KUUMA NGOTHI-INĨ | RĨRĨA MŨNDŨ WENDETE AKUA
Hihi nĩ Ũũru Gũkorũo na Ihooru?
Hihi wanekora ũrĩ na ndwari nene kwa ihinda inini? No kũhoteke wahonire na ihenya ũũ atĩ nĩ wariganĩirũo nĩ ũndũ ũcio. No, ihooru rĩtihaana ũguo. Ndagĩtarĩ wĩtagwo Alan Wolfelt aandĩkire ũũ ibuku-inĩ rĩake rĩtagwo Healing a Spouse’s Grieving Heart: “Ihooru ‘rĩtiriganagĩra.’” O na kũrĩ ũguo, ongereire ũũ: “Thutha wa ihinda na kũgerera ũteithio wa andũ angĩ ihooru rĩaku no rĩnyihanyihe.”
Kwa ngerekano, ta wĩcirie ũrĩa Iburahimu eekire mũtumia wake akua. Bibilia yugaga atĩ “Iburahimu akĩambĩrĩria gũcakaya na kũrĩra nĩ ũndũ wake [Sara].” Kiugo “akĩambĩrĩria” kĩronania atĩ nĩ oire ihinda akĩhiũrania na ihooru rĩa gũkuĩrũo. * Ngerekano ĩngĩ nĩ ya Jakubu, ũrĩa waheenirio na agĩtĩkia atĩ mũrũwe Jusufu nĩ oragĩtwo nĩ nyamũ ya gĩthaka. Nĩ aagĩire na ihooru “matukũ maingĩ,” na andũ a famĩlĩ yake nĩ maaremirũo nĩ kũmũhooreria. Mĩaka ĩigana ũna thutha ũcio, gĩkuũ kĩa Jusufu no gĩatũmaga akorũo na ihooru inene.—Kĩambĩrĩria 23:2 (New World Translation); 37:34, 35; 42:36; 45:28.
Iburahimu akĩrĩra nĩ ũndũ wa gũkuĩrũo nĩ Sara
Ũguo noguo kũrĩ ũmũthĩ harĩ andũ aingĩ arĩa magĩaga na ihooru nĩ ũndũ wa gũkuĩrũo nĩ mũndũ mendete. Ta wĩcirie ngerekano ici igĩrĩ.
-
“Mũthuri wakwa Robert aakuire Julaĩ 9, 2008. Kĩroko kĩa mũthenya ũcio aakuire nĩ ũndũ wa aksidenti, gĩtiarĩ ngũrani na mĩthenya ĩrĩa ĩngĩ. Thutha wa kũnyua cai wa rũcinĩ, twekire o ũrĩa twekaga atanathiĩ wĩra, tũkĩhĩmbanĩria, tũkĩmumunyana na tũkĩĩrana ‘Nĩ ngwendete.’ O na thutha wa mĩaka ĩtandatũ, no ngoragwo na ruo rũu ngoro-inĩ. Ndigwĩciria nĩ kũrĩ hĩndĩ ngariganĩrũo nĩ gĩkuũ kĩa Robert.”—Gail, wa mĩaka 60.
-
“O na gũtuĩka mũtumia wakwa aakuire makĩria ma mĩaka 18 mĩhĩtũku, nĩ ndĩriragĩria gũkorũo nake na ngaigua ihooru nĩ ũndũ wa gĩkuũ gĩake. Hĩndĩ ciothe ingĩona kĩndũ gĩthaka, nĩ ndĩmũririkanaga, na ngaambĩrĩria gwĩciria ũrĩa angĩakena tũgĩkĩĩrorera nake.”—Etienne, wa mĩaka 84.
Hatarĩ nganja, nĩ ũndũ wa ndũire kũigua ruo ta rũu kwa ihinda iraihu. O mũndũ onanagia ihooru na njĩra yake, na no ũkorũo ũtarĩ ũndũ wa ũũgĩ gũtuĩra mũndũ ũrĩa ũngĩ nĩ ũndũ wa ũrĩa aronania ihooru rĩrĩa akuĩrũo. Ningĩ, nĩ tũbatiĩ gwĩthema gwĩcirithia ithuĩ ene nĩ ũndũ wa kuonania ihooru ihinda inene. Tũngĩhiũrania atĩa na ihooru?
^ kĩb. 4 Isaaka mũriũ wa Iburahimu o nake nĩ aagĩire ihooru ihinda inene. O ta ũrĩa gĩcunjĩ kĩa “Wĩgerekanie na Wĩtĩkio Wao” kĩrĩa kĩrĩ thĩinĩ wa ngathĩti ĩno kĩonanĩtie, Isaaka no aarĩ na ihooru o na thutha wa mĩaka ĩtatũ kuuma aakuĩrũo nĩ nyina, Sara.—Kĩambĩrĩria 24:67.
Icunjĩ Ingĩ Hihi Ũngĩenda Gũthoma
MŨRANGĨRI
Ũrĩa Ũngĩhiũrania na Ihooru
Bibilia nĩ yonanĩtie maũndũ tũngĩka marĩa monekete atĩ no matũteithie.
ARAHŨKAI!
Kĩeha gĩa Gũkuĩrũo—Maũndũ Marĩa Ũngĩĩrĩgĩrĩra
Nĩ moritũ ta marĩkũ mũndũ ũkuĩrĩirũo angĩĩrĩgĩrĩra thutha wa mwendwa wake gũkua?
