1-2. Nĩ kĩĩ kĩngĩtũteithia gũtaũkĩrũo nĩ ũrĩa Jehova aiguaga nĩ ũndũ wa rĩĩtwa rĩake kũhakwo gĩko?

 TA HŨŨRA mbica mũndũ wendete aheanĩte ũhoro mũũru ũkwĩgiĩ. Nĩ ũĩ ũhoro ũcio nĩ wa maheeni no andũ amwe makawĩtĩkia. O na gũthũkia mũno makambĩrĩria gũtheremia maheeni macio na andũ angĩ aingĩ makawĩtĩkia. Hihi ũngĩigua atĩa? Angĩkorũo nĩ wendete andũ na no wende gũtũũria rĩĩtwa rĩega, no ũigue ũũru mũno nĩ ũndũ wa gũcambio na njĩra ĩyo.—Thim. 22:1.

² Ngerekano ĩyo no ĩtũteithie gũtaũkĩrũo nĩ ũrĩa Jehova aaiguire rĩrĩa rĩĩtwa rĩake rĩahakirũo gĩko. Mũraika ũmwe nĩ aaririe ũhoro wa maheeni ũmwĩgiĩ kũrĩ Hawa, nake agĩtĩkia maheeni macio. Maheeni macio maatũmire aciari aitũ a mbere maremere Jehova, na ũndũ ũcio ũgĩtũma mehia na gĩkuũ ithereme kũrĩ andũ othe. (Kĩam. 3:​1-6; Rom. 5:12) Kwoguo mathĩna mothe marĩa tuonaga thĩinĩ wa thĩ, ta ikuũ, mbaara, na ũthĩni, makoragwo kuo nĩ ũndũ wa maheeni marĩa Shaitani aambĩrĩirie gũtheremia mũgũnda-inĩ wa Edeni. Hatarĩ nganja Jehova nĩ atuuragwo nĩ maheeni macio na mathĩna marĩa moimanĩte namo. No ũndũ ũcio ndũtũmaga Jehova aige marũrũ ngoro-inĩ. Handũ ha ũguo, we atũũrĩte arĩ “Ngai ũrĩa mũkeni.”—1 Tim. 1:11.

3. Nĩ mweke ũrĩkũ twĩ naguo?

³ Tũrĩ na mweke wa kũnyita itemi harĩ gũtheria rĩĩtwa rĩa Jehova na njĩra ya gwathĩkĩra rĩathani rĩrĩ: “Goocai rĩĩtwa rĩa Jehova.”  (Thab. 113:1) Twĩkaga ũguo rĩrĩa twera arĩa angĩ mawega ma Jehova. Hihi wee nĩ ũgoocaga rĩĩtwa rĩa Jehova? Rekei twarĩrĩrie itũmi ithatũ nene iria irĩtũteithagia kũgooca rĩĩtwa rĩa Ngai witũ na ngoro yothe.

NĨ TŨKENAGIA JEHOVA RĨRĨA TWAGOOCA RĨĨTWA RĨAKE

4. Nĩ kĩĩ gĩtũmaga Jehova akene rĩrĩa tũramũgooca? Heana ngerekano. (Ningĩ rora mbica.)

⁴ Nĩ tũkenagia Ithe witũ wa igũrũ rĩrĩa twagooca rĩĩtwa rĩake. (Thab. 119:108) No hihi ũguo nĩ kuuga atĩ Ngai mwene hinya wothe atariĩ ta andũ matarĩ akinyanĩru arĩa meriragĩria kũgaathĩrĩrio nĩguo maigue marĩ a bata? Aca. Ta wĩcirie ngerekano ĩno. Ta hũũra mbica kairĩtu gatengʼerete harĩ ithe gakamũhĩmbĩria gakamwĩra: “Gũtirĩ baba ũngĩ mwega tawe.” Ithe agakena na akahutio mũno nĩ ciugo icio ciako. Hihi no tuuge atĩ ithe akena tondũ akoragwo akĩĩrirĩria kũgaathĩrĩrio nĩ mwana wake nĩguo aigue arĩ wa bata? Aca. Tondũ nĩ endete kairĩtu gake, no tũkorũo na ma atĩ akena tondũ nĩ kamuonia atĩ nĩ kamwendete na atĩ karĩ na ngatho nĩ ũndũ wa maũndũ marĩa agekagĩra. Nĩ oĩ atĩ kangĩkũra karĩ na mwerekera ta ũcio nĩ karĩkoragwo na gĩkeno. Itũmi o ta icio nĩcio itũmaga Jehova, Ithe witũ wa igũrũ akene rĩrĩa twamũgooca.

5. Nĩ maheeni marĩkũ tũteithagĩrĩria kũguũria rĩrĩa tũragooca rĩĩtwa rĩa Ngai?

⁵ Rĩrĩa twagooca Ithe witũ wa igũrũ, nĩ tũteithagĩrĩria kũguũria maheeni marĩa Shaitani aaririe igũrũ ritũ. Shaitani aaugire atĩ gũtirĩ mũndũ ũngĩtũũria wĩhokeku harĩ gũtetera rĩĩtwa rĩa Ngai. Kũringana na Shaitani, gũtirĩ mũndũ ũngĩhota gũtũũria wĩkindĩru wake harĩ Ngai. Aaugire atĩ ithuothe no tũtige gũtungatĩra Ngai tũngĩona ta tũkũgunĩka tweka ũguo. (Ayub. 1:9-11; 2:4) No Ayubu nĩ aatũũririe wĩhokeku harĩ Ngai na kwoguo akĩonania atĩ Shaitani nĩ mũheenania. Hihi wee nĩ ũkwĩrutanĩria gũtũũria wĩhokeku? O ũmwe witũ arĩ na mweke wa gũtetera rĩĩtwa rĩa Ithe witũ wa igũrũ na kũmũkenia na njĩra ya kũmũtungatĩra tũrĩ ehokeku. (Thim. 27:11) Ũcio nĩ mweke wa mwanya tũkoragwo naguo.

6. Tũngĩĩgerekania atĩa na Mũthamaki Daudi na Alawii? (Nehemia 9:5)

⁶ Andũ arĩa mendete Jehova nĩ magoocaga rĩĩtwa rĩake na ngoro yothe. Mũthamaki Daudi aaugire ũũ: “Reke niĩ ngooce Jehova; kĩndũ gĩothe kĩrĩa kĩrĩ thĩinĩ wakwa nĩ kĩgooce rĩĩtwa rĩake itheru.” (Thab. 103:1) Daudi nĩ aataũkagĩrũo atĩ kũgooca rĩĩtwa rĩa Jehova nĩ kũgooca Jehova we mwene. Rĩĩtwa rĩa Jehova rĩrũgamagĩrĩra ũrĩa atariĩ, kwoguo rĩrĩa rĩagwetwo twĩciragia ũhoro wa ngumo ciake  na mawĩko make ma magegania. Daudi oonaga rĩĩtwa rĩa Ithe witũ wa igũrũ rĩrĩ itheru na akarĩgooca. Eekaga ũguo na “kĩndũ gĩothe kĩrĩa [kĩarĩ] thĩinĩ” wake—ũguo nĩ kuuga na ngoro yake yothe. O na Alawii maakoragwo mũhari-inĩ wa mbere harĩ kũgooca Jehova. Nĩ maamenyaga atĩ matingĩona ciugo njiganu cia kũgooca rĩĩtwa itheru rĩa Jehova. (Thoma Nehemia 9:5.) Hatarĩ nganja, rũgooco rũu rwa kuuma ngoro nĩ rwakenagia Jehova.

7. Tũngĩgooca Jehova atĩa tũrĩ ũtungata-inĩ na mĩhangʼo-inĩ itũ ya o mũthenya?

⁷ O na ithuĩ ũmũthĩ no tũkenie Jehova na njĩra ya kwaragia ũhoro wake tũcanjamũkĩte, na tũkonania atĩ tũrĩ na ngatho harĩ we na nĩ tũmwendete. Rĩrĩa tũrĩ ũtungata, twagĩrĩirũo kũririkana atĩ muoroto witũ mũnene nĩ gũteithia andũ gũkuhĩrĩria Jehova na kũmateithia kuona Ithe witũ ta ũrĩa tũmuonaga. (Jak. 4:8) Nĩ tũkenagĩra kuonia andũ ũrĩa Bibilia ĩguũragia igũrũ rĩgiĩ Jehova, ngumo ciake ta wendo, kĩhooto, ũũgĩ, hinya, na ingĩ nyingĩ itũgucagĩrĩria. Ningĩ nĩ tũgoocaga Jehova na tũkamũkenia rĩrĩa twerutanĩria kwĩgerekania nake. (Ef. 5:1) Rĩrĩa tweka ũguo, andũ no mone atĩ tũrĩ ngũrani na andũ arĩa angĩ thĩinĩ wa thĩ ĩno ĩiyũire waganu na mende kũmenya gĩtũmi. (Mat. 5:​14-16) Na rĩrĩa twagĩa na mweke wa kwaranĩria nao twĩ mĩhangʼo-inĩ ya o mũthenya, no tũmataarĩrie kĩrĩa gĩtũmaga tũkorũo tũrĩ ngũrani. Tweka ũguo, andũ a ngoro njega nĩ marĩgucagĩrĩrio harĩ Ngai witũ. Rĩrĩa twagooca Jehova na njĩra ta icio, nĩ tũkenagia ngoro yake.—1 Tim. 2:​3, 4.

NĨ TŨKENAGIA JESU RĨRĨA TWAGOOCA RĨĨTWA RĨA JEHOVA

8. Jesu aigĩte kĩonereria atĩa harĩ kũgoocithia rĩĩtwa rĩa Jehova?

⁸ Harĩ ciũmbe iria ciothe ithathayagia Jehova kũrĩa igũrũ na gũkũ thĩ, gũtirĩ ũĩ Jehova wega makĩria ta Jesu. (Mat. 11:27) Jesu nĩ endete Ithe na nĩ aigĩte kĩonereria harĩ kũgoocithia rĩĩtwa rĩa Jehova. (Joh. 14:31) Rĩrĩa aahoyaga ũtukũ wa mũico atanakua, eerire Ithe ũũ akĩaria ũhoro wĩgiĩ ũndũ ũrĩa wa bata makĩria aahingirie ũtungata-inĩ wake gũkũ thĩ: “Nĩ ndĩmamenyithĩtie rĩĩtwa rĩaku.” (Joh. 17:26) Hihi eendaga kuuga atĩa?

9. Nĩ ngerekano ĩrĩkũ Jesu aahũthĩrire gũtaarĩria wega ũrĩa Ithe atariĩ?

⁹ Jesu to kũmenyithia aamenyithirie andũ atĩ Ngai etagwo Jehova. Ayahudi arĩa aarutaga nĩ mooĩ rĩĩtwa rĩa Ngai. No Jesu nĩ ooire ikinya rĩa ‘kũmataarĩria ũhoro Wake.’ (Joh. 1:​17, 18) Kwa ngerekano, Maandĩko ma Kĩhibirania nĩ maguũrĩtie atĩ Jehova nĩ arĩ tha na nĩ mũcayanĩri. (Tham. 34:5-7) Jesu nĩ aathathaũrire ũhoro ũcio wega rĩrĩa aaheanire ngerekano ya mwanake ũrĩa worĩte. Rĩrĩa twathoma ũrĩa ithe aamuonire “arĩ o haraya” agĩcoka, agĩtengʼera kũmũtũnga, akĩmũhĩmbĩria, na akĩmuohera kuuma ngoro, nĩ tũtaũkagĩrũo wega nĩ tha na ũcayanĩri wa Jehova. (Luk. 15:​11-32) Hatarĩ nganja Jesu nĩ aaguũririe ũrĩa Ithe atariĩ kũna.

10. (a) Tũmenyaga atĩa atĩ Jesu nĩ aahũthagĩra rĩĩtwa rĩa Ithe na atĩ nĩ eendaga andũ arĩa angĩ marĩhũthĩre? (Mariko 5:19) (Ningĩ rora mbica.) (b) Jesu endaga twĩke atĩa ũmũthĩ?

¹⁰ Hihi Jesu nĩ eendaga andũ angĩ o nao mahũthĩre rĩĩtwa rĩa Ngai? Hatarĩ nganja! Kwahoteka atongoria amwe a ndini moonaga ta kũgweta rĩĩtwa rĩa Ngai arĩ kũrĩagĩra gĩtĩo tondũ nĩ itheru mũno, no Jesu ndaarekire ũndũire ũcio ũtaaumanĩte na Maandĩko ũmũgirĩrĩrie gũtĩithia rĩĩtwa rĩa Ithe. Kwa ngerekano ta wĩcirie ũhoro wĩgiĩ rĩrĩa aahonirie mũndũ warĩ na ndaimono gĩcigo-inĩ kĩa Agerasi. Andũ a kũu nĩ meetigĩrire mũno na magĩthaitha Jesu aume kũu, na kwoguo ndaaikarire gĩcigo-inĩ kĩu. (Mar. 5:16, 17) O na kũrĩ ũguo,  Jesu nĩ eendaga andũ a kũu mamenye rĩĩtwa rĩa Jehova. Kwoguo akĩĩra mũndũ ũcio aahonetie athiĩ akeere andũ ũrĩa Jehova amwĩkĩire, no ti ũrĩa Jesu amwĩkĩire. (Thoma Mariko 5:19.) a O na ũmũthĩ, Jesu nĩ endaga tũmenyithanie rĩĩtwa rĩa Ithe thĩinĩ wa thĩ yothe. (Mat. 24:14; 28:19, 20) Tweka ũguo nĩ tũkenagia Jesu Mũthamaki witũ.

11. Jesu aarutire arũmĩrĩri ake mahoyage igũrũ rĩgiĩ ũndũ ũrĩkũ, na ũndũ ũcio nĩ wa bata nĩkĩ? (Ezekieli 36:23)

¹¹ Jesu nĩ aamenyaga atĩ muoroto wa Jehova nĩ gũtheria rĩĩtwa rĩake nĩ ũndũ wa maheeni marĩa mothe marĩtio igũrũ rĩake. Nĩkĩo Jesu aarutire arũmĩrĩri ake mahoyage ũũ: “Ithe witũ ũrĩ igũrũ, rĩĩtwa rĩaku nĩ rĩtherio.” (Mat. 6:9) Jesu nĩ aataũkagĩrũo atĩ ũcio nĩguo ũndũ ũrĩa mũnene wagĩrĩirũo gwĩkĩrĩrũo nĩ ũũmbi wothe wa Jehova. (Thoma Ezekieli 36:23.) Gũtirĩ kĩũmbe kĩngĩ igũrũ na thĩ kĩrĩ gĩatheria rĩĩtwa rĩa Jehova ta ũrĩa Jesu eekire. No rĩrĩa Jesu aanyitirũo, thũ ciake ciamũthitangire atĩ nĩ arumĩte Ngai. Hatarĩ nganja, Jesu oonaga kũruma kana gũcambia rĩĩtwa itheru rĩa Ithe rĩrĩ rĩhia inene mũno. Nĩ aatangĩkire mũno nĩ ũndũ wa gũthitangĩrũo na gũtuĩrũo nĩ ũndũ wa ihĩtia rĩu. No kũhoteke kĩu nĩkĩo gĩtũmi kĩnene kĩrĩa gĩatũmĩte Jesu akorũo arĩ na “ruo rũingĩ” ihinda inini atananyitwo.—Luk. 22:​41-44.

12. Nĩ njĩra ĩrĩkũ nene Jesu aatheririe rĩĩtwa rĩa Ithe nayo?

¹² Jesu nĩ aakirĩrĩirie kũnyarirũo, kũrumwo, na gũcambio, nĩgetha atherie rĩĩtwa rĩa Ithe. No ndaaconokire nĩ ũndũ wa maũndũ macio tondũ nĩ aamenyaga atĩ aathĩkĩire Ithe maũndũ-inĩ mothe. (Ahib. 12:2) Ningĩ nĩ aamenyaga atĩ Shaitani nĩ kũmũũkĩrĩra aamũũkagĩrĩra ĩmwe kwa ĩmwe mahinda-inĩ macio maritũ. (Luk. 22:​2-4; 23:​33, 34) Shaitani eerĩgagĩrĩra atĩ Jesu nĩ aangĩatiganĩirie wĩkindĩru wake, no matanya make matiakinyanĩire. Jesu nĩ oonanirie wega atĩ Shaitani nĩ mũheenania, na atĩ Jehova nĩ arĩ ndungata njĩhokeku iria itũũragia wĩkindĩru o na rĩrĩa iragerera magerio maritũ.

13. Ũngĩkenia Mũthamaki witũ atĩa?

¹³ Hihi wee no wende gũkenia Mũthamaki witũ? Thiĩ na mbere kũgooca rĩĩtwa rĩa Jehova, ũgĩteithagia andũ kũmenya ũrĩa Ngai witũ atariĩ kũna. Weka ũguo, ũrĩkoragwo  ũkĩrũmĩrĩra makinya ma Jesu. (1 Pet. 2:21) O ta Jesu, nĩ ũrĩkenagia Jehova na ũkonania atĩ thũ yake Shaitani nĩ mũheenania.

NĨ TŨTEITHAGĨRĨRIA KŨHONOKIA MĨOYO RĨRĨA TWAGOOCA RĨĨTWA RĨA JEHOVA

14-15. Twĩyonagĩra maumĩrĩro marĩkũ rĩrĩa twaruta andũ ũhoro wĩgiĩ Jehova?

¹⁴ Rĩrĩa twagooca rĩĩtwa rĩa Jehova, nĩ tũteithagĩrĩria kũhonokia mĩoyo. Na njĩra ĩrĩkũ? Ma nĩ atĩ Shaitani nĩ “atumumarĩtie meciria ma arĩa matetĩkĩtie.” (2 Kor. 4:4) Ũndũ ũcio ũtũmĩte andũ metĩkie maheeni ta maya ma Shaitani: Gũtirĩ Ngai, Ngai akoragwo araihanĩrĩirie na andũ na ndamarũmbũyagia, na atĩ Ngai ndarĩ tha na nĩ aherithagia ehia mwaki-inĩ wa tene na tene. Muoroto wa maheeni ta macio nĩ kũhaka rĩĩtwa rĩa Jehova gĩko nĩguo andũ matigakũrie wendi wa kũmũkuhĩrĩria. No wĩra witũ wa kũhunjia nĩ ũthararagia muoroto ũcio wa Shaitani. Nĩ tũrutaga andũ ũhoro wa ma wĩgiĩ Ithe witũ wa igũrũ na kwoguo tũkagoocithia rĩĩtwa rĩake itheru. Maumĩrĩro makoragwo marĩ marĩkũ?

¹⁵ Ma cia Kiugo kĩa Ngai nĩ irĩ hinya mũingĩ. Rĩrĩa twaruta andũ ũhoro wĩgiĩ Jehova na ũrĩa atariĩ kũna, nĩ twĩyonagĩra ũndũ wa magegania. Andũ acio matumumarĩtio nĩ maheeni ma Shaitani nĩ mahingũkaga maitho, na makambĩrĩria kuona Ithe witũ wa igũrũ ta ũrĩa tũmuonaga. Nĩ magegagio nĩ hinya wake mũingĩ. (Isa. 40:26) Nĩ mamenyaga atĩ no mamwĩhoke nĩ ũndũ wa kĩhooto gĩake gĩkinyanĩru. (Gũcok. 32:4) Ningĩ nĩ merutaga kuumana na ũũgĩ wake mũingĩ. (Isa. 55:9; Rom. 11:33) Na nĩ momagĩrĩrio mamenya atĩ Ngai nĩ wendo. (1 Joh. 4:8) O ũrĩa marakuhĩrĩria Jehova noguo kĩĩrĩgĩrĩro kĩao gĩa gũgaatũũra tene na tene marĩ ciana ciake gĩthiaga gĩkĩgĩaga hinya. Na githĩ tũtikĩrĩ na mweke wa mwanya wa gũteithia andũ gũkuhĩrĩria Ithe witũ wa igũrũ! Rĩrĩa tweka ũguo, Jehova atuonaga tũrĩ “arutithania wĩra hamwe [nake].”—1 Kor. 3:​5, 9.

16. Andũ amwe mahutĩtio atĩa thutha wa kũmenya rĩĩtwa rĩa Ngai? Heana ngerekano.

¹⁶ Kĩambĩrĩria-inĩ no tũrute mũndũ atĩ Ngai etagwo Jehova, na ũndũ ũcio no ũhutie na njĩra nene mũndũ ũrĩ na ngoro njega. Kwa  ngerekano, mũirĩtu ũmwe wĩtagwo Aaliyah b aarereirũo famĩlĩ-inĩ ĩtarĩ ya Gĩkristiano. No ndaaiguaga ndini ĩyo ĩkĩmũteithia gũkuhĩrĩria Ngai. Maũndũ nĩ maacenjirie rĩrĩa aambĩrĩirie kwĩruta Bibilia na Aira a Jehova, tondũ nĩ aambĩrĩirie gũkũria ũrata hamwe na Ngai. Nĩ aagegire mũno rĩrĩa aamenyire atĩ rĩĩtwa rĩa Ngai nĩ rĩeheretio Bibilia-inĩ nyingĩ, na handũ-inĩ harĩo hagekĩrũo marĩĩtwa mangĩ ma ũnene ta Mwathani. Kũmenya rĩĩtwa rĩa Jehova nĩ gwacenjirie ũtũũro wake. Aaugire: “Mũrata wakwa wa hakuhĩ nĩ arĩ rĩĩtwa!” Ũndũ ũcio wamũhutirie atĩa? Aaugire ũũ: “Rĩu njiguaga ndĩ na thayũ mũingĩ ngoro-inĩ. Njiguaga ndĩ na mweke wa mwanya.” Nake mũthuri ũmwe wĩtagwo Steve warĩ mũini, aarereirũo famĩlĩ-inĩ yarũmĩtie mũno maũndũ ma Kĩyahudi. Ndeendaga ũhoro wa ndini nĩ ũndũ wa kuona ũhinga wacio. No rĩrĩa nyina aakuire, nĩ eetĩkĩrire gũthikĩrĩria Mũira wa Jehova makĩĩruta Bibilia na mũndũ ũngĩ. Nĩ aahutirio mũno amenya rĩĩtwa rĩa Ngai. Aaugire: “Ndioĩ atĩ Ngai nĩ arĩ rĩĩtwa.” Agĩcoka akiuga: “Rĩarĩ riita rĩakwa rĩa mbere gũtaũkĩrũo nĩ Ngai wega na kuona atĩ no ndĩmũkuhĩrĩrie. Na ngĩona atĩ nĩ ndagĩa na Mũrata.”

17. Ũtuĩte itua rĩa gũthiĩ na mbere kũgooca rĩĩtwa rĩa Jehova nĩkĩ? (Ningĩ rora mbica.)

¹⁷ Rĩrĩa ũrahunjia na ũkarutana-rĩ, hihi nĩ wĩraga andũ ũhoro wĩgiĩ rĩĩtwa itheru rĩa Jehova? Hihi nĩ ũmateithagia kũmenya ũrĩa Ngai witũ atariĩ? Rĩrĩa ũreka ũguo, ũkoragwo ũkĩgooca rĩĩtwa rĩa Ngai. Ũrothiĩ na mbere kũgoocithia rĩĩtwa itheru rĩa Jehova na njĩra ya gũteithia andũ kũmenya ngumo ciake. Weka ũguo, nĩ ũrĩhonokagia mĩoyo. Ningĩ ũrĩkoragwo ũkĩrũmĩrĩra kĩonereria kĩa Mũthamaki witũ Jesu Kristo. Na ũndũ wa bata o na makĩria nĩ ũrĩkoragwo ũgĩkenia Jehova, Ithe witũ ũtwendete. Ũrotũũra ‘ũgoocaga rĩĩtwa rĩake tene na tene’!—Thab. 145:2.