HARĨ ciana iria ciothe cianatũũra gũkũ thĩ-rĩ, ũgwĩciria nĩ mwana ũrĩkũ wanakenia Jehova makĩria?— Nĩ Mũrũwe, Jesu. Reke twarĩrĩrie maũndũ Jesu eekire agĩtũma Ithe ũrĩa ũrĩ igũrũ akene.

Jesu na famĩlĩ yao maahũthagĩra thikũ ithatũ kuuma kwao gũthiĩ nginya Jerusalemu, kũrĩa hekarũ ya Jehova yarĩ. Jesu eetire hekarũ ĩyo “nyũmba ya Baba.” Marĩ na famĩlĩ yao, nĩ maathiaga kuo o mwaka gũkũngũĩra Pasaka.

Hĩndĩ ĩmwe rĩrĩa Jesu aarĩ na mĩaka 12, famĩlĩ yao nĩ yambĩrĩirie rũgendo rwa kũinũka thutha wa gũkũngũĩra Pasaka. No matiamenyire atĩ Jesu ndaarĩ hamwe nao nginya rĩrĩa maakinyire kũrĩa maathiaga gũkoma ũtukũ ũcio. Mariamu na Jusufu mamenya ũguo, magĩcoka Jerusalemu nĩguo magacarie Jesu. Ũgwĩciria Jesu aarĩ kũ?—

Maakorire Jesu hekarũ-inĩ. Maamũkorire agĩthikĩrĩria arutani, akĩmoragia ciũria. Na maũndũ marĩa mothe maamũragia nĩ aahotaga kũmacokeria. Nĩ maagegirio mũno nĩ macokio make mega. Hihi nĩ wona kĩrĩa gĩatũmaga Ngai akenio nĩ Mũrũwe?—

Mariamu na Jusufu nĩ maakenire na magĩtiga kũmaka rĩrĩa monire Jesu. No o na matanoka, Jesu ndaamakaga. Nĩ aamenyaga atĩ hekarũ-inĩ kwarĩ na ũgitĩri. Kwoguo akĩmoria atĩrĩ: “Mũtikũmenyaga atĩ njagĩrĩirũo gũkorũo thĩinĩ wa nyũmba ya Baba?” Jesu nĩ aamenyaga atĩ hekarũ ĩyo yarĩ nyũmba ya Ngai, na nĩ aakenagĩra gũikara kuo.

 Thutha ũcio, Mariamu na Jusufu nĩ maainũkire hamwe na Jesu kwao mũciĩ, Nazarethi. Hihi nĩ ũkuona ta Jesu aathĩkagĩra aciari ake?— Bibilia yugaga atĩ ‘aathiire na mbere kũmaathĩkĩra.’ Kwoguo eekaga maũndũ marĩa mothe aciari ake mamwĩraga eke, nginya kũruta mawĩra ma mũciĩ ta wĩra wa gũtaha maĩ kuuma gĩthima-inĩ.—Luka 2:41-52.

Ta wĩcirie ũndũ ũyũ: O na gũtuĩka Jesu aarĩ mũkinyanĩru, nĩ aathĩkagĩra aciari ake na matiarĩ akinyanĩru. Hihi Ngai nĩ aakenagio nĩ ũndũ ũcio?— Ĩĩ nĩ akenaga tondũ Kiugo gĩake kĩĩraga ciana ũũ: “Athĩkagĩrai aciari anyu.” (Aefeso 6:1) O nawe ũngĩathĩkĩra aciari aku o ta ũrĩa Jesu eekaga, nĩ ũrĩkenagia Ngai.

Ũndũ ũngĩ ũngĩka nĩguo ũkenie Ngai, nĩ kwĩra andũ arĩa angĩ ũhoro wake. Andũ amwe moigaga atĩ wĩra wa kũhunjia ndwagĩrĩirũo kũrutwo nĩ ciana. No hĩndĩ ĩmwe rĩrĩa andũ meendaga kũgiria tũhĩĩ kwaria ũhoro wa Ngai, Jesu oririe atĩrĩ: ‘Kaĩ mũtathomete thĩinĩ wa Maandĩko atĩ, “Ngai nĩ akaahotithia twana kũmũgooca”?’ (Mathayo 21:16)  Kwoguo ithuothe tũngĩenda, no twĩre andũ arĩa angĩ ũhoro wĩgiĩ Jehova, atĩ nĩ Ngai wa magegania mũno. Tũngĩka ũguo, nĩ tũrĩkenagia Ngai.

Nĩ kũ tũthomaga maũndũ megiĩ Ngai marĩa tũngĩra andũ arĩa angĩ?— Tũthomaga thĩinĩ wa Bibilia rĩrĩa tũrĩ mũciĩ. No ningĩ nĩ twĩrutaga maũndũ mangĩ maingĩ rĩrĩa twathiĩ kũrĩa andũ a Ngai macemanagia nĩguo merute ũhoro wa Ngai. No hihi andũ a Ngai nĩ arĩkũ?—

Nĩguo tũmenye, twagĩrĩirũo kũrora maũndũ marĩa andũ acio mekaga rĩrĩa macemania. Hihi maũndũ marĩa marutanaga marĩ thĩinĩ wa Bibilia? Hihi nĩ mamĩthomaga na makamĩarĩrĩria? Njĩra ta ĩyo nĩyo Ngai ahũthagĩra gũtwarĩria, kana tiguo?— Mĩcemanio ya Gĩkristiano yagĩrĩirũo gũkorũo ĩrĩ ya gũtũteithia kũigua Ngai agĩtwarĩria, githĩ tiguo?— Ĩ andũ amwe mangiuga atĩ to mũhaka wathĩkĩre maũndũ marĩa Bibilia yugaga? Hihi nĩ ũkuona ta andũ acio marĩ a Ngai?

Reke rĩu twĩcirie ũndũ ũngĩ. Bibilia yugaga atĩ andũ a Ngai nĩ arĩa “metanĩtio na rĩĩtwa rĩake.” (Atũmwo 15:14) Na tondũ Ngai eetagwo Jehova-rĩ, no tũũrie andũ acio kana Ngai wao eetagwo Jehova. Mangiuga aca, tũkamenya atĩ acio tio andũ a Ngai. Ũndũ ũngĩ andũ a Ngai mekaga, nĩ kũhunjĩria andũ ũhoro mwega wa Ũthamaki wa Ngai. Ningĩ nĩ monanagia atĩ nĩ mendete Ngai na njĩra ya gwathĩkĩra maathani make.—1 Johana 5:3.

Angĩkorũo nĩ ũĩ andũ mekaga maũndũ macio mothe, nĩ wagĩrĩirũo gũthiaga mĩcemanio-inĩ yao, gũthathaiya Ngai hamwe nao. Ningĩ nĩ wagĩrĩirũo gũthikĩrĩria wega rĩrĩa ũrĩ mĩcemanio-inĩ na gũcokia ciũria iria ciũragio kuo. Ũguo nĩguo Jesu eekire rĩrĩa aarĩ nyũmba-inĩ ya Ngai. Angĩkorũo nĩ ũrĩkaga maũndũ macio, nĩ ũrĩkenagia Ngai, o ta Jesu.

 Hihi nĩ ũĩ ciana ingĩ igwetetwo thĩinĩ wa Bibilia iria ciakenagia Ngai?— Ũmwe aarĩ Timotheo. Baba wao ndeetĩkĩtie Jehova. No mami wao Eunike na cũcũ wao Loisi nĩ meetĩkĩtie Jehova. Timotheo nĩ aamathikĩrĩirie na akĩĩruta ũhoro wĩgiĩ Jehova.

Rĩrĩa Timotheo aanenehire, Mũtũmwo Paulo nĩ aaceerire itũũra-inĩ rĩrĩa maaikaraga. Paulo nĩ onire atĩ Timotheo nĩ eendaga mũno gũtungatĩra Jehova. Nĩ ũndũ ũcio, akĩra Timotheo mathiĩ nake nĩguo atungatĩre Ngai makĩria. Kũrĩa guothe maathiaga, maaheaga andũ ũhoro wĩgiĩ Ũthamaki wa Ngai na wĩgiĩ Jesu.—Atũmwo 16:1-5; 2 Timotheo 1:5; 3:14, 15.

No hihi ciana iria igwetetwo thĩinĩ wa Bibilia ciakenagia Ngai ciothe ciarĩ tũhĩĩ?— Aca. Reke twarĩrĩrie ũhoro wa kairĩtu kamwe koimĩte Isiraeli gaakenirie Ngai. Hĩndĩ ĩyo, rũrĩrĩ rwa Suriata rwarĩ ũthũ na rũrĩrĩ rwa Isiraeli. Mũthenya ũmwe, Asuriata nĩ mathiire makĩrũa na Aisiraeli na magĩkuua kairĩtu kau. Magĩgatwara mũciĩ  kwa mũnene wa njeshi wetagwo Naamani. Gaakinya kũu gagĩtuo ndungata ya mũtumia wa Naamani.

Naamani aarĩ mũrwaru mũrimũ wĩtagwo mangũ. Gũtirĩ ndagĩtarĩ o na ũmwe wahotete kũmũteithia. No kairĩtu kau koimĩte Isiraeli nĩ geetĩkĩtie atĩ mũnabii wa Ngai nĩ angĩahotire gũteithia Naamani. No Naamani na mũtumia wake matiarĩ athathaiya a Jehova. Hihi kairĩtu kau nĩ kaamerire maũndũ marĩa koĩ? Korũo nĩwe ũngĩekire atĩa?—

Kairĩtu kau koigire ũũ: ‘Na arĩ korũo Naamani no athiĩ Isiraeli kũrĩ mũnabii wa Jehova na no kũhonio angĩhonio mũrimũ ũcio wa mangũ.’ Naamani nĩ aathikĩrĩirie kairĩtu kau, na agĩthiĩ kũrĩ mũnabii wa Jehova. Rĩrĩa eekire ũrĩa mũnabii ũcio aamwĩrire eke, no kũhona aahonire. Ũndũ ũcio ũgĩtũma Naamani atuĩke mũthathaiya wa Jehova.—2 Athamaki 5:1-15.

O ta kairĩtu kau-rĩ, wee no wende gũteithia mũndũ eerute ũhoro wa Jehova na amenye ũrĩa agĩrĩirũo nĩ gwĩka?— Hihi nĩa ũngĩteithia?— Andũ amwe no mone ta matarabatara ũteithio waku. O na kũrĩ ũguo, nĩ wega kũmeera maũndũ mega marĩa Jehova ekaga. Na mahota gũgũthikĩrĩria. Ũngĩkaga ũguo nĩ ũrĩkenagia Ngai.