Jesu okĩte gũkũ thĩ nĩguo ahunjie ũhoro ũrĩa mwega wa Ũthamaki wa Ngai. Nĩguo Jehova onanie ũrĩa Jesu ageeka arĩ Mũthamaki, nĩ aamũheire roho wake mũtheru nĩguo ahote kũringa ciama nyingĩ. Gũtirĩ mũrimũ atangĩahotire kũhonia. Andũ arĩa maarĩ arũaru nĩ maathiaga gũcaria ũteithio kũrĩ we kũrĩa guothe aathiaga, na nĩ aamahonagia. Atumumu nĩ moonaga, arĩa mataiguaga makaigua, cionje igetwara, na arĩa maarĩ na ndaimono nĩ ciarutagwo thĩinĩ wao. O na mangĩahutirie gĩcũrĩ kĩa nguo ya Jesu, nĩ maahonaga. Andũ nĩ maamũrũmagĩrĩra kũrĩa guothe aathiaga. O na rĩrĩa eendaga gũkorũo handũ arĩ wiki, gũtirĩ mũndũ aacokithagia.

Harĩ hĩndĩ ĩmwe andũ maatwarire mũndũ warĩ kĩonje thĩinĩ wa nyũmba ĩmwe Jesu aaikaraga. No nyũmba ĩyo yarĩ na andũ aingĩ mũno ũndũ matangĩahotire kũingĩra. Nĩ ũndũ ũcio nĩ maatũrire irima nyũmba igũrũ na magĩikũrũkia mũndũ ũcio harĩ Jesu. Jesu aamwĩrire ũũ: ‘Ũkĩra wĩtware.’ Rĩrĩa mũndũ ũcio eetwarire, andũ nĩ maagegire mũno.

Nĩ kũrĩ hĩndĩ ĩngĩ Jesu aaingĩraga itũũra-inĩ rĩmwe, na andũ ikũmi maarĩ na mangũ nĩ maarũgamire handũ haraihu makĩanĩrĩra ũũ: ‘Jesu, tũteithie!’ Matukũ-inĩ macio mũndũ angĩakorirũo na mangũ, ndetĩkagĩrio gũkuhĩrĩria andũ arĩa angĩ. Jesu eerire andũ acio mathiĩ hekarũ-inĩ, o ta ũrĩa Watho wa Jehova woigĩte maagĩrĩirũo nĩ gwĩka thutha wa kũhona. Rĩrĩa maathiaga hekarũ-inĩ nĩ  maahonire. Rĩrĩa ũmwe wao onire atĩ nĩ aahona, nĩ aacokire na thutha gũcokeria Jesu ngatho na kũgooca Ngai. Harĩ andũ acio ikũmi, no ũcio ũmwe tu wacokire gũcokeria Jesu ngatho.

Mũtumia ũmwe warwarĩte kwa ihinda rĩa mĩaka 12 ndonaga ta angĩahonire. Nĩ aathiire thutha wa Jesu arĩ gatagatĩ-inĩ ga kĩrĩndĩ na akĩhutia gĩcũrĩ kĩa nguo yake ya igũrũ. Aahonire o hĩndĩ ĩyo. Rĩrĩa ũndũ ũcio wekĩkire, Jesu oririe ũũ: “Nũ wahutia?” Mũtumia ũcio nĩ aamakire mũno, no nĩ aathiire harĩ Jesu na akĩmwĩra ũrĩa eekĩte. Jesu nĩ aamũmĩrĩirie na njĩra ya kũmwĩra ũũ: ‘Mwarĩ wakwa, thiĩ na thayũ.’

Mũthigari ũmwe wetagwo Jairo nĩ aathaithire Jesu ũũ: ‘Nĩ tũthiĩ gwakwa! Kairĩtu gakwa nĩ karũaru mũno.’ No Jesu atanakinya kwa Jairo mũciĩ, kairĩtu kau nĩ gaakuire. Rĩrĩa Jesu aakinyire kwa Jairo, nĩ aakorire andũ aingĩ arĩa maathiĩte gũcakaya hamwe na famĩlĩ ĩyo. Jesu aamerire ũũ: ‘Tigai kũrĩra, nĩ gũkoma gakomete.’ Aacokire akĩnyita kairĩtu kau guoko na agĩkeera: ‘Kairĩtu, ũkĩra!’ Gaaikarire thĩ o hĩndĩ ĩyo, na Jesu akĩra aciari ako makahe kĩndũ gĩa kũrĩa. Ta wĩcirie ũrĩa aciari ako maaiguire!