringa ciama. Ĩndĩ nĩ marĩteithagio nĩ roho mũtheru.

Thutha wa kũriũkio, Jesu oimĩrĩire arutwo ake “ihinda rĩa matukũ mĩrongo ĩna.” Aamoimagĩrĩra na mĩĩrĩ ngũrani na ‘akeyonithania kũrĩ o arĩ muoyo na njĩra nyingĩ itangĩkararĩka,’ akĩmataaraga “ũhoro wĩgiĩ Ũthamaki wa Ngai.”​—Atũmwo 1:3; 1 Akorintho 15:7.

Kwahoteka atũmwo marĩ o Galili, Jesu akameera macoke Jerusalemu. Acemania nao itũũra-inĩ rĩu akameera: “Mũtikoime Jerusalemu, no ikarai mwetereire kĩrĩa Awa aamwĩrĩire, kĩrĩa mwaiguire kuuma kũrĩ niĩ; nĩ gũkorũo Johana, aabatithanagia na maĩ, no inyuĩ mũkaabatithio na roho mũtheru matukũ maigana ũna kuuma rĩu.”​—Atũmwo 1:​4, 5.

Thutha ũcio Jesu agacemania na atũmwo o rĩngĩ. ‘Akamaruta nja akamatwara nginya Bethania,’ ĩrĩa ĩrĩ mwena wa irathĩro wa Kĩrĩma kĩa Mĩtamaiyũ. (Luka 24:50) O na gũtuĩka Jesu nĩ aameerĩte maũndũ maingĩ megiĩ gũthiĩ gwake, o na rĩu metĩkĩtie atĩ Ũthamaki wake ũgũkorũo gũkũ thĩ.​—Luka 22:​16, 18, 30; Johana 14:​2, 3.

Atũmwo makoria Jesu atĩrĩ: “Mwathani, ihinda rĩrĩ nĩrĩo ũgũcokeria Isiraeli ũthamaki?” Nake akameera: “Ti ũhoro wanyu kũmenya mahinda kana ciathĩ iria Awa atuĩte we mwene.” Agacoka agatĩtĩrithia o rĩngĩ wĩra ũrĩa magĩrĩirũo kũruta akoiga: “Nĩ mũkaamũkĩra hinya rĩrĩa roho mũtheru ũgooka igũrũ rĩanyu, na nĩ mũgaatuĩka aira akwa thĩinĩ wa Jerusalemu, Judea guothe, Samaria, o nginya ituri ciothe cia thĩ.”​—Atũmwo 1:​6-8.

Atũmwo marĩ na Jesu hau Kĩrĩma-inĩ kĩa Mĩtamaiyũ, akambĩrĩria kwambata na igũrũ. Thutha wa kahinda akahumbĩrũo nĩ itu makaga kũmuona. Thutha wa kũriũkio Jesu aamoimagĩrĩra na mĩĩrĩ ya nyama na thakame. No rĩu Jesu agatigana na mwĩrĩ ũrĩa oima naguo, na akambata igũrũ arĩ kĩumbe kĩa roho. (1 Akorintho 15:​44, 50; 1 Petero 3:18) O atũmwo acio ehokeku mamwĩroreire, “arũme erĩ mehumbĩte nguo njerũ” makoimĩra na makarũgama hau marĩ. Arũme acio nĩ araika marĩ na mĩĩrĩ ya andũ, na makamoria ũũ: “Andũ aya a Galili, mũrũgamĩte mũrorete igũrũ nĩkĩ? Jesu ũcio muona oywo kuuma kũrĩ inyuĩ atwarũo igũrũ, agooka na njĩra o ta ĩyo muona agĩthiĩ nayo igũrũ.”​—Atũmwo 1:​10, 11.

Rĩrĩa Jesu oimire gũkũ thĩ akĩambata igũrũ, ndeyonithanirie harĩ andũ aingĩ, arũmĩrĩri ake ehokeku no o tu maamuonire. Angĩgacoka “na  njĩra o ta ĩyo” atekwĩyonithania harĩ andũ aingĩ, na no arũmĩrĩri ake ehokeku tu mangĩkamenya nĩ okĩte arĩ Mũthamaki.

Thutha ũcio atũmwo magacoka Jerusalemu. Thikũ iria irũmĩrĩire, makongana na arutwo angĩ, o hamwe na “Mariamu nyina wa Jesu na ariũ a nyina.” (Atũmwo 1:14) Marĩ othe, makahoya na kĩyo. Ũndũ ũmwe marahoya igũrũ rĩaguo wĩgiĩ gũthuura mũrutwo ũngĩ oye ithenya rĩa Judasi Mũisikariota nĩgetha atũmwo mahinge 12 rĩngĩ. (Mathayo 19:28) Marenda gũthuura mũrutwo ũkoretwo akĩĩyonera ciĩko cia Jesu na kũriũka gwake. Magaikia kura nĩgetha mamenye wendi wa Ngai nĩ ũrĩkũ, na rĩu nĩrĩo riita rĩa mũico ũhoro wa gũikia kura kũgwetwo thĩinĩ wa Bibilia. (Thaburi 109:8; Thimo 16:33) Mathia agathuurũo, ũrĩa kwahoteka aarĩ ũmwe wa arĩa 70 Jesu aatũmĩte na ‘agataranĩrio hamwe na atũmwo arĩa ikũmi na ũmwe.’​—Atũmwo 1:26.

Thikũ ikũmi thutha wa Jesu kwambata igũrũ, gĩkũngũĩro kĩa Ayahudi kĩa Pentekoste ya mwaka wa 33 gĩkambĩrĩria. Arutwo ta 120 makagomana handũ rumu-inĩ ya igũrũ thĩinĩ wa Jerusalemu. O rĩmwe, mũgambo ũtariĩ ta wa rũhuho rũnene ũkaiyũra nyũmba ĩyo yothe. Gũkoneka nĩmĩ itariĩ ta cia mwaki igũrũ rĩa o mũndũ ũrĩa ũrĩ nyũmba ĩyo. Arutwo makambĩrĩria kwaria na thiomi itiganĩte. Na njĩra ĩyo, magaitĩrĩrio roho mũtheru ũrĩa Jesu eeranĩire.​—Johana 14:26.