HIHI nĩ twagĩrĩirũo kuona mũndũ ta atarĩ mwega o na mbere ya kũmũmenya wega?— Aca. Tũngĩka ũguo, tũngĩonania atĩ tũtiendete mũndũ ũcio nĩ ũndũ tu ndahaana ta ithuĩ kana ndaragia rũthiomi ta rwitũ.

Hihi nĩ wega kuona andũ arĩa angĩ ũguo?— Aca. Ũndũ ũcio ndwagĩrĩire, na ti mwega o na hanini. Tũtiagĩrĩirũo gwĩka andũ arĩa angĩ maũndũ matarĩ mega atĩ tondũ matihaana ta ithuĩ.

Ta reke ngũũrie, wee nĩ ũĩ mũndũ ũkoragwo na rangi ngũrani na waku kana waragia rũthiomi rũtahaana rwaku?— Ningĩ no gũkorũo nĩ ũĩ mũndũ ũtahaana tawe tondũ wa kũrũara kana nĩ ũndũ wa gũkorũo na thĩna ũngĩ wa mwĩrĩ. Hihi wee nĩ wĩkagĩra andũ acio matahaana tawe maũndũ mega?—

Tũngĩthikĩrĩria Jesu Kristo, Mũrutani Ũrĩa Mũnene, nĩ tũrĩkagĩra andũ othe maũndũ mega. Tũtiagĩrĩirũo kuona mũndũ uumĩte bũrũri ũngĩ arĩ ngũrani na ithuĩ, o na angĩkorũo arĩ na rangi ngũrani na witũ. Twagĩrĩirũo kũmwĩkĩra maũndũ mega. Ũguo nĩguo Jesu aarutanire o na gũtuĩka andũ aingĩ matiĩkaga ũguo. Ta reke twarĩrĩrie ũndũ ũcio.

Mũyahudi ũmwe ũteendete andũ arĩa angĩ nĩ aathiire harĩ Jesu akĩmũũria atĩrĩ, ‘Njagĩrĩirũo gwĩka atĩa nĩguo ngaaheo muoyo wa tene na tene?’ Jesu nĩ aamenyaga atĩ no gũkorũo mũndũ ũcio eendaga oige atĩ andũ arĩa twagĩrĩirũo gwĩkĩra maũndũ mega no arĩa a rũrĩrĩ kana bũrũri witũ. Nĩ ũndũ ũcio, handũ ha kũmũcokeria, Jesu oririe mũndũ ũcio ũũ: ‘Watho wa Ngai ugaga twagĩrĩirũo gwĩka atĩa?’

 Mũndũ ũcio akĩmũcokeria atĩrĩ: ‘No mũhaka wende Jehova Ngai waku na ngoro yaku yothe, na no mũhaka wende mũndũ wa itũũra o ta ũrĩa wĩyendete.’ Nake Jesu akĩmwĩra atĩrĩ: ‘Nĩ wacokia wega. Ĩkaga ũguo na nĩ ũkaaheo muoyo wa tene na tene.’

O na kũrĩ ũguo, mũndũ ũcio ndeendaga gwĩkĩra andũ arĩa mataahaanaga take maũndũ mega, kana kũmonia wendo. Kwoguo akĩgeria gwetha kĩĩgwatio. Akĩũria Jesu atĩrĩ: ‘Mũndũ wa itũũra nĩ ũrĩkũ?’ No gũkorũo eendaga Jesu oige ũũ: “Mũndũ wa itũũra nĩ mũrata waku” kana, “Mũndũ ũrĩa mũhaanaine nake.” Nĩguo Jesu acokie kĩũria kĩu, aaheanire rũgano rwa Mũyahudi na Mũsamaria. Ta thikĩrĩria wĩigue ũrĩa gwathiire.

Kwarĩ mũndũ wathiaga Jeriko oimĩte itũũra rĩa Jerusalemu. Mũndũ ũcio aarĩ Mũyahudi. Hĩndĩ ĩyo aathiaga, akĩnyitwo nĩ aici, makĩmũtunya mbeca na nguo ciake. Makĩmũhũũra, makĩmũtiga mũkĩra-inĩ wa barabara arĩ hakuhĩ gũkua.

Thutha wa kahinda kanini, mũthĩnjĩri-Ngai ũmwe akĩgera barabara-inĩ ĩyo. Akĩona mũndũ ũcio wahũũrĩtwo nĩ aici. Korũo nĩ wee ũngĩekire atĩa?— Mũthĩnjĩri-Ngai ũcio aagereire mũkĩra ũcio  ũngĩ wa barabara. O na ndaarũgamire. Ndaateithirie mũndũ ũcio o na hanini.

Thutha ũcio Mũyahudi ũngĩ akĩgera barabara-inĩ ĩyo. Aarĩ Mũlawii, na aatungataga hekarũ-inĩ ĩrĩa yarĩ Jerusalemu. Hihi nĩ aarũgamire nĩguo ateithie mũndũ ũcio?— Aca. Eekire o ta mũthĩnjĩri-Ngai.

Mũsamaria ũmwe agĩcoka akĩgera barabara-inĩ ĩyo. Hihi nĩ ũramuona haarĩa agĩũka?— Rĩrĩa aakinyire hau, akĩona mũyahudi ũcio wahũũrĩtwo. No rĩrĩ, Asamaria na Ayahudi maatiendaine o na hanini. (Johana 4:9) Hihi Mũsamaria ũcio nĩ aateithirie mũndũ ũcio? Hihi nĩ eeyũririe ũũ: ‘Ndĩrateithia Mũyahudi ũyũ nĩkĩ? We angĩngora hũũrĩtwo-rĩ, no andeithie’?

 Rĩrĩa Mũsamaria ũcio onire mũndũ ũcio akomete mũkĩra-inĩ wa barabara, akĩmũiguĩra tha mũno. Akĩona ndekũmũtiga hau akue. Kwoguo, akiuma bunda-inĩ yake, agĩthiĩ harĩ mũndũ ũcio na akĩambĩrĩria kũmũthondeka kũrĩa aatihangĩtio. Agĩitĩrĩria ironda icio maguta na ndibei. Gwĩka ũguo nĩ kũngĩatũmire ironda icio ihone. Agĩcoka agĩcioha na gĩtambaya.

Mũsamaria ũcio aacokire akĩmuoya akĩmũigĩrĩra bunda igũrũ. Magĩcoka magĩthiĩ o kahora nginya mũkawa-inĩ ũmwe. Agĩkomborera mũndũ ũcio kanyũmba mũkawa-inĩ ũcio nĩguo aikare kuo, na akĩmũtungata wega mũno.

Jesu aarĩkia kũheana rũgano rũu, akĩũria Mũyahudi ũcio atĩrĩ: ‘Harĩ andũ acio atatũ-rĩ, ũkuona ta arĩ ũrĩkũ wekire ta mũndũ wa itũũra?’ Wee ũngiuga atĩa? Hihi nĩ mũthĩnjĩri-Ngai, kana nĩ Mũlawii, kana nĩ Mũsamaria ũcio?—

Mũyahudi ũcio agĩcokeria Jesu akĩmwĩra ũũ: ‘Mũndũ ũrĩa warũgamire na agĩteithia ũcio wahũũrĩtwo nĩ aici nĩwe wekire ta mũndũ wa itũũra.’ Jesu akĩmwĩra atĩrĩ: ‘Nĩ wamenya. Gĩthiĩ na wĩkage ũguo wee mwene.’—Luka 10:25-37.

Githĩ rũgano rũu rũtiarĩ rwega? Nĩ rwatũteithia  kũmenya andũ a itũũra ritũ nĩ arĩkũ. To arata aitũ tu. Ningĩ to arĩa makoragwo na rangi ta witũ kana arĩa maaragia rũthiomi ta rwitũ. Jesu aatũrutire atĩ twagĩrĩirũo gwĩkagĩra andũ othe maũndũ mega gũtekũmakania kũrĩa moimĩte, ũrĩa mahaana, kana rũthiomi rũrĩa maaragia.

Ũguo nĩguo Jehova Ngai ahaana. Ekagĩra andũ othe maũndũ mega. Jesu oigire ũũ: ‘Ithe wanyu ũrĩa ũrĩ igũrũ atũmaga riũa rĩake rĩarĩre andũ arĩa oru na arĩa ega. Na agatũma mbura yure kũrĩ andũ arĩa ega na arĩa matarĩ ega.’ Kwoguo twagĩrĩirũo gwĩkagĩra andũ othe maũndũ mega o ta Ngai.—Mathayo 5:44-48.

Kwoguo-rĩ, ũngĩka atĩa ũngĩona mũndũ ũrabatara ũteithio?— Ĩ angĩkorũo mũndũ ũcio oimĩte bũrũri ũngĩ kana arĩ na rangi ngũrani na waku? Nĩ wagĩrĩirũo kũmũteithia tondũ o nake no mũndũ wa itũũra. Ũngĩona ta ũtangĩhota kũmũteithia tondũ ũrĩ mũnini, no wĩre mũndũ ũngĩ mũnene amũteithie. No ũcarie ũteithio kuuma kũrĩ mũthigari kana mwarimũ. Ũngĩka ũguo ũngĩkorũo wĩkĩte wega o ta Mũsamaria ũcio.

Mũrutani Ũrĩa Mũnene endaga twĩkage maũndũ mega. Endaga tũteithie andũ arĩa angĩ tũtegũthuurania. Nĩkĩo aaheanire rũgano rũu rwa Mũsamaria mwega.