1. Nĩ kĩĩ gĩatũmĩte Shilo gũkorũo na kĩeha na maithori?

Samueli nĩ onaga kĩeha kĩrĩa kĩarĩ Shilo. Itũũra rĩothe rĩaiyũire maithori. Hihi nĩ ciana na atumia aigana maarĩraga nĩ ũndũ wa gũkuĩrũo nĩ maithe, athuri, anake, o na ariũ a nyina? Ũndũ ũrĩa tũũĩ nĩ atĩ arũme 4,000 a Isiraeli nĩ mooragĩtwo mbaara-inĩ na thutha ũcio magĩkua angĩ 30,000 thutha wa kũhootwo nĩ Afilisiti.—1 Sam. 4:1, 2, 10.

2, 3. Nĩ maũndũ marĩkũ moru meekĩkĩte magĩtũma Shilo yũrwo nĩ riri?

² Kĩu kĩarĩ o kĩambĩrĩria kĩa maũndũ moru marĩa mangĩekĩkire. Hofini na Finehasi, ariũ aganu a Eli, mũthĩnjĩri-Ngai mũnene maarutĩte ithandũkũ rĩa kĩrĩkanĩro kũu Shilo. Ithandũkũ rĩu, rĩrĩa rĩaigagwo harĩa hatheru mũno hekarũ-inĩ rĩonanagia atĩ Ngai aarĩ hamwe na Aisiraeli. Andũ makĩrĩoya, magĩthiĩ narĩo mbaara-inĩ mecirĩtie atĩ rĩngĩarĩ gĩthitũ gĩa kũmateithia mahootane. No Afilisiti makĩrĩtaha na makĩũraga Hofini na Finehasi.—1 Sam. 4:3-11.

³ Hekarũ ĩrĩa yarĩ kũu Shilo nĩ yaheetwo gĩtĩo mĩaka mĩingĩ tondũ nĩkuo Ithandũkũ rĩu rĩaigagwo. No rĩu rĩtiarĩ kuo rĩngĩ. Rĩrĩa Eli ũrĩa warĩ na mĩaka 98 aaiguire ũhoro ũcio, akĩgũa kuuma gĩtĩ-inĩ gĩake agĩkua. Nake mũtumia wa mũriũ agĩkua mũthenya o ũcio rĩrĩa aagĩaga mwana. Oigire ũũ atanatuĩkana: “Ũnene ũkwehera woima he Isiraeli.” Hatarĩ nganja maũndũ nĩ mangĩagarũrũkire biũ kũu Shilo.—1 Sam. 4:12-22.

4. Tũkwarĩrĩria ũndũ ũrĩkũ gĩcunjĩ-inĩ gĩkĩ?

⁴ Hihi Samueli aangĩekire atĩa thutha wa kuona ũrĩa maũndũ maathiĩte? Hihi wĩtĩkio wake nĩ ũngĩamũhotithirie gũteithia andũ acio morĩtwo nĩ ũgitĩri wa Jehova na makaaga gwĩtĩkĩrĩka nĩwe? Rĩmwe na rĩmwe no tũcemanie na moritũ ma kũgeria wĩtĩkio witũ. Nĩ ũndũ ũcio, rekei tuone maũndũ marĩa tũngĩĩruta kuumana na Samueli.

5, 6. Nĩ ũndũ ũrĩkũ Bibilia yaragĩrĩria ihinda-inĩ rĩa mĩaka 20, na Samueli eekaga atĩa hĩndĩ ĩyo?

⁵ Thutha wa maũndũ macio, Bibilia ĩtigaga kwaria ũhoro wa Samueli, ĩkarĩrĩria ũhoro wa Ithandũkũ rĩa kĩrĩkanĩro, ĩgatuonia ũũru ũrĩa wakorire Afilisiti nĩ ũndũ wa kũrĩoya. Ĩcokaga kũmũgweta mĩaka 20 thutha ũcio. (1 Sam. 7:2) Nĩ atĩa eekaga ihinda-inĩ rĩu? Bibilia nĩ ĩtũheaga macokio.

⁶ Ĩtwĩraga atĩ ihinda rĩu rĩtanambĩrĩria, “ndũmĩrĩri ya Samueli ĩgĩkinyĩrĩra Aisiraeli othe.” (1 Sam. 4:1) Bibilia yonanagia atĩ rĩrĩa mĩaka ĩyo yathirire, Samueli aaceragĩra matũũra matatũ ma Isiraeli o mwaka agatuithania maciira. Thutha ũcio agacoka kwao Rama. (1 Sam. 7:15-17) Kwoguo no tuuge atĩ o na ihinda-inĩ rĩu rĩa mĩaka 20, Samueli nĩ aarĩ na wĩra mũingĩ wa kũruta.

7, 8. (a) Nĩ ndũmĩrĩri ĩrĩkũ Samueli aakinyĩirie andũ thutha wa kũruta wĩra mũritũ mĩaka 20? (b) Andũ meekire atĩa maigua ciugo cia Samueli?

⁷ Waganu wa ariũ a Eli nĩ watũmĩte andũ maage wĩtĩkio. Kũroneka aingĩ ao maambĩrĩirie gũthathaiya ngai cia maheeni. No thutha wa Samueli kũruta wĩra mũritũ mĩaka 20, aamerire ũũ: “Mũngĩkorũo nĩmũkwenda gũcokerera Jehova na ngoro yanyu yothe, eheriai ngai cianyu cia kũngĩ, o na Maashitarothu, mũhaarĩrie ngoro cianyu cierekere Jehova, mũmũtungatagĩre we wiki, na nĩekũmũhonokia amũrute moko-inĩ ma Afilisiti.”—1 Sam. 7:3.

⁸ Aisiraeli nĩ maatoretio nĩ ‘moko ma Afilisiti.’ Thutha wa Afilisiti kũhoota Aisiraeli mbaara-inĩ, meeciragia atĩ no mahinyĩrĩrie andũ a Ngai hatarĩ mũndũ ũkũmoria. No Samueli akĩra Aisiraeli atĩ mangĩacokereire Jehova norĩo tu maũndũ mangĩagĩrire. Hihi nĩ meendaga gwĩka ũguo? Bibilia yugaga atĩ maateire mĩhianano yao, makĩambĩrĩria ‘gũtungatĩra Jehova wiki.’ Samueli akĩmeera marũrũngane Mizipa, taũni yarĩ irĩma-inĩ rũgongo rwa Jerusalemu. Andũ makĩrũrũngana, makĩĩhinga kũrĩa, na makĩĩrira nĩ ũndũ wa kũhoya ngai ingĩ.—Thoma 1 Samueli 7:4-6.

9. Afilisiti meendaga kũhũthĩra mweke ũrĩkũ, na andũ a Ngai meekire atĩa rĩrĩa maamenyire ũgwati ũrĩa warĩ mbere?

⁹ O na kũrĩ ũguo, Afilisiti nĩ maiguire ũhoro wa kĩrũrũngano  kĩu na makĩona ũrĩ mweke mwega wa kũmatharĩkĩra. Magĩtũma mbũtũ yao Mizipa ĩkanine athathaiya a Jehova. Nao Aisiraeli makĩigua ũgwati ũrĩa ũngĩamakorire. Maiyũirũo nĩ maĩ nda, makĩra Samueli amahoere. Agĩka ũguo, o na akĩruta igongona. Hĩndĩ ĩyo maarũrũnganĩte, mbũtũ ya Afilisiti ĩgĩtharĩkĩra Mizipa. Nake Jehova agĩcokia ihoya rĩa Samueli. “Akĩrurumĩria Afilisiti marurumĩ manene mũno mũthenya ũcio.”—1 Sam. 7:7-10.

10, 11. (a) Nĩkĩ no mũhaka marurumĩ marĩa Jehova aarehithiĩrie Afilisiti maarĩ ma mwanya? (b) Moimĩrĩro ma mbaara ĩrĩa yarĩ Mizipa maarĩ marĩkũ?

¹⁰ Hihi nĩ twagĩrĩirũo gwĩciria atĩ Afilisiti acio maatariĩ ta twana tũnini tũrĩa tũũragĩra harĩ maanyina twaigua marurumĩ? Aca, maarĩ thigari ciarĩ na ũmenyeru mũnene mbaara-inĩ. No mũhaka makorũo matiaiguĩte marurumĩ ta macio mbere ĩyo. Hihi nĩ tondũ maarĩ “manene mũno”? Kana nĩ tondũ maaiguire mĩgambo yamo ĩkiuma irĩma-inĩ? O ũrĩa kũngĩkorũo kwarĩ, marurumĩ macio nĩ maatũmire Afilisiti mamake mũno. Matukanĩirũo ũguo, makĩremwo nĩ gũtharĩkĩra, magĩtharĩkĩrwo arĩ o. Arũme a Isiraeli makiuma Mizipa mateng’erete, makĩmatharĩkĩra na makĩmaingatithia kũndũ kũraya nginya mũhuro wa Jerusalemu, mwena wa ithũĩro.—1 Sam. 7:11.

¹¹ Mbaara ĩyo yarehire ũgarũrũku mũnene harĩ andũ a Ngai. Matukũ-inĩ marĩa Samueli aarĩ mũtirĩrĩri bũrũri, Afilisiti nĩ maamacokeirie matũũra marĩa mothe maatahĩte.—1 Sam. 7:13, 14.

12. Nĩ na njĩra ĩrĩkũ Samueli eekire “maũndũ ma ũthingu,” na nĩ ngumo irĩkũ ciamũteithirie gwĩka ũguo?

¹² Mĩaka mĩingĩ thutha ũcio, mũtũmwo Paulo nĩ aagwetire Samueli gatagatĩ ka atiirĩrĩri bũrũri na anabii ehokeku arĩa meekire “maũndũ ma ũthingu.” (Ahib. 11:32, 33) Samueli nĩ eekire maũndũ mega na magĩrĩru maitho-inĩ ma Ngai na agĩĩkĩra arĩa angĩ ngoro meke taguo. Aahotire gwĩka ũguo tondũ aarĩ mwĩhokeku wĩra-inĩ wake na nĩ eetagĩrĩra Jehova o na gũtuĩka ti matanya mothe make maahingaga. Ningĩ nĩ aacokagia ngatho. Thutha wa ũhootani wa kũu Mizipa Samueli nĩ aahandire ihiga rĩa kũririkanaga ũrĩa Jehova aateithĩtie andũ ake.—1 Sam. 7:12.

13. (a) Nĩ ngumo irĩkũ tũkũbatara angĩkorũo nĩ tũkwĩgerekania na Samueli? (b) Ũgwĩciria ihinda rĩrĩa rĩega rĩa gũkũria ngumo ta cia Samueli nĩ rĩrĩkũ?

 ¹³ Hihi no wende gwĩkaga “maũndũ ma ũthingu”? Angĩkorũo no wende, nĩ wega wĩrute kuumana na wetereri na wĩnyihia wa Samueli. (Thoma 1 Petero 5:6.) Ithuothe nĩ tũbataraga ngumo icio. Samueli nĩ aagunĩkire nĩ ũndũ wa gũkũria ngumo icio arĩ o mũnyinyi tondũ nĩ ciamũteithirie matukũ ma thutha-inĩ rĩrĩa aacemanirie na moritũ manene makĩria.

14, 15. (a) Nĩ ũndũ ũrĩkũ Samueli eerĩgagĩrĩra ‘arĩ mũkũrũ’ ũkĩaga kũhinga? (b) Hihi Samueli nĩ aatũũnagia ciana ciake ta Eli? Taarĩria.

¹⁴ Tũcokaga gũthoma ũhoro wa Samueli rĩngĩ ‘arĩ mũkũrũ.’ Gũkinyĩria ihinda rĩu Samueli aarĩ na ariũ erĩ agima, Joeli na Abija, na nĩ aamehokeire wĩra wa kũmũteithĩrĩria gũtuithania maciira. Ũndũ wa kĩeha nĩ atĩ matiekire kũringana na ũrĩa merĩgagĩrĩrũo. O na gũtuĩka Samueli aarĩ mũthingu na mwĩhokeku, ariũ acio ake maahũthĩrire mweke ũcio kũhotomia maciira na kwamũkĩra ihaki.—1 Sam. 8:1-3.

¹⁵ Mũthenya ũmwe athuri arĩa maatongoragia thĩinĩ wa  Isiraeli nĩ maathiire kũrĩ mũnabii ũcio mũkũrũ kũmũtwarĩra mateta mao. Makĩmwĩra ũũ: “Ariũ aku matithiaga na mĩthiĩre ta yaku.” (1 Sam. 8:4, 5) Hihi Samueli nĩ aamenyaga ũguo? Bibilia ndiugĩte. No ngũrani na Eli, Samueli ndaatũũnagia ciana ciake. Jehova nĩ aarehithĩirie Eli ũũru nĩ ũndũ wa kwaga kũrũnga ciana ciake na gũcitĩĩa kũmũkĩra. (1 Sam. 2:27-29) Ĩndĩ ndonire mahĩtia ta macio harĩ Samueli.

16. Aciari arĩa ciana ciao ciamakararia maiguaga atĩa, na kĩonereria gĩa Samueli kĩngĩmahoreria atĩa?

¹⁶ Bibilia ndĩonanagia kana Samueli nĩ aaiguire thoni, agĩtangĩka, kana agĩkua ngoro rĩrĩa aamenyire ũhoro wa mĩthiĩre mĩũru ya ariũ ake. O na kũrĩ ũguo, aciari aingĩ no mahote kũmenya wega ũrĩa aaiguire. Matukũ-inĩ maya moru, ciana nyingĩ nĩ irakararia aciari na ikaga kũmatĩa. (Thoma 2 Timotheo 3:1-5.) Aciari arĩa mageragĩra ruo ta rũu no mahoorerio nĩ kĩonereria gĩa Samueli na merute nake. O na gũtuĩka ariũ ake matiarĩ ehokeku, we nĩ aatũũririe wĩhokeku wake. Ririkana atĩ, kĩonereria kĩa mũciari no kĩhote gũkinyĩra ngoro ya mwana o na rĩrĩa ciugo kana kũmũrũnga kwarema. Na aciari nĩ makoragwo na mweke wa gũkenia Ithe wao Jehova o ta ũrĩa Samueli eekire.

17. Athuri a Isiraeli meerire Samueli eke atĩa, na ũndũ ũcio watũmire aigue atĩa?

¹⁷ Ariũ a Samueli matiamenyaga ũrĩa waganu wao ũngĩarĩ na moimĩrĩro moru. Athuri a Isiraeli maacokire makĩra Samueli ũũ: “Gĩtũcarĩrie mũthamaki atũciragĩre o ta ndũrĩrĩ iria ingĩ ciothe.” Hihi ũndũ ũcio nĩ watũmire Samueli one ta arĩ we maaregaga? Aatũũrĩte ahũthĩrĩtwo nĩ Jehova mĩaka mĩingĩ arĩ mũtirĩrĩri bũrũri. No rĩu meendaga gũtongorio nĩ mũthamaki ta ndũrĩrĩ iria ingĩ handũ ha mũnabii. Aaiguire atĩa hihi? Tũthomaga ũũ: “Ũndũ ũcio ndwakenirie Samueli.”—1 Sam. 8:5, 6.

18. Jehova omĩrĩirie Samueli atĩa na akĩonania ũritũ wa mehia ma Aisiraeli?

¹⁸ Ta rora ũrĩa Jehova aacokeirie Samueli rĩrĩa aamũmenyithirie ũhoro ũcio: “Ĩtĩkĩra uuge wa andũ acio maũndũ-inĩ mothe marĩa megũkwĩra; nĩ gũkorũo tiwe maarega, no nĩ niĩ maarega, ndigatuĩke mũthamaki wao.” O na gũtuĩka ciugo icio nĩ ciomĩrĩirie Samueli, andũ acio nĩ maatuurithĩtie Ngai Mwene-Hinya-Wothe! Jehova akĩĩra mũnabii ũcio wake amenyithie Aisiraeli igũrũ rĩgiĩ moimĩrĩro moru ma gũthamakĩrũo nĩ mũndũ.  Rĩrĩa Samueli aamerire, maacokirie ũũ: “Aca, gũtirĩ hingo tũtekũgĩa na mũthamaki atũthamakagĩre.” Tondũ Samueli nĩ aathĩkagĩra Ngai wake, aathire na agĩitĩrĩria maguta mũthamaki ũrĩa Jehova aathurĩte.—1 Sam. 8:7-19.

19, 20. (a) Samueli aathĩkĩire Jehova na njĩra irĩkũ rĩrĩa eerirũo agaitĩrĩrie Saulu maguta atuĩke mũthamaki? (b) Samueli aathire na mbere gũteithia andũ a Jehova atĩa?

¹⁹ Hihi Samueli aathĩkire ta mũndũ ũtarenda kana ũratindĩkwo? Hihi nĩ aarekire gũkua ngoro gũtũme aige marakara ngoro-inĩ? Andũ aingĩ no meke ũguo no tiguo Samueli eekire. Aaitĩrĩirie Saulu maguta na agĩtĩkĩra atĩ nĩwe Jehova aathurĩte. Aamumunyire Saulu kuonania atĩ nĩ eeharĩirie kwĩnyihĩria mũthamaki ũcio mwerũ. Agĩcoka akĩĩra Aisiraeli ũũ: “Githĩ mũtikuona atĩ thĩinĩ wa andũ aya hatirĩ mũndũ o na ũmwe ũhaanaine na mũndũ ũyũ ũthurĩtwo nĩ Jehova?”—1 Sam. 10:1, 24.

²⁰ Handũ ha kũrora mahĩtia ma mũndũ ũcio Jehova aathurĩte, Samueli aarorire wega wake. Ũndũ ũrĩa we ekĩrĩire nĩ wĩkindĩru wake harĩ Ngai no ti gwĩtĩkĩrĩka nĩ andũ mataarĩ nyama-inĩ kana rũa-inĩ. (1 Sam. 12:1-4) Ningĩ nĩ aarutire wĩra ũrĩa aahetwo arĩ na wĩhokeku, agĩtaara andũ igũrũ rĩgiĩ maũndũ marĩa mangĩathũkirie ũrata wao hamwe na Ngai, na akĩmekĩra ngoro matũũre marĩ ehokeku. Ũtaaro wake nĩ wahutirie ngoro ciao na makĩmũthaitha amahoere. Aamacokeirie ũũ: “Ha ũhoro wakwa niĩ mwene-rĩ, ndĩroaga gũkanehia Jehova ngĩtiga kũmũhoera; no nĩngũmũruta gũthiaga na njĩra njega, o ĩrĩa yerekereire.”—1 Sam. 12:21-24.

21. Kĩonereria gĩa Samueli kĩngĩgũteithia atĩa ũngĩigua ũkuĩte ngoro rĩrĩa mũndũ ũngĩ aheo mweke mũna wa ũtungata?

²¹ Hihi ũrĩ waigua ũkuĩte ngoro rĩrĩa mũndũ ũngĩ aaheo mweke mũna wa ũtungata? Kĩonereria gĩa Samueli gĩtũririkanagia atĩ tũtiagĩrĩirũo kũreka ũiru kana marakara maingĩre ngoro-inĩ citũ. (Thoma Thimo 14:30.) Nĩ kũrĩ wĩra mũingĩ ndungata njĩhokeku cia Ngai ingĩruta ũcirehere gĩkeno.

22. Nĩkĩ Samueli ndaahĩtĩtie kuona Saulu arĩ mũndũ mwega kĩambĩrĩria-inĩ?

²² Saulu aarĩ mũraihu na mũrũngarũ akĩoneka, aarĩ na  ũcamba na aarĩ mwĩnyihia kĩambĩrĩria-inĩ. Kwoguo Samueli ndaahĩtĩtie kũmuona arĩ mũndũ mwega. (1 Sam. 10:22, 23, 27) Ningĩ aarĩ na kĩheo kĩa mwanya gĩa gũthuura ũrĩa egwĩka na ũtũũro wake na gwĩtuĩra matua. (Gũcok. 30:19) Hihi nĩ aahũthĩrire kĩheo kĩu wega?

23. Nĩ ngumo ĩrĩkũ Saulu aambire gũte, na aakĩrĩrĩirie kũrema atĩa?

²³ Ũndũ wa kĩeha nĩ atĩ rĩrĩa mũndũ agĩa na ũnene, kaingĩ ngumo ya mbere ĩrĩa ateaga nĩ wĩnyihia. Thutha wa kahinda gatarĩ coho, Saulu agĩkũria mwĩtĩo. Aathurire kwaga gwathĩkĩra watho wa Jehova ũrĩa aahetwo nĩ Samueli. Hĩndĩ ĩmwe nĩ aagire wetereri akĩruta igongona rĩrĩa rĩarĩ rĩrutwo nĩ Samueli. Samueli nĩ aamũrũngire na akĩmwĩra atĩ ũthamaki ndũgũtũũra thĩinĩ wa famĩlĩ yake. Handũ ha kũgarũrũka, Saulu aathire na mbere gwĩka maũndũ moru makĩria.—1 Sam. 13:8, 9, 13, 14.

24. (a) Saulu aagire gwathĩkĩra Jehova atĩa rĩrĩa eerirũo akarũe na Aamaleki? (b) Saulu eekire atĩa rĩrĩa aarũngirũo, na Jehova aatuire itua rĩrĩkũ?

²⁴ Jehova aatũmire Samueli akeere Saulu athiĩ akarũe na Aamaleki. Ũndũ ũmwe Jehova aamwĩrĩte eke nĩ kũũraga Agagi, mũthamaki mwaganu. No Saulu ndooragire Agagi, ningĩ nĩ eeigĩire mataha mega marĩa maagĩrĩire kũniinwo. Rĩrĩa Samueli aathire kũmũrũnga, onanirie atĩ nĩ aacenjetie. Handũ ha gwĩtĩkĩra mahĩtia, nĩ gwĩtetera eeteteire na akĩgeria kwĩgwatia atĩ nĩ andũ maatũmĩte eke ũguo. Rĩrĩa Saulu aaregire kũrũngwo akiuga atĩ eendaga kũruta mataha mamwe marĩ igongona kũrĩ Jehova, Samueli aamwĩrire ciugo ici ciũĩkaine mũno: “Gwathĩkĩra Jehova nĩkuo kwega gũkĩra magongona.” Samueli ndeetigĩrire kũmenyithia Saulu itua rĩa Jehova atĩ nĩ egũtembũra ũthamaki kuuma harĩ we aũhe mũndũ ũngĩ mwega kũmũkĩra. *—1 Sam. 15:1-33.

25, 26. (a) Nĩ kĩĩ gĩatũmĩte Samueli acakaĩre Saulu, na Jehova aamũrũngire atĩa na njĩra ya wendo? (b) Samueli eerutire ũndũ ũrĩkũ rĩrĩa aathire kwa Jesii?

²⁵ Samueli nĩ aarakarire mũno nĩ ũndũ wa ũremi wa Saulu. Aarĩrĩire Jehova ũtukũ mũgima nĩ ũndũ wa ũndũ ũcio. O na nĩ  aacakaire. Onete Saulu arĩ mũndũ mwega mũno, no rĩu nĩ aamũragĩte ngoro. Saulu nĩ aagarũrũkĩte, agate ngumo njega mũno iria aarĩ nacio o na akaremera Jehova. Samueli akĩrega gũgaacemania na Saulu rĩngĩ. Thutha-inĩ, Jehova akĩĩra Samueli atĩrĩ, “Ũgũtũũra ũrĩragĩra Saulu nginya hĩndĩ ĩ, kuona atĩ nĩndĩmũregete, atige gũtũũra arĩ mũthamaki wa gũthamakĩra Isiraeli? Iyũria rũhĩa rũaku maguta, ũthiĩ, ngũrekie kwĩ Jesii Mũbethilehemu, nĩ gũkorũo nĩndĩĩoneire mũthamaki thĩinĩ wa ariũ ake.”—1 Sam. 15:34, 35; 16:1.

²⁶ Mĩoroto ya Jehova ndĩhocetie harĩ wĩhokeku wa andũ matarĩ akinyanĩru. Mũndũ ũmwe angĩtiga gũkorũo arĩ mwĩhokeku Jehova nĩ acaragia ũngĩ wa kũhingia wendi Wake. Nĩ ũndũ ũcio Samueli agĩtiga gũcakaĩra Saulu. Samueli nĩ aathĩkĩire Jehova, agĩthiĩ Bethilehemu kwa Jesii kũrĩa aakorire ariũ a Jesii arũngarũ. No rĩrĩa Samueli aambĩrĩirie kũmabaara kuuma wa mbere, Jehova aamũririkanirie atige kũrora ũrĩa matariĩ makĩonwo na maitho. (Thoma 1 Samueli 16:7.) Macũngĩrĩro-inĩ, Samueli agĩkinyĩrĩra Daudi mwanake ũrĩa mũnyinyi, na nĩwe Jehova aathurĩte!

27. (a) Nĩ kĩĩ gĩateithirie wĩtĩkio wa Samueli ũthiĩ ũkĩrũmaga? (b) Wee wonaga atĩa kĩonereria kĩrĩa Samueli aaigire?

²⁷ Mĩaka-inĩ yake ya ũkũrũ atanakua, Samueli nĩ onire atĩ itua rĩa Jehova rĩa gũtua Daudi mũthamaki ithenya rĩa Saulu rĩarĩ rĩagĩrĩru. Saulu aaiguĩrĩire Daudi ũiru, akĩenda kũmũũraga na agĩtuĩka mũregenyũki. O na kũrĩ ũguo, Daudi onanirie ngumo njega ta ũcamba, wĩkindĩru, wĩtĩkio, na wĩhokeku. Wĩtĩkio wa Samueli waathiaga ũkĩrũmaga o ũrĩa aakũraga. Nĩ onire atĩ gũtirĩ thĩna o na ũmwe ũngĩtũma mũndũ akue ngoro Jehova atangĩniina kana o na aũgarũre ũtuĩke kĩrathimo. Mũthia-inĩ Samueli agĩkua, na atũũraga aririkanagwo nĩ ũndũ wa wĩhokeku wake wa hakuhĩ mĩaka igana rĩmwe. Nĩkĩo Aisiraeli othe maacakaĩire mũthuri ũcio mwĩhokeku. Ndungata cia Jehova ciagĩrĩirũo kwĩyũria ũũ: ‘Hihi nĩ ndĩĩgerekanagia na wĩtĩkio wa Samueli?’