Ithuothe tũratũũra kũndũ kũrĩ hakuhĩ kũgĩa na kĩhuhũkanio kĩnene kĩrĩa Jesu eetire ‘thĩna ũrĩa mũnene.’ (Mathayo 24:21) Tũtingĩhota gwĩthema kĩhuhũkanio kĩu. Ĩndĩ harĩ ũndũ tũngĩka nĩguo twĩgitĩre. Ũndũ ũcio nĩ ũrĩkũ?

Thĩinĩ wa Mahunjio ma Jesu Kristo ma Kĩrĩma-inĩ, aaheanire ũtaaro ũyũ: “Caragiai Ũthamaki wa Ngai mbere na ũthingu wake.” (Mathayo 6:33) Tũngĩka ũguo na njĩra ĩrĩkũ?

Caria Ũthamaki wa Ngai mbere. Ũguo nĩ kuuga atĩ twagĩrĩirũo kuona Ũthamaki wa Ngai arĩ guo ũndũ ũrĩa wa bata gũkĩra ũndũ ũngĩ o wothe. (Mathayo 6:25, 32, 33) Nĩkĩ? Tondũ andũ matingĩhota kũniinĩra andũ mathĩna mao. Ũthamaki wa Ngai noguo tu ũngĩhota gwĩka ũndũ ũcio mũritũ.

Caria ũthingu wake. Twagĩrĩirũo kwĩrutanĩria ũrĩa wothe tũngĩhota gwathĩkĩra mawatho na motaaro ma Ngai ma ũthingu. Nĩkĩ? Tondũ tũngĩĩtuagĩra wega na ũũru, moimĩrĩro marĩkoragwo marĩ moru. (Thimo 16:25) No tũngĩathĩkagĩra ithimi cia Ngai, nĩ tũrĩkenagia Ngai na tũkagunĩka ithuĩ ene.​—Isaia 48:17, 18.

Thiĩ na mbere gũcaria Ũthamaki wa Ngai mbere na ũthingu wake. Jesu ooigire atĩ andũ amwe nĩ mangĩkaahĩngĩcwo mecirie atĩ no mone ũgitĩri mangĩcaria mbeca nyingĩ ũrĩa mangĩhota. Angĩ nao nĩ  mangĩkaareka mĩtangĩko ya ũtũũro ĩmatoorie nginya mage mahinda ma gũcaria Ũthamaki wa Ngai.​—Mathayo 6:19-21, 25-32.

O na kũrĩ ũguo, Jesu eeranĩire atĩ andũ arĩa manyitaga mbaru Ũthamaki wa Ngai nĩ marĩhingagĩrio mabataro mao ihinda-inĩ rĩrĩ na nĩ magaakenera irathimo cia gũtũũra ihinda rĩrĩa rĩroka.—Mathayo 6:33.

O na gũtuĩka arutwo a Jesu matukũ-inĩ make nĩ maacaragia Ũthamaki wa Ngai mbere na ũthingu wake, mationire ruo na mathĩna mothe makĩniinwo hĩndĩ yao. No nĩ maagitĩrirũo. Na njĩra ĩrĩkũ?

Nĩ maathĩkagĩra ithimi cia Ngai cia ũthingu, na ũndũ ũcio nĩ wamagitagĩra kuumana na maũndũ maritũ marĩa maakoraga andũ arĩa mataathĩkagĩra Ngai. Gũkorũo na wĩtĩkio mũrũmu atĩ Ũthamaki wa Ngai nĩ ũgooka nĩ kwamateithagia gũkirĩrĩria o na mathĩna marĩa maritũ mũno. Na Ngai nĩ aamaheire “hinya ũrĩa ũkĩrĩte wa ndũire” nĩguo mahote gũkirĩrĩria mathĩna marĩa maacemanagia namo.—2 Akorintho 4:7-9.

Akristiano matukũ-inĩ ma atũmwo nĩ maathĩkĩire watho wa Jesu wa gũcaria Ũthamaki wa Ngai mbere. Maahunjirie ũhoro ũrĩa mwega wa Ũthamaki kũrĩa guothe maaikaraga. (Akolosai 1:23) Hihi kũrĩ andũ mareka ũguo mahinda-inĩ maya?

Ĩĩ nĩ kũrĩ! Aira a Jehova nĩ maramenya atĩ ihinda rĩrĩa rĩtigarĩte Ũthamaki wa Ngai ũtananiina thĩ ĩno nĩ inini. Na kwoguo marerutanĩria ũrĩa wothe mangĩhota kũhingia rĩathani rĩrĩ rĩa Jesu: “Naguo ũhoro ũyũ mwega wa Ũthamaki nĩ ũkaahunjio thĩ yothe ĩrĩa ĩikaragwo ũtuĩke ũira kũrĩ ndũrĩrĩ ciothe, na hĩndĩ ĩyo nĩrĩo mũico ũgaakinya.”​—Mathayo 24:14.

Hihi ũkwamũkĩra ũhoro ũrĩa mwega na njĩra ĩrĩkũ? Tũragwĩkĩra ngoro wĩgerekanie na andũ a matukũ ma atũmwo arĩa maaikaraga Makedonia itũũra rĩa Beroia. Rĩrĩa maaiguire ũhoro ũrĩa mwega wĩgiĩ Ũthamaki wa Ngai kuuma kũrĩ mũtũmwo Paulo, maawamũkĩrire “meciria-inĩ marĩ na wendi mũnene.” Magĩcoka ‘magĩthuthuria Maandĩko na njĩra ndikĩru’ nĩguo mone kana maũndũ macio maaiguĩte maarĩ ma ma, na magĩka kũringana na ũrĩa meerutaga.​—Atũmwo 17:11, 12.

O nawe no wĩke o tao. Wacaria Ũthamaki wa Ngai mbere na ũthingu wake, nĩ ũrĩgitagĩrũo mahinda-inĩ maya na nĩ ũgaakenera thayũ wa tene na tene na ũgitĩri mahinda marĩa maroka.