1, 2. Nĩ ngerekano ĩrĩkũ ĩronania ũrĩa tũngĩhota gũkũũrana ũhoro ũrĩa wa ma wĩgiĩ Ngai?

 TŨNGĨHOTA atĩa kũmenya Ngai? Hihi nĩ tũrabatara gũtuĩria morutani mothe ma ndini ciothe? Tũtingĩhota gwĩka ũguo. O na tũngĩhota-rĩ, tũngĩmenya atĩa ũrutani ũrĩa wa ma nĩ ũrĩkũ?

² Kwoguo, nĩ ũndũ wa ũrĩa kũrĩ na mawoni maingĩ ngũrani megiĩ Ngai, tũrabatara kũmenya ũhoro wa ma nĩ ũrĩkũ, ũrĩa andũ othe mangĩtĩkanĩria. Kwa ngerekano-rĩ, ta wĩcirie kũgĩte na ngarari thoko-inĩ ĩgiĩ ũrĩa gĩtambaya kĩa nguo kĩigana. Mwendia aroiga atĩ gĩtambaya kĩu nĩ kĩa mita ithatũ, no mũgũri arona ta kĩrĩ kĩnini gũkĩra ũguo. Nganja icio ingĩniinwo atĩa? Na njĩra ya gũthima gĩtambaya kĩu na fiti.

3. Bibilia yaandĩkirũo nĩkĩ?

³ Hihi nĩ gũkoragwo na kĩndũ kĩngĩringithanio na fiti gĩa gũtũteithia kũmenya ũhoro ũrĩa wa ma wĩgiĩ Ngai? Ĩĩ, nĩ Bibilia. Ngai aandĩkithirie Bibilia nĩguo andũ a kũndũ guothe mamenye ũhoro wa ma ũmwĩgiĩ. Kobĩ bilioni nyingĩ nĩ icabĩtwo. Ĩtaũrĩtwo ĩrĩ yothe kana icunjĩ ciayo na thiomi ta 3,000. Hakuhĩ mũndũ o wothe no ahote gũthoma ũhoro wa ma wĩgiĩ Ngai na rũthiomi rwake.

4. Bibilia ĩkoragwo na ũhoro ũrĩkũ?

⁴ Bibilia nĩ kĩheo kĩa goro mũno kuuma kwĩ Ngai. Ĩtaarĩirie maũndũ tũtangĩkamenya. Nĩ ĩtwĩraga ũhoro wa arĩa matũũraga ciikaro-inĩ cia roho. Ĩgatũguũrĩria meciria ma Ngai, ũrĩa atariĩ, na muoroto wake.  Ĩgatwĩra ũrĩa ahiũranĩtie na andũ ihinda-inĩ rĩa mĩaka ngiri nyingĩ. Ĩgatwĩra ũhoro wa maũndũ marĩa marĩĩkĩka ihinda rĩũkĩte. Na ĩgatuonia ũrĩa tũngĩhota kuona njĩra ya muoyo wa tene na tene.

5. Nĩ ngerekano ĩrĩkũ ĩronania atĩ Bibilia nĩ ĩtwaranaga na sayansi?

⁵ Kũrĩ na itũmi nyingĩ mũno cia gũtũma twĩtĩkie atĩ Bibilia nĩ Kiugo kĩa Ngai. Gĩtũmi kĩmwe nĩ atĩ Bibilia nĩ ĩtwaranaga na sayansi. Tene andũ thĩinĩ wa thĩ yothe meeciragia atĩ thĩ nĩ yatiirĩrĩirũo nĩ kĩndũ. Kwa ngerekano, thĩinĩ wa Afrika ya Ithũĩro, kũrĩ hĩndĩ andũ meetĩkĩtie atĩ thĩ yanyitĩrĩrũo nĩ nyoka yekũnjanĩtie, ikũnjo 3,500 igũrũ rĩa thĩ na ikũnjo 3,500 rungu rwa thĩ. Ĩndĩ makĩria ma mĩaka 3,500 mĩhĩtũku, mwandĩki ũmwe wa Bibilia ooigire atĩ “thĩ hatirĩ kĩndũ [Ngai] amĩcunjurĩtie nakĩo,” na ũguo noguo sayansi yugĩte.—Ayubu 26:7.

6. Nĩ ũira ũrĩkũ mũnene wa kuonania atĩ Bibilia yumĩte kwĩ Ngai?

⁶ Ũira ũrĩa mũnene wa kuonania atĩ Bibilia yumĩte kwĩ Ngai nĩ ũrĩa yũĩkaine harĩ kũratha maũndũ ma ihinda rĩũkĩte. Ngũrani na andũ arĩa marathaga mohoro, Ngai nĩ oĩ wega ũhoro wa mahinda mokĩte, na ũrĩa wothe eranĩra hĩndĩ ciothe nĩ ũhingaga.

7. Nĩ morathi marĩkũ ma Bibilia maahingire mahinda mahĩtũku?

⁷ Morathi maingĩ ma Bibilia nĩ maahingire mahinda-inĩ ma tene. Kwa ngerekano, o mbere ta mĩaka 700, Bibilia nĩ yarathĩte wega atĩ Jesu angĩaciarĩirũo itũũra-inĩ rĩa Bethilehemu, na ũguo noguo gwathiire. (Mika 5:2; Mathayo 2:3-9) Hamwe na morathi mangĩ maingĩ makoniĩ Jesu, Bibilia nĩ yarathĩte atĩ angĩaciarirũo nĩ mũirĩtu gathirange na thutha ũcio akunyanĩrũo na icunjĩ 30 cia betha. Morathi macio mothe o namo nĩ maahingire. Ma nĩ atĩ gũtirĩ mũndũ ũngĩahotete kũratha maũndũ macio!—Isaia 7:14; Zekaria 11:12, 13; Mathayo 1:22, 23; 27:3-5.

8. Nĩ morathi marĩkũ ma Bibilia marahinga ũmũthĩ, na maronania atĩa?

⁸ Morathi maingĩ ma Bibilia nĩ marahinga mahinda-inĩ maya. Maya nĩ mamwe mamo:

•   “Rũrĩrĩ nĩ rũgookĩrĩra rũrĩa rũngĩ [kũgerera mbaara], na ũthamaki ũũkĩrĩre ũrĩa ũngĩ. Nĩ gũkaagĩa ithingithia nene, na ng’aragu na mĩrimũ mĩũru kũndũ na kũndũ.”—Luka 21:10, 11.

•   ‘Uuni-watho nĩ ũngĩkaingĩha.’—Mathayo 24:12.

•   “Matukũ-inĩ ma kũrigĩrĩria . . . andũ nĩ magaatuĩka eyendi, endi mbeca, . . . matathĩkagĩra aciari, . . . mategiragĩrĩria, matarĩ tha, matendete maũndũ mega, . . . etĩi, mendete ikeno handũ ha kwenda Ngai.”—2 Timotheo 3:1-5.

 Na githĩ to wĩtĩkanie atĩ maũndũ macio nĩ marekĩka ũmũthĩ? Gũkorũo atĩ morathi ma Bibilia nĩ ma ma na mahingaga hatarĩ mahĩtia kuonanagia atĩ Bibilia nĩ ngũrani na mabuku marĩa mangĩ. Nĩ Kiugo kĩa Ngai gĩtongoretio nĩ roho!—2 Timotheo 3:16.

9, 10. Nĩ ũndũ ũrĩkũ ũronania atĩ Ngai ndarĩ etĩkĩria andũ magarũre Bibilia?

⁹ Ta hũũra mbica ũrĩ na kĩganda na nĩ wandĩkĩte mawatho ma kũrũmĩrĩrũo nĩ aruti aku a wĩra. Thũ yaku ĩngĩgarũrania ũrĩa wandĩkĩte-rĩ, ũngĩka atĩa? Na githĩ to ũthondeke harĩa thũ ĩyo ĩgarũrĩte? O ũndũ ũmwe na ũcio, Ngai ndetĩkagĩria andũ magarũre ma ĩrĩa ĩrĩ thĩinĩ wa Kiugo gĩake, Bibilia.

¹⁰ Andũ arĩa maanageria kũgarũra ũrutani wa Kiugo kĩa Ngai matirĩ mahota. Tũngĩringithania Bibilia ĩrĩa twĩ nayo ũmũthĩ na kobĩ cia tene cia Bibilia, ndũmĩrĩri yacio ĩkoragwo ĩhaanaine. Ũndũ ũcio ũronania atĩ Bibilia ndĩrĩ yagarũrũo mĩaka-inĩ ĩyo yothe mĩhĩtũku.