ANDŨ aya me thĩna-inĩ. Maaga gwĩthara no mũhaka moragwo. Nĩ athigani Aisiraeli, na mũtumia ũrĩa ũramateithia nĩ Rahabu. Rahabu atũũraga nyũmba yarĩ rũthingo-inĩ rũa itũũra rĩa Jeriko. Reke tũtuĩrie gĩtũmi kĩa andũ aya gũkorũo me thĩna-inĩ.

Aisiraeli nĩ meharĩirie kũringa Rũĩ rũa Jorodani matonye bũrũri wa Kanaani. Mbere ya gũthiĩ-rĩ, Joshua agĩtũma athigani erĩ. Akĩmeera atĩrĩ: ‘Thiĩi mũgatuĩrie bũrũri ũcio wega, o na Jeriko.’

Rĩrĩa athigani maakinyire Jeriko, maatonyire nyũmba ya Rahabu. No mũndũ ũmwe agĩkinyĩria mũthamaki wa Jeriko ũhoro ũyũ: ‘Nĩgũũkĩte athigani erĩ a Isiraeli ũtukũ ũyũ gũthigana bũrũri.’ Rĩrĩa aiguire ũhoro ũcio, mũthamaki ũcio akĩrekania harĩ Rahabu, makĩmwĩra atĩrĩ: ‘Andũ acio mokire gwaku nyũmba marutithie na nja!’ No ĩndĩ Rahabu nĩ aahithĩte athigani acio igũrũ wa nyũmba. Rĩu akiuga ũũ: ‘Ĩĩ, ti-itherũ andũ acio nĩmegũũkĩte gwakwa, no rĩrĩ, ndinamenya kũrĩa mekuumĩte nakuo. Maumagarire mbere ya gwatuka, mũrango wa itũũra ũtanahingwo. Mũngĩhiũha-rĩ, no mũmakinyĩre!’ Na rĩu andũ acio makĩmauma thutha mahanyũkĩte.

Thutha wao gũthiĩ, Rahabu akĩhanyũka igũrũ rĩa nyũmba. Eerire athigani acio ũũ: ‘Nĩnjũĩ Jehova nĩamũheete bũrũri ũyũ. Nĩtũigũĩte ũrĩa Jehova aahũithirie maĩ ma Iria Itune, hĩndĩ ĩrĩa mwoimire Misiri, na ũrĩa mwekire mũthamaki Sihoni na Ogu, acio mwaminire o kũnina biũ. Niĩ ndĩmũteithĩtie ngamwĩka wega, ndamũthaitha na inyuĩ mũnjĩke wega. Mũhonokie baba, na maitũ, o na ariũ a baba, na airĩtu ake.’

Athigani acio makĩmwĩhĩtĩra atĩ nĩ mekũhingia kĩrĩko, ĩndĩ no mũhaka Rahabu eke ũndũ ũyũ. Athigani acio makĩmwĩra, ‘Oherera rũrigi rũrũ rũtune ndirica-inĩ, na ũkonganie andũ a nyũmba yanyu othe, ũmarehe gwaku. Na rĩrĩa tũgacoka gũtaha Jeriko, nĩ tũkoona rũrigi rũrũ ndirica-inĩ yaku na tũtikoraga mũndũ o na ũmwe thĩinĩ wa nyũmba.’ Rĩrĩa athigani maahũndũkire, makĩĩra Joshua maũndũ mothe marĩa monete.