LOTI na famĩlĩ yake matũũrire hamwe na Iburahimu bũrũri-inĩ wa Kanaani. Mũthenya ũmwe Iburahimu akĩĩra Loti atĩrĩ: ‘Gũtirĩ na mũgũnda mũiganu gũkũ wa mahiũ maitũ mothe. Wenda-rĩ, reke tweheranĩre. Wathiĩ ũmotho-rĩ, niĩ ngũthiĩ ũrĩo.’

Loti agĩcũthĩrĩria bũrũri ũcio. Akĩona gĩcũnjĩ kĩmwe kĩarĩ kĩega mũno kĩa bũrũri kĩarĩ na maĩ na nyeki nduru ya mahiũ make. Kũu kwarĩ Rũgongo rwa Jorodani. Loti agĩgĩthamĩria famĩlĩ yake na mahiũ make kuo. Mũthia-inĩ magĩaka mũciĩ wao itũũra-inĩ rĩa Sodomu.

Andũ a Sodomu maarĩ oru mũno. Ũndũ ũcio nĩwekĩrire Loti kĩeha mũno, tondũ aarĩ mũndũ mwega. O ũndũ ũmwe Ngai nake akĩigua kĩeha. Mũthia-inĩ, Ngai agĩtũma araika erĩ mamenyithie Loti atĩ nĩekwananga matũũra ma Sodomu na Gomora nĩ ũndũ wa waaganu wamo.

Rĩu araika makĩĩra Loti: ‘Wĩthare! Oya mũtumia waku na airĩtu aku erĩ mwehere gũkũ!’ Loti na famĩlĩ yake makĩgondereria, na kwoguo araika makĩmanyita moko makĩmoimia nja ya itũũra. O rĩo mũraika ũmwe akiuga: ‘Wĩtharei mũtikorũo nĩ muoyo! Mũtikehũgũre. Mwĩtharĩrei irĩma-inĩ mũtikaninwo.’

Loti na airĩtu ake magĩathĩka makĩũra kuuma Sodomu. Matiarũgamire o na hanini, o na matiehũgũrire. No mũtumia wa Loti ndaathĩkire. Maathiathia itĩna rĩna kuuma Sodomu-rĩ, akĩrũgama na akĩĩhũgũra. Mũtumia wa Loti agĩtuĩka ihiga rĩa cumbĩ. Wahota kũmwona mbica-inĩ?

Haha he wĩruti mwega. Ũkuonania atĩ Ngai ahonokagia arĩa mamwathĩkagĩra, nao arĩa matamwathĩkagĩra magaate muoyo wao.