Hihi nĩ Ũkũrũmĩrĩra Ithimi cia Ngai
Ithimi ciĩgiĩ mĩtugo iria tũthuuraga no ihutie na njĩra nene ũrĩa ũtũũro witũ ũgũkorũo ũhaana. Jehova Ngai nĩ oĩ ũguo, na nĩkĩo endaga tũtũũre kũringana na ithimi ciake.
Jehova nĩ endaga tũgĩe na ũtũũro wĩ na gĩkeno na thayũ
“Niĩ Jehova, nĩ niĩ Ngai waku, o we Ũrĩa ũkũrutaga nĩguo ũgunĩke wee mwene, o we Ũrĩa ũgũtongoragia njĩra-inĩ ĩrĩa wagĩrĩirũo kũgerera. Na arĩ korũo no ũrũmĩrĩre maathani makwa! Thayũ waku ũngĩhaana o ta rũũĩ naguo ũthingu waku ũhaane o ta makũmbĩ ma iria.”—Isaia 48:17, 18.
Tondũ Ngai nĩwe Mũũmbi witũ, nĩ oĩ ũrĩa twagĩrĩirũo gwĩka nĩguo tũkorũo na ũtũũro mwega biũ. Endaga tũrũmĩrĩre ũtongoria wake nĩgetha tũgunĩke. Rĩrĩa twarũmĩrĩra mawatho ma Ngai, tũtibataraga kwĩyũria kana nĩ tũkũgĩa na maumĩrĩro mega. Hingo ciothe tũrĩkoragwo tũtuĩte itua rĩrĩa rĩagĩrĩire, na ũndũ ũcio nĩ ũrĩtũmaga tũgĩe gĩkeno na thayũ.
Jehova ndangĩtwĩra twĩke ũndũ tũtangĩhota gwĩka.
“Maathani maya ndĩragwatha ũmũthĩ ti maritũ harĩ wee, o na kana magakorũo handũ ũtangĩmakinyĩra.”—Gũcokerithia Maathani 30:11.
No tũbatare kũgarũrĩra mwĩcirĩrie na ciĩko citũ nĩguo tũhote gũtũũra kũringana na ithimi cia Ngai ciĩgiĩ mĩtugo. O na kũrĩ ũguo, Jehova ndatwĩraga twĩke maũndũ tũtangĩhota gwĩka. Ningĩ tondũ nĩwe Mũũmbi witũ, nĩ oĩ maũndũ marĩa tũngĩhota gwĩka. Na o ũrĩa tũkũmenya Jehova, noguo tũrĩonaga atĩ “maathani make ti mũrigo.”—1 Johana 5:3.
Jehova nĩ eranĩire atĩ nĩ arĩteithagia arĩa mathuurĩte gũtũũra kũringana na ithimi ciake.
“Niĩ Jehova Ngai waku, nĩ nyitĩte guoko gwaku kwa ũrĩo, na ngakwĩra atĩrĩ, ‘Ndũgetigĩre. Nĩ ngũgũteithia.’”—Isaia 41:13.
No tũhote gũtũũra kũringana na ithimi cia Ngai ciĩgiĩ mĩtugo tondũ nĩ arĩtũteithagia. No eke ũguo kũgerera Kiugo gĩake Bibilia, kĩrĩa gĩtwĩkĩraga ngoro na gĩgatũhe kĩĩrĩgĩrĩro.
Andũ milioni nyingĩ thĩinĩ wa thĩ nĩ monete atĩ gũtũũra kũringana na ithimi cia Bibilia nĩ kwagagĩrĩtie ũtũũro wao. Tũgũkũũria wĩrute ũhoro makĩria wĩgiĩ ũtaaro ũrĩa Bibilia ĩheanaga. No wĩke ũguo na njĩra ya gũthoma kabuku getagwo Kenera Ũtũũro Tene na Tene! No koneke thĩinĩ wa jw.org/ki hatarĩ marĩhi. Gakoragwo na mathomo maya:
-
Bibilia Ĩngĩgũteithia Atĩa?
-
Bibilia nĩ Ĩtũheaga Kĩĩrĩgĩrĩro
-
Hihi no Wĩhoke Bibilia?
Ũngĩthuthuria Kiugo kĩa Ngai, Bibilia, nĩ ũkuona atĩ ti kĩhĩtũke nĩ mahinda; nĩ gĩa “kwĩhokeka hĩndĩ ciothe, rĩu na nginya tene na tene.” (Thaburi 111:8) Kũrũmĩrĩra ithimi ciĩgiĩ mĩtugo iria irĩ thĩinĩ wa Bibilia, nĩguo ũndũ ũrĩa ũngĩtũma tũgĩe na ũtũũro mwega biũ. O na kũrĩ ũguo, Ngai ndangĩtũtindĩkĩrĩria tũcirũmĩrĩre. (Gũcokerithia Maathani 30:19, 20; Joshua 24:15) Rĩu nĩ itua o ũmwe witũ abatiĩ gwĩtuĩra.
