1, 2. Nĩ kũ tũngĩona ũgitĩri mahinda-inĩ maya?

TA HŨŨRA mbica ũgĩthiĩ na njĩra kũrĩ na kĩhuhũkanio kĩnene. Matu makaira na gũkagĩa na heni na ngwa. Mbura ĩgacoka ĩgaitĩka, na kwoguo ũkambĩrĩria gũcaria handũ ha kwĩyũa. Na githĩ to ũigue wahũmũka mũno ũngĩona handũ hega na harĩ na ũgitĩri.

² Tũragerera ũndũ o ta ũcio ũmũthĩ. Maũndũ thĩinĩ wa thĩ marathiĩ o mathũkĩte. Ũndũ ũcio no ũtũme wĩyũrie ũũ, ‘Nĩ kũ ingĩona ũgitĩri?’ Mwandĩki wa thaburi ooigire ũũ: “Niĩ ngwĩra Jehova atĩrĩ: ‘Wee nĩwe rĩũrĩro rĩakwa o na mwĩgitio wakwa, o wee Ngai wakwa ũrĩa ndĩhokete.’” (Thaburi 91:2) Hatarĩ nganja, Jehova no atũteithie rĩrĩa tũrĩ na mathĩna ihinda-inĩ rĩrĩ, na nĩ atũheaga kĩĩrĩgĩrĩro kĩa magegania kĩa ihinda rĩũkĩte.

3. Tũngĩtua Jehova rĩũrĩro ritũ atĩa?

³ Jehova angĩtũgitĩra atĩa? No atũteithie kũhiũrania na thĩna o wothe tũngĩkorũo naguo, na nĩ arĩ hinya mũno gũkĩra mũndũ o wothe ũngĩgeria gũtwĩka ũũru. O na tũngĩcemania na ũndũ mũũru ihinda-inĩ rĩrĩ, no tũkorũo na ma atĩ Jehova nĩ akaaũthondeka ihinda rĩũkĩte. Bibilia ĩtwĩkĩraga ngoro ũũ: ‘Mwĩigei wendo-inĩ wa Ngai.’ (Judasi 21) Tũrabatara gũikara hakuhĩ na Jehova nĩguo atũteithie hĩndĩ ya moritũ. No tũngĩka ũguo atĩa?

4, 5. Jehova atuonetie wendo wake na njĩra irĩkũ?

⁴ Nĩguo tũhote gũtũũra hakuhĩ na Jehova, nĩ tũrabatara kũmenya ũrĩa atwendete. Ta wĩcirie maũndũ marĩa mothe Jehova atwĩkĩire. Atũheete thĩ thaka na akamĩiyũria indo njega ta mĩmera na nyamũ. Ningĩ nĩ atũheete irio njega cia kũrĩa o na maĩ matheru ma kũnyua. Kũgerera Bibilia, Jehova nĩ atũmenyithĩtie rĩĩtwa rĩake o hamwe na ngumo ciake cia magegania. Makĩria ma maũndũ macio mothe, nĩ aatuonirie wendo wake rĩrĩa aatũmire Mũrũ wake, Jesu, gũkũ thĩ arute muoyo wake nĩ ũndũ witũ. (Johana 3:16) Igongona rĩu nĩ rĩtũmaga tũkorũo na kĩĩrĩgĩrĩro kĩega kĩa ihinda rĩũkĩte.

⁵ Jehova nĩ ahandĩte Ũthamaki wa Kĩĩmesia kũrĩa igũrũ, na nĩguo ũgooka kweheria mathĩna mothe thĩinĩ wa thĩ. Ũthamaki ũcio nĩ ũgaatũma thĩ ĩtuĩke paradiso kũrĩa andũ othe magaatũũra tene na tene marĩ na thayũ na gĩkeno. (Thaburi 37:29) Njĩra ĩngĩ Jehova atuonetie wendo wake nayo nĩ gũtũruta ũrĩa tũngĩikara na njĩra njega ihinda-inĩ rĩrĩ. Ningĩ nĩ atwĩraga tũmũhoe, na hĩndĩ ciothe akoragwo ehaarĩirie gũtũthikĩrĩria. Jehova nĩ onanĩtie wendo wake harĩ o ũmwe witũ.

6. Wagĩrĩirũo gwĩka atĩa nĩ ũndũ wa wendo ũrĩa Jehova akuonetie?

⁶ Wagĩrĩirũo gwĩka atĩa nĩ ũndũ wa wendo ũrĩa Jehova akuonetie? Muonagie atĩ ũrĩ na ngatho nĩ ũndũ wa maũndũ marĩa mothe agwĩkĩire. Ũndũ wa kĩeha nĩ atĩ andũ aingĩ ũmũthĩ matikoragwo na ngatho. Ũguo noguo kwarĩ rĩrĩa Jesu aarĩ gũkũ thĩ. Harĩ hĩndĩ Jesu aahonirie andũ ikũmi maarĩ na mangũ, ĩndĩ no ũmwe tu wamũcokeirie ngatho. (Luka 17:12-17) Ithuĩ tũngĩenda gũkorũo tũhaana ta mũndũ ũcio wacokeirie Jesu  ngatho. Tũngĩenda gũcokagĩria Jehova ngatho hĩndĩ ciothe.

7. Twagĩrĩirũo kwenda Jehova na gĩkĩro kĩrĩkũ?

⁷ Ningĩ nĩ tũrabatara kuonia Jehova atĩ nĩ tũmwendete. Jesu eerire arutwo ake atĩ no mũhaka mende Jehova na ngoro yao yothe, muoyo wao wothe, na meciria mao mothe. (Thoma Mathayo 22:37.) Ũguo nĩ kuuga atĩa?

8, 9. Tũngĩonia Jehova atĩa atĩ nĩ tũmwendete?

⁸ Hihi kuuga tu atĩ nĩ twendete Jehova nĩ kũiganu? Aca. Angĩkorũo nĩ twendete Jehova na ngoro yothe, muoyo wothe, na meciria maitũ mothe, ciĩko citũ nĩ irĩonanagia ũguo. (Mathayo 7:16-20) Bibilia ĩrutanaga atĩ angĩkorũo nĩ twendete Ngai, nĩ tũrĩathĩkagĩra maathani make. Hihi gwĩka ũguo nĩ ũndũ mũritũ? Aca, tondũ “maathani make ti mũrigo.”—Thoma 1 Johana 5:3.

⁹ Rĩrĩa twathĩkĩra Jehova nĩ tũgĩaga na ũtũũro ũrĩ na gĩkeno na tũkaiganĩra. (Isaia 48:17, 18) No nĩ kĩĩ kĩrĩtũteithagia gũtũũra hakuhĩ na Jehova? Reke tuone.

10. Wagĩrĩirũo gũthiĩ na mbere kwĩruta ũhoro wa Jehova nĩkĩ?

¹⁰ Watuĩkire mũrata wa Jehova atĩa? Kwĩruta Bibilia nĩkuo gũgũteithĩtie kũmenya Jehova makĩria na gũkũria ũrata wa hakuhĩ nake. Ũrata ũcio no ũringithanio na mwaki ũrakana na ndũrenda ũhore. O ta ũrĩa mwaki ũbataraga kuongererũo ngũ nĩguo ũthiĩ na mbere gwakana, noguo o nawe ũrabatara gũthiĩ na mbere kwĩruta ũhoro wa Jehova nĩguo ũrata wanyu nake ũtũũre ũrĩ mũrũmu.—Thimo 2:1-5.

11. Morutani ma Bibilia megũkũguna atĩa?

¹¹ O ũrĩa ũgũthiĩ na mbere kwĩruta Bibilia, noguo ũkwĩruta maũndũ mekũhutia ngoro yaku. Ta rora wone ũrĩa arutwo erĩ a Jesu maaiguire rĩrĩa aamataaragĩria  morathi ma Bibilia. Mooigire ũũ: “Na githĩ tũtikũhĩahĩaga ngoro agĩtwarĩria tũrĩ njĩra-inĩ, rĩrĩa egũtũthathaũragĩra Maandĩko?”—Luka 24:32.

12, 13. (a) Nĩ ũndũ ũrĩkũ ũngĩhaanĩka harĩ wendo witũ harĩ Ngai? (b) Tũngĩka atĩa nĩguo wendo witũ harĩ Jehova ũtũũre ũrĩ mũrũmu?

¹² O ta ũrĩa arutwo acio maahutirio ngoro rĩrĩa maataũkĩirũo nĩ Maandĩko, no kũhoteke o nawe noguo wahutirio ngoro wambĩrĩria gũtaũkĩrũo nĩ Bibilia. Ũndũ ũcio nĩ wagũteithirie kũmenya Jehova na kũmwenda. Ndũngĩenda wendo ũcio ũthiĩ ũkĩnyihaga.—Mathayo 24:12.

¹³ Warĩkia gũtuĩka mũrata wa Ngai, nĩ ũrabatara kwĩrutanĩria mũno nĩguo ũrata ũcio ũtũũre ũrĩ mũrũmu. No mũhaka ũthiĩ na mbere kwĩruta ũhoro wake na wa Jesu, na wĩcũranie maũndũ marĩa ũreruta na ũrĩa ũngĩmahũthĩra ũtũũro-inĩ waku. (Johana 17:3) Wĩyũragie ũũ rĩrĩa ũrathoma Bibilia: ‘Ũndũ ũyũ ũranduta atĩa igũrũ rĩgiĩ Jehova  Ngai? Njagĩrĩirũo kũmwenda na ngoro yakwa yothe na muoyo wakwa wothe nĩkĩ?’—1 Timotheo 4:15.

14. Mahoya mateithagia atĩa harĩ gũtũma wendo witũ harĩ Jehova ũtũũre ũrĩ mũrũmu?

¹⁴ Ũngĩkorũo na mũrata mwega, nĩ mwaranagĩria kaingĩ na ũndũ ũcio nĩ ũtũmaga ũrata wanyu ũtũũre ũrĩ mũrũmu. Na njĩra o ta ĩyo, kwaria na Jehova kaingĩ kũgerera mahoya nĩ gũtũmaga wendo witũ harĩ we ũtũũre ũrĩ mũrũmu. (Thoma 1 Athesalonike 5:17.) Mahoya nĩ kĩheo kĩega mũno kuuma kũrĩ Ithe witũ wa igũrũ. Hĩndĩ ciothe twagĩrĩirũo kwaragia nake kuuma ngoro. (Thaburi 62:8) Tũtiagĩrĩirũo kũiga ciugo meciria-inĩ atĩ nĩguo tũcicokagĩre rĩrĩa tũrahoya. Twathiĩ na mbere kwĩruta Bibilia na kũhoyaga kuuma ngoro, wendo witũ harĩ Jehova ũgũtũũra ũrĩ mũrũmu.

15, 16. Wee wonaga wĩra wa kũhunjia atĩa?

¹⁵ Angĩkorũo nĩ tũkwenda gũtũũra hakuhĩ na Jehova, nĩ twagĩrĩirũo kũmenyithagia arĩa angĩ ũrĩa twĩtĩkĩtie. Kwaria na arĩa angĩ ũhoro wĩgiĩ Jehova nĩ mweke wa mwanya. (Luka 1:74) Ningĩ ũcio nĩ wĩra waheirũo Akristiano othe a ma nĩ Jesu. O ũmwe witũ nĩ agĩrĩirũo kũhunjia ũhoro ũrĩa mwega wa Ũthamaki wa Ngai. Hihi nĩ wĩkaga ũguo?—Mathayo 24:14; 28:19, 20.

¹⁶ Mũtũmwo Paulo oonaga wĩra wa kũhunjia ũrĩ wa goro mũno; aawĩtire “mũthithũ.” (2 Akorintho 4:7) Kwĩra andũ arĩa angĩ ũhoro wĩgiĩ Jehova na muoroto wake nĩguo wĩra ũrĩa wa bata mũno ũngĩruta. Ĩyo nĩ njĩra ĩmwe ya gũtungatĩra Jehova na nĩ akenagio nĩ maũndũ marĩa wĩkaga nĩ ũndũ wake. (Ahibirania 6:10) Kũhunjia ningĩ no gũkũgune na kũgune arĩa magũthikagĩrĩria tondũ no kũmũteithie inyuothe gũkuhĩrĩria Jehova na gũkona muoyo wa  tene na tene. (Thoma 1 Akorintho 15:58.) Hihi nĩ kũrĩ wĩra ũngĩ ũngĩtũma ũigue ũkenete gũkĩra ũcio?

17. Wĩra wa kũhunjia ũrabatara kũrutwo hatarĩ kũmaĩrĩria nĩkĩ?

¹⁷ Wĩra wa kũhunjia ũrabatara kũrutwo hatarĩ kũmaĩrĩria. Nĩ twagĩrĩirũo ‘kũhunjia kiugo’ na twagĩrĩirũo ‘gwĩka ũguo tũtekũmaĩrĩria.’ (2 Timotheo 4:2) Andũ nĩ marabatara kwĩrũo ũhoro wa Ũthamaki wa Ngai. Bibilia yugaga ũũ: “Mũthenya ũrĩa mũnene wa Jehova ũrĩ hakuhĩ! Ũrĩ hakuhĩ na nĩ ũroka na ihenya mũno!” Mũico ‘ndũgaacererũo!’ (Zefania 1:14; Habakuku 2:3) Ica ikuhĩ, Jehova nĩ ekũniina thĩ ĩno njũru ya Shaitani. Hĩndĩ ĩyo ĩtanakinya, andũ nĩ marabatara kũheo mũkaana nĩguo matue itua kana nĩ megũtungatĩra Jehova.

18. Twagĩrĩirũo gũthathayagia Jehova tũrĩ hamwe na Akristiano arĩa angĩ a ma nĩkĩ?

¹⁸ Jehova endaga tũmũthathayagie tũrĩ hamwe na Akristiano arĩa angĩ a ma. Bibilia yugaga ũũ: “Nĩ twĩciranagie mũndũ na ũrĩa ũngĩ nĩguo twĩkĩranage hinya ũhoro-inĩ wĩgiĩ wendo na ciĩko njega, tũtegũtiga gũcemanagia hamwe, ta ũrĩa andũ amwe memenyeretie, no twĩkĩranage ngoro, na tũgakĩrĩrĩria gwĩka ũguo o ũrĩa mũrona mũthenya ũcio ũgĩkuhĩrĩria.” (Ahibirania 10:24, 25) Twagĩrĩirũo gwĩka ũrĩa wothe tũngĩhota nĩguo tũkoragwo mĩcemanio-inĩ yothe. Mĩcemanio nĩ ĩtũheaga mweke wa kũũmanĩrĩria na gwĩkĩrana hinya.

19. Nĩ kĩĩ kĩngĩtũteithia kwenda aarĩ na ariũ a Ithe witũ?

¹⁹ Wathiĩ mĩcemanio nĩ ũkũgĩa na arata ega na nĩ marĩgũteithagia gũthathaiya Jehova. Nĩ ũgũcemania na aarĩ na ariũ a Ithe witũ marerutanĩria gũthathaiya Jehova o tawe. Na o tawe, ti akinyanĩru na nĩ mahĩtagia. Koragwo wĩhaarĩirie kũmohera makũhĩtĩria. (Thoma Akolosai 3:13.) Hingo ciothe roraga ngumo iria njega  cia aarĩ na ariũ a Ithe witũ, tondũ gwĩka ũguo nĩ kũrĩgũteithagia kũmenda na gũkuhĩrĩria Jehova makĩria.

20, 21. “Muoyo ũrĩa wa ma” nĩ kĩĩ?

²⁰ Jehova endaga arata ake othe makorũo na ũtũũro ũrĩa mwega biũ. Bibilia ĩtũrutaga atĩ ũtũũro witũ wa ihinda rĩũkĩte ũgaakorũo ũrĩ ngũrani mũno na wa ihinda rĩrĩ.

²¹ Ihinda rĩrĩa rĩroka tũtigaikaraga mĩaka 70 kana 80 tu, ĩndĩ tũgaatũũra tene na tene. Nĩ tũgaakenera “muoyo wa tene na tene” thĩinĩ wa paradiso thaka, tũrĩ na ũgima mwega wa mwĩrĩ na thayũ. Ũcio nĩguo Bibilia ĩtaga “muoyo ũrĩa wa ma.” Jehova nĩ atwĩrĩire muoyo ũcio wa ma, ĩndĩ no mũhaka twĩke ũrĩa wothe tũngĩhota nĩguo ‘tũũrũmie biũ.’—1 Timotheo 6:12, 19.

22. (a) Tũngĩka atĩa nĩguo ‘tũrũmie biũ muoyo ũrĩa wa ma’? (b) Nĩkĩ gũtirĩ hĩndĩ tũngĩgũra muoyo wa tene na tene?

²² Tũngĩka atĩa nĩguo ‘tũrũmie biũ muoyo ũrĩa wa ma’? No mũhaka ‘twĩkage maũndũ mega’ na ‘tũkĩragĩrĩrie harĩ ciĩko njega.’ (1 Timotheo 6:18) Ũguo nĩ kuuga atĩ nĩ twagĩrĩirũo kũhũthagĩra maũndũ marĩa tũreruta kuuma Bibilia-inĩ. O na kũrĩ ũguo, tũtikaaheo muoyo ũrĩa wa ma nĩ ũndũ wa kĩyo gitũ. Gũtirĩ hĩndĩ tũngĩgũra muoyo wa tene na tene. Kĩu nĩ kĩheo Jehova akaaheana o ũguo tũhũ kũrĩ ndungata ciake njĩhokeku, na kĩronania “ũtugi [wake] mũnene.” (Aroma 5:15) Ithe witũ wa igũrũ nĩ eriragĩria mũno kũhe ndungata ciake njĩhokeku kĩheo kĩu.

23. Ũrabatara gũtua matua marĩa magĩrĩire ihinda-inĩ rĩrĩ nĩkĩ?

²³ Ta wĩyũrie ũũ: ‘Hihi nĩ ndĩrathathaiya Ngai na njĩra ĩrĩa etĩkagĩra?’ Ũngĩona atĩ nĩ harĩ mogarũrũku ũrabatara gwĩka, ndũkahũthĩrĩrie gwĩka ũguo. Rĩrĩa twehoka Jehova na twerutanĩria biũ kũmwathĩkĩra, arĩkoragwo arĩ rĩũrĩro ritũ. Nĩ ekũgitĩra andũ ake ehokeku matukũ-inĩ mothe ma  kũrigĩrĩria ma thĩ ĩno njũru ya Shaitani. Jehova nĩ arĩcoka ahingie kĩĩranĩro gĩake gĩa gũtigĩrĩra atĩ nĩ twatũũra tene na tene thĩinĩ wa Paradiso. Hatarĩ nganja, no ũgĩe na muoyo ũrĩa wa ma ũngĩtua matua marĩa magĩrĩire ihinda-inĩ rĩrĩ!