HIHI nĩ ũrĩ wahĩtĩrio nĩ mũndũ?— Hihi nĩ kaũndũ eekire kana akiuga gagĩkũrakaria?— Hihi nĩ wagĩrĩirũo kwĩrĩhĩria ũmwĩke o ta ũguo aagwĩkire?—

Andũ aingĩ mangĩkwo kaũndũ koru nĩ merĩhagĩria. No Jesu aarutanire atĩ nĩ twagĩrĩirũo kuohera andũ rĩrĩa matũhĩtĩria. (Mathayo 6:12) Ĩ mũndũ angĩtũhĩtĩria maita maingĩ? Ũgwĩciria twagĩrĩirũo kũmuohera maita maigana?—

Petero nĩ eendaga kũmenya ũndũ ũcio. Mũthenya ũmwe oririe Jesu ũũ: ‘Nĩ maita maigana njagĩrĩirũo kuohera mũndũ? Hihi nĩ nginya maita mũgwanja?’ Maita mũgwanja ti maiganu. Jesu oigire ũũ: ‘Wagĩrĩirũo kuohera mũndũ ũrĩa ũngĩ maita mĩrongo mũgwanja na mũgwanja’ angĩkũhĩtĩria maita maingĩ ũguo.

Macio nĩ maita maingĩ mũno! O na mũndũ angĩtũhĩtĩrĩa maita maingĩ ũguo, ndigwĩciria no tũririkane maita macio mothe. Kana tiguo? Jesu eendaga kuuga atĩ, tũtiagĩrĩirũo gũtara maita marĩa tũhĩtĩirio nĩ andũ arĩa angĩ. Mangĩtwĩra tũmohere, nĩ twagĩrĩirũo kũmohera.

Jesu eendaga kuonia arũtwo ake atĩ kuohanĩra nĩ ũndũ wa bata mũno. Thutha wa gũcokia kĩũria kĩa Petero, nĩ  aaheire arutwo ake karũgano. Hihi no wende gũkaigua?—

Hĩndĩ ĩmwe tene nĩ kwarĩ mũthamaki warĩ mwega mũno. Nĩ eekaga andũ maũndũ mega. O na nĩ aakombagĩra ngombo ciake mbeca rĩrĩa ciabatara ũteithio. Mũthenya ũmwe mũthamaki ũcio nĩ eerire ngombo iria ciarĩ na thiirĩ wake imũrĩhe. Ngombo ĩmwe nĩ yatwarirũo harĩ mũthamaki, na yarĩ na thiirĩ wa milioni 60. Icio ciarĩ mbeca nyingĩ mũno!

 No ngombo ĩyo nĩ yahũthĩrĩte mbeca icio cia mũthamaki ciothe, na ndĩngĩahotire kũmũrĩha. Nĩ ũndũ ũcio mũthamaki akiuga ngombo ĩyo yendio. Mũthamaki oigire nginya mũtumia wayo na ciana ciayo na indo iria ciothe yarĩ nacio ciendio. Oigire mendio nĩguo mbeca icio irĩhe thiirĩ wake. Wee ũgwĩciria ngombo ĩyo yaiguire atĩa?—

Ngombo ĩyo yaturirie maru mbere ya mũthamaki ĩkĩmwĩra ũũ: “Ndagũthaitha ũhe ihinda, na nĩ ngũkũrĩha thiirĩ waku ũrĩa wothe ndĩ naguo.” Korũo nĩ wee warĩ mũthamaki-rĩ, ũngĩekire ngombo ĩyo atĩa?— Mũthamaki ũcio nĩ aaiguĩrĩire ngombo ĩyo tha. Nĩ ũndũ ũcio akĩmĩohera. Mũthamaki eerire ngombo ĩyo ndĩgatinde ĩkĩrĩha mbeca icio, o na ciringi ĩmwe. No nginya ngombo ĩyo ĩkorũo nĩ yakenire mũno!

No ngombo ĩyo yacokire ĩgĩka atĩa? Yathiire ĩgĩkora mũndũ ũngĩ warĩ ngombo tayo, warĩ na thiirĩ wayo wa ciringi 100 tu. Ĩkĩmũnyita na ĩkĩambĩrĩria kũmũita, ĩkiugaga: “Ndĩha thiirĩ wakwa wothe ũrĩa ũrĩ naguo!” Ta wĩcirie ũndũ ũcio ngombo ĩyo yekire, na nĩguo yoheirũo thiirĩ mũnene nĩ mũthamaki! Hihi nĩ ũkuona ta yekire wega?—

Ngombo ĩyo yarĩ na thiirĩ wa ciringi 100 yarĩ thĩni. Ndĩngĩahotire kũrĩha mbeca icio hau hau. Nĩ ũndũ ũcio, ĩgĩturia maru ĩkĩra ĩyo ĩngĩ atĩrĩ, “Ndagũthaitha ũhe ihinda, na nĩ ngũkũrĩha thiirĩ waku.” Nĩ ũkuona ta ngombo ĩyo yabataraga kũhe ngombo ĩyo ĩngĩ ihinda?— Korũo nĩ wee ũngĩekire atĩa?—

Ngombo ĩyo ndĩarĩ na tha ta mũthamaki. Yeendaga ĩrĩhwo mbeca ciayo hau hau. Yoigire ngombo ĩyo yarĩ na thiirĩ wayo wa ciringi 100 ĩikio njera tondũ ndĩngĩahotire kũrĩha. Ngombo iria ingĩ nĩ cionire ũndũ ũcio na itiakenire. Nĩ ciaiguĩrĩire ngombo ĩyo yaikirio njera tha mũno. Kwoguo ciathiire ikĩra mũthamaki ũhoro ũcio.

 O nake mũthamaki ndaakenire. Nĩ aarakarire mũno nĩ ũndũ wa ngombo ĩyo kwaga kuohanĩra. Kwoguo mũthamaki agĩta ngombo ĩyo akĩmĩra atĩrĩ: ‘Wee ngombo ĩno njũru, na githĩ ndikuoheire thiirĩ waku? Githĩ o nawe ndũkwagĩrĩirũo kuohera ngombo ĩrĩa ĩngĩ?’

Ngombo ĩyo yaagĩrĩirũo kwĩruta kuohanĩra kuuma kũrĩ mũthamaki ũcio mwega. No ndĩerutire ũndũ ũcio. Kwoguo mũthamaki akiuga ngombo ĩyo ĩikio njera nginya rĩrĩa ĩkaarĩha mbeca iria aamĩkombeire, milioni 60. Ĩrĩ kũu njera, ndĩngĩahotire kũruta wĩra nĩguo ĩrĩhe mũthamaki. Kwoguo ĩngĩaikarire njera nginya rĩrĩa ĩgaakua.

Jesu akĩrĩkĩrĩria rũgano rwake eerire arũmĩrĩri ake ũũ: ‘Ũguo noguo o na inyuĩ, mũngĩaga kuohagĩra ariũ a Ithe wanyu kuuma ngoro, o nake Ithe witũ ũrĩa ũrĩ igũrũ ndarĩmuohagĩra.’—Mathayo 18:21-35.

 Nĩ twagĩrĩirũo kũmenya atĩ ithuothe nĩ tũkoragwo na thiirĩ mũnene harĩ Ngai. Nginya muoyo witũ nĩwe watũheire! Tũngĩciria thiirĩ ũrĩa tũkoragwo naguo harĩ Ngai, no tuone atĩ thiirĩ ũrĩa andũ makoragwo naguo witũ nĩ mũnini mũno. Thiirĩ ũrĩa makoragwo naguo witũ nĩ ta thiirĩ wa ciringi 100 ũrĩa ngombo yarĩ naguo wa ngombo ĩrĩa ĩngĩ. No thiirĩ ũrĩa tũkoragwo naguo harĩ Ngai nĩ ũndũ wa mahĩtia maitũ, nĩ ta thiirĩ wa milioni 60 ũrĩa ngombo yarĩ naguo wa mũthamaki.

Ngai nĩ mwega mũno. O na gũtuĩka nĩ tũmũhĩtagĩria, nĩ atuohagĩra. Rĩrĩa twahĩtia, Ngai ndatwĩtagia muoyo ũrĩa aatũheire. No ũndũ ũrĩa twagĩrĩirũo kũririkana nĩ ũyũ: Ngai atuohagĩra angĩkorũo nĩ tuohagĩra andũ arĩa angĩ rĩrĩa matũhĩtĩria. Githĩ ũcio ti ũndũ wa bata kũririkana?—

Kwoguo-rĩ, mũndũ angĩkũhĩtĩria na acoke akwĩre ũmuohere-rĩ, ũngĩka atĩa? Hihi no ũmuohere?— Ĩ angĩkũhĩtĩria maita maingĩ? Hihi o na hĩndĩ ĩyo no ũmuohere?—

Korũo nĩ wee ũroiga woherũo-rĩ, githĩ to wende mũndũ ũcio akuohere?— Kwoguo o nawe nĩ wagĩrĩirũo kũmuohera. Na rĩrĩa tuohera mũndũ twagĩrĩirũo gwĩka ũguo kuuma ngoro. Tweka ũguo, nĩ tũrĩonanagia atĩ tũrĩ arũmĩrĩri a Mũrutani Ũrĩa Mũnene.