TARORA, kaĩ nĩ maũndũ moru marekĩkaĩ! Jesu nĩaroragwo. Mamũcurĩtie mũtĩ igũrũ. Arahũrĩrĩrũo mĩcumarĩ moko na magũrũ. Nĩkĩ gĩtũmi andũ mende gwĩka Jesu ũguo?

Nĩ ũndũ andũ amwe nĩmathũire Jesu. Nĩ ũũĩ nĩ a? Ũmwe wao nĩ mũraika ũrĩa mũũru Shaitani Mũcukani. Nĩwe ũrĩa watũmire Adamu na Hawa maremere Jehova. Na ningĩ Shaitani nowe watũmire thũ cia Jesu igere ngero ĩno njũru ũũ.

O na mbere ya Jesu gũcurio mũtĩ-inĩ, thũ ciake nĩciamwĩkire maũndũ ma kĩnyũrũri. Waririkana ũrĩa mokire na makĩmũnyita mũgũnda-inĩ wa Gethisemane? Thũ icio nĩ a? Ĩĩni, maarĩ atongoria a ndini. Kwoguo, tareke tuone ũrĩa gwekĩkire thutha ũcio.

Rĩrĩa Jesu anyitirũo nĩ atongoria a ndini-rĩ, atũmwo ake makĩhurunjũka. Maatiganĩirie Jesu e wiki na thũ ciake, tondũ nĩ metigĩrire. No atũmwo erĩ Petero na Johana matiathire itĩna iraihu. Maarũmĩrĩire hakuhĩ hakuhĩ nĩguo mone ũrĩa Jesu egwĩkwo.

Rĩu athĩnjĩri-Ngai magĩtwara Jesu kwĩ Anasi mũthuri mũkũrũ, ũrĩa warĩkĩtie gũkorũo arĩ mũthĩnjĩri-Ngai mũnene. Kĩrĩndĩ gĩtiaikarire kuo mũno. Thutha ũcio magĩtwara Jesu nyũmba-inĩ ya Kaiafa, na nĩwe waarĩ mũthĩnjĩri-Ngai mũnene. Atongoria aingĩ a ndini maagomanĩte gwake mũciĩ.

Mũciĩ gwa Kaiafa makĩmũciirithia. Andũ a maheni makĩrehwo kũu mamũigĩrĩre igenyo. Atongoria othe a ndini makiuga ũũ: ‘No mũhaka Jesu oragwo.’ Maacokire makĩmũtuĩra mata ũthiũ na makĩmũhũra ngundi nyingĩ.

Rĩrĩa maũndũ macio mothe mekĩkaga-rĩ, Petero aarĩ hau nja. Kwarĩ ũtukũ wĩ heho, na kwoguo andũ magĩakia mwaki. Rĩrĩa motaga mwaki-rĩ, ndungata ya mũirĩtu ĩkĩrora Petero, na ĩkiuga: ‘Mũndũ ũyũ o nake moima hamwe na Jesu.’

Petero agĩcokia atĩrĩ: ‘Aca, tiniĩ!’

Maita matatũ andũ makĩĩra Petero atĩ maarĩ na Jesu. Na maita macio mothe Petero agĩkaana. Na ihinda rĩa gatatũ rĩrĩa Petero aamũkanire-rĩ, Jesu akĩgarũrũka na akĩmũrora. Petero akĩigua kĩeha mũno nĩũndũ wa kwaria maheni macio, akiumagara akĩrĩra mũno.

Rĩrĩa riũa rĩarathire mũthenya wa Gatano kĩroko, athĩnjĩri-Ngai magĩtwara Jesu igoti-inĩ rĩao inene, rĩa Sanhedrini. Kũu nĩkuo maarĩrĩirie ũrĩa mekũmwĩka. Makĩmũtwara kwĩ Pontio Pilato, ũrĩa wathamakaga bũrũri wa Judea.

Athĩnjĩri-Ngai makĩĩra Pilato atĩrĩ, ‘Ũyũ nĩ mũndũ mũũru. Agĩrĩirũo nĩ kũũragwo.’ Thutha wa kũria Jesu ciũria-rĩ, Pilato akiuga: ‘Niĩ ndikuona ũndũ o na ũmwe mũũru ekĩte.’ Thutha ũcio Pilato agĩtwarithia Jesu kwĩ Herode Antipa. Herode aarĩ mwathani wa Galili, no aikaraga Jerusalemu. O nake Herode ndonire ũndũ o na ũmwe mũũru Jesu eekĩte, nĩ ũndũ ũcio akĩmũcokia kwĩ Pilato.

Pilato nĩendaga kuohora Jesu. No ĩndĩ thũ cia Jesu ciendaga mwohwo ũngĩ arekererio handũ hake. Mũndũ ũyũ nĩ mũici ũrĩa wetagwo Baraba. Rĩu nĩ ta thaa thita rĩrĩa Pilato aarutire Jesu nja. Akĩĩra kĩrĩndĩ atĩrĩ: ‘Tarora! Mũthamaki wanyu!’ No athĩnjĩri-Ngai arĩa anene makĩgũthũka makiuga: ‘Mweheriei! Mũragei! Mũragei!’ Kwoguo Pilato akĩohora Baraba, nao makĩoya Jesu makamũrage.

Mũthenya wa Gatano mathaa ma thaa inyanya Jesu akĩambwo mũtĩ igũrũ. Ndũngĩhota kũmona mbica-inĩ, no ĩndĩ mĩena-inĩ yerĩ ya Jesu nĩ haambĩtwo kĩmaramari mũtĩ-inĩ. Kahinda kanini mbere ya Jesu gũkua-rĩ, ũmwe wa imaramari icio akĩmwĩra ũũ: ‘Ũkandirikana watonya ũthamaki-inĩ waku.’ Nake Jesu agĩcokia: ‘Ngũkwĩra atĩrĩ nĩũgakorũo na niĩ thĩinĩ wa Paradiso.’

Na githĩ kĩu ti kĩĩranĩro kĩa mageganiaĩ? Wee-rĩ, nĩ ũũĩ Jesu aaragia ũhoro wa paradiso ĩrĩkũ? Paradiso ĩrĩa Ngai aathondekire mbere yaarĩ kũ? Ĩĩni, yaarĩ gũkũ thĩ. Rĩrĩa Jesu agaathana arĩ mũthamaki igũrũ matu-inĩ-rĩ, nĩakariũkia mũndũ ũyũ akenere muoyo rĩngĩ thĩinĩ wa thĩ njerũ ĩrĩ Paradiso. Na githĩ tũtiagĩrĩirũo nĩ gũkenera ũhoro ũcio mũno?