GĨCUNJĨ KĨA WĨRUTI KĨA 43
RWĨMBO NA. 90 Nĩ Twĩkĩranage Ngoro
Ũrĩa Ũngĩniina Nganja
“Thuthuragiai maũndũ mothe.”—1 THES. 5:21.
ŨNDŨ ŨRĨA WARĨRĨIRIO
Nĩ tũkuona ũrĩa tũngĩka angĩkorũo nĩ tũkoragwo na nganja ingĩtũma tũremererũo gũthiĩ na mbere gũtungatĩra Jehova.
1-2. (a) Nĩ nganja ta irĩkũ ndungata cia Jehova ingĩkorũo nacio? (b) Tũkwarĩrĩria maũndũ marĩkũ gĩcunjĩ-inĩ gĩkĩ?
ITHUOTHE gũtekũmakania kana tũrĩ ethĩ kana akũrũ, nĩ tũkoragwo na nganja a rĩmwe na rĩmwe. Kwa ngerekano, ta wĩcirie ũhoro wa mũndũ mwĩthĩ ũrekĩrĩra nganja kana Jehova nĩ amũrũmbũyagia. Ũndũ ũcio no ũtũme amaĩrĩrie gũtua itua rĩa kũbatithio. Ningĩ ta wĩcirie ũhoro wa mũrũ wa Ithe witũ watuire itua arĩ mwĩthĩ rĩa gũtungatĩra Jehova handũ ha gũthingata wĩra wĩ na mũcara mũnene. Tondũ rĩu tũbeca tũrĩa onaga tũmũhotithagia o kũhingĩria famĩlĩ yake mabataro ma o mũhaka tu, no arigwo kana itua rĩrĩa aatuire rĩarĩ rĩa ũũgĩ. Ningĩ ta wĩcirie ũhoro wa mwarĩ wa Ithe witũ mũkũrũ ũthirĩtwo nĩ hinya wa mwĩrĩ. No aigue akuĩte ngoro tondũ ndangĩhota kũhingia maũndũ marĩa aahingagia tene. Hihi wee waneyũria ciũria ta ici: ‘Hihi Jehova nĩ arũmbũyanagia na niĩ? Hihi warĩ ũndũ wa ũũgĩ kwĩima ũguo wothe nĩ ũndũ wa Jehova? Hihi no ngoragwo ndĩ wa bata harĩ Jehova?’
2 Tũngĩaga gũcaria macokio ma ciũria ta icio, ũndũ ũcio no ũtũme tũremererũo gũthiĩ na mbere gũtungatĩra Jehova. Gĩcunjĩ-inĩ gĩkĩ, nĩ tũkuona ũrĩa motaaro ma Bibilia mangĩtũteithia angĩkorũo tũrĩ na nganja (1) kana Jehova nĩ atũrũmbũyagia, (2) kana matua marĩa twatuire tene maarĩ ma ũũgĩ, na (3) kana no tũkoragwo tũrĩ a bata harĩ Jehova.
ŨRĨA ŨNGĨNIINA NGANJA
3. Ũndũ ũmwe ũngĩtũteithia kũniina nganja citũ nĩ ũrĩkũ?
3 Ũndũ ũmwe ũngĩtũteithia kũniina nganja citũ nĩ gũcaria macokio ma ciũria iria twĩ nacio Kiugo-inĩ kĩa Ngai. Tũngĩka ũguo, nĩ tũkũgĩa na hinya kĩĩroho na tũhote gũikara tũrũmĩte “thĩinĩ wa wĩtĩkio.”—1 Kor. 16:13.
4. ‘Tũngĩthuthuria maũndũ mothe’ atĩa? (1 Athesalonike 5:21)
4 Thoma 1 Athesalonike 5:21. Bibilia ĩratwĩkĩra ngoro ‘tũthuthuragie maũndũ mothe.’ Tũngĩka ũguo atĩa? Nĩguo tũtigĩrĩre atĩ mawoni marĩa twĩ namo nĩ magĩrĩire, twagĩrĩirũo gũthuthuria ũrĩa Bibilia ĩrauga ũhoro-inĩ ũcio. Kwa ngerekano, ta wĩcirie ũhoro wa mũndũ mwĩthĩ ũrĩa uuma na nganja kana nĩ wa bata maitho-inĩ ma Jehova. Hihi nĩ agĩrĩirũo kwaga gũtindanĩra na nganja icio? Aca! Agĩrĩirũo ‘gũthuthuria maũndũ mothe,’ na njĩra ya kũhũthĩra Bibilia nĩguo amenye mwĩcirĩrie wa Jehova ũndũ-inĩ ũcio.
5. Tũngĩka atĩa nĩguo tũtaũkĩrũo nĩ mawoni ma Jehova megiĩ ciũria citũ?
5 Rĩrĩa tũrathoma Bibilia nĩ ta Jehova akoragwo agĩtwarĩria. No nĩguo tũmenye mwĩcirĩrie wa Jehova ũhoro-inĩ wĩgiĩ kĩũria kĩna twĩ nakĩo, nĩ tũrabatara gwĩka ũndũ ũngĩ makĩria ma gũthoma Bibilia. Tũrabatara gũthuthuria maandĩko marĩa mangĩtũteithia kuona macokio ma kĩũria kĩu. No twĩke ũguo tũkĩhũthĩra indo cia gwĩka ũthuthuria iria tũheetwo nĩ ithondeka rĩa Jehova. (Thim. 2:3-6) No tũhoe Jehova tũgĩka ũthuthuria nĩguo atũteithie tũtaũkĩrũo nĩ mawoni make megiĩ kĩũria gitũ. Tũcoke tũcarie motaaro ma Bibilia na ũhoro ũrĩa ũngĩtũteithia ũndũ-inĩ ũcio. Ningĩ no tũgunĩke tũngĩthuthuria andũ magwetetwo Bibilia-inĩ arĩa maacemanirie na ũndũ ta ũcio.
6. Mĩcemanio ĩngĩtũteithia atĩa kũniina nganja iria tũngĩkorũo nacio?
6 Ningĩ Jehova nĩ atwaragĩria kũgerera mĩcemanio. Tũngĩthiaga mĩcemanio tũtegũtĩrĩria, no tũigue macokio ma kĩũria tũngĩkorũo nakĩo, kũgerera mĩario ĩrĩa ĩrutagwo kana macokio ma aarĩ na ariũ a Ithe witũ. (Thim. 27:17) Reke rĩu tuone ũrĩa tũngĩniina nganja imwe andũ makoragwo nacio.
RĨRĨA WAGĨA NGANJA KANA JEHOVA NĨ AKŨRŨMBŨYAGIA
7. Nĩ kĩũria kĩrĩkũ andũ amwe mangĩĩyũria?
7 Hihi waneyũria ũũ: ‘Hihi Jehova nĩ arũmbũyanagia na niĩ?’ Angĩkorũo ũiguaga ta ũtarĩ kĩene, rĩciria rĩa gũkorũo ũrĩ mũrata wa Mũũmbi wa indo ciothe no rĩoneke rĩrĩ ũndũ ũtangĩhoteka. No kũhoteke kwĩ hĩndĩ Mũthamaki Daudi aarĩ na mawoni ta macio. Nĩ aagegagio nĩ rĩciria rĩa atĩ Jehova nĩ atindanagĩra na andũ, tondũ ooririe ũũ: “Atĩrĩrĩ Jehova, mũndũ-rĩ, nĩwe kĩ atĩ nĩguo ũrũmbũyanie nake, mũrũ wa mũndũ nĩwe kĩ, atĩ ũtindanĩre nake?” (Thab. 144:3) Hihi nĩ kũ tũngĩona macokio ma kĩũria kĩu?
8. Kũringana na 1 Samueli 16:6, 7, 10-12, nĩ kĩĩ Jehova aroraga harĩ andũ?
8 Bibilia ĩtũrutaga atĩ Jehova nĩ arũmbũyanagia na andũ arĩa monagwo ta matarĩ a bata. Kwa ngerekano, Jehova nĩ aatũmire Samueli mũciĩ kwa Jesii agaitĩrĩrie mũrũ wake ũmwe maguta nĩguo agaatuĩka mũthamaki wa Isiraeli. Jesii eetire ariũ ake mũgwanja mathiĩ kũrĩ Samueli, no ndetire Daudi, mũriũ wake ũrĩa mũnini. b Ĩndĩ Jehova aathuurĩte Daudi. (Thoma 1 Samueli 16:6, 7, 10-12.) Jehova nĩ oonete ũrĩa Daudi aatariĩ ngoro-inĩ, atĩ kaarĩ kamwana kendete maũndũ ma kĩĩroho.
9. Nĩ kĩĩ kĩngĩtũma ũkorũo na ma atĩ Jehova nĩ akũrũmbũyagia? (Ningĩ rora mbica.)
9 Ta wĩcirie ũrĩa Jehova onanĩtie atĩ nĩ arũmbũyanagia nawe. Hingo ciothe nĩ akũheaga ũtaaro ũrĩa ũrabatara. (Thab. 32:8) Ũndũ ũcio ũronania atĩ nĩ akũĩ wega. (Thab. 139:1) Rĩrĩa wahũthĩra ũtaaro wa Jehova na wona ũgĩgũteithia, ũndũ ũcio nĩ ũtũmaga ũkorũo na ma atĩ Jehova nĩ akũrũmbũyagia. (1 Maũ. 28:9; Atũm. 17:26, 27) Jehova nĩ onaga kĩyo gĩaku. Nĩ onaga ngumo njega iria ũkoragwo nacio na akenda gũtuĩka mũrata waku. (Jer. 17:10) Na nĩ akenaga mũno rĩrĩa o nawe wetĩkĩra gũtuĩka mũrata wake.—1 Joh. 4:19.
“Angĩkorũo nĩ [ũgũcaria Jehova], nĩ ekũreka ũmuone.”—1 Maũ. 28:9 (Rora kĩbungo gĩa 9) c
RĨRĨA WAGĨA NGANJA KANA NĨ WATUIRE MATUA MA ŨŨGĨ
10. Nĩ ciũria irĩkũ tũngĩĩyũria rĩrĩa tweciria ũhoro wa matua marĩa twatuire tene?
10 Rĩmwe andũ amwe maacokia meciria na thutha, nĩ meyũragia kana nĩ maatuire matua marĩa magĩrĩire. No gũkorũo maatuire itua rĩa gũtiga wĩra ũrĩ na mũcara mwega kana biacara njega nĩguo matungatĩre Jehova makĩria. No rĩu kwahoteka nĩ mĩaka mĩingĩ mĩhĩtũku, na hihi harĩ na andũ moĩ maathingatire wĩra mwega, na rĩu monekaga ta magaacĩrĩte mũno ũtũũro-inĩ. Nĩ ũndũ ũcio no meyũrie: ‘Hihi warĩ ũndũ wa ũũgĩ kwĩima ũguo wothe nĩ ũndũ wa Jehova? Kana hihi matua makwa nĩ maatũmire njũrũo nĩ mĩeke ĩngĩ ya bata?’
11. Nĩ ũndũ ũrĩkũ wathumbũraga mwandĩki wa Thaburi ya 73?
11 Angĩkorũo o nawe nĩ wĩyũragia ciũria ta icio, wĩcirie ũrĩa mwandĩki wa Thaburi ya 73 aaiguaga. Nĩ oonaga andũ mataatungatagĩra Jehova, arĩa moonekaga ta marĩ na ũtũũro mwega ũtarĩ na mathĩna. (Thab. 73:3-5, 12) Nĩ ũndũ wa kuona ta andũ acio magaacĩrĩte ũtũũro-inĩ, nĩ aambĩrĩirie kuona ta kĩyo gĩake gĩa gũtungatĩra Jehova kĩarĩ gĩa tũhũ. ‘Aaikaraga agĩtangĩkaga mũthenya mũgima’ nĩ ũndũ wa mawoni macio ma kũũraga ngoro. (Thab. 73:13, 14) Hihi aahiũranirie atĩa na ũndũ ũcio?
12. Kũringana na Thaburi 73:16-18, nĩ kĩĩ gĩateithirie mwandĩki ũcio wa Thaburi kũniina nganja ciake?
12 Thoma Thaburi 73:16-18. Mwandĩki ũcio wa Thaburi nĩ aathiire harĩa hatheru ha Jehova, na arĩ hau nĩ aahotire kuona maũndũ na njĩra ĩrĩa yagĩrĩire. Nĩ aataũkĩirũo atĩ o na gũtuĩka andũ amwe moonekaga ta magaacĩrĩte ũtũũro-inĩ, matiarĩ na kĩĩrĩgĩrĩro kĩa ihinda rĩũkĩte. Thutha wa gũtaũkĩrũo nĩ ũndũ ũcio, nĩ aagĩire na thayũ wa meciria nĩ kũmenya atĩ itua rĩa gũtungatĩra Jehova nĩrĩo itua rĩrĩa rĩega biũ. Nĩ ũndũ ũcio, nĩ aatuire itua rĩa gũthiĩ na mbere gũtungatĩra Jehova.—Thab. 73:23-28.
13. Ũngĩgĩa atĩa na thayũ wa meciria angĩkorũo wĩ na nganja ciĩgiĩ matua watuire tene? (Ningĩ rora mbica.)
13 O nawe Bibilia no ĩgũteithie kũgĩa na thayũ ta ũcio wa meciria. Na njĩra ĩrĩkũ? No wĩcirie maũndũ mega marĩa ũgĩte namo, ta gwĩtĩkĩrĩka nĩ Jehova, na ũririkane atĩ arĩa matamũtungatagĩra matikoragwo na irathimo ta icio. Andũ aingĩ arĩa matatungatagĩra Jehova monaga ta gũkorũo na wĩra mwega, arĩ guo ũndũ ũrĩa wa bata mũno ũtũũro-inĩ tondũ matikoragwo na kĩĩrĩgĩrĩro kĩa ihinda rĩũkĩte. Ĩndĩ wee nĩ ũgĩte na irathimo nyingĩ mahinda-inĩ maya, na Jehova agakwĩrĩra irathimo nyingĩ cia magegania ihinda-inĩ rĩũkĩte. (Thab. 145:16) Ningĩ ta wĩcirie ũndũ ũyũ: Hihi no tũhote kũmenya biũ ũrĩa ũtũũro witũ ũngĩhaana korũo twatuire matua ngũrani? Korũo na ma na ũndũ ũyũ: Rĩrĩa watua matua ũgĩtindĩkwo nĩ wendo waku harĩ Ngai na andũ arĩa angĩ, hingo ciothe nĩ ũrĩkoragwo na kĩrĩa gĩothe kĩbataranagia nĩguo ũkorũo na gĩkeno.
Igaga meciria harĩ irathimo iria Jehova eranĩire (Rora kĩbungo gĩa 13) d
RĨRĨA WAGĨA NGANJA KANA ŨRĨ WA BATA HARĨ JEHOVA
14. Ndungata imwe cia Jehova irahiũrania na ũritũ ũrĩkũ, na nĩ kĩũria kĩrĩkũ ingĩyũria?
14 Ndungata imwe cia Jehova nĩ iremagĩrĩrũo kũhingia maũndũ maingĩ nĩ ũndũ wa ũkũrũ, mũrimũ, kana wathe wa mwĩrĩ. Ũndũ ũcio no ũtũme meigue matarĩ a bata maitho-inĩ ma Jehova. No meyũrie ũũ, ‘Hihi no ngoragwo ndĩ wa bata harĩ Jehova?’
15. Nĩ ũndũ ũrĩkũ mwandĩki wa Thaburi ya 71 aarĩ na ma naguo?
15 Mwandĩki wa Thaburi ya 71 nĩ aahiũranagia na ũndũ ta ũcio. Aahoire ũũ: “Ndũkanandige rĩrĩa ngaakorũo itarĩ na hinya.” (Thab. 71:9, 18) O na gũtuĩka aaiguaga atarĩ na hinya, aarĩ na ma atĩ angĩthiĩ na mbere gũtungatĩra Jehova arĩ mwĩhokeku, Jehova nĩ arĩmũtongoragia na akamũteithia. Mwandĩki ũcio wa Thaburi nĩ eerutĩte atĩ, Jehova nĩ akenagio nĩ arĩa mekaga ũrĩa wothe mangĩhota nĩguo mamũtungatĩre o na makĩhiũranagia na moritũ.—Thab. 37:23-25.
16. Nĩ maũndũ ta marĩkũ andũ arĩa akũrũ mangĩhota gwĩkĩra Jehova na andũ arĩa angĩ? (Thaburi 92:12-15)
16 Inyuĩ andũ akũrũ, mwĩyonagei ta ũrĩa Jehova amuonaga. No amũteithie gũthiĩ na mbere gũkũra kĩĩroho o na angĩkorũo nĩ mũrahiũrania na mathĩna ma mwĩrĩ. (Thoma Thaburi 92:12-15.) Handũ ha kũiga meciria harĩ maũndũ marĩa rĩu ũtangĩhota kũhingia, wĩcirie ũhoro wa marĩa ũngĩhota kũhingia. Kwa ngerekano, no wĩkĩre arĩa angĩ ngoro kũgerera kĩonereria gĩaku kĩega na kũmonia atĩ nĩ ũramarũmbũiya. No wĩre arĩa angĩ ũrĩa Jehova agũtiirĩrĩire kwa ihinda rĩa mĩaka mĩingĩ, na ũmataarĩrie ciĩranĩro cia Bibilia iria wĩrĩgagĩrĩra kuona ikĩhinga. Ningĩ ndũkanahũthie hinya wa mahoya marĩa ũhoyaga nĩ ũndũ wa andũ arĩa angĩ. (1 Pet. 3:12) Gũtekũmakania maũndũ marĩa tũragerera, o ũmwe witũ arĩ na maũndũ angĩhota gwĩkĩra Jehova na andũ arĩa angĩ.
17. Twagĩrĩirũo gwĩthema kwĩringithania na arĩa angĩ nĩkĩ?
17 Angĩkorũo nĩ ũkuaga ngoro nĩ ũndũ wa kũremwo nĩ kũhingia maũndũ maingĩ ũtungata-inĩ wa Jehova, korũo na ma atĩ nĩ akenagio nĩ ũndũ o wothe ũhotaga kũhingia. Wĩtheme kwĩringithania na arĩa angĩ. Nĩkĩ? Tondũ o na Jehova ndatũringithanagia. (Gal. 6:4) Kwa ngerekano-rĩ, Mariamu nĩ aaheire Jesu kĩheo kĩa goro kĩa maguta manungi wega. (Joh. 12:3-5) Ngũrani nake, mũtumia ũmwe wa ndigwa mũthĩni aahothire hekarũ-inĩ tũthendi twĩrĩ twa thogora mũnini mũno. (Luk. 21:1-4) Ĩndĩ Jesu oonire iheo icio cierĩ ikĩonania atĩ maarĩ na wĩtĩkio mũnene. O na Ithe, Jehova, nĩ akenagio mũno nĩ ũndũ o wothe wĩkaga ũgĩtindĩkwo nĩ wendo na wĩyamũrĩri waku harĩ we, o na ũngĩoneka ũrĩ mũnini mũno.
18. Nĩ kĩĩ kĩngĩgũteithia kũniina nganja iria ũngĩkorũo nacio? (Ningĩ rora gathandũkũ, “ Kiugo kĩa Ngai no Gĩgũteithie Kũniina Nganja.”)
18 Ithuothe nĩ tũkoragwo na nganja rĩmwe na rĩmwe. No o ta ũrĩa tuona, Kiugo kĩa Ngai Bibilia no gĩtũteithie kũniina nganja icio. Kwoguo wĩrutanĩrie gũcaria macokio ma ciũria iria ũngĩkorũo nacio nĩguo ũhote kũniina nganja. Korũo na ma atĩ Jehova nĩ akũĩ wee ũrĩ mũndũ kĩũmbe. Nĩ akenagio nĩ maũndũ marĩa wĩimĩte nĩguo ũmũtungatĩre na ndarĩ hĩndĩ angĩaga gũkũrathima. Korũo na ma atĩ Jehova nĩ endete ndungata ciake ciothe njĩhokeku na nĩ acirũmbũyagia.
RWĨMBO NA. 111 Itũmi Citũ cia Gũkena
a GŨTAARĨRIA KIUGO: Gĩcunjĩ-inĩ gĩkĩ, tũrarĩrĩria nganja iria tũngĩkorũo nacio nĩ ũndũ wa kuona ta tũtarĩ a bata harĩ Jehova kana nĩ ũndũ wa kuona ta tũtaatuire matua ma ũũgĩ na hau kabere. Nganja icio ti ta iria igwetetwo thĩinĩ wa Bibilia iria cionanagia atĩ mũndũ ndarĩ na wĩtĩkio harĩ Jehova na ciĩranĩro ciake.
b O na gũtuĩka Bibilia ndĩtwĩraga mĩaka ĩrĩa Daudi aarĩ nayo rĩrĩa Jehova aamũthuurire, no gũkorũo aarĩ o tinĩnja.—Rora ngathĩti ya Mnara wa Mlinzi ya Septemba 1, 2011, kar. 29, kĩb. 2.
