“Kũu igũrũ kwarĩ na gĩtĩ kĩa ũnene, na haarĩ mũndũ waikarĩire gĩtĩ kĩu. na ũcio waikarĩte thĩ aahaanaga ta ihiga rĩa njathibi na rĩa wakiki, na gĩtĩ kĩu gĩathiũrũrũkĩirio nĩ mũkũnga-mbura watariĩ ta ihiga rĩa thumarati.”—Kũguũrĩrio 4:2, 3.

“Na [gũkĩgĩa] ũtheri ũmũrigicĩirie mĩena yothe. Naguo ũtheri ũcio wamũrigicĩirie mĩena yothe-rĩ, watariĩ o ta mũkũnga mbura ũrĩa wonagwo itu-inĩ hĩndĩ ya mbura. Naguo ũtheri ũcio ũkonagwo ta arĩ mũhianĩre wa ũrĩa Jehova arĩ riri.”—Ezekieli 1:27, 28.

Cioneki icio cionirio mũtũmwo Johana na mũnabii Ezekieli cionanagia riri wa Jehova Ngai, Ũrĩa wĩ Igũrũ Mũno, ikĩhũthĩra indo tũngĩhota kũmenya wega ta mahiga ma goro, mũkũnga-mbura, na riri wa gĩtĩ kĩa ũnene. Maũndũ macio monanagia atĩ Jehova akoragwo na ũthaka wa kũgegania, wega na thayũ.

Ũguo noguo mwandĩki wa thaburi aatarĩirie Ngai atariĩ rĩrĩa oigire ũũ: “Jehova nĩ mũnene, na nĩ wa kũgoocwo mũno: we nĩ wa gwĩtigĩrũo gũkĩra ngai ciothe. Thima-rĩ, ngai icio ciothe cia irĩndĩ no indo itarĩ kĩene, ĩndĩ Jehova nĩwe wombire igũrũ. Mbere-inĩ yake hatũũraga ũtĩĩku o na ũkaru; kũu gwake kwamũre gũgagĩtũũra hinya o na ũthaka.”—Thaburi 96:4-6.

O na gũtuĩka Jehova nowe wiki tu ũrĩ na Ũnene Wothe, nĩ atwĩraga tũmũhoye na nĩ egũtũthikĩrĩria. (Thaburi 65:2) Ngai nĩ atwendete na nĩ atũrũmbũyagia mũno, na nĩkĩo mũtũmwo Johana aandĩkire ũũ arĩ na ũma: “Ngai nĩ wendo.”—1 Johana 4:8.

“[Stefano ũrĩa warĩ mũrũmĩrĩri wa Jesu], aiyũrĩtwo nĩ roho mũtheru, akĩrora igũrũ akĩona riri wa Ngai na wa Jesu arũgamĩte guoko-inĩ kwa ũrĩo kwa Ngai, akiuga: ‘Atĩrĩ, ndĩrona igũrũ rĩhingũkĩte na Mũrũ wa mũndũ arũgamĩte guoko-inĩ kwa ũrĩo kwa Ngai.’”—Atũmwo 7:55, 56.

Mbere ya Stefano kuona kĩoneki kĩu, Jesu aakoretwo oragwo nĩ atongoria acio a Kĩyahudi, o acio Stefano aaragĩria. Kĩoneki kĩu kĩonanirie atĩ Jesu aarĩ muoyo na nĩ aariũkĩtio na akaheo  riri. Mũtũmwo Paulo aandĩkire ũũ igũrũ rĩgiĩ ũndũ ũcio: “[Jehova] aamũriũkirie kuuma kũrĩ arĩa akuũ na akĩmũiga guoko-inĩ gwake kwa ũrĩo kũũrĩa igũrũ, akĩmũtũũgĩria mũno gũkĩra thirikari ciothe na wathani na hinya na ũnene na rĩĩtwa o rĩothe, na to mũtabarĩre-inĩ ũyũ wa maũndũ no nĩ nginya ũrĩa ũgooka.”—Aefeso 1:20, 21.

Makĩria ma gũtaarĩria ũnene wake, Maandĩko nĩ monanagia atĩ, o ta Jehova, Jesu nĩ arũmbũyagia andũ mũno. Arĩ ũtungata-inĩ wake gũkũ thĩ nĩ aahonirie arwaru, ithua, na akĩriũkia akuũ. Nĩ oonanirie wendo wake mũnene harĩ Ngai na andũ kũgerera gĩkuũ gĩake kĩrĩ igongona. (Aefeso 2:4, 5) Ica ikuhĩ, Jesu ũrĩa ũrĩ guoko-inĩ kwa ũrĩo kwa Ngai, nĩ arĩrehera andũ arĩa athĩki irathimo nyingĩ thĩinĩ wa thĩ kũgerera wathani wake.

“Ningĩ ngĩgĩcoka ngĩcũthĩrĩria o nginya ngĩona atĩrĩ, Itĩ-cia-ũnene ciarehirũo ikĩigwo thĩ, nake Ũrĩa-ũtũire-ho-kuuma-o-tene agĩikara thĩ ho. . . . Aatungatagĩrũo nĩ ndungata ngiri maita ngiri, . . . ngiri ikũmi maita ngiri ikũmi makarũgama mbere yake.”—Danieli 7:9, 10.

Kĩoneki-inĩ kĩu, Danieli ndonire mũraika ũmwe tu, ĩndĩ oonire araika ngiri nyingĩ. No mũhaka gĩkorũo kĩarĩ kĩoneki kĩa magegania mũno! Araika nĩ ciũmbe cia kĩĩroho irĩ riri, ũũgĩ, na hinya mũingĩ. Nĩ marĩ ikĩro itiganĩte ta maserafi na akerubi. Bibilia nĩ ĩgwetete araika makĩria ma maita 250.

Araika ti andũ maatũũraga gũkũ thĩ tene. Ngai ombire araika ihinda iraihu mbere ya kũũmba andũ. Hĩndĩ ĩrĩa thĩ yombagwo, araika nĩ meroragĩra na makĩanĩrĩra nĩ gũkena.—Ayubu 38:4-7.

Njĩra ĩmwe araika ehokeku matungatagĩra Ngai nayo nĩ kũnyita mbaru wĩra ũrĩa wa bata mũno ũrarutwo thĩinĩ wa thĩ yothe wa kũhunjia ũhoro ũrĩa mwega wa Ũthamaki. (Mathayo 24:14) Itemi rĩao wĩra-inĩ ũyũ rĩguũrĩtio kĩoneki-inĩ kĩa mũtũmwo Johana, ũrĩa wandĩkire ũũ: “Ngĩcoka ngĩona mũraika ũngĩ akĩũmbũkĩra igũrũ gatagatĩ arĩ na ũhoro mwega wa tene na tene nĩguo ahunjĩrie andũ arĩa maikaraga thĩinĩ wa thĩ, ndũrĩrĩ ciothe na mĩhĩrĩga na thiomi na iruka cia andũ.” (Kũguũrĩrio 14:6) O na gũtuĩka araika matiaragia na andũ ĩmwe kwa ĩmwe ta ũrĩa meekaga tene, nĩ matongoragia arĩa mahunjagia ũhoro ũrĩa mwega kũrĩ andũ arĩa marĩ na ngoro njega.

“Na igũrũ gũkiumĩra mbaara: Mikaeli [Jesu Kristo] na araika ake makĩrũa na ndamathia ĩyo, nayo ndamathia ĩyo na araika ayo makĩrũa nao no matiatooririe, o na matiacokire kuonerũo gwa gũikara kũu igũrũ. Nĩ ũndũ ũcio ndamathia ĩyo ĩkĩharũrũkio, nĩyo nyoka ĩrĩa ya tene, o we wĩtagwo Mũcukani na Shaitani, ũrĩa ũhĩtithagia thĩ yothe; akĩharũrũkio nginya thĩ, o na araika ake makĩharũrũkio hamwe nake.”—Kũguũrĩrio 12:7-9.

Kũrĩa igũrũ gũtikoretwo na thayũ hĩndĩ ciothe. Kuuma o hĩndĩ ĩrĩa mũndũ ombirũo, mũraika ũmwe nĩ aakũririe merirĩria ma gũthathaiyo na akĩremera Jehova, kwoguo agĩtuĩka Shaitani, kiugo kĩrĩa kiugĩte, “Mũkararia.” Thutha ũcio araika angĩ makĩnyitanĩra nake ũremi-inĩ ũcio na nĩo metagwo ndaimono. Ciũmbe icio njũru nĩ ireganaga biũ na Jehova na itongoretie andũ aingĩ gwĩka mũgarũ na wendi wa Jehova.

Shaitani na ndaimono ciake nĩ aganu na matirĩ tha. Nĩ thũ nene cia andũ na nĩ matũmĩte gũkorũo na mĩnyamaro mĩingĩ mũno gũkũ thĩ. Kwa ngerekano, Shaitani nĩ aanangire mahiũ na ndungata cia mũndũ mwĩhokeku wetagwo Ayubu. Agĩcoka akĩũraga ciana ciothe ikũmi cia Ayubu kũgerera “rũhuho rũnene” rũrĩa rwamomorire nyũmba ĩrĩa maarĩ. Thutha ũcio Shaitani agĩtũma Ayubu agĩe “ironda ii ruo mũno gwata makinya make ma magũrũ o kinya cũmbĩ,” kana mũtwe.—Ayubu 1:7-19; 2:7.

Ica ikuhĩ Shaitani nĩ ekũniinwo kaimana. Kuuma aaharũrũkio gũkũ thĩ, nĩ aramenya atĩ “arĩ na ihinda inini.” (Kũguũrĩrio 12:12) Shaitani nĩ ekwanangwo, na hatarĩ nganja ũcio nĩ ũhoro mwega.

Akĩaria ũhoro wa Jesu, mũtũmwo Johana oigire ũũ: “Ũkĩgũrĩra Ngai andũ na thakame yaku kuuma mĩhĩrĩga-inĩ yothe na thiomi na iruka na ndũrĩrĩ, na ũkĩmatua athamaki na athĩnjĩri-Ngai matungatagĩre Ngai witũ, na nĩo a gwathana marĩ athamaki igũrũ rĩa thĩ.”—Kũguũrĩrio 5:9, 10.

O ta ũrĩa Jesu aariũkirio na agĩthiĩ igũrũ, andũ angĩ nao nĩ makaariũkio mathiĩ igũrũ. Jesu eerire atũmwo ake ehokeku ũũ: “Ndĩrathiĩ kũhaarĩria handũ nĩ ũndũ wanyu. Ningĩ . . . nĩ ngooka rĩngĩ na ndĩmũgĩre, nĩguo harĩa ndĩ o na inyuĩ mũkoragwo ho.”—Johana 14:2, 3.

 Arĩa mathiaga igũrũ, mathiaga kũruta wĩra ũrĩkũ? Marĩ hamwe na Jesu, nĩ magathondeka Ũthamaki ũrĩa ũgaathana thĩinĩ wa thĩ yothe na ũrehere andũ irathimo. Ũcio nĩguo Ũthamaki ũrĩa Jesu eerire arũmĩrĩri ake mahoyage ũke rĩrĩa oigire ũũ: “Ithe witũ ũrĩ igũrũ, rĩĩtwa rĩaku nĩ rĩtherio. Ũthamaki waku ũũke. Wendi waku wĩkwo gũkũ thĩ o ta kũu igũrũ.”—Mathayo 6:9, 10.

Mũtũmwo Johana oigire ũũ: “Ngĩcoka ngĩigua mũgambo mũnene kuuma gĩtĩ-inĩ kĩrĩa gĩa ũthamaki woiga: ‘Atĩrĩrĩ, hema ya Ngai ĩrĩ hamwe na andũ, . . . na nĩ ekũmagiria maithori mothe mathire maitho-inĩ mao, na gĩkuũ gĩtigacoka gũkorũo kuo rĩngĩ, o na kĩeha kana kĩrĩro kana ruo. Maũndũ marĩa ma tene nĩ mathiru biũ.’”—Kũguũrĩrio 21:3, 4.

Kĩoneki kĩu kĩonanagia ũrĩa gũkahana hĩndĩ ĩrĩa Ũthamaki wa Ngai ũkeheria wathani wa Shaitani ũtue thĩ paradiso. Jesu nĩwe mũthamaki wa Ũthamaki ũcio o hamwe na arĩa makaariũkio mathiĩ igũrũ. Maũndũ marĩa makoretwo makĩrehera andũ ruo na kĩeha kĩnene matigakorũo kuo rĩngĩ. O na gĩkuũ gĩtigakorũo kuo rĩngĩ.

Ĩ nao andũ bilioni nyingĩ arĩa manakua no matirĩ na kĩĩrĩgĩrĩro gĩa gũthiĩ igũrũ? Mahinda mokĩte, nĩ makaariũkio marĩ na kĩĩrĩgĩrĩro gĩa gũtũũra tene na tene thĩinĩ wa thĩ Paradiso.—Mathayo 5:5.