NĨ KĨĨ kĩrĩ na ngũũrani mbica-inĩ ĩno? Ĩni, nĩ andũ. Nĩo, mũndũrũme wa mbere na mũtumia. Nũũ wamombire? Nĩ Ngai. Nĩ ũũĩ rĩĩtwa rĩake? Nĩ Jehova. Na mũndũrũme ũcio na mũtumia magĩĩtwo Adamu na Hawa.

Ũũ nĩguo Jehova Ngai ombire Adamu. Oire rũkũngũ rwa thĩ na akĩũmba mwĩrĩ mwagĩrĩru wa mũndũ. Agĩcoka akĩmũheeherera mĩhũmũ marima ma iniũrũ, Adamu agĩtuĩka mũndũ wĩ muoyo.

Jehova Ngai nĩaaheire Adamu wĩra. Erire Adamu atue mĩthemba yothe ya nyamũ marĩĩtwa. No kũhoteke Adamu nĩ arorete nyamũ icio ihinda iraya nĩguo ahote gũciĩta marĩĩtwa marĩa magĩrĩire. Rĩrĩa Adamu aheaga nyamũ marĩĩtwa-rĩ, nĩ onire ũndũ mũna. Nĩ ũũĩ nĩ ũndũ ũrĩkũ?

Nyamũ o nyamũ ciaikaraga cia njamba na cia nga. Kwarĩ njogu baba na njogu mami, baba na mami a mĩrũthi. No Adamu ndaarĩ na mũtumia. Kwogwo Jehova agĩtũma Adamu akome toro mũnene mũno, akĩmũruta rũbaru rũmwe. Jehova aahũthĩrire rũbaru rũu akĩũmba mũndũ-mũka ũrĩa watuĩkire mũtumia wa Adamu.

Hĩ, kaĩ Adamu nĩagĩkenire-ĩ! Tawĩciirie gĩkeno kĩrĩa Hawa aarĩ nakĩo kũigwo mũgũnda-inĩ ũcio mũthaka ũguo atũũre kuo! Rĩu nĩmangĩagĩire ciana na matũũre na gĩkeno hamwe.

Jehova eendaga Adamu na Hawa matũũre tene na tene. Eendaga mathondeke thĩ yothe ĩthakare o ta mũgũnda wa Edeni. No mũhaka rĩciiria rĩa kũruta wĩra ũcio rĩkorũo nĩ rĩakenirie Adamu na Hawa mũno! Wee nĩ ũngĩendire kũnyitanĩra wĩra wa gũthondeka thĩ ĩtuĩke mũgũnda mũthaka? No gĩkeno kĩa Adamu na Hawa gĩtiathire na mbere. Tareke tũcarie gĩtũmi.