Rĩrĩa Musa aarĩ Kĩrĩma-inĩ gĩa Sinai, Jehova nĩ aamwĩrire aake hema ya mwanya ĩrĩa yetagwo hema ya gũtũnganwo, na hau nĩho Aisiraeli maahoyagĩra. Nĩ mangĩahotire gũkuua hema ĩyo ya gũtũnganwo makiuma handũ hamwe magĩthiĩ harĩa hangĩ.

Jehova oigire ũũ: ‘Ĩra andũ marute kĩrĩa o mũndũ angĩhota nĩguo mateithĩrĩrie gwaka hema ya gũtũnganwo.’ Aisiraeli maarutire thahabu, betha, gĩcango, mahiga ma goro, na indo ingĩ cia kwĩgemia. Ningĩ nĩ maarutire guoya wa mbũri, gatani ĩrĩa njega, njũa cia nyamũ, na indo ingĩ nyingĩ. Maarutire indo nyingĩ nginya Musa akĩmeera: ‘Nĩ ciaigana rĩu! Tigai kũrehe ingĩ.’

Athuri na atumia aingĩ arĩa maarĩ na ũhoti ũtiganĩte nĩ maateithĩrĩirie gwaka hema ya gũtũnganwo. Jehova nĩ aamaheire ũũgĩ wa kũruta wĩra ũcio. Andũ amwe maatumaga, arĩa angĩ makogotha ndigi, na angĩ makagemia itambaya. Nao angĩ maabangaga tũhiga, angĩ makaruta wĩra na thahabu, kana magathondeka mĩthemba yothe ya indo cia mbaũ.

Andũ maakire hema ya gũtũnganwo o ta ũrĩa meerĩtwo nĩ Jehova. Nĩ maathondekire gĩtambaya gĩthaka gĩa kũgayania hema ya gũtũnganwo maita merĩ, harĩa Hatheru na harĩa Hatheru Mũno. Harĩa Hatheru Mũno haarĩ na ithandũkũ rĩa kĩrĩkanĩro. Rĩakĩtwo na mbaũ cia mũtĩ wa mũgaa na rĩkagemio na thahabu. Harĩa Hatheru haakoragwo na mũtĩ wa kũigĩrĩrũo matawa ma thahabu, metha, na kĩgongona gĩa gũcinĩra ũbumba. Nja ya hema ya gũtũnganwo kwarĩ na kĩraĩ gĩa gĩcango na kĩgongona kĩnene.  Ithandũkũ rĩa kĩrĩkanĩro nĩ rĩaririkanagia Aisiraeli ũrĩa maarĩkanĩire na Jehova atĩ nĩ marĩmwathĩkagĩra. Hihi nĩ ũĩ kĩrĩkanĩro nĩ kĩĩ? Nĩ mwĩhĩtwa wa mwanya.

Jehova nĩ aathurire Haruni na ariũ ake nĩguo matungatage hema-inĩ ya gũtũnganwo marĩ athĩnjĩri-Ngai. Wĩra wao warĩ kũmenyerera hema ĩyo na kũrutĩra Jehova magongona. Haruni nowe wetĩkĩrĩtio kũingĩra harĩa Hatheru mũno, tondũ aarĩ Mũthĩnjĩri-Ngai-Mũnene. Aaingĩraga harĩa Hatheru Mũno o mwaka nĩguo arute igongona rĩa mehia make, ma famĩlĩ yake, na ma Aisiraeli othe.

Aisiraeli maarĩkirie gwaka hema ya gũtũnganwo mwaka ũmwe kuuma moima Misiri. Rĩu nĩ maagĩte na handũ ha gũtungatagĩra Jehova.

Jehova nĩ aiyũririe riri wake thĩinĩ wa hema ĩyo ya gũtũnganwo na gũkĩgĩa na itu igũrũ rĩayo. Rĩrĩa rĩothe itu rĩu rĩakoragwo igũrũ rĩa hema ĩyo ya gũtũnganwo, Aisiraeli matingĩathamire harĩa maambĩte hema ciao. No itu rĩu rĩngĩeherire, nĩ maamenyaga ihinda rĩa gũthama nĩ ikinyu. Maarũkanagia hema ĩyo ya gũtũnganwo na makarũmĩrĩra itu rĩu.