1, 2. (a) Nĩ ũndũ ũrĩkũ andũ aingĩ mangĩona ta ũtangĩhoteka, no Bibilia ĩtwĩraga atĩa? (b) Iburahimu aarĩ na ũrata ũhaana atĩa hamwe na Ngai, na nĩkĩ?

 ŨNGĨIGUA atĩa Mũũmbi wa igũrũ na thĩ angiuga ũũ igũrũ rĩkwĩgiĩ, “Ũyũ nĩ mũrata wakwa”? Andũ aingĩ no mone ta ũndũ ũcio ũtangĩhoteka. Nĩ marigagwo ũrĩa mũndũ angĩgĩa ũrata na Jehova Ngai. O na kũrĩ ũguo, Bibilia ĩtwĩraga atĩ no tũhote gũkuhĩrĩria Ngai.

² Iburahimu aarĩ na ũrata ta ũcio wa hakuhĩ hamwe na Ngai. Jehova aamwĩtire “mũrata wakwa.” (Isaia 41:8) Kwoguo Jehova oonaga Iburahimu arĩ mũrata wake wa hakuhĩ. Ngai aatuire Iburahimu mũrata wake tondũ nĩ “aagĩire na wĩtĩkio harĩ Jehova.” (Jakubu 2:23) O na ũmũthĩ Jehova nĩ acaragia mĩeke ya kũgĩa ũrata na arĩa mamũtungatagĩra, na ya “[kũmonia] wendo wake.” (Gũcokerithia Maathani 10:15) Kiugo gĩake gĩtwĩraga ũũ: “Kuhĩrĩriai Ngai, nake nĩ ekũmũkuhĩrĩria.” (Jakubu 4:8) Hihi ciugo icio iratũruta atĩa?

3. Jehova atwĩrĩte twĩke atĩa, na nĩ ũndũ ũrĩkũ oigĩte nĩ egwĩka?

³ Jehova atwĩrĩte tũmũkuhĩrĩrie. Nĩ endaga mũno tũtuĩke arata ake. Atwĩraga atĩ twerutanĩria kũmũkuhĩrĩria, o nake nĩ egũtũkuhĩrĩria. Na njĩra ĩyo, tũgĩe na kĩndũ kĩa goro mũno, nĩkĩo “ũrata wa hakuhĩ na Jehova.” (Thaburi 25:14) ‘Mũrata wa hakuhĩ’ nĩ mũndũ tũngĩaria nake maũndũ maitũ ma hitho, kana maũndũ tũtangĩra mũndũ ũngĩ o wothe.

4. Ũngiuga mũrata wa hakuhĩ nĩ ũrĩkũ, na Jehova onanĩtie atĩa atĩ akoragwo arĩ mũrata wa hakuhĩ harĩ arĩa mamũkuhagĩrĩria?

⁴ Hihi nĩ ũrĩ mũrata wa hakuhĩ ũngĩra maũndũ maku  ma hitho? Mũrata ta ũcio nĩ akũrũmbũyagia, na nĩ ũmwĩhokete tondũ nĩ mwĩhokeku. Nĩ ũiguaga ũkenete mũkĩaria nake maũndũ marĩa maragũkenia. Na rĩrĩa wamwĩra maũndũ marĩa maragũthĩnia, nĩ agũthikagĩrĩria na agataũkĩrũo nĩwe, na ũkaigua wahũthahũthĩrũo. O na kũngĩkorũo gũtirĩ mũndũ ũngĩ ũroneka ta arataũkĩrũo nĩ ũrĩa ũraigua, we nĩ ataũkagĩrũo. Noguo gũthiaga rĩrĩa wakuhĩrĩria Ngai. Ũgĩaga na Mũrata wa mwanya ũrĩa ũkuonaga ũrĩ wa bata, agakũrũmbũyia mũno, na agataũkĩrũo nĩwe. (Thaburi 103:14; 1 Petero 5:7) No ũmũitũrũrĩre ngoro yaku yothe, tondũ nĩ ũĩ atĩ akoragwo arĩ mwĩhokeku harĩ arĩa ehokeku. (Thaburi 18:25) No tũhotaga kũgĩa na ũrata ta ũcio wa hakuhĩ na Ngai tondũ tu nĩ atũhingũrĩire njĩra ya kũgĩa na ũrata ta ũcio.

5. Jehova eekire atĩa nĩguo tũhote kũmũkuhĩrĩria?

⁵ Tondũ tũrĩ andũ ehia, tũtingĩhota gũkuhĩrĩria Ngai tũtarĩ na ũteithio. (Thaburi 5:4) Mũtũmwo Paulo aandĩkire ũũ: “No Ngai onanagia wendo wake harĩ ithuĩ na njĩra ya atĩ hĩndĩ ĩrĩa twarĩ ehia, Kristo nĩ aakuire nĩ ũndũ witũ.” (Aroma 5:8) Jehova aatũmire Jesu gũkũ thĩ nĩguo “arute muoyo wake ũtuĩke ũkũũri nĩ ũndũ wa gũkũũra andũ aingĩ.” (Mathayo 20:28) Wĩtĩkio witũ harĩ igongona rĩu rĩa ũkũũri nĩ ũtũmaga tũhote gũkuhĩrĩria Ngai. Tondũ Ngai nĩwe “waambire gũtwenda,” nĩ aatũthondekeire mũthingi wa kũgĩa na ũrata nake.—1 Johana 4:19.

6, 7. (a) Jehova atwĩrĩte ũrĩa atariĩ nĩkĩ? (b) Jehova eguũrĩtie na njĩra irĩkũ?

⁶ Jehova nĩ ekĩte ũndũ ũngĩ: Nĩ atũguũrĩirie ũrĩa ahaana. Kĩrĩa gĩtũmaga ũrata o wothe ũrũme, nĩ kũmenya mũndũ na gũkenio nĩ ngumo na ciĩko ciake. Kwoguo korũo Jehova nĩ Ngai wĩhithĩte na ũtangĩmenyeka,  tũtingĩhota kũmũkuhĩrĩria. No handũ ha kũhitha ũrĩa ahaana, nĩ endaga tũmũmenye. (Isaia 45:19) Makĩria ma ũguo, andũ othe nginya arĩa monagwo nĩ andũ a thĩ ta matangĩtaũkĩrũo, no merute maũndũ marĩa aguũrĩtie mamwĩgiĩ.—Mathayo 11:25.

⁷ Jehova eguũrĩtie atĩa harĩ ithuĩ? Indo iria ombĩte nĩ cionanagia ngumo imwe ciake, ta hinya wake mũingĩ, ũũgĩ wake mũrikĩru, na wendo wake mũnene. (Aroma 1:20) No Jehova ndeguũrĩtie o kũgerera indo iria ombĩte. Nĩ atũrutĩte makĩria ũrĩa atariĩ kũgerera Kiugo gĩake Bibilia.

8. Nĩ kĩĩ kĩngĩtũma tuuge atĩ Bibilia nĩ ũira wa kuonania atĩ Jehova nĩ atwendete?

⁸ Bibilia yo nyene nĩ ũira wa atĩ Jehova nĩ atwendete. Thĩinĩ wayo, nĩ eguũrĩtie na ciugo tũngĩhota gũtaũkĩrũo, kuonania atĩ to kwenda endaga tũmũmenye, no ningĩ nĩ endaga tũmwende. Maũndũ marĩa tũthomaga thĩinĩ wa Bibilia nĩ matũhotithagia kũmũkuhĩrĩria. (Thaburi 1:1-3) Reke twarĩrĩrie njĩra imwe iria Jehova eguũrĩtie nacio thĩinĩ wa Kiugo gĩake.

9. Heana ngerekano cia maandĩko mamwe marĩa magwetaga ngumo cia Ngai ĩmwe kwa ĩmwe.

⁹ Nĩ kũrĩ maandĩko maingĩ magwetaga ngumo cia Ngai ĩmwe kwa ĩmwe. Reke tuone mamwe ma mo. “Jehova nĩ endete kĩhooto.” (Thaburi 37:28) Ngai nĩ “arĩ hinya mũingĩ.” (Ayubu 37:23) “Ndĩ mwĩhokeku,” ũguo nĩguo Jehova ekuuga. (Jeremia 3:12) “We nĩ arĩ ũũgĩ wa ngoro.” (Ayubu 9:4) Nĩ “Ngai mũigua tha na mũcayanĩri, ndahiũhaga kũrakara na nĩ aiyũirũo nĩ wendo mwĩhokeku na ũhoro wa ma.” (Thama 34:6) “Wee Jehova ũrĩ mwega na ũkoragwo wĩhaarĩirie kuohanĩra.” (Thaburi 86:5) Na o ta ũrĩa gĩcunjĩ kĩrĩa kĩhĩtũku kĩoonanirie, nĩ arĩ  ngumo ĩmwe nene. Bibilia yugaga atĩ “Ngai nĩ wendo.” (1 Johana 4:8) Rĩrĩa twecũrania igũrũ rĩgiĩ ngumo icio njega nĩ tũiguaga tũkĩenda gũtuĩka arata ake.

10, 11. (a) Nĩ kĩĩ Jehova andĩkithĩtie thĩinĩ wa Kiugo gĩake nĩguo tũhote kuona ngumo ciake wega makĩria? (b) Nĩ ngerekano ĩrĩkũ ĩrĩ thĩinĩ wa Bibilia ĩtũteithagia kuona ũrĩa Ngai oonanirie hinya wake?

¹⁰ Makĩria ma gũtwĩra ngumo ciake, Jehova ningĩ nĩ andĩkithĩtie thĩinĩ wa Kiugo gĩake ngerekano cia ũrĩa onanĩtie ngumo icio. Kũgerera ngerekano icio, nĩ tũhotaga kũhũũra mbica meciria-inĩ tũkona wega makĩria ngumo itiganĩte cia Jehova. Gwĩka ũguo nĩ gũtũteithagia kũmũkuhĩrĩria. Reke tuone ngerekano ĩmwe.

¹¹ Bibilia ĩtwĩraga atĩ Ngai nĩ arĩ “hinya . . . wa magegania.” (Isaia 40:26) No rĩrĩa twathoma ũrĩa aahonokirie Aisiraeli makĩgerera Iria Itune, agĩcoka akĩmateithia marĩ werũ-inĩ mĩaka 40, nĩ tuonaga ngumo ĩyo wega makĩria. No ũhũũre mbica maĩ ma iria rĩu makĩgayũkana. Ũkona rũrĩrĩ rũu rwa andũ ta 3,000,000 rũgereire thĩ nyũmũ gatagatĩ ka iria, namo maĩ mehandĩte ta thingo mĩena yerĩ. (Thama 14:21; 15:8) Marĩ werũ-inĩ, no wone ũrĩa Ngai aamarũmbũyagia na akamagitĩra. Nĩ aatũmire ihiga rĩrute maĩ, na irio ciarĩ cia rangi mwerũ ikĩgwa kuuma igũrũ. (Thama 16:31; Ndari 20:11) Jehova nĩ oonanirie atĩ nĩ arĩ hinya, na makĩria akĩonania atĩ nĩ aũhũthagĩra gũteithia andũ ake. Na githĩ ti ũndũ wa gwĩkĩra ngoro kũmenya atĩ mahoya maitũ mathiaga kũrĩ Ngai wĩ hinya? Nĩwe  “rĩũrĩro ritũ na hinya witũ, ũteithio wonekaga na ihenya hĩndĩ ya mĩtangĩko.”—Thaburi 46:1.

12. Jehova etaarĩirie atĩa na njĩra tũngĩhota gũtaũkĩrũo?

¹² Harĩ ũndũ ũngĩ Jehova ekĩte nĩguo tũhote kũmũmenya. We nĩ Roho na tũtingĩhota kũmuona, tondũ maitho ma mũndũ matingĩhota kuona maũndũ ma roho. Ngai angĩhũthĩra rũthiomi rwa kĩĩroho gũtũtaarĩria ũrĩa ahaana, ũndũ ũcio ũngĩkorũo ũhaana ta gũtaarĩria mũndũ waciarirũo atarĩ na ũhoti wa kuona ũrĩa ũthiũ waku ũhaana, na nginya tũrema tũrĩa wĩ natuo. Handũ ha ũguo, Jehova ahũthĩrĩte ciugo tũngĩhota gũtaũkĩrũo nĩcio. Rĩmwe na rĩmwe nĩ eringithanagia na indo iria tũĩ wega, nĩguo tũhote kũmũmenya. O na rĩmwe nĩ etaaragĩria na njĩra ĩronania ta akoragwo na ciĩga ta cia mũndũ. a

13. Rĩandĩko rĩa Isaia 40:11 rĩtũheaga mbica ĩrĩkũ ĩgiĩ Jehova, na ũndũ ũcio ũrakũhutia atĩa?

¹³ Rĩandĩko rĩa Isaia 40:11 riugaga ũũ igũrũ rĩgiĩ Jehova: “O ta mũrĩithi, nĩ akaarũmbũiya rũũru rwake. Natuo tũgondu atũcokanĩrĩrie na guoko gwake, na atũkuue gĩthũri-inĩ gĩake.” Rĩandĩko rĩu rĩringithanĩtie Jehova na mũrĩithi ũnyitaga tũgondu na “guoko gwake.” Ũndũ ũcio wonanagia ũhoti wa Ngai wa kũgitĩra na kũrũmbũiya andũ ake, nginya o na arĩa matarĩ na hinya. No tũigue tũrĩ na ũgitĩri tũrĩ moko-inĩ make, tondũ ndarĩ hĩndĩ agaatũtiganĩria twatũũra tũrĩ ehokeku. (Aroma 8:38, 39) Mũrĩithi Ũrĩa Mũnene akuuaga tũgondu “gĩthũri-inĩ gĩake,” ũndũ ũrĩa ũtaaragĩria ũrĩa mũrĩithi aahũthagĩra nguo yake ya igũrũ gũkuua kagondu gaciarũo,  akanyitĩte gĩthũri-inĩ gĩake. Ũndũ ũcio ũtuonagia atĩ Jehova nĩ atwendete na nĩ atũrũmbũyagia. Na kĩu nĩ gĩtũmi kĩiganu gĩa gũtũma twende kũmũkuhĩrĩria.

14. Njĩra ĩrĩa njega mũno Jehova eguũrĩtie nayo harĩ ithuĩ nĩ ĩrĩkũ?

¹⁴ Njĩra ĩrĩa njega mũno Jehova eguũrĩtie nayo harĩ ithuĩ nĩ kũgerera Mũrũwe Jesu. Gũtirĩ mũndũ ũngĩhota kuonania kana gũtaarĩria ũrĩa Ngai aiguaga o hamwe na mwĩcirĩrie wake, na njĩra njega gũkĩra ũrĩa Jesu eekire. Arĩ irigithathi rĩa Ngai, aatũũrĩte na Ithe ihinda iraya o na ciũmbe cia kĩĩroho na indo ingĩ ciothe itanombwo. (Akolosai 1:15) Kwoguo Jesu nĩ aamenyete Jehova na njĩra ndikĩru. Nĩkĩo ooigire ũũ: “Gũtirĩ mũndũ ũĩ Mũriũ tiga Awa, na gũtirĩ mũndũ ũĩ Awa tiga Mũriũ na mũndũ o wothe ũrĩa Mũriũ endaga kũguũrĩria.” (Luka 10:22) Rĩrĩa Jesu aarĩ gũkũ thĩ, nĩ aaguũririe Ithe na njĩra igĩrĩ cia bata.

15, 16. Jesu aaguũririe Ithe na njĩra irĩkũ igĩrĩ?

 ¹⁵ Wa mbere, morutani ma Jesu nĩ matũteithagia kũmenya Ithe. Jesu aataarĩirie Jehova na ciugo ihutagia ngoro citũ. Kwa ngerekano, Jesu agĩtaarĩria ũrĩa Ngai ũcio ũrĩ tha etĩkagĩra arĩa merira mehia mao, aahaananirie Jehova na mũciari muohanĩri ũrĩa ũhutagio nĩ kuona mwana wake ũrĩa weitangire agĩcoka, na akahanyũka akamũhĩmbĩria na akamũmumunya. (Luka 15:11-24) Ningĩ Jesu nĩ oonanirie atĩ Jehova nĩ Ngai ‘ũgucagĩrĩria’ andũ arĩa me ngoro njega tondũ nĩ amendete marĩ mũndũ ũmwe ũmwe. (Johana 6:44) O na nĩ amenyaga nginya rĩrĩa kanyoni kanini kagwa thĩ. Jesu aaugire ũũ: “Mũtigetigĩre; inyuĩ mũrĩ a bata gũkĩra tũnyoni tũingĩ.” (Mathayo 10:29, 31) Hatarĩ nganja no twende kũgĩa ũrata na Ngai ta ũcio.

¹⁶ Wa kerĩ, kĩonereria kĩa Jesu nĩ gĩtuonagia ũrĩa Jehova ahaana. Jesu oonanirie ngumo cia Ithe na njĩra nginyanĩru biũ na nĩkĩo aaugire ũũ: “Mũndũ o wothe ũnyonete nĩ onete Awa o nake.” (Johana 14:9) Kwoguo rĩrĩa twathoma ũhoro wĩgiĩ Jesu thĩinĩ wa mabuku ma Injiri, tũkona ngumo iria oonanagia na ũrĩa aarũmbũyanagia na andũ arĩa angĩ, nĩ tuonaga ũrĩa Ithe ahaana. Ĩyo nĩyo njĩra ĩrĩa njega biũ Jehova atũguũrĩirie nayo ũrĩa ahaana.

17. Heana ngerekano ya ũrĩa Jehova ekĩte nĩguo tũhote gũtaũkĩrũo nĩ ũrĩa ahaana.

¹⁷ Kwa ngerekano, ta hũũra mbica ũkĩgeria gũtaarĩria ũtugi nĩ kĩĩ. Kwahoteka no ũtaarĩrie na ciugo. No ũngĩona mũndũ akĩonania ũtugi, ũcoke wĩre mũndũ ũngĩ “Kĩu nĩkĩo kĩonereria kĩa ũtugi,” no ahote gũtaũkĩrũo na njĩra hũthũ makĩria ũrĩa kiugo “ũtugi” kiugĩte. Jehova ekĩte ũndũ ta ũcio nĩguo atũteithie kũmenya ũrĩa ahaana. Makĩria ma gũtũguũrĩria ũrĩa ahaana kũgerera ciugo, nĩ atũheete kĩonereria kĩroneka kĩa Mũrũwe. Kũgerera Jesu, nĩ  tuonaga ngumo cia Ngai. Kũgerera ũhoro wĩgiĩ Jesu ũrĩa ũrĩ mabuku-inĩ ma Injiri, Jehova nĩ ta akoragwo agĩtwĩra: “Ũguo nĩguo haana.” Ũhoro ũcio ũtongoretio nĩ roho ũtaarĩirie Jesu atĩa rĩrĩa aarĩ gũkũ thĩ?

18. Jesu oonanirie atĩa hinya, kĩhooto, na ũũgĩ?

¹⁸ Ngumo iria inya nene cia Ngai nĩ cioonanirio na njĩra njega mũno nĩ Jesu. Aarĩ na hinya igũrũ rĩa mĩrimũ, ngʼaragu, na gĩkuũ. No ngũrani na andũ arĩa mahũthagĩra hinya wao ũũru, Jesu ndaahũthĩrire hinya ũcio kwĩguna we mwene kana kũhinyanĩrĩria. (Mathayo 4:2-4) Nĩ eendete kĩhooto. Aarĩ na gĩtũmi kĩega gĩa kũrakara rĩrĩa oonire ahũũri biacara hekarũ-inĩ makĩhinyĩrĩria andũ. (Mathayo 21:12, 13) Aarũmbũyagia athĩni na andũ a gĩkĩro gĩa thĩ atarĩ na mũthutũkanio, na akamateithia nĩguo ‘macanjamũrũo.’ (Mathayo 11:4, 5, 28-30) Gũtirĩ mũndũ ũngĩ warĩ na ũũgĩ wa kũrutana ta Jesu, ũũgĩ wake ‘wakĩrĩte wa Suleimani.’ (Mathayo 12:42) No Jesu ndeendaga kwĩyonania ũrĩa arĩ mũũgĩ. Ciugo ciake nĩ ciakinyagĩra ngoro cia andũ a kawainda, tondũ aarutanaga na njĩra hũthũ, ĩraiguĩka wega, na ĩrahutia mĩtũũrĩre yao.

19, 20. (a) Jesu aarĩ kĩonereria kĩega biũ kĩa wendo na njĩra ĩrĩkũ? (b) Rĩrĩa tũrathoma na tũgecũrania kĩonereria kĩa Jesu-rĩ, nĩ ũndũ ũrĩkũ twagĩrĩire kũririkana?

¹⁹ Jesu aarĩ kĩonereria kĩega mũno gĩa kuonania wendo. Ũtungata-inĩ wake wothe arĩ gũkũ thĩ, nĩ oonanirie wendo na njĩra nyingĩ itiganĩte, o hamwe na tha na ũcayanĩri. Angĩoonire andũ magĩtangĩka nĩ aamaiguagĩra tha. Kaingĩ nĩ aatindĩkagwo nĩ tha gũteithia andũ. (Mathayo 14:14) O na gũtuĩka nĩ aahonanirie na akĩhũnia andũ, Jesu nĩ oonanirie tha na njĩra ĩngĩ ya bata makĩria. Nĩ aateithirie andũ kũmenya, gwĩtĩkĩra, na kwenda ma ĩgiĩ Ũthamaki wa Ngai, ũrĩa ũkaarehe kĩhonia gĩa gũtũũra kĩa mathĩna mothe ma andũ. (Mariko 6:34; Luka 4:43)  Makĩria ma ũguo, Jesu nĩ oonanirie wendo wa kwĩima rĩrĩa aarutire muoyo wake nĩ ũndũ witũ.—Johana 15:13.

²⁰ Jesu aarĩ na wendo mũingĩ na tha, ũndũ ũrĩa watũmaga ũkorũo ũrĩ ũndũ mũhũthũ harĩ andũ a mĩthemba yothe kũgucĩrĩrio nĩwe. (Mariko 10:13-16) O na kũrĩ ũguo, rekei tũririkanage atĩ rĩrĩa tũrathoma na tũgecũrania kĩonereria kĩega kĩa Jesu, tũkoragwo tũkĩona wega ũrĩa Ithe ahaana.—Ahibirania 1:3.

21, 22. Gũcaria Jehova nĩ kuuga atĩa, na ibuku rĩrĩ rĩgũtũteithia atĩa gwĩka ũguo?

²¹ Gũkorũo atĩ Jehova nĩ eguũrĩtie kũgerera Kiugo gĩake, kuonanagia atĩ nĩ endaga tũmũkuhĩrĩrie. No ningĩ ndatũtindĩkagĩrĩria kũgĩa na ũrata nake. Nĩ igũrũ ritũ gũcaria Jehova “hĩndĩ ĩrĩa angĩoneka.” (Isaia 55:6) Gũcaria Jehova nĩ kuuga tũthiĩ na mbere kwĩruta ngumo ciake na ũrĩa ekaga maũndũ, ta ũrĩa Bibilia yonanĩtie. Ibuku rĩrĩ ũrathoma rĩhaarĩirio nĩguo rĩgũteithie kũgĩa na ũmenyo ũcio.

²² Nĩ ũkuona atĩ ibuku rĩrĩ rĩgayanĩtio na icigo, kũringana na ngumo iria inya nene cia Ngai: hinya, kĩhooto,  ũũgĩ, na wendo. O gĩcigo kĩambĩrĩirie na gũtaarĩria na njĩra nguhĩ ngumo ĩrĩa kĩrarĩrĩria. Icunjĩ cigana ũna iria irũmĩrĩire ciarĩrĩirie ũrĩa Jehova onanagia ngumo ĩyo na njĩra itiganĩte. Ningĩ o gĩcigo kĩrĩ na gĩcunjĩ kĩrarĩrĩria ũrĩa Jesu oonanirie ngumo ĩyo, na kĩngĩ kĩonanĩtie ũrĩa o na ithuĩ tũngĩmĩonania ũtũũro-inĩ witũ.

23, 24. (a) Taarĩria ũrĩa tũngĩhũthĩra gathandũkũ ga “Ciũria cia Gwĩcũrania.” (b) Gwĩcũrania gũtũteithagia atĩa gũkuhĩrĩria Ngai makĩria?

²³ Kwambĩrĩria na gĩcunjĩ gĩkĩ, nĩ harĩkoragwo na gathandũkũ karĩ na kĩongo “Ciũria cia Gwĩcũrania.” Kwa ngerekano, rora  gathandũkũ karĩ karatathi-inĩ ka 24. Maandĩko macio hamwe na ciũria itihaarĩirio irĩ cia gũcokera gĩcunjĩ kĩu na njĩra nguhĩ. No nĩ cia gũtũteithia gwĩciria ũhoro wa gĩcunjĩ kĩu na njĩra ndikĩru. Ũngĩka atĩa nĩguo ũgunĩke kuumana na gathandũkũ kau? Thoma na kinyi maandĩko mothe marĩa monanĩtio, ũrore ciũria, na wĩcũranie macokio ma cio. Ningĩ no wĩke ũthuthuria makĩria. Wĩyũrie ciũria ingĩ ta: ‘Ũhoro ũyũ ũranduta atĩa igũrũ rĩgiĩ Jehova? Ingĩũhũthĩra atĩa ũtũũro-inĩ wakwa? Ingĩũhũthĩra atĩa gũteithia andũ angĩ?’

²⁴ Gwĩcũrania na njĩra ĩyo no gũtũteithie gũkuhĩrĩria Jehova makĩria. Nĩkĩ? Tondũ Bibilia yonanagia atĩ gwĩcũrania nĩ kũhutagia ngoro citũ. (Thaburi 19:14) Rĩrĩa twecũrania maũndũ marĩa tweruta megiĩ Ngai, ũhoro ũcio ũingĩraga thĩinĩ wa ngoro citũ cia mũhaano, ũgatũteithia gwĩciria, na kuoya ikinya. Wendo witũ harĩ Ngai nĩ wongererekaga, naguo wendo ũcio ũgatũtindĩka kwenda kũmũkenia arĩ Mũrata witũ wa hakuhĩ. (1 Johana 5:3) Nĩguo tũgĩe na ũrata ta ũcio, no mũhaka tũmenye ngumo cia Jehova na ũrĩa ekaga maũndũ. Reke twambe twarĩrĩrie ũndũ ũmwe wĩgiĩ Ngai ũngĩtũma twende mũno kũmũkuhĩrĩria, nĩguo ũtheru wake.