HIHI nĩ ũĩ nĩa anene na marĩ hinya gũgũkĩra na kũngĩra? Wee ũngiuga nĩa?— Jehova Ngai nĩ mũnene gũtũkĩra. Ĩ nake Mũrũwe, Mũrutani Ũrĩa Mũnene? Hihi nĩ mũnene gũtũkĩra?— Ĩĩ, nĩ mũnene gũtũkĩra.

Jesu aatũraga hamwe na Ngai kũũrĩa igũrũ. Aarĩ kĩũmbe kĩa roho, kana mũraika. Hihi Ngai nĩ ombire araika angĩ, kana ciũmbe cia roho?— Ĩĩ, nĩ ombire araika milioni nyingĩ mũno. Araika acio nĩ anene na nĩ marĩ hinya gũtũkĩra.—Ahibirania 1:7; Danieli 7:10.

Wee nĩ ũraririkana rĩĩtwa rĩa mũraika ũrĩa waaririe na Mariamu?— Eetagwo Gaburieli. Eerire Mariamu atĩ kaana karĩa angĩagĩire kangĩetirũo Mũrũ wa Ngai. Ngai aingĩririe muoyo wa Mũrũ wake thĩinĩ wa nda ya Mariamu nĩguo Jesu aciarũo arĩ kaana gũkũ thĩ.—Luka 1:26, 27.

Hihi nĩ wĩtĩkĩtie kĩama kĩu? Nĩ wĩtĩkĩtie atĩ Jesu maatũũraga na Ngai kũũrĩa igũrũ?— Jesu nĩ oigire atĩ nĩkuo aatũũraga. Hihi Jesu aamenyire atĩa maũndũ macio? Rĩrĩa Jesu aarĩ kamwana kanini, no gũkorũo Mariamu nĩ aamwĩrire ũrĩa Gaburieli oigĩte. Ningĩ no gũkorũo Jusufu nĩ eerĩte Jesu atĩ Ngai nĩwe warĩ Ithe.

Rĩrĩa Jesu aabatithirio, Ngai nĩ aaririe kuuma igũrũ akiuga ũũ: “Ũyũ nĩ Mũrũ wakwa.” (Mathayo 3:17) Ũtukũ ũmwe mbere ya Jesu gũkua, aahoire ũũ: ‘Baba, rĩu ngoocithia ndĩ hakuhĩ nawe na riri o ta ũrĩa ndaakoragwo naguo ndĩ hakuhĩ nawe thĩ ĩtanombwo.’ (Johana 17:5) Jesu aahoire Ngai amũcokie kũu igũrũ magatũũre nake. No angĩahotire atĩa gũtũũra igũrũ rĩngĩ?— Kũngĩahotekire tu Jehova Ngai angĩamũtuire kĩũmbe kĩa roho rĩngĩ.

Ta reke ngũũrie kĩũria kĩa bata. Hihi araika othe nĩ ega? Ũgwĩciria atĩa?— Kũrĩ hĩndĩ araika othe maarĩ ega. Maarĩ ega tondũ Jehova nĩwe wamombire, na kĩndũ gĩothe Jehova ombire kĩarĩ kĩega. No thutha-inĩ mũraika ũmwe agĩtuĩka mũũru. Ũndũ ũcio wekĩkire atĩa?

Nĩguo tũmenye ũrĩa gwathiire, no mũhaka twĩririkanie ũhoro wa rĩrĩa Ngai ombire mũthuri na mũtumia wa mbere, Adamu na Hawa. Andũ amwe moigaga atĩ ũhoro wĩgiĩ Adamu na Hawa nĩ rũgano rwa maheeni. No Mũrutani Ũrĩa Mũnene nĩ aamenyaga atĩ rũgano rũu nĩ rwa ma.

Rĩrĩa Ngai ombire Adamu na Hawa, aamaigire Mũgũnda-inĩ warĩ mũthaka mũno wetagwo Edeni. Mũgũnda ũcio warĩ paradiso. Nĩ mangĩagĩire na ciana nyingĩ, famĩlĩ yao ĩnenehe, na matũũre thĩinĩ wa Paradiso tene na tene. No nĩ harĩ ũndũ ũmwe maabataraga kwĩruta. Ũndũ ũcio nĩ twawarĩrĩirie. Ta reke tuone kana nĩ tũraririkana.

 Jehova eerire Adamu na Hawa atĩ no marĩe matunda marĩa mothe mangĩendire thĩinĩ wa Mũgũnda ũcio. No nĩ harĩ matunda ma mũtĩ ũmwe meerĩtwo matikanarĩe. Ngai nĩ aameerire ũrĩa kũngĩathiire mangĩarĩire matunda macio. Aameerire ũũ: ‘No mũhaka mũgakua.’ (Kĩambĩrĩria 2:17; 3:3) Kwoguo-rĩ, nĩ ũndũ ũrĩkũ Adamu na Hawa maabataraga kwĩruta?—

Nĩ maabataraga kwĩruta gũkorũo na wathĩki. Nĩguo matũũre muoyo, no mũhaka mangĩathĩkĩire Jehova Ngai! Ndwarĩ ũndũ mũiganu Adamu na Hawa kuuga atĩ nĩ megwathĩkĩra Ngai. No mũhaka mangĩonanirie wathĩki kũgerera ciĩko ciao. Korũo nĩ maathĩkĩire Ngai, mangĩonanirie atĩ nĩ mamwendete, na nĩ marenda atuĩke Mũtongoria wao. Ũndũ ũcio ũngĩatũmire matũũre tene na tene thĩinĩ wa Paradiso. No mangĩarĩire matunda ma mũtĩ ũrĩa maakanĩtio-rĩ, mangĩonanirie ũndũ ũrĩkũ?—

Maangĩonanirie atĩ matiarĩ na ngatho nĩ ũndũ wa indo iria Ngai aamahete. Korũo nĩ wee-rĩ, nĩ ũngĩathĩkĩire Jehova?— Kĩambĩrĩria-inĩ, Adamu na Hawa nĩ maathĩkagĩra Jehova. No nĩ harĩ mũraika ũmwe waheenirie Hawa.  Agĩtũma Hawa aage gwathĩkĩra Jehova. Mũraika ũcio nĩ ũrĩkũ?—

Bibilia yugaga atĩ nyoka nĩ yaaririe na Hawa. No wee nĩ ũĩ nyoka ndĩaragia. Kwoguo gwathiire atĩa ĩkĩaria?— Nĩ mũraika watũmire nyoka ĩyo yoneke ta ĩraria. No mũraika ũcio nĩwe waragia. Mũraika ũcio aakoretwo aambĩrĩria kũgĩa na meciria moru. Eendaga Adamu na Hawa mamũthathayagie. Eendaga mamwathĩkagĩre. Eendaga atuĩke mũnene gũkĩra Ngai.

Kwoguo mũraika ũcio mũũru agĩtũma Hawa agĩe na meciria matagĩrĩire. Aahũthĩrire nyoka kwĩra Hawa ũũ: ‘Ngai nĩ aamũheenirie. Mũngĩrĩa matunda ma mũtĩ ũcio mũtigũkua. Mũgũtuĩka ogĩ o ta Ngai.’ Korũo nĩ wee-rĩ, nĩ ũngĩetĩkirie ũhoro ũcio?—

Hawa nĩ aambĩrĩirie kwĩrirĩria kĩndũ ataahetwo nĩ Ngai. Akĩrĩa itunda rĩa mũtĩ ũrĩa maakanĩtio. Agĩcoka agĩtwarĩra Adamu. Adamu ndetĩkirie ũrĩa nyoka yoigĩte. No wendo wake harĩ Hawa warĩ mũnene gũkĩra wendo wake harĩ Jehova. Nĩ ũndũ ũcio, o nake akĩrĩa itunda rĩa mũtĩ ũcio.—Kĩambĩrĩria 3:1-6; 1 Timotheo 2:14.

Meka ũguo gwathiire atĩa?— Adamu na Hawa maatuĩkire andũ matarĩ akinyanĩru,  makĩambĩrĩria gũkũra, na magĩkua. Tondũ matiarĩ akinyanĩru, ciana ciao ciothe ciaciarirũo itarĩ nginyanĩru, kwoguo o nacio igĩkũra na igĩkua. Ngai ndaarĩtie maheeni! Nĩguo andũ matũũre muoyo, no mũhaka mamwathĩkĩre. (Aroma 5:12) Bibilia ĩtwĩraga atĩ mũraika ũcio waheenirie Hawa etagwo Shaitani Ũrĩa Mũcukani, nao araika acio angĩ maatuĩkire oru metagwo ndaimono.—Jakubu 2:19; Kũguũrĩrio 12:9.

Hihi nĩ wamenya mũraika ũcio mwega wombĩtwo nĩ Ngai aatuĩkire mũũru nĩkĩ?— Nĩ tondũ nĩ aambĩrĩirie gwĩciria maũndũ moru. Eendaga gũkorũo arĩ mũnene gũkĩra Ngai. Nĩ aamenyaga atĩ Ngai eerĩte Adamu na Hawa magĩe ciana, kwoguo eendaga andũ acio othe mamũthathayagie. Mũcukani endaga andũ othe maage gwathĩkĩra Jehova. Nĩ ũndũ ũcio ageragia gũthũkia meciria maitũ.—Jakubu 1:13-15.

Mũcukani oigaga atĩ gũtirĩ mũndũ wendete Jehova biũ. Oigaga atĩ niĩ na wee tũtiendete Ngai na atĩ tũtiendaga gwĩka ũrĩa Ngai atwĩraga. Oigaga atĩ twathĩkagĩra Jehova o rĩrĩa maũndũ maitũ marathiĩ wega. Hihi ũguo Mũcukani oigaga nĩ ma? Hihi ũguo nĩguo tũhaana?

Mũrutani Ũrĩa Mũnene oigire atĩ Mũcukani nĩ mũheenania! Jesu onanirie atĩ nĩ eendete Jehova biũ na njĩra ya kũmwathĩkĩra. Na Jesu ndaathĩkĩire Ngai o rĩrĩa maũndũ make maathiaga wega. Aathĩkagĩra Ngai hingo ciothe, nginya rĩrĩa andũ angĩ maatũmaga ũkorũo ũrĩ ũndũ mũritũ gwathĩka. Aathiire o na mbere gwathĩkĩra Jehova o nginya rĩrĩa aakuire. Nĩkĩo Ngai aamũriũkirie nĩguo atũũre tene na tene.

Kwoguo ũngiuga thũ itũ ĩrĩa nene nĩ ĩrĩkũ?— Nĩ Shaitani Ũrĩa Mũcukani. Hihi no ũhote kũmuona?— Aca! No nĩ tũĩ atĩ arĩ kuo na nĩ mũnene na nĩ arĩ hinya gũtũkĩra. No nũũ mũnene kũrĩ Mũcukani?— Nĩ Jehova Ngai. Kwoguo tũrĩ na ma atĩ Ngai no ahote gũtũgitĩra.