ARŨME aya mararutithia andũ wĩra na hinya. Tarora mũndũ ũyũ ũrahũra ũmwe wa aruti wĩra na kĩboko! Aruti wĩra aya nĩ Aisiraeli na nĩ a famĩlĩ ya Jakubu. Nao arũme aya maramarutithia wĩra na hinya nĩ Amisiri. Aisiraeli matuĩkĩte ngombo cia Amisiri. Gwatuĩkire ũguo atĩa?

Handũ ha mĩaka mĩingĩ-rĩ, famĩlĩ nene ya Jakubu yatũũire na thayũ Misiri. Jusufu, ũrĩa warĩ igweta mũno thĩinĩ wa Misiri na wa kerĩ kuuma he Firauni, nĩakoretwo amamenyereire. Rĩu Jusufu agĩkua. Firauni ũngĩ, ũtendete Aisiraeli, agĩtuĩka mũthamaki wa Misiri.

Kwoguo Firauni ũyũ mũũru agĩtua Aisiraeli ngombo. Aamaigĩire arangĩri oru na maarĩ eĩ. Maarutithirie Aisiraeli wĩra mũritũ mũno na gwakĩra Firauni matũũra. Ĩndĩ Aisiraeli maathire o na mbere kwongerereka. Thutha wa kahinda-rĩ, Amisiri magĩĩtigĩra atĩ Aisiraeli maahota kũingĩha na kũgĩa hinya mũno.

Nĩ ũũĩ ũrĩa Firauni eekire? Aaririe na atumia arĩa maaciarithagia Aisiraeli, na akĩmera ũũ: ‘No mũhaka mũrage kaana ga kahĩĩ gaciarũo.’ No atumia acio maarĩ ega, na matingĩoragire twana.

Kwoguo Firauni agĩatha andũ ake othe ũũ: ‘Ciana ciothe cia Aisiraeli cia tũhĩĩ, ũragai. No cia tũirĩtu-rĩ, mũreke ciikare muoyo.’ Na githĩ ndwakĩrĩ watho mũũru mũno? Tareke tuone ũrĩa kaana kamwe ga kahĩĩ kaahonokirio.

Thama 1:6-22.