Ũrĩa Ũngĩka Nĩguo Ũgaatũũra Thĩinĩ wa Thĩ Njerũ

THAAKA

Thĩinĩ wa icunjĩ iria hĩtũku nĩ tuona atĩ Ngai ica ikuhĩ nĩ ekũniina andũ arĩa aganu thĩinĩ wa thĩ na aniine mathĩna mothe. No tũkorũo na ma atĩ maũndũ macio nĩ mageekĩka. Nĩkĩ? Tondũ Kiugo kĩa Ngai Bibilia, nĩ kĩĩranĩire atĩ:

“Thĩ nĩ gũthira ĩrathira.”—1 JOHANA 2:17.

Tũrĩ na ma atĩ nĩ kũrĩ andũ makaahonoka tondũ mũhari ũcio wa Bibilia wĩranĩire ũũ:

“Ũrĩa wĩkaga wendi wa Ngai atũũraga tene na tene.”

Nĩ ũndũ ũcio, angĩkorũo nĩ tũrenda gũkaahonoka nĩ twagĩrĩirũo gwĩka wendi wa Ngai. Nĩgetha tũmenye wendi wa Ngai nĩ ũrĩkũ no mũhaka twambe tũmũmenye.

‘KŨMENYA’ NGAI NO GŨGŨTEITHIE GŨKAAHONOKA

Jesu aaugire ũũ: “Naguo muoyo wa tene na tene nĩ atĩrĩ, nĩ makũmenye wee Ngai ũrĩa ũmwe wa ma.” (Johana 17:3) Nĩ tũrabatara ‘kũmenya’ Ngai nĩguo tũkaahonoka na tũtũũre tene na tene. Kũmenya Ngai to gwĩtĩkia atĩ arĩ kuo kana kũmenya tũmaũndũ tũnini tũmwĩgiĩ. Nĩ tũrabatara gũkorũo na ũrata hamwe nake. Nĩguo andũ makorũo marĩ na ũrata mũrũmu, nĩ mabataraga kũhũthĩra mahinda hamwe. Ũguo noguo kũrĩ harĩ ũrata witũ na Ngai. Reke tuone maũndũ mamwe tũngĩĩruta thĩinĩ wa Bibilia mangĩtũteithia gũkũria na gũtũũria ũrata wa hakuhĩ hamwe na Ngai.

Ma Iria Twĩrutaga Bibilia-inĩ

Nĩ twĩrutaga atĩ Ngai eendaga tũtũũre thĩinĩ wa Paradiso.

Oombire andũ a mbere Adamu na Hawa na akĩmaiga mũgũnda-inĩ mũthaka wa Edeni. Maarĩ akinyanĩru, na Ngai nĩ amaheete kĩrĩa gĩothe maabataraga nĩguo makenere ũtũũro. Mangĩatũũrire tene na tene. Korũo nĩ maatũũririe ũrata wao hamwe na Ngai, matingĩakuire. No maathuurire kwaga gwathĩkĩra watho mũhũthũ ũrĩa Ngai aamaheete.

Nĩ twĩrutaga kĩrĩa gĩtũmaga tũcemanie na mathĩna.

Nĩ ũndũ wa kwaga gwathĩkĩra Ngai, mũndũ wa mbere Adamu nĩ aateire mweke wa gũtũũra tene na tene o hamwe na andũ arĩa angĩ othe. Bibilia yugaga ũũ: “Kũgerera harĩ mũndũ ũmwe mehia maatonyire thĩinĩ wa thĩ na gĩkuũ gĩgĩtonya nĩ ũndũ wa mehia, na kwoguo gĩkuũ gĩgĩtherema kũrĩ andũ othe.” (Aroma 5:12) O ta ũrĩa mũndũ angĩgaya wathe kuuma harĩ aciari ake, no taguo ciana ciothe cia Adamu ciagaire kwaga gũkinyanĩra kuuma harĩ we. Nĩkĩo gĩtũmaga tũkũre na tũkue.

Nĩ twĩrutaga ũndũ ũrĩa Ngai ekĩte nĩguo atũteithie.

Bibilia yugaga ũũ: “Ngai nĩ eendire kĩrĩndĩ gĩa gũkũ thĩ mũno, nginya akĩruta Mũrũ wake wa mũmwe, nĩguo mũndũ o wothe ũrĩonanagia wĩtĩkio harĩ we ndakananiinwo no akaagĩa na muoyo wa tene na tene.” (Johana 3:16) Ngai aatũmire Jesu gũkũ thĩ nĩguo arute muoyo wake nĩ ũndũ witũ. Mũthuri ũmwe wa mĩaka 86 wĩtagwo Prabhakar kuuma bũrũri-inĩ wa India akĩaria ũhoro wĩgiĩ gĩĩko kĩu kĩa wendo aaugire ũũ: “Kĩonanagia atĩ Jehova a nĩ anyendete mũno. Wendo wake nĩ ũheete mwĩhoko wa muoyo wa tene na tene.”

Nĩ twĩrutaga ũrĩa tũngĩonania ngatho nĩ ũndũ wa ũrĩa Ngai atwĩkĩire.

Bibilia yugaga atĩ no tuonanie ngatho citũ nĩ ũndũ wa maũndũ marĩa Ngai atwĩkĩire na njĩra ya “kũrũmĩrĩra maathani make.” (1 Johana 2:3) Nĩ ũndũ wa Jehova gũtwenda, nĩ atuonetie ũrĩa tũngĩka nĩguo tũkenere ũtũũro ihinda-inĩ rĩrĩ. (Isaia 48:17, 18, kohoro ka magũrũ-inĩ) Ngai ndakenaga rĩrĩa tũrathĩnĩka. Eranĩire atĩ tũngĩrũmĩrĩra morutani make, nĩ tũrĩkoragwo na ũtũũro ũrĩ na gĩkeno ihinda-inĩ rĩrĩ na tũgĩe na kĩĩrĩgĩrĩro gĩa gũgaatũũra tene na tene mahinda marĩa maroka.

THOMAGA KIUGO KĨA NGAI BIBILIA O MŨTHENYA

Kũhoya Ngai na gwĩka wendi wake no gũgũteithie gũkaahonoka mũthia wa thĩ ĩno njũru

Nĩguo tũtũũre nĩ tũbataraga kũrĩa irio kaingĩ. No Jesu aaugire ũũ: “Mũndũ ndatũũragio nĩ mũgate wiki, no nĩ kiugo gĩothe kĩrĩa kiumaga kanua-inĩ ka Jehova.”—Mathayo 4:4.

Mahinda-inĩ maya, ciugo cia Ngai ikoragwo thĩinĩ wa Bibilia. Kwĩruta ibuku rĩu itheru nĩ gũgũgũteithia kũmenya maũndũ marĩa Ngai aneka ihinda ihĩtũku, marĩa areka thaa ici, na marĩa ageeka mahinda marĩa maroka.

HOYAGA NGAI AGŨTEITHIE

Ũngĩka atĩa angĩkorũo nĩ ũrenda kũrũmĩrĩra ũtaaro wa Ngai, no nĩ ũraremererũo gũtigana na maũndũ mamwe ũmenyerete gwĩka? Hĩndĩ ta ĩyo, kũmenya Ngai no gũgũteithie na njĩra ya mwanya.

Ta wĩcirie ũhoro wĩgiĩ mũtumia ũmwe tũgwĩta Sakura watũũraga mũtũũrĩre wa ũũra thoni. Rĩrĩa aambĩrĩirie kwĩruta Bibilia nĩ aamenyire ũhoro wĩgiĩ watho wa Ngai ũrĩa ugaga, “ũragĩrai ngomanio itagĩrĩire.” (1 Akorintho 6:18) Sakura nĩ aahoire Ngai amũteithie na nĩ aahotire gũtigana na mũtugo ũcio mũũru. Ĩndĩ no athiaga na mbere kũrũa na merirĩria moru. Aaugire ũũ: “Rĩrĩa merirĩria moru moka meciria-inĩ makwa, hoyaga Jehova kuuma ngoro, ngĩmenyaga atĩ ndingĩhota kũrũa na merirĩria macio ndĩ wiki. Mahoya nĩ mandeithĩtie gũkuhĩrĩria Jehova makĩria.” O ta Sakura, andũ milioni nyingĩ nĩ mamenyete Ngai. Nĩ amaheaga hinya ũrĩa marabatara nĩguo meke mogarũrũku ũtũũro-inĩ wao, na matũũre na njĩra ĩrĩa ĩmũkenagia.—Afilipi 4:13.

O ũrĩa ũkũmenya Ngai wega, noguo o nawe ‘ũkũmenywo nĩ Ngai,’ na ũtuĩke mũrata wake wa hakuhĩ. (Agalatia 4:9; Thaburi 25:14) Na nĩ ũkaahonoka na ũingĩre thĩinĩ wa thĩ njerũ ya Ngai. No hihi thĩ ĩyo njerũ ĩgaakorũo ĩhaana atĩa? Gĩcunjĩ kĩrĩa kĩrũmĩrĩire nĩ gĩkwarĩrĩria ũndũ ũcio.

a Jehova nĩrĩo rĩĩtwa rĩa Ngai ta ũrĩa rĩguũrĩtio thĩinĩ wa Bibilia.

Icunjĩ Ingĩ Hihi Ũngĩenda Gũthoma

MŨRANGĨRI

Andũ Aingĩ nĩ Makaahonoka—O Nawe no Ũhonoke

Na njĩra ĩrĩkũ? Hihi wagĩrĩirũo nĩ kwĩigĩra indo kana gwetha ũrĩa ũkeegitĩra kĩĩmwĩrĩ mũthenya ũcio?

MŨRANGĨRI