NGAI MWENE-HINYA-WOTHE nĩwe Mũnene wa igũrũ na thĩ. Ũtũũro witũ wa ihinda rĩrĩ na rĩrĩa rĩũkĩte, wĩhocetie harĩ we. Arĩ na hinya wa kũheana ngerenwa o na hinya wa kũherithia. Arĩ na hinya wa kũheana muoyo o na hinya wa kweheria muoyo. Tũngĩtĩkĩrĩka harĩ we no tũgaacĩre, no tũngĩaga gwĩtĩkĩrĩka harĩ we, moimĩrĩro mangĩkorũo marĩ moru harĩ ithuĩ. Kwoguo nĩ ũndũ wa bata gũtigĩrĩra atĩ ũthathaiya witũ nĩ ũretĩkĩrĩka harĩ we!

Andũ mathathayagia na njĩra nyingĩ. Angĩkorũo ndini ihaana njĩra-rĩ, hihi nĩ ndini ciothe ciĩtĩkĩrĩkaga harĩ Ngai? Aca ti ciothe. Jesu, Mũrũ wa Ngai, oonanirie atĩ njĩra no igĩrĩ tu. Ooigire ũũ: “Mũromo nĩ mwariĩ na njĩra ĩrĩa ĩkinyagia andũ harĩ kũniinwo nĩ njariĩ, na andũ arĩa aingĩ nĩyo mageraga; no mũromo nĩ mũceke na njĩra ĩrĩa ĩkinyagia andũ muoyo-inĩ nĩ ngunderu, na andũ arĩa mamĩonaga nĩ anini.”—Mathayo 7:13, 14.

ũkoragwo na ndini mĩthemba ĩĩrĩ: ĩrĩa ĩkinyagia andũ muoyo-inĩ na ĩrĩa ­ĩkinyagia andũ harĩ kũniinwo. Muoroto wa kabuku gaka nĩ gũgũteithia wone njĩra ĩrĩa ĩkinyagia andũ mũoyo-inĩ wa tene na tene.