Johana, mũrũ wa Zekaria na Elizabethi, aaneneha aatuĩkire mũnabii. Jehova aahũthĩrire Johana kũruta andũ atĩ Mesia nĩ angĩokire. No handũ ha kũrutana thunagogi-inĩ kana taũni-inĩ, Johana aahunjagia werũ-inĩ. Andũ moimaga Jerusalemu na Judea guothe nĩguo marutwo nĩwe. Aamarutaga atĩ nĩguo makenie Ngai, nĩ maabataraga gũtigana na ciĩko njũru. Thutha wa andũ acio kũmũthikĩrĩria, aingĩ ao nĩ meeririre mehia, na Johana akĩmabatithia Rũũĩ-inĩ rwa Jorodani.

Johana aaikaraga ũtũũro mũhũthũ. Eekĩraga nguo ciathondeketwo na guoya wa ngamĩra, na aarĩaga ngigĩ na ũũkĩ wa gĩthaka. Andũ nĩ meendaga mũno kũmenya ũhoro wake. O na Afarisai na Asadukai arĩa maarĩ na mwĩtĩo nĩ maathiaga kũmuona. Johana aameerire ũũ: ‘Nĩ mũrabatara kũgarũrĩra mĩthiĩre yanyu na mwĩrire. Mũtikae gwĩciria mũrĩ andũ a mwanya atĩ tondũ nĩ mugaga mũrĩ njiarũa cia Iburahimu. Ũguo ti kuuga atĩ mũrĩ ciana cia Ngai.’

Andũ aingĩ nĩ maathiaga kũrĩ Johana makamũũria: ‘Twagĩrĩirũo gwĩka atĩa nĩguo tũkenie Ngai?’ Johana eerire Ayahudi ũũ: ‘Angĩkorũo ũrĩ na nguo igĩrĩ, heana ĩmwe kũrĩ mũndũ ũrĩa ũtarĩ.’ Hihi nĩ ũĩ nĩ kĩĩ gĩatũmire ameere ũguo? Eendaga mamenye atĩ nĩguo makenie Ngai, no mũhaka maangĩendire andũ arĩa angĩ.

Johana eerire etia a mbia cia igooti ũũ: ‘Tuĩkai andũ ehokeku na mũtikanaheenie mũndũ o na ũrĩkũ.’ Nacio thigari aaciĩrire ũũ: ‘Mũtigacoke kuoya mahaki kana kũheenania.’

 Athĩnjĩri-Ngai na Alawii o nao nĩ maathiire kũrĩ Johana makĩmũũria: ‘Wee nĩwe ũ? Gũtirĩ mũndũ ũtarenda gũkũmenya.’ Johana aameerire ũũ: ‘Niĩ ndĩ mũgambo ũrĩ werũ-inĩ, ũrĩa ũratongoria andũ harĩ Jehova o ta ũrĩa Isaia aarathĩte.’

Andũ nĩ maakenagio nĩ maũndũ marĩa Johana aamarutaga. Andũ aingĩ nĩ meeyũragia kana hihi Johana nĩwe warĩ Mesia. No akĩmeera ũũ: ‘Nĩ kũrĩ mũndũ ũngĩ mũnene kũngĩra ũroka. Na o na ndirĩ mwagĩrĩru wa kuohora ndigi cia iratũ ciake. Niĩ batithanagia na maĩ, nowe akabatithanagia na roho mũtheru.’