ŨRĨ wehĩta na thutha ũcio ũkĩona hinya kũhingia? Mũndũ ũyũ ũrĩ mbica-inĩ ĩno-rĩ, nĩekire ũguo na nĩkĩo aroneka arĩ na kĩeha mũno. Jefitha aarĩ mũtuithania cira njamba ya Isiraeli.

Jefitha aatũũrire ihinda-inĩ Aisiraeli maatigĩte gũthathaiya Jehova. Rĩu ningĩ mareka maũndũ moru. Nĩ ũndũ ũcio Jehova akĩrekereria andũ a Amoni mamanyariire. Ũndũ ũyũ ũgĩtũma Aisiraeli makaĩre Jehova makiuga ũũ: ‘Nĩtwĩhĩtie. Twagũthaitha ũtũhonokie!’

Andũ acio makĩĩrira nĩ ũndũ wa maũndũ marĩa moru mekĩĩte. Monanirie atĩ nĩmaherete na ũndũ wa gũcoka gũthathaiya Jehova rĩngĩ. Jehova akĩmateithia o rĩngĩ.

Jefitha aathuurirũo nĩ andũ nĩ guo ahũũrane na andũ oru a Amoni. Jefitha endaga mũno makĩria Jehova amũteithĩrĩrie mbaara-inĩ. Nĩ ũndũ ũcio akĩĩhĩtĩra Jehova ũũ: ‘Ũngĩkorũo nĩũkũrekereria ciana cia Amoni ũcineane moko-inĩ makwa, kĩrĩa gĩothe gĩkandũnga thome kiumĩte na gwakwa mũciĩ nĩ ũndũ wa ũhootani-rĩ, nĩngakũhee.’

Jehova nĩathikĩrĩirie mwĩhĩtwa wa Jefitha, na akĩmũteithĩrĩria kũhootana. Jefitha aacoka mũciĩ-rĩ, nĩ ũũĩ nũũ warĩ wa mbere kũmũtũnga? Nĩ mwarĩ, ũrĩa warĩ wa mũmwe. Jefitha akĩanĩrĩra ũũ: ‘Ĩiya, mwarĩ wakwa-ĩ! Kaĩ nĩ wandehera kĩeha-ĩ! Nĩndumũrĩire Jehova kanua gakwa na ndingĩhota kwĩricũkwo.’

Rĩrĩa mwarĩ wa Jefitha aamenyire ũhoro wa mwĩhĩtwa ũcio, o nake akĩamba kũnyitwo nĩ kĩeha. Tondũ rĩu no mũhaka atigane na ithe na arata ake. Rĩu aahũthĩrire ũtũũro wake wothe agĩtungata thĩinĩ wa hekarũ ya Jehova kũu Shilo. Rĩu akĩĩra ithe atĩrĩ-rĩ: ‘Kuona atĩ nĩwatumũrĩire Jehova kanua gaku-rĩ, no mũhaka ũũhingie.’

Kwoguo mwarĩ wa Jefitha agĩthiĩ Shilo, na akĩhũthĩra ũtũũro wake wothe agĩtungatĩra Jehova hekarũ-inĩ yake. Mĩthenya ĩna o mwaka airĩtu a Isiraeli maathiaga kũmũcerera, na magakenanĩra hamwe. Andũ nĩmeendete mwarĩ wa Jefitha tondũ aarĩ ndungata njega ya Jehova.