“Nĩ ma, Mũrungu ndarĩ hingo angĩĩka waganu.”—Ayubu 34:12.

ŨRĨA ANDŨ MOIGAGA

Amwe moigaga atĩ maũndũ mothe mekĩkaga nĩ wendi wa Ngai. Kwoguo, metĩkĩtie atĩ Ngai nĩwe ũtũrehagĩra mĩnyamaro. Kwa ngerekano, rĩrĩa kuoneka icanjama cia ndũire, meciragia atĩ Ngai nĩwe ũracihũthĩra kũhũra andũ arĩa mehĩtie.

ŨRĨA BIBILIA YUGAGA

Bibilia ĩrutanaga wega atĩ Ngai tiwe ũrehagĩra andũ mĩnyamaro. Kwa ngerekano, Bibilia yugaga atĩ rĩrĩa twacemania na magerio, no tũkorũo tũhĩtĩtie tũngiuga ũũ: “Ndagerio nĩ Ngai.” Nĩkĩ? Tondũ “Ngai ndangĩhota kũgerio nĩ maũũru; nake we mwene ndageragia mũndũ o na ũrĩkũ.” (Jakubu 1:13) Ũguo nĩ kuuga atĩ, Ngai tiwe ũtũrehagĩra magerio marĩa tũcemanagia namo kana mĩnyamaro ĩrĩa yumanaga namo. Gwĩka ũguo kũngĩkorũo kũrĩ waganu, na “Mũrungu ndarĩ hingo angĩĩka waganu.”—Ayubu 34:12.

Angĩkorũo ti Ngai ũtũrehagĩra mĩnyamaro-rĩ, nũ ũmĩrehaga kana yuumaga kũ? Kĩeha nĩ atĩ, andũ kaingĩ nĩ manyamarĩkaga nĩ ũndũ wa kwaga gũkinyanĩra kwa arĩa angĩ. (Kohelethu 8:9) Makĩria ma ũguo, no tũcemanie na moritũ kuumana na “ũndũ ũterĩgĩrĩirũo,” ũguo nĩ kuuga, gũkorũo handũ harĩa hatagĩrĩire ihinda rĩrĩa rĩtagĩrĩire. (Kohelethu 9:11, New World Translation) Bibilia ĩrutanaga atĩ Shaitani Mũcukani, o we “mũnene wa gũkũ thĩ,” nĩwe ũtũmaga andũ manyamarĩke, tondũ “kĩrĩndĩ gĩa thĩ gĩothe nĩgĩtũire kĩnyitĩtwo nĩ ũcio mũũru.” (Johana 12:31; 1 Johana 5:19) Shaitani nĩwe ũrehagĩra andũ mĩnyamaro, no ti Ngai.

“Mathĩna-inĩ mao mothe-rĩ, o nake nĩaathĩnĩkire.”—Isaia 63:9.

ŨRĨA ANDŨ MOIGAGA

Andũ amwe meciragia atĩ Ngai ndatindanagĩra na ithuĩ rĩrĩa twacemania na magerio. Kwa ngerekano, mwandĩki ũmwe nĩ agwetete ũhoro wa kĩrĩa etĩte, Ngai “kwaga tha kana ũcayanĩri ũhoro-inĩ wĩgiĩ mĩnyamaro iitũ.” Mwandĩki ũcio oigĩte atĩ angĩkorũo Ngai arĩ kuo, no mũhaka akorũo “ndatindanagĩra na andũ tondũ ndarĩ tha.”

ŨRĨA BIBILIA YUGAGA

Handũ ha kuuga atĩ Ngai ndarĩ tha na atĩ ndatindanagĩra, Bibilia ĩrutanaga atĩ Ngai nĩ ahutagio mũno nĩ mĩnyamaro iitũ, na atĩ ica ikuhĩ nĩ arĩmĩniina kaimana. Ta wĩcirie ũhoro wa maũndũ maya matatũ ma gwĩkĩra ngoro marĩ thĩinĩ wa Bibilia.

Ngai nĩ onaga mĩnyamaro iitũ. Kuuma rĩrĩa andũ maambĩrĩirie kũnyamarĩka, gũtirĩ rĩithori o na rĩmwe rĩanaitwo Jehova * atonaga, tondũ “maitho make nĩmacũthagĩrĩria” indo ciothe. (Thaburi 11:4; 56:8) Kwa ngerekano, rĩrĩa ndungata ciake hĩndĩ ya tene cianyamaragio, Ngai oigire ũũ: “Ti-itherũ nĩnyonete mĩnyarirĩko ya andũ akwa.” No hihi aamenyaga ruo rwao o igũrũ igũrũ? Aca, tondũ aacokire akĩongerera ũũ: ‘Nĩnjũĩ maruo marĩa marĩ namo.’ (Thama 3:7) Andũ aingĩ nĩ momĩrĩirio nĩ kũmenya atĩ, Ngai nĩ onaga mĩnyamaro ĩrĩa yothe tũracemania nayo, o na magerio marĩa tũragerera andũ angĩ matekũmona kana gũtaũkĩrũo nĩmo.—Thaburi 31:7; Thimo 14:10.

Ngai nĩ atũiguagĩra tha rĩrĩa tũranyamarĩka. Jehova Ngai to kuona onaga mĩnyamaro ya andũ no nĩ ahutagio mũno nĩyo. Kwa ngerekano, Ngai nĩ aathĩnĩkaga mũno rĩrĩa ndungata ciake hĩndĩ ya tene ciacemanagia na magerio. Bibilia yugaga ũũ: “Mathĩna-inĩ mao mothe-rĩ, o nake nĩaathĩnĩkire.” (Isaia 63:9) O na gũtuĩka Ngai nĩ mũtũgĩru mũno gũkĩra andũ, nĩ amacayagĩra rĩrĩa maranyamarĩka. Nĩ ta ruo rũrĩa maraigua rũrĩ ngoro-inĩ yake! Hatarĩ nganja, ‘Jehova nĩ muuma-andũ mũno na mũigua-tha.’ (Jakubu 5:11) Makĩria ma ũguo, Jehova nĩ atũteithagia tũhote gũkirĩrĩria mĩnyamaro iitũ.—Afilipi 4:12, 13.

Ngai nĩ arĩniina mĩnyamaro ya andũ yothe. Bibilia yonanagia atĩ Ngai nĩ arĩniinĩra andũ othe mĩnyamaro thĩinĩ wa thĩ. Kũgerera Ũthamaki wake wa igũrũ, Jehova nĩ agaacenjia maũndũ ma andũ na njĩra nene, magĩre biũ. Ĩkĩaria ũhoro wĩgiĩ hĩndĩ ĩyo, Bibilia ĩranagĩra atĩ Ngai “nĩekũmagiria maithori mothe mathire maitho mao; nakĩo gĩkuũ gĩtirĩ hingo gĩgacoka kũgĩa, o na gũtirĩ hingo gũgacoka kũgĩa na kĩeha, kana kĩrĩro, kana ruo; maũndũ marĩa ma mbere nĩ mathengu magathira.” (Kũguũrĩrio 21:4) Ĩ ũhoro-inĩ wĩgiĩ arĩa makuĩte? Ngai nĩ akaamacokia muoyo rĩngĩ gũkũ thĩ nĩguo o nao makenere muoyo matekũnyamarĩka. (Johana 5:28, 29) Hihi nĩ kũrĩ mũndũ ũgaathĩnĩkaga nĩ ũndũ wa kũririkana mĩnyamaro anacemania nayo? Aca, tondũ Jehova eranĩire ũũ: “Maũndũ marĩa ma tene matikaririkanwo, o na kana marũmbũiyo.”—Isaia 65:17. *