1. Nĩ atĩa arĩ o mũhaka twĩke nĩguo tũkenie Ngai?

 NĨGUO tũgĩe na ũrata mwega na wa hakuhĩ hamwe na Ngai, no mũhaka twĩtheme ndini ya maheeni. No mũhaka tũrũmĩrĩre ndini ya ma. Ũmũthĩ andũ milioni nyingĩ thĩinĩ wa thĩ yothe nĩ mareka ũguo.

2. Aira a Jehova monekaga kũ, na wĩra wao nĩ ũrĩkũ?

² O ta ũrĩa Bibilia yarathĩte, athathaiya a ma makoragwo marĩ “kĩrĩndĩ kĩnene” kĩa andũ kuuma “ndũrĩrĩ-inĩ ciothe, na mĩhĩrĩga, na ikundi cia andũ, na thiomi.” (Kũguũrĩrio 7:9) Thĩinĩ wa mabũrũri 240, Aira a Jehova milioni nyingĩ marathiĩ na mbere gũteithia andũ angĩ merute ũhoro wĩgiĩ njĩra cia Jehova cia gũtũguna na ũrĩa endaga twĩke.

3. Aira a Jehova merekagĩria ũthathaiya wao kũrĩ ũ, na nĩ mĩthemba ĩrĩkũ ya ũthathaiya methemaga?

³ Aira a Jehova metĩkĩtie atĩ no Jehova wiki wagĩrĩire gũthathaiyo. Maregaga biũ kũinamĩrĩra mĩhianano kana mbica cia kĩndini. (1 Johana 5:21) Matithathayagia arĩa makuĩte na njĩra ya kũnyitanĩra mĩtugo-inĩ ta ya maraara nja kana magongona mangĩ ma gũtũũgĩria mawĩtĩkio ma ndini cia maheeni na “morutani ma ndaimono.” (1 Timotheo 4:1) O na kũrĩ ũguo, nĩ momagĩrĩria arĩa makuĩrĩirũo na njĩra ya gũtaarĩria kĩĩranĩro kĩa Ngai kĩa atĩ arĩa makuĩte nĩ makaariũkio thĩinĩ wa paradiso gũkũ thĩ.—Johana 5:28, 29; Atũmwo 24:15.

4. Andũ a Ngai makoragwo na mũrũgamo ũrĩkũ igũrũ rĩgiĩ maũndũ ma ũgo?

⁴ Aira a Jehova matiĩingĩranagia o na hanini na ũgo, ũrogi, kana ũragũri, tondũ nĩ moĩ atĩ maũndũ macio moimanĩte na Mũcukani. Matiĩhokaga maũndũ ma ũgo nĩguo mamagitĩre, ĩndĩ mehokaga Jehova amagitĩre.—Thimo 18:10.

5. Nĩ na njĩra ĩrĩkũ Aira a Jehova matarĩ a “thĩ ĩno”?

⁵ Jesu ooigire arutwo ake mangĩgakorũo “[matarĩ] a thĩ ĩno.” (Johana 17:16) Jesu we mwene nĩ aaregire kwĩingĩrania na ũteti wa matukũ-inĩ make. (Johana 6:15) O ũndũ ũmwe na ũcio, Aira a Jehova matiĩingĩranagia na ũteti, gũtũũgĩria bũrũri, o na kana macindano megiĩ indo cia kĩĩmwĩrĩ. O na kũrĩ ũguo, nĩ marĩhaga magooti na magathĩkĩra mawatho ma bũrũri ũrĩa maikaraga.—Johana 15:19; Aroma 13:1, 7.

6. Ndungata cia Ngai irũmagĩrĩra motaaro marĩkũ ũhoro-inĩ wĩgiĩ kũhikania na gũtigana?

⁶ Tondũ nĩ mathĩkagĩra mawatho ma thirikari, Aira a Jehova matigagĩrĩra atĩ kĩhiko kĩao nĩ kĩandĩkithie kũringana na watho. (Tito 3:1) Nĩ mathĩkagĩra ũtongoria wa Ngai, na nĩ ũndũ ũcio magethema kũhikia makĩria ma mũtumia ũmwe. (1 Timotheo 3:2) Makĩria ma ũguo, tondũ nĩ marũmagĩrĩra motaaro ma Bibilia mũtũũrĩre-inĩ wao, ti ũndũ mũhũthũ arĩa marĩ kĩhiko-inĩ gũtigana.

7. Aira a Jehova monanagia atĩa wendo gatagatĩ-inĩ kao?

⁷ Aira a Jehova nĩ mendaine o ene. O na gũtuĩka moimĩte ndũrĩrĩ nyingĩ na mĩhĩrĩga ĩtiganĩte, kwendana kũu o hamwe na kwenda Ngai, nĩ kũmanyitithanagia magakorũo na ũrũmwe wa ma. Rĩrĩa kwagĩa na icanjama kana kuoimĩra bata mũnene, Aira a Jehova nĩ mahiũhaga gũteithania. Monanagia wendo kũgerera mũtũũrĩre wao.—Johana 13:35.

8. Andũ a Ngai methemaga maũndũ marĩkũ moru?

⁸ Andũ a Jehova nĩ merutanagĩria mũno gũtũũra ũtũũro mũrũngĩrĩru marĩ ehokeku. Nĩ methemaga kũiya, kũhenania, waganu, ũrĩĩu, na biacara iria itagĩrĩire. Athuri matihũũraga atumia ao. Mbere ya gũtuĩka Aira a Jehova, amwe nĩ meekaga maũndũ macio, no nĩ ũndũ wa ũteithio wa Jehova nĩ maatigire. ‘Maathambirio magĩthera’ maitho-inĩ ma Ngai.—1 Akorintho 6:9-11.

9. Ibuku rĩmwe riugĩte atĩa igũrũ rĩgiĩ makanitha ma kĩĩroho ma Afrika?

⁹ Hatarĩ nganja, ndini nyingĩ ciugaga atĩ  ikoragwo na ũhoro wa ma. Igwetaga mawĩra manene marĩa irutĩte nĩguo cionanie atĩ irĩ na ũhoro wa ma. Kwa ngerekano, ibuku rĩmwe riugĩte ũũ ũhoro-inĩ wĩgiĩ makanitha marĩa metagwo ma kĩĩroho thĩinĩ wa Afrika: “Wĩra wa ago na aragũri rĩu nĩ woetwo nĩ [ikundi njerũ cia Gĩkristiano]. . . . Ciugaga nĩ irathaga maũndũ na ikaringa ciama. Anabii ao maheanaga cioneki na magataũra iroto. Mahũthagĩra maĩ matheru, maguta marathime, mũhu, mĩcumaa na ũbumba nĩguo mahonanie na magirĩrĩrie mĩrimũ.”

10, 11. Nĩ kĩĩ kĩngĩtũma tuuge atĩ ũmũthĩ ciama iria iringagwo itionanagia atĩ ndini yumanĩte na Ngai?

¹⁰ Arũmĩrĩri a ndini icio moigaga atĩ ciama nĩ cionanagia ũira wa atĩ ndini yao nĩ ĩrathimĩtwo nĩ Ngai. Ĩndĩ ciama ta icio itionanagia atĩ ndini nĩ ĩtĩkĩrĩkĩte nĩ Jehova. Shaitani nĩ ahotithagia athathaiya amwe a maheeni meke “mawĩko . . . ma hinya.” (2 Athesalonike 2:9) Makĩria ma ũguo, Bibilia yarathĩte atĩ iheo cia magegania kuuma kwĩ Ngai ta kũratha mohoro, kwaria na thiomi, na ũmenyo wa mwanya, ‘nĩ ingĩkaaniinwo.’—1 Akorintho 13:8.

¹¹ Jesu aaheanire mũkaana ũyũ: “Ti mũndũ o wothe ũnjĩtaga, ‘Mwathani, Mwathani,’ ũkaaingĩra Ũthamaki-inĩ wa igũrũ, no nĩ ũrĩa wĩkaga wendi wa Ithe witũ wa igũrũ ũkaaingĩra. Mũthenya ũcio andũ aingĩ nĩ makaanjũria atĩrĩ: ‘Mwathani, Mwathani, githĩ tũtiarathaga mohoro na rĩĩtwa rĩaku, na tũkaingata ndaimono na rĩĩtwa rĩaku, o na tũgĩka mawĩko maingĩ ma hinya na rĩĩtwa rĩaku?’ Na hĩndĩ ĩyo nĩ ngaameera atĩrĩ: ‘Niĩ ndirĩ hĩndĩ ndamũĩ! Njehererai, inyuĩ mwĩkaga maũndũ ma uuni-watho!’”—Mathayo 7:21-23.

12. Nĩa makaaingĩra Ũthamaki-inĩ wa igũrũ?

¹² Kwoguo-rĩ, nĩa makaaingĩra Ũthamaki-inĩ wa igũrũ? Nĩ arĩa mekaga wendi wa Jehova.

13. Nĩ wĩra ũrĩkũ Ngai aheete andũ ake ũmũthĩ, na nĩa maũrutaga?

¹³ Wendi wa Jehova nĩ ũrĩkũ harĩ andũ ake ũmũthĩ? Jesu ooigire ũũ: “Ũhoro ũyũ mwega wa Ũthamaki nĩ ũkaahunjio thĩ yothe ĩrĩa ĩikaragwo ũtuĩke ũira kũrĩ ndũrĩrĩ ciothe.” (Mathayo 24:14) Ũcio nĩguo wĩra ũrĩa Aira a Jehova marutaga na kĩyo.

14. Ũthamaki wa Ngai nĩ kĩĩ, na nĩa magaathana Ũthamaki-inĩ ũcio?

¹⁴ Thĩinĩ wa “thĩ yothe ĩrĩa ĩikaragwo,” Aira a Jehova mahunjagia ũhoro wa Ũthamaki wa Ngai ũrĩ thirikari ya igũrũ ĩrĩa ĩgaathana thĩinĩ wa thĩ yothe na ũthingu. Marutanaga atĩ Jehova nĩ athuurĩte Jesu Kristo atuĩke Mũthamaki wa Ũthamaki ũcio, hamwe na andũ 144,000 arĩa magaathana nake, arĩa mathuurĩtwo kuuma gũkũ thĩ.—Danieli 7:14, 18; Kũguũrĩrio 14:1, 4.

15. Ũthamaki wa Ngai ũkaaniina kĩĩ?

¹⁵ Aira a Jehova mahũthagĩra Bibilia kuonia andũ atĩ Ũthamaki wa Ngai nĩ ũkaaniina mũtabarĩre wothe wa Shaitani. Ndini ya maheeni o nayo nĩ ĩkaaniinwo o hamwe na morutani mayo marĩa matatĩithagia Ngai na makumagia Mũcukani! (Kũguũrĩrio 18:8) O nacio thirikari ciothe cia andũ iria ikararagia Ngai nĩ ikaaniinwo!—Danieli 2:44.

16. Nĩa magaatuĩka raiya a Jesu Kristo, na magaatũũra kũ?

¹⁶ Makĩria ma ũguo, Aira a Jehova nĩ mamenyithanagia atĩ Jesu Kristo nĩ akaarehe irathimo cia magegania kũrĩ arĩa othe mekaga ũrĩa Ngai endaga. Magaatuĩka raiya ake gũkũ thĩ. Bibilia ĩranĩire ũũ: “Nĩ akaahonokia athĩni arĩa makayaga makĩhoya ũteithio, o na mũndũ ũrĩa ũtarĩ hinya hamwe na ũrĩa wothe ũtarĩ na wa kũmũteithia. Andũ arĩa matarĩ hinya na arĩa athĩni nĩ akaamaiguĩra tha, na nĩ akaahonokia mĩoyo ya arĩa athĩni.”—Thaburi 72:12, 13.

17. Nĩa oiki tu mamenyithanagia Ũthamaki wa Ngai?

¹⁷ Gũtirĩ gĩkundi kĩngĩ kĩa andũ mekaga wendi wa Ngai na njĩra ya kũhunjia ũhoro mwega wa Ũthamaki. Aira a Jehova no o tu mamenyithanagia Ũthamaki wa Ngai thĩinĩ wa thĩ yothe.