1, 2. Nĩ maũndũ ta marĩkũ andũ moragwo nĩmo ũmũthĩ, na ũndũ ũcio ũtũmaga tũigue atĩa?

 KAANA nĩ karĩraga mũno kanyamũ gako ga gũthaaka karĩa kendete kangĩthũka kana kore. Kĩrĩro ta kĩu gĩako no gĩtũme mũndũ akaiguĩre tha. No hihi ũrĩ wona ũrĩa kaana gakenaga rĩrĩa mũciari agathondekera kanyamũ kau, gagacoka o ũrĩa koima? Mũciari no one karĩ kaũndũ kanini gũcaria kana gũthondeka kanyamũ ta kau. No kaana gakenaga mũno na gakagegio nĩ ũndũ ũcio. Kĩndũ kĩrĩa gĩkuonekete ta kĩora kana gĩathũka biũ nĩ gĩacokio!

² Jehova, Mũciari witũ ũrĩa mũnene, nĩ arĩ ũhoti wa gũcokia kĩrĩa ciana ciake cia gũkũ thĩ ingĩona ta kĩũrĩte biũ. Hatarĩ nganja tũtiraria ũhoro wa tũnyamũ twa gũthaaka. ‘Mahinda-inĩ maya ma ũgwati maritũ kũhiũrania namo,’ nĩ tũũragwo nĩ indo cia bata makĩria. (2 Timotheo 3:1-5) No tũũrũo nĩ mĩciĩ itũ, indo citũ, wĩra, na ũgima wa mwĩrĩ hĩndĩ o yothe. Ningĩ no tũigue kĩeha rĩrĩa tuona ũrĩa thĩ ĩthũkangĩtio, na ũrĩa ũndũ ũcio ũtũmĩte indo nyingĩ iria irĩ muoyo ithiĩ ithirĩte. No gũtirĩ ũndũ ũtũmaga tũigue kĩeha makĩria ta gũkuĩrũo nĩ mũndũ twendete. Kĩeha kĩu gĩa gũkuĩrũo na kũigua tũtarĩ na hinya no gĩtũhinyĩrĩrie mũno.—2 Samueli 18:33.

3. Nĩ ũndũ ũrĩkũ wa gũtwĩkĩra ngoro ũgwetetwo thĩinĩ wa Atũmwo 3:21, na Jehova akaahũthĩra kĩĩ kũũhingia?

³ Githĩ ndũkĩrĩ ũndũ wa gũtwĩkĩra ngoro kwĩruta ũhoro wa hinya wa Jehova wa gũcokia indo ũrĩa ciarĩ! O ta ũrĩa tũkuona, nĩ kũrĩ maũndũ maingĩ Ngai agaacokeria ciana ciake cia gũkũ thĩ. O na Bibilia nĩ yonanagia atĩ Jehova nĩ akoragwo na muoroto wa “kwerũhia indo ciothe,” kana gũcicokia ũrĩa ciarĩ. (Atũmwo 3:21) Nĩguo ahingie muoroto ũcio, Jehova akaahũthĩra Ũthamaki wa Kĩĩmesia, Mũrũ wake Jesu Kristo arĩ mũthamaki. Nĩ kũrĩ ũira wonanagia atĩ Ũthamaki ũcio waambĩrĩirie gwathana igũrũ  mwaka-inĩ wa 1914. a (Mathayo 24:3-14) Nĩ maũndũ marĩkũ magaacokio ũrĩa maarĩ? Ta reke tũthuthurie maũndũ mamwe ma bata marĩa Jehova abangĩte gũgaacokia ũrĩa maarĩ. Ũmwe wamo nĩ tũrawona na tũkaũkenera mahinda-inĩ maya. Macio mangĩ nĩ mageekĩka na njĩra nene mahinda mokĩte.

4, 5. Gwekĩkire atĩa harĩ andũ a Ngai mwaka wa 607 M.M.M., na Jehova aamaheire mwĩhoko ũrĩkũ?

⁴ Ũndũ ũmwe Jehova acoketie ũrĩa warĩ nĩ ũthathaiya mũtheru. Nĩgetha tũtaũkĩrũo wega nĩ ũndũ ũcio, reke tũthuthurie na njĩra nguhĩ historĩ ya ũthamaki wa Juda. Gwĩka ũguo nĩ gũgũtũteithia kuona ũrĩa Jehova akoretwo akĩhũthĩra hinya wake wa gũcokia indo ũrĩa ciarĩ.—Aroma 15:4.

⁵ Ta wĩcirie ũrĩa Ayahudi ehokeku maaiguire rĩrĩa Jerusalemu yaanangirũo mwaka wa 607 M.M.M. Itũũra rĩao rĩrĩa meendete mũno nĩ rĩathũkangĩtio na thingo ciarĩo ikamomorũo. Makĩria ma ũguo, hekarũ thaka ĩrĩa Suleimani aakĩte ĩrĩa andũ othe thĩinĩ wa thĩ maathiaga gũthathaĩria Jehova, yatuĩkĩte maganjo. (Thaburi 79:1) Arĩa maatigarire maatwarĩtwo ithamĩrio Babuloni, magatiga bũrũri wao ũgĩtũũrũo nĩ nyamũ cia gĩthaka. (Jeremia 9:11) Kũringana na muonere wa andũ, nĩ ta maũndũ maathũkĩte biũ. (Thaburi 137:1) No Jehova, ũrĩa warathĩte ũhoro wa kwanangwo kũu mĩaka mĩingĩ mbere ĩyo, nĩ aamaheire mwĩhoko atĩ harĩ hĩndĩ maũndũ mangĩgacoka ũrĩa maarĩ.

6-8. (a) Nĩ ũndũ ũrĩkũ ũgwetetwo maita maingĩ maandĩko-inĩ ma anabii, na morathi macio maahingire riita rĩa mbere atĩa? (b) Andũ a Ngai a mahinda maya meyoneire atĩa morathi maingĩ megiĩ gũcokia maũndũ ũrĩa maarĩ makĩhinga?

⁶ Thĩinĩ wa maandĩko ma anabii, ũhoro wa gũcokia maũndũ  ũrĩa maarĩ nĩ ũgwetetwo maita maingĩ. b Kũgerera anabii acio, Jehova nĩ eeranĩire atĩ bũrũri ũcio wao nĩ ũngĩacokire gũtũũrũo nĩ andũ rĩngĩ, ũkorũo wĩ mũnoru, na ũgitĩrũo kuumana na nyamũ cia gĩthaka na thũ. Aataarĩirie atĩ bũrũri ũcio wacokio ũrĩa warĩ ũngĩatuĩkire paradiso! (Isaia 65:25; Ezekieli 34:25; 36:35) Makĩria ma ũguo, ũthathaiya mũtheru nĩ ũngĩacokirio, na hekarũ yakwo rĩngĩ. (Mika 4:1-5) Morathi macio nĩ maatũmire Ayahudi arĩa maarĩ ithamĩrio magĩe na mwĩhoko, na makĩhota gũkirĩrĩria mĩaka 70 ĩrĩa maaikarire Babuloni.

⁷ Mũthia-inĩ, ihinda rĩa gũcokia maũndũ ũrĩa maarĩ nĩ rĩakinyire. Ayahudi makĩrekererio kuuma Babuloni, magĩcoka Jerusalemu na magĩaka hekarũ ya Jehova rĩngĩ. (Ezara 1:1, 2) Rĩrĩa rĩothe maarũmagĩrĩra ũthathaiya mũtheru, Jehova nĩ aamarathimaga na agatũma bũrũri wao ũkorũo wĩ mũnoru na ũgaacĩre. Nĩ aamagitagĩra kuumana na thũ ciao na nyamũ cia gĩthaka iria ciatũũrĩte bũrũri-inĩ wao mĩaka mĩingĩ. No mũhaka makorũo nĩ maakenire mũno nĩ kuona Jehova akĩhũthĩra hinya wake gũcokia maũndũ ũrĩa maarĩ! No maũndũ macio moonanirie o na njĩra nini tu ũrĩa morathi megiĩ gũcokia indo ũrĩa ciarĩ mangĩahingire. Morathi macio mangĩahingire na njĩra nene “ihinda-inĩ rĩa mũthia rĩa matukũ,” na nĩrĩo mahinda-inĩ maya tũrĩ, rĩrĩa mũndũ ũrĩa weranĩirũo wa rũciaro rwa Mũthamaki Daudi angĩatuĩkire mũthamaki.—Isaia 2:2-4; 9:6, 7.

⁸ Kahinda kanini thutha wa Jesu gũtuwo mũthamaki Ũthamaki-inĩ wa igũrũ mwaka wa 1914, nĩ aarũmbũyirie mabataro ma kĩĩroho ma ndungata njĩhokeku cia Ngai gũkũ thĩ. O ta ũrĩa mũtongoria Mũperisia wetagwo Kurusu aakũũrire Ayahudi arĩa maatigarĩte kuuma Babuloni mwaka wa 537 M.M.M., noguo Jesu aakũũrire arũmĩrĩri ake matige gũthũkio nĩ “Babuloni Ũrĩa Mũnene,” nĩwe ndini ciothe cia maheeni. (Kũguũrĩrio 18:1-5; Aroma 2:29) Kuuma mwaka wa 1919 gũthiĩ na mbere, ũthathaiya mũtheru nĩ ũcoketio harĩa wagĩrĩire ũtũũro-inĩ wa Akristiano a ma. (Malaki 3:1-5) Kuuma hĩndĩ ĩyo, andũ a Jehova makoretwo makĩmũthathaiya thĩinĩ wa hekarũ yake therie ya kĩĩroho  ĩrĩa ĩrũgamĩrĩire mũbango ũrĩa Ngai aigĩte wa ũthathaiya mũtheru. Nĩkĩ ũndũ ũcio nĩ wa bata harĩ ithuĩ ũmũthĩ?

9. Nĩ ũndũ ũrĩkũ ndini cia maheeni ciekire harĩ ũthathaiya wa Ngai thutha wa atũmwo gũkua, no nĩ atĩa Jehova ekĩte mahinda-inĩ maya?

⁹ Ta wĩcirie maũndũ marĩa mekĩkĩte thĩinĩ wa historĩ. Akristiano a karine ya mbere nĩ maakenagĩra irathimo nyingĩ cia kĩĩroho. No Jesu na atũmwo nĩ maarathĩte atĩ ũthathaiya wa ma nĩ ũngĩgathũkio. (Mathayo 13:24-30; Atũmwo 20:29, 30) Thutha wa atũmwo gũkua, ndini cia maheeni nĩ cioimĩrire. Atongoria a cio makĩambĩrĩria kũrũmĩrĩra morutani na mĩtugo ya andũ arĩa maahoyaga ngai cia mĩhianano. Ningĩ nĩ maatũmire kuoneke ta andũ matangĩhota gũkuhĩrĩria Ngai, makĩgeria kuonania atĩ Ngai nĩ Ũtatũ ũtangĩmenyeka na makĩruta andũ moimbũragĩre atongoria a ndini mehia mao, na mahoyage Mariamu na “atheru” handũ ha Jehova. Tondũ ũthathaiya wa ma nĩ ũthũkĩtio kwa ihinda rĩa mĩaka mĩingĩ-rĩ, nĩ ũndũ ũrĩkũ Jehova ekĩte? Thĩinĩ wa thĩ ĩno ĩiyũire maheeni ma ndini na mĩtugo mĩũru, Jehova nĩ acoketie ũthathaiya wa ma! Gũcokio kũu nĩ ũndũ ũmwe wa maũndũ ma bata marĩa mekĩtwo mahinda-inĩ maya.

10, 11. (a) Nĩ maũndũ marĩkũ merĩ makoragwo thĩinĩ wa paradiso ya kĩĩroho, na ũngĩka atĩa nĩguo ũingĩre paradiso ĩyo? (b) Nĩ andũ arĩkũ Jehova acokanĩrĩirie thĩinĩ wa paradiso ya kĩĩroho, na nĩ ũndũ ũrĩkũ magaakorũo na mweke wa kwĩyonera?

¹⁰ Nĩ ũndũ ũcio, Akristiano a ma ũmũthĩ nĩ makenagĩra paradiso ya kĩĩroho ĩrĩa Jehova arathiĩ na mbere gũthakaria. Nĩ maũndũ marĩkũ makoragwo thĩinĩ wa paradiso ĩyo? Nĩ harĩ maũndũ merĩ ma bata. Wa mbere nĩ ũthathaiya mũtheru wa Jehova, Ngai ũrĩa wa ma. Nĩ atũheete ũthathaiya ũtakoragwo na maheeni kana maũndũ mahĩtanu. Ningĩ nĩ atũheete irio cia kĩĩroho. Irio icio itũteithagia kwĩruta ũhoro wa Ithe witũ wa igũrũ, ũrĩa tũngĩmũkenia, na ũrĩa tũngĩmũkuhĩrĩria. (Johana 4:24) Ũndũ wa kerĩ wa paradiso ya kĩĩroho ũhutanĩtie na andũ. O ta ũrĩa Isaia aarathĩte, “ihinda-inĩ rĩa mũthia rĩa matukũ,” Jehova nĩ arutĩte andũ ake ũrĩa mangĩgĩa na thayũ. Nĩ aniinĩte biũ mbaara gatagatĩ-inĩ  gaitũ. O na gũtuĩka tũtirĩ akinyanĩru, nĩ atũteithagia kwĩhumba “ũmũndũ mwerũ.” Nĩ arathimaga kĩyo gitũ na njĩra ya gũtũhe roho wake mũtheru ũrĩa ũtũteithagia gũkũria ngumo njega. (Aefeso 4:22-24; Agalatia 5:22, 23) Rĩrĩa wetĩkĩra gũtongorio nĩ roho wa Ngai, ũingĩraga thĩinĩ wa paradiso ĩyo ya kĩĩroho.

¹¹ Jehova nĩ acokanĩrĩirie andũ arĩa endete thĩinĩ wa paradiso ĩyo ya kĩĩroho. Acio nĩ arĩa mamwendete, makenda thayũ, na “marũmbũyagia mabataro mao ma kĩĩroho.” (Mathayo 5:3) Andũ acio nĩo magaakorũo na mweke wa kwĩyonera na njĩra nene makĩria maũndũ megiĩ andũ na thĩ magĩcokio ũrĩa maarĩ.

12, 13. (a) Nĩkĩ no mũhaka morathi megiĩ gũcokia maũndũ ũrĩa maarĩ makaahinga na njĩra ĩngĩ? (b) Muoroto wa Jehova harĩ thĩ nĩ ũrĩkũ o ta ũrĩa aagwetete mũgũnda-inĩ wa Edeni, na nĩkĩ ũndũ ũcio nĩ ũtũmaga tũkorũo na mwĩhoko wa ihinda rĩũkĩte?

¹² Morathi maingĩ marĩa megiĩ gũcokia maũndũ ũrĩa maarĩ, matikoniĩ o gũcokio kwa ũthathaiya mũtheru. Kwa ngerekano, Isaia nĩ aandĩkire ũhoro wa ihinda rĩrĩa andũ arwaru, arĩa mathuaga, arĩa matonaga, na arĩa mataiguaga makaahonio, na gĩkuũ kĩniinwo biũ. (Isaia 25:8; 35:1-7) Ciĩranĩro icio itiahingire hĩndĩ ya Isiraeli ya tene. Na o na gũtuĩka nĩ twĩyoneire ikĩhinga na njĩra ya kĩĩroho mahinda-inĩ maya maitũ, tũrĩ na mũthingi wa gwĩtĩkia atĩ nĩ ikaahinga na njĩra nene mahinda-inĩ mokĩte. Tũmenyaga ũguo atĩa?

¹³ Thĩinĩ wa mũgũnda wa Edeni, Jehova nĩ aagwetete muoroto wake harĩ thĩ: Warĩ thĩ ĩtũũrũo nĩ andũ akenu, marĩ na ũgima mwega wa mwĩrĩ, na marĩ na ũrũmwe. Andũ maarĩ mathondeke thĩ na marore ciũmbe ciothe iria ciarĩ thĩinĩ wayo, matũme thĩ yothe ĩtuĩke paradiso. (Kĩambĩrĩria 1:28) No ũguo tiguo maũndũ mahaana ũmũthĩ. Ĩndĩ no tũkorũo na ma atĩ gũtirĩ hĩndĩ mĩoroto ya Jehova ĩngĩaga kũhinga. (Isaia 55:10, 11) Jesu arĩ Mũthamaki wa Kĩĩmesia ũrĩa ũthuurĩtwo nĩ Jehova, nĩ agaatũma thĩ yothe ĩtuĩke Paradiso.—Luka 23:43.

14, 15. (a) Jehova ‘akerũhia maũndũ mothe’ atĩa? (b) Ũtũũro ũgaakorũo ũhaana atĩa thĩinĩ wa Paradiso, na nĩ ũndũ ũrĩkũ ũrerirĩria mũno?

 ¹⁴ Ta hũũra mbica thĩ yothe ĩtuĩkĩte Paradiso! Jehova akĩaria ũhoro wa ihinda rĩu, ooigire ũũ: “Atĩrĩrĩ, nĩ kwerũhia ndĩrerũhia maũndũ mothe.” (Kũguũrĩrio 21:5) Ta wĩcirie ũrĩa gũgaakorũo kũhaana. Thutha wa Jehova kũhũthĩra hinya wake wa kwananga kũniina mũtabarĩre ũyũ mũũru, gũgaatigara “igũrũ rĩerũ na thĩ njerũ.” Ũguo nĩ kuuga atĩ thirikari njerũ nĩ ĩgaathana kuuma igũrũ, ĩthamakĩre thĩ njerũ ya andũ arĩa mendete Jehova na mekaga wendi wake. (2 Petero 3:13) Shaitani na ndaimono ciake nĩ makaahingĩrũo magithio hinya. (Kũguũrĩrio 20:3) Thutha wa mĩaka mĩingĩ, rĩgaakorũo rĩrĩ riita rĩa mbere harĩ andũ kwaga kũhĩtithio nĩ Shaitani na ndaimono ciake. Hatarĩ nganja andũ nĩ magaakenera mũno ihinda rĩu.

¹⁵ Hĩndĩ ĩyo nĩ tũkaahota gũthondeka thĩ ĩno ĩthakare o ta ũrĩa muoroto wa Ngai warĩ. Thĩ yũmbĩtwo ĩrĩ na ũhoti wa gwĩthondeka kũrĩa ĩthũkĩtio. Iria na njũũĩ iria irĩ gĩko no ihote gwĩtheria ingĩtiga gwĩkĩrũo gĩko; nakuo kũndũ kũrĩa gũthũkĩtio nĩ mbaara no kwagĩre mbaara ingĩthira. Gĩgaakorũo kĩrĩ gĩkeno kĩnene gũteithĩrĩria harĩ wĩra wa gũthondeka thĩ ĩhaane ta mũgũnda wa Edeni ĩiyũire mĩthemba mĩingĩ ya nyamũ na mĩmera. Handũ ha gũthũkia mĩmera na kũniina nyamũ, andũ magaaikarania na thayũ na ciũmbe ciothe thĩinĩ wa thĩ. O na ciana itigetigagĩra nyamũ cia gĩthaka.—Isaia 9:6, 7; 11:1-9.

16. Nĩ maũndũ marĩkũ tũgaacokerio thĩinĩ wa Paradiso?

¹⁶ Ningĩ harĩ maũndũ tũgaacokerio ũrĩa maarĩ tũrĩ mũndũ ũmwe ũmwe. Arĩa makaahonoka Hari–Magedoni, nĩ makeeyonera gũkĩhonanio na njĩra ya kĩama thĩinĩ wa thĩ yothe. Jesu akaahũthĩra hinya ũrĩa aheetwo nĩ Ngai kũhonia arĩa matonaga, arĩa mataiguaga, na arĩa mathuaga, o ta ũrĩa eekire arĩ gũkũ thĩ. (Mathayo 15:30) Andũ arĩa akũrũ nĩ magaakenera gũcokerio hinya wa wĩthĩ na ũgima mwega wa mwĩrĩ. (Ayubu 33:25) Mĩgũtha yothe nĩ ĩgaathira, namo moko, magũrũ, na marũngo magĩe na hinya rĩngĩ. Andũ arĩa ehokeku nĩ makoona moimĩrĩro moru ma mehia na kwaga gũkinyanĩra magĩthira o kahora. Nĩ  tũgaacokeria Jehova Ngai ngatho nĩ ũndũ wa hinya wake wa gũcokia maũndũ ũrĩa maarĩ! Reke rĩu tũthuthurie ũndũ ũmwe wa gũcanjamũra ũrĩa ũgeekĩka ihinda-inĩ rĩu.

17, 18. (a) Jesu aarũngire Asadukai nĩkĩ? (b) Nĩ kĩĩ gĩatũmire Elija ahoe Jehova ariũkie kamwana gaakuĩte?

¹⁷ Hĩndĩ ya karine ya mbere, atongoria amwe a ndini meetagwo Asadukai, matietĩkĩtie ũhoro wa kũriũka. Jesu aamarũngire akĩmeera ũũ: “Inyuĩ nĩ mũhĩtĩtie, tondũ mũtiũĩ Maandĩko o na kana hinya wa Ngai.” (Mathayo 22:29) Maandĩko monanagia atĩ Jehova nĩ arĩ hinya ta ũcio wa gũcokia muoyo andũ arĩa makuĩte. Na njĩra ĩrĩkũ?

¹⁸ Ta hũũra mbica ũrĩa gwekĩkire hĩndĩ ya Elija. Kamwana kamwe ka mũtumia ũmwe wa ndigwa nĩ gaakuire, na ndaarĩ na mwana ũngĩ. Mũnabii Elija, ũrĩa waikarĩte kwa mũtumia ũcio kwa ihinda rĩigana ũna, no mũhaka akorũo nĩ aamakirio mũno nĩ ũndũ ũcio. Mbere ĩyo nĩ aahonoketie kamwana kau gatigakue nĩ ngʼaragu. No kũhoteke nĩ aakinyĩte kwenda kamwana kau. Nyina wa kamwana kau nĩ aakuĩte ngoro. Nĩko gaatũmaga aririkane mũthuri wake ũrĩa wakuĩte. No gũkorũo eerĩgagĩrĩra atĩ kamwana kau nĩko kangĩkamũrũmbũiya arĩ mũkũrũ. Mũtumia ũcio wa ndigwa aarĩ na mĩtangĩko na eeciragia atĩ nĩ kũherithio aaherithagio nĩ ũndũ wa mehia eekĩte tene. Elija ndangĩakirĩrĩirie kuona maũndũ macio mothe ma kĩeha. Ooire mwĩrĩ wa kamwana kau kuuma harĩ nyina, akĩũtwara nyũmba-inĩ yake, na akĩhoya Jehova Ngai agacokie muoyo.—1 Athamaki 17:8-21.

19, 20. (a) Iburahimu oonanirie atĩa atĩ nĩ eetĩkĩtie hinya wa Jehova wa gũcokia andũ muoyo, na aarĩ na gĩtũmi kĩrĩkũ wa gwĩtĩkia ũguo? (b) Jehova aarathimire wĩtĩkio wa Elija atĩa?

¹⁹ Elija tiwe warĩ mũndũ wa mbere gwĩtĩkia ũhoro wa kũriũka. Mĩaka mĩingĩ mbere ĩyo, Iburahimu nĩ eetĩkĩtie atĩ Jehova nĩ arĩ hinya ũcio, na nĩ aarĩ na gĩtũmi kĩega gĩa gwĩtĩkia ũguo. Rĩrĩa Iburahimu aarĩ na mĩaka 100 nake Sara mĩaka 90, Jehova nĩ aamacokeirie ũhoti wao wa kũgĩa mwana na njĩra ya kĩama, na Sara akĩgĩa mwana wa kahĩĩ. (Kĩambĩrĩria 17:17; 21:2, 3)  Thutha-inĩ, rĩrĩa mwana ũcio wao aatuĩkire mũndũ mũgima, Jehova nĩ eerire Iburahimu amũrute arĩ igongona. Iburahimu nĩ oonanirie wĩtĩkio, tondũ aarĩ na ma atĩ Jehova no acokie Isaaka muoyo. (Ahibirania 11:17-19) Wĩtĩkio ũcio mũrũmu no ũtũteithie kũmenya kĩrĩa gĩatũmire Iburahimu atanambata kĩrĩma-inĩ kũruta mũrũwe igongona, ere ndungata ciake atĩ we na Isaaka nĩ mangĩacokire hamwe.—Kĩambĩrĩria 22:5.

²⁰ Jehova nĩ aagirĩrĩirie Isaaka gũkua, kwoguo gũtiarĩ na bata wa kũriũkania hĩndĩ ĩyo. No hĩndĩ ya Elija, kamwana ka mũtumia ũcio wa ndigwa nĩ gaakuĩte, o na gũtuĩka gatiaikarĩte ihinda iraihu. Jehova nĩ aarathimire wĩtĩkio wa mũnabii ũcio na njĩra ya kũriũkia kamwana kau! Elija agĩcoka akĩnengera mũtumia ũcio kamwana kau gake, na akĩmwĩra ciugo ici itangĩriganĩra: “Ta rora, mũrũguo arĩ muoyo.”—1 Athamaki 17:22-24.

21, 22. (a) Ũhoro wa andũ arĩa maariũkirio waandĩkirũo thĩinĩ wa Maandĩko nĩkĩ? (b) Johana 5:28, 29 yonanĩtie atĩa ũhoro wĩgiĩ ũriũkio thĩinĩ wa Paradiso?

²¹ Rĩu nĩrĩo riita rĩa mbere rĩrĩa rĩonanĩtio Bibilia-inĩ, rĩa Jehova kũhũthĩra hinya wake wa gũcokia andũ muoyo. Thutha-inĩ, Jehova nĩ aaheire Elisha, Jesu, Paulo, na Petero hinya wa gũcokia andũ muoyo. Hatarĩ nganja, arĩa maariũkirio nĩ maacokire magĩkua. O na kũrĩ ũguo, ngʼano icio cia Bibilia nĩ itũteithagia kuona maũndũ mega marĩa mageekĩka ihinda rĩũkĩte.

²² Thĩinĩ wa Paradiso, Jesu nĩ akaahingia itemi rĩake arĩ we ‘ũriũkio na muoyo.’ (Johana 11:25) Nĩ akaariũkia andũ milioni nyingĩ, amahe mweke wa gũtũũra tene na tene thĩinĩ wa Paradiso gũkũ thĩ. (Johana 5:28, 29) Ta hũũra mbica arata na andũ a famĩlĩ arĩa matigithanĩtio ihinda iraihu nĩ gĩkuũ makĩhĩmbanĩria makenete mũno! Andũ othe nĩ makaagooca Jehova nĩ ũndũ wa hinya wake wa gũcokia andũ muoyo.

23. Njĩra ĩrĩa nene makĩria Jehova oonanirie hinya wake nayo nĩ ĩrĩkũ, na ũndũ ũcio ũtũmaga tũkorũo na ũũma ũrĩkũ wĩgiĩ ihinda rĩũkĩte?

²³ Jehova nĩ atũheete mũthingi mũrũmu wa gwĩtĩkia atĩ  ciĩrĩgĩrĩro icio nĩ cia ma. Njĩra ĩrĩa nene makĩria oonanirie hinya wake nayo, nĩ kũriũkia Mũrũ wake Jesu arĩ kĩũmbe kĩa roho kĩrĩ na hinya, na akĩmũtua wa kerĩ kuuma harĩ we. Jesu nĩ ooimĩrĩire andũ aingĩ thutha wa kũriũkio. (1 Akorintho 15:5, 6) Ũcio nĩ ũira mũiganu nginya harĩ arĩa mekagĩrĩra nganja ũhoro wa kũriũka, wa kuonania atĩ Jehova nĩ arĩ ũhoti wa gũcokia andũ muoyo.

24. Tũngĩkorũo na ma nĩkĩ atĩ Jehova nĩ akaariũkia andũ arĩa makuĩte, na nĩ kĩĩrĩgĩrĩro kĩrĩkũ o ũmwe witũ angĩkenera?

²⁴ Jehova to ũhoti wa kũriũkia andũ akoragwo naguo, no nĩ nginya wendi wa gwĩka ũguo. Mũthuri mwĩhokeku wetagwo Ayubu aatongoririo nĩ roho kuuga atĩ Jehova nĩ eriragĩria kũriũkia arĩa makuĩte. (Ayubu 14:15) Githĩ to ũigue ũgucĩrĩirio nĩ Ngai witũ ũrĩa wĩriragĩria kũhũthĩra hinya wake wa gũcokia indo ũrĩa ciarĩ na njĩra ta ĩyo ya wendo? No ririkana atĩ, kũriũkia andũ nĩ ũndũ ũmwe tu wa maũndũ maingĩ marĩa Jehova agaacokia ũrĩa maarĩ ihinda rĩũkĩte. Kwoguo thiĩ na mbere gũkuhĩrĩria Jehova, na hingo ciothe ũririkanage atĩ o nawe ũrĩ na kĩĩrĩgĩrĩro kĩa mwanya gĩa gũgaakorũo kuo wĩyonere Jehova ‘akĩerũhia maũndũ mothe.’—Kũguũrĩrio 21:5.