Kũringana na ũthuthuria ũmwe wekirũo mwaka wa 2014, gĩcunjĩ kĩa mĩrongo ĩtandatũ na ĩmwe harĩ igana kĩa andũ ethĩ a gatagatĩ ka mĩaka 18-25, metĩkĩtie atĩ ngomanio mbere ya kũhikania “ti ũndũ mũnene bũrũri-inĩ wa India.” Ndagĩtarĩ ũmwe ũrutagĩra wĩra Mumbai eerire Hindustan Times atĩ kũringana na mawoni make, “andũ ethĩ mambĩrĩria ndũgũ ti kuuga atĩ makoragwo na muoroto wa kũhikania. Matigĩaga na kĩrĩko atĩ nĩ mekũhikania o na angĩkorũo nĩ makomanĩtie, marĩ na ũrata, o na kana nĩ maraikarania.”

ŨNDŨ WA GWĨCIRIA: Hihi mĩrimũ ĩrĩa ĩgwatanagio kũgerera ngomanio na ruo rwa ngoro-rĩ, kaingĩ ciumanaga na ngomanio mbere ya kũhikania kana thutha wa kũhikania?—1 Akorintho 6:18.

Gũkararanagia kaingĩ na andũ a famĩlĩ no gũtũme mũndũ akue tene arĩ na mĩaka 35 nginya 50. Athuthuria yunivasĩtĩ-inĩ ya Copenhagen, nĩ maathuthuririe andũ hakuhĩ 10,000 a mĩaka ĩyo kwa ihinda rĩa mĩaka 11 na makĩona atĩ arĩa maakararanagia na mũndũ wa famĩlĩ kaingĩ, haakoragwo na ũhotekeku mũnene atĩ megũkua tene gũkĩra arĩa mataakoragwo na ngarari kaingĩ. Mwandĩki ũmwe wa maũndũ macio oigire atĩ kũhota kũhiũrania na mĩtangĩko, kũhingagĩria famĩlĩ mabataro, na kũiguithanagia “no kũnyihanyihie ikuũ cia tene.”

BIBILIA YUGAGA ŨŨ: “Ũrĩa ũtaingĩhagia ndeto nĩwe wĩ na ũmenyi, mũndũ wa ngoro horo nĩwe mũtaũku.”—Thimo 17:27.

Kũringana na ũthuthuria wa ica ikuhĩ wekirũo thĩinĩ wa Louisiana wĩgiĩ andũ 564 arĩa maakoretwo mahikania, wonanirie atĩ arĩa matiganaga magĩcokanagwo hĩndĩ ĩrĩa marĩ ndũgũ-inĩ, kũrĩ na ũhotekeku mũnene harĩ o kũgeria gũtigana mĩaka-inĩ yao ya mbere ĩtano thutha wa kũhikania. Na kaingĩ nĩ magaga kũiguithania na magakorũo mataiganĩire na kĩhiko kĩao.

BIBILIA YUGAGA ŨŨ: “Arĩa Ngai anyitithanĩtie [thĩinĩ wa kĩhiko], mũndũ ndakanamatigithanie.”—Mathayo 19:6.