Jesu akarĩkia kũruta atũmwo ake ana Kĩrĩma-inĩ kĩa Mĩtamaiyũ, kũrĩa ekũmacokagĩria kĩũria kĩgiĩ rĩrĩa angĩgaakorũo kuo na ithirĩro rĩa mũtabarĩre ũyũ wa maũndũ.

Jesu akoretwo na mĩhang’o mĩingĩ mũthenya ũyũ wa Nisani 11. Magĩcoka Bethania nĩguo makarare kuo, kwahoteka nĩrĩo Jesu arera atũmwo ake ũũ: “Nĩ mũĩ atĩ thikũ igĩrĩ kuuma rĩu Pasaka nĩ ĩgũkinya, na Mũrũ wa mũndũ nĩ ekũneanwo nĩguo oragĩrũo mũtĩ igũrũ.”​—Mathayo 26:2.

Mũthenya ũyũ ũngĩ wa Njumatano, Jesu hihi agatinda hamwe na atũmwo ake marĩ oiki. Mũthenya ũmwe mũhĩtũku, nĩ arokĩrĩire atongoria a ndini na aramoimbũrania mbere ya andũ. Rĩu maracaria ũrĩa mekũmũũraga. Nĩkĩo atarenda kuumĩra andũ-inĩ mũthenya wa Nisani 12, nĩgetha hatikagĩe ũndũ ũkũgiria akũngũĩre Pasaka hamwe na atũmwo ake mũthenya ũyũ ũngĩ hwaĩ-inĩ Nisani 14 riũa rĩathũa.

Ĩndĩ athĩnjĩri-Ngai arĩa anene na athuri no maracaria ũrĩa mekũmũũraga mbere ya Pasaka. Magacemania kwa mũthĩnjĩri-Ngai ũrĩa mũnene wĩtagwo Kaiafa. Nĩkĩ hihi? Nĩ arakaru mũno tondũ Jesu akoretwo akĩmoimbũrania mbere ya andũ. Rĩu makarĩkanĩra “mahũthĩre wara kũnyita Jesu na mamũũrage.” Hihi megwĩka ũndũ ũcio atĩa, na mekũwĩka rĩ? Makerana ũũ: “Tũtikaamũnyita hĩndĩ ya gĩathĩ nĩguo andũ matigatũũkĩrĩre.” (Mathayo 26:​4, 5) Nĩ maretigĩra tondũ Jesu nĩ endetwo nĩ andũ aingĩ.

O hĩndĩ ĩyo, mũndũ ũmwe agathiĩ harĩ atongoria acio. Ũndũ wa kũmakania nĩ atĩ, nĩ mũtũmwo wa Jesu wĩtagwo Judasi Mũisikariota. Shaitani nĩ amwĩkĩrĩte rĩciria rĩa gũkunyanĩra Mwathi wake. Judasi akamoria atĩrĩ: “Mũkũhe  kĩĩ nĩguo ndĩmũkunyanĩre harĩ inyuĩ?” (Mathayo 26:15) Nao magakenio nĩ ũndũ ũcio, ‘makaiguithanĩria mamũhe mbeca cia betha.’ (Luka 22:5) Cigana hihi? Makarĩkanĩra mamũhe icunjĩ 30 cia betha. Ririkana atĩ ngombo yendagio cekeri 30. (Thama 21:32) Kwoguo atongoria a ndini makonania ũrĩa manyararĩte Jesu, mamuonaga atarĩ kĩene. Rĩu Judasi akambĩrĩria “gũcaria mweke mwega wa kũmũkunyanĩra kũrĩ o hatarĩ kĩrĩndĩ hakuhĩ.”​—Luka 22:6.

Nisani 13 ĩkambĩrĩria Njumatano riũa rĩathũa, na nĩguo ũtukũ wa gatandatũ na wa mũico Jesu kũrara Bethania. Mũthenya ũyũ ũngĩ, nĩ makaarĩkĩrĩria mĩbango ya kũhaarĩria Pasaka. Nĩ marabatara gũcaria gatũrũme nĩgetha gathĩnjwo na gacinwo karĩ gothe Nisani 14 yambĩrĩria. Hihi makaarĩra kũ, na nĩa makahaarĩria? Jesu ndarĩ arameera maũndũ macio. Kwoguo Judasi ndarĩ na ũhoro wa kũhe athĩnjĩri-Ngai acio anene.

Kwahoteka Aramithi mathaa ma mĩaraho, Jesu arĩ Bethania agatũma Petero na Johana akameera: “Thiĩi mũgatũhaarĩrĩrie Pasaka.” Nao makamũũria: “Ũkwenda tũkamĩhaarĩrĩrie kũ?” Jesu akameera atĩrĩ: “Mwatonya thĩinĩ wa itũũra, nĩ mũgũtũngwo nĩ mũndũ ũkuuĩte ndigithũ ya maĩ. Mũmũrũmĩrĩre nginya nyũmba ĩrĩa arĩingĩra. Na mwĩre mwene nyũmba ĩyo, ‘Mũrutani aroria atĩrĩ: “Ĩ ha nyũmba ya ageni kũrĩa niĩ na arutwo akwa tũngĩrĩĩra Pasaka?”’ Nake mũndũ ũcio nĩ ekũmuonia nyũmba nene ya igũrũ, ĩrĩ na indo ciothe. Mĩhaarĩrĩriei kũu.”​—Luka 22:8-12.

Hatarĩ nganja mwene nyũmba ĩyo nĩ mũrutwo wa Jesu. No gũkorũo nĩ arerĩgĩrĩra Jesu ahoe nyũmba ĩyo yake nĩ ũndũ wa Pasaka. Atũmwo acio erĩ maakinya Jerusalemu, magakora maũndũ mothe matariĩ o ta ũrĩa Jesu ekũmerĩte. Kwoguo magatigĩrĩra atĩ nĩ mahaarĩria gatũrũme, o hamwe na indo ingĩ cia kũhũthĩra hĩndĩ ya Pasaka ingĩigana andũ 13, Jesu na atũmwo ake 12.