GATHANDŨKŨ KA ŨRUTANI KA 1B
Matemo ma Ibuku rĩa Ezekieli
Ibuku rĩa Ezekieli no rĩgayanio na njĩra ĩno:
MŨRANGO WA 1 NGINYA WA 3
Mwaka wa 613 M.M.M., rĩrĩa Ezekieli aaikaraga gatagatĩ-inĩ ka Ayahudi arĩa maarĩ ithamĩrio Babuloni, nĩ oonire cioneki cia Jehova na akĩheo wĩra wa kũrathĩra Ayahudi arĩa maaikaraga hakuhĩ na rũũĩ rwa Kebari.
MŨRANGO WA 4 NGINYA WA 24
Gatagatĩ ka mwaka wa 613 na 609 M.M.M., Ezekieli nĩ aaheanire ndũmĩrĩri ciarĩ na ũrathi wĩgiĩ ituĩro kwerekera Jerusalemu na aikari a kuo arĩa maarĩ aremi na maahoyaga mĩhianano.
MŨRANGO WA 25 NGINYA WA 32
Kwambĩrĩria mwaka wa 609 M.M.M., mwaka ũrĩa Ababuloni maambĩrĩirie kũrigicĩria Jerusalemu riita rĩa mũico, Ezekieli nĩ aatiganire na Jerusalemu na akĩerekeria ndũmĩrĩri yake ya ituĩro kũrĩ mabũrũri marĩa maamathiũrũrũkĩirie marĩa maarĩ thũ—Amoni, Edomu, Misiri, Moabi, Filistia, Sidoni, na Turo.
MŨRANGO WA 33 NGINYA WA 48
Kwambĩrĩria mwaka wa 606 M.M.M., rĩrĩa itũũra rĩa Jerusalemu rĩarĩ rĩanangĩku kilomita magana maingĩ kuuma Babuloni o hamwe na hekarũ ĩrĩa yarĩ kũu, Ezekieli akaheana ndũmĩrĩri ĩrĩ na kĩĩrĩgĩrĩro—gũcokio kwa ũthathaiya mũtheru wa Jehova Ngai.
Kwoguo ibuku rĩa Ezekieli rĩbangĩtwo kũringana na ũrĩa maũndũ meekĩkire na kũringana na ũhoro ũrĩa ũrarĩrĩrio. Morathi megiĩ kwanangwo kwa Jerusalemu na hekarũ ĩrĩa yarĩ kuo marĩ mbere ya morathi maingĩ megiĩ gũcokio kwa ũthathaiya mũtheru. Ũndũ ũcio nĩ mwagĩrĩru tondũ, morathi megiĩ gũcokio kwa ũthathaiya mũtheru maronania atĩ ũthathaiya ũrĩa warĩ hekarũ-inĩ nĩ wathirĩte.
Makĩria ma ũguo, morathi ma Ezekieli kwerekera mabũrũri marĩa maamathiũrũrũkĩirie marĩa maarĩ thũ (mũrango wa 25 nginya wa 32) marĩ gatagatĩ ka ndũmĩrĩri ciake cia matuĩro kwerekera Jerusalemu na morathi megiĩ gũcokio kwa ũthathaiya mũtheru. Mũthomi ũmwe ooigire ũũ akĩaria ũhoro wa ndũmĩrĩri cia Ezekieli ciĩgiĩ matuĩro kwerekera ndũrĩrĩ: “Ciandĩkĩtwo na njĩra njega ĩronania marakara ma Ngai na thutha ũcio tha Ciake kwerekera andũ Ake, tondũ kũherithio gwa thũ ciao nĩ gĩcunjĩ gĩa kũhonokio kwa andũ Ake.”
