No Ũtoorie!

IHINDA rĩaku nĩ ikinyu rĩa “[kũgĩa] na ũmĩrĩru” na woe ikinya. (1 Maũndũ ma Matukũ ma Tene 28:10) Nĩ makinya marĩkũ mangĩ ũngĩoya nĩgetha ũhote gũtiga kũnyua thigara?

Wĩigĩre mũthenya wa gũtiga kũnyua thigara. Rũhonge rwa Ũgima wa Mwĩrĩ na Motungata ma Andũ (Department of Health and Human Services) rwa Amerika (U.S.) rugaga atĩ rĩrĩa watua gũtiga kũnyua thigara, mũthenya wa mbere ũrĩa ũtekũnyua thigara ũbatiĩ gũkorũo ũrĩ gatagatĩ-inĩ ga ciumia igĩrĩ kuuma rĩrĩa watua itua rĩu. Ũndũ ũcio nĩ ũgũtũma wendi waku wa gũtiga kũnyua thigara ũkorũo ũrĩ o mũnene. Ĩkĩra rũũri mũthenya ũcio karenda-inĩ yaku, wĩre arata aku, na ndũgacenjie mũthenya ũcio o na angĩkorũo maũndũ maku nĩ megũcenjia.

Thondeka gakandi karĩ na maũndũ mangĩgũteithia gũtiga kũnyua thigara. No gakorũo na maũndũ maya marũmĩrĩire na ũndũ ũngĩ o wothe ũngĩkĩra hinya wendi waku wa gũtiga kũnyua thigara:

● Itũmi ciaku cia gũtiga kũnyua thigara

● Namba cia thimũ cia andũ ũngĩhũũrĩra rĩrĩa waigua ta ũrenda gũcokerera kũnyua thigara

● Ciugo ingĩgũteithia kũrũmia itua rĩaku, kwa ngerekano mĩhari ya Bibilia ta Agalatia 5:22, 23

Kuuaga gakandi kau hĩndĩ ciothe na ũgagathoma maita maingĩ o mũthenya. O na watiga kũnyua thigara, thiĩ na mbere gũthomaga gakandi kau rĩrĩa rĩothe waigua ũkĩenda kũnyua thigara.

Menya maũndũ marĩa matũmaga ũnyue thigara na ũrũe namo. Mũthenya ũcio ũtuĩte wa gũtiga kũnyua thigara ũtanakinya, garũrĩra mũtugo o wothe wĩmenyeretie ũhutanĩtie na kũnyua thigara. Kwa ngerekano, angĩkorũo ũmenyerete kũnyua thigara o rũcinĩ wokĩra, no weterere ta ithaa rĩmwe ũtananyua thigara. Angĩkorũo ũnyuaga thigara ũkĩrĩa kana warĩkia kũrĩa, no ũgarũrĩre mũtugo ũcio. Wĩtheme kũndũ kũrĩa andũ manyuagĩra thigara. Na wĩmenyerie kuugaga ũũ wanĩrĩire ũrĩ o wiki: “Aca ndikwenda. Nĩ ndigĩte kũnyua thigara.” Makinya ta macio nĩ megũgũteithia kwĩhaarĩria nĩ ũndũ wa mũthenya wa gũtiga kũnyua thigara. Ningĩ nĩ marĩkũririkanagia atĩ ica ikuhĩ nĩ ũgũtiga kũnyua thigara.

Wĩhaarĩrie gũtiga kũnyua thigara. O ũrĩa mũthenya waku wa gũtiga kũnyua thigara ũrakuhĩrĩria, no ũgũre indo ta karati, thuiti, njũgũ, kana indo ingĩ ta icio. Ririkania arata aku na andũ a famĩlĩ mũthenya waku wa gũtiga kũnyua thigara na ũrĩa mangĩgũteithĩrĩria. Mũthenya ũmwe mbere ya rĩrĩa ũbangĩte gũtiga kũnyua thigara, te tũbakũri tuothe twa kũiga matigari ma thigara, kĩbiriti gĩa kũgwatia thigara na kĩndũ kĩngĩ o gĩothe kĩngĩtũma ũcokerere mũtugo ũcio wa kũnyua thigara, ta thigara irĩ gwaku mũciĩ, ngaari-inĩ yaku, mĩhuko-inĩ yaku, kana harĩa ũrutagĩra wĩra. Ũhoro wa ma nĩ atĩ, nĩ ũndũ mũritũ kũhoya thigara kuuma kũrĩ mũrata kana kũgũra thigara gũkĩra kuoya thigara ĩrĩ hakuhĩ nawe. Ningĩ thiĩ na mbere kũhoya ũteithio kuuma kũrĩ Jehova, makĩria thutha wa kũnyua thigara riita rĩa mũico.—Luka 11:13.

Andũ aingĩ nĩ mahotete gũtiga kũnyua thigara. O nawe no ũhote. Weka ũguo nĩ ũkwagagĩria ũgima waku wa mwĩrĩ na uume ũkombo-inĩ wa thigara.

Kuuaga gakandi kau hĩndĩ ciothe na ũgagathoma maita maingĩ o mũthenya