Hatarĩ nganja, morutani ma mũthingi ma Bibilia marĩa wĩrutĩte nĩ mekĩrĩte hinya wendo waku harĩ Jehova. Wendo ũcio ũbataraga gũikara ũkĩrĩmagĩrũo. (1 Petero 2:2) Kĩĩrĩgĩrĩro gĩaku kĩa muoyo wa tene na tene kĩĩhocetie harĩ wee gũthiĩ na mbere gũkuhĩrĩria Ngai na njĩra ya kwĩruta Kiugo gĩake.​—Thoma Johana 17:3; Judasi 21.

O ũrĩa ũmenyo waku wĩgiĩ Ngai ũkuongerereka, noguo wĩtĩkio waku ũrĩgĩaga na hinya. Wĩtĩkio nĩ ũrĩgũteithagia gũkenia Ngai. (Ahibirania 11:1, 6) Ũgũgũtindĩka kwĩrira na gwĩka mogarũrũku marĩa magĩrĩire mĩthiĩre-inĩ yaku.​—Thoma Atũmwo 3:19.

Ma nĩ atĩ, nĩ ũrĩendaga kwĩra arĩa angĩ maũndũ marĩa wĩrutĩte—ithuothe nĩ tũkenagĩra kwaria ũhoro mwega. Wathiĩ na mbere kwĩruta Bibilia, nĩ ũkũmenya ũrĩa ũrĩmĩhũthagĩra gũtaarĩria andũ arĩa angĩ wĩtĩkio waku harĩ Jehova na harĩ ũhoro ũrĩa mwega.​—Thoma Aroma 10:13-15.

Andũ aingĩ mambagĩrĩria kũhunjĩria arata na andũ a famĩlĩ ciao ũhoro ũrĩa mwega. Hũthĩra ũtaũku. Handũ ha kũruta ndini yao mahĩtia, meere ũhoro wa ciĩranĩro cia Ngai. Ningĩ ririkana atĩ, kaingĩ andũ magucagĩrĩrio mũno nĩ ciĩko ciaku njega gũkĩra ciugo.​—Thoma 2 Timotheo 2:24, 25.

Kwĩruta Kiugo kĩa Ngai nĩ gũgũgũteithia gũkũra kĩĩroho. Macũngĩrĩro-inĩ, no ũgĩe na ũrata wa mwanya mũno hamwe na Jehova. No ũtuĩke wake kũna ũrĩ ũmwe wa famĩlĩ yake.​—Thoma 2 Akorintho 6:18.

No ũkũre kĩĩroho na njĩra ya gũthiĩ na mbere kwĩruta Kiugo kĩa Ngai. (Ahibirania 5:13, 14) Ũria Mũira wa Jehova agũteithie kwĩruta Bibilia mũkĩhũthĩra ibuku rĩa Bibilia Ĩtũrutaga Atĩa? O ũrĩa ũgũthiĩ na mbere kwĩruta kuumana na Kiugo kĩa Ngai, noguo ũtũũro waku ũkũgaacĩra makĩria.​—Thoma Thaburi 1:1-3; 73:27, 28.

Ũhoro ũrĩa mwega uumaga kũrĩ Jehova, Ngai ũrĩa mũkeni. No ũmũkuhĩrĩrie makĩria ũngĩnyitanagĩra na andũ ake. (Ahibirania 10:24, 25) Na njĩra ya gũthiĩ na mbere kwĩrutanĩria gũkenia Jehova, ũrakinyĩra muoyo ũrĩa wa ma—muoyo wa tene na tene. Gũkuhĩrĩria Ngai nĩguo ũndũ ũrĩa mwega mũno ũngĩka.​—Thoma 1 Timotheo 1:11; 6:19.