THUTHA wa mũtaaramu wa rĩera kũrora ũrĩa rĩera rĩhaana akĩhũthĩra mĩtambo, akona nĩ gũkũgĩa kĩhuhũkanio kĩnene na kĩerekeire kũndũ gũikaragwo nĩ andũ aingĩ. Tondũ nĩ ararũmbũyia andũ acio, ageka ũrĩa wothe angĩhota kũmahe mũkaana kĩhuhũkanio gĩtanakinya.

O ta mũtaaramu ũcio, Jehova rĩu nĩ arera aikari a thĩ atĩ kũrĩ na “kĩhuhũkanio” kĩroka, kĩũru o na gũkĩra kĩngĩ o gĩothe kĩngĩmenyithanio nĩ ataaramu a rĩera. Areka ũguo na njĩra ĩrĩkũ? Na tũngĩkorũo na ma atĩa atĩ nĩ arahe andũ ihinda rĩa kũigana rĩa kuoya ikinya? Nĩguo tuone macokio, rekei twambe tuone mĩkaana ĩmwe Jehova aaheanire ihinda ihĩtũku.

Mahinda-inĩ ma Bibilia, Jehova nĩ aaheanire mĩkaana ĩgiĩ “ihuhũkanio” itiganĩte kana matuĩro marĩa angĩareheire andũ arĩa maaregaga kũmwathĩkĩra. (Thim. 10:25; Jer. 30:23) Hingo ciothe, nĩ aaheaga andũ arĩa aremi mũkaana o mbere na akameera ũrĩa magĩrĩirũo gwĩka nĩguo mamwathĩkĩre. (2 Ath. 17:12-15; Neh. 9:29, 30) Nĩguo ateithie andũ moe ikinya rĩrĩa rĩagĩrĩire, kaingĩ aahũthagĩra ndungata ciake njĩhokeku gũkũ thĩ imenyithie andũ matuĩro make na imonie bata wa kuoya ikinya o na ihenya.—Amos 3:7.

Mũndũ ũmwe harĩ ndungata icio njĩhokeku aarĩ Nuhu. Kwa ihinda rĩa mĩaka mĩingĩ, ategwĩtigĩra nĩ aaheire mũkaana andũ arĩa maarĩ aganu na maahũthagĩra ũhinya matukũ-inĩ make ũhoro wĩgiĩ Mũiyũro ũrĩa ũngĩokire thĩ yothe. (Kĩam. 6:9-13, 17) Ningĩ nĩ aameeraga ũrĩa magĩrĩirũo gwĩka nĩguo mahonokio, na eekire ũguo na njĩra nene nginya thutha-inĩ agĩtwo “mũhunjia wa ũthingu.”—2 Pet. 2:5.

O na Nuhu akĩmaheaga mũkaana, andũ acio maatũũraga mbere ya Mũiyũro matiathikĩrĩirie ndũmĩrĩri yake ĩrĩa yoimĩte kũrĩ Ngai. Moonanirie atĩ matiarĩ na wĩtĩkio o na hanini. Na kwoguo nĩ maakuire rĩrĩa Mũiyũro “wokire na ũkĩmaniina othe.” (Mat. 24:39; Ahib. 11:7) Rĩrĩa maarĩ hakuhĩ kũniinwo, matingĩegwatirie atĩ Ngai ndaamaheete mũkaana.

Kũrĩ mahinda mangĩ Jehova aaheaga andũ mũkaana kahinda kanini mbere ya “kĩhuhũkanio” kana ituĩro rĩake rĩambĩrĩirie. O na kũrĩ ũguo, nĩ aatigagĩrĩra atĩ andũ arĩa maraheo mũkaana marĩ na ihinda rĩiganu rĩa kuoya ikinya. Kwa ngerekano, nĩ aaheanaga mũkaana o mbere hĩndĩ ya Mahũũra marĩa Ikũmi mookire igũrũ rĩa Misiri. Kwa mũhaano, Jehova nĩ aatũmire Musa na Haruni mahe Firauni na ndungata ciake mũkaana wĩgiĩ ihũũra rĩa mũgwanja rĩa mbura nene ya mbembe. Na tondũ ihũũra rĩu rĩngĩambĩrĩirie mũthenya ũrĩa warũmĩrĩire-rĩ, hihi Ngai nĩ aamaheire ihinda rĩiganu rĩa gwetha handũ ha kwĩgitia kĩhuhũkanio kĩu? Bibilia yugaga ũũ: “Ndungata cia Firauni iria cietigĩrire kiugo kĩu kĩa Jehova ikĩingĩria ndungata ciacio nyũmba narua o hamwe na mahiũ ma cio, no iria itetigĩrire kiugo kĩu kĩa Jehova itiaingĩririe ndungata ciacio o na mahiũ ma cio.” (Tham. 9:18-21) Ma nĩ atĩ, Jehova nĩ aaheanĩte mũkaana wa kũigana, na kwoguo andũ arĩa mooire ikinya o na ihenya nĩ maahonokire ngũrani na arĩa matooire ikinya.

Ningĩ Firauni na ndungata ciake nĩ maaheirũo mũkaana mbere ya ihũũra rĩa ikũmi. No nĩ ũndũ wa ũrimũ, matiathĩkĩire mũkaana ũcio. (Tham. 4:22, 23) Nĩ ũndũ ũcio, ariũ ao a irigithathi magĩkua. Ũcio warĩ ũndũ wa kĩeha mũno! (Tham. 11:4-10; 12:29) Hihi nĩ maangĩahotete kuoya ikinya ihinda rĩrĩa rĩagĩrĩire? Ĩĩ! Musa nĩ aaheire Aisiraeli mũkaana o hĩndĩ ĩyo wĩgiĩ ihũũra rĩa ikũmi rĩrĩa rĩakuhĩrĩirie na akĩmeera ũrĩa maagĩrĩirũo gwĩka mahonokie famĩlĩ ciao. (Tham. 12:21-28)  Hihi nĩ andũ aigana maathĩkĩire mũkaana ũcio? Andũ amwe megeragĩria atĩ andũ milioni ithatũ, o hamwe na Aisiraeli na “andũ angĩ aingĩ matukanĩte” matarĩ Aisiraeli na angĩ Amisiri, nĩ maahonokire ituĩro rĩu rĩa Ngai na makiuma Misiri.—Tham. 12:38; kohoro ka magũrũ-inĩ.

O ta ũrĩa ngerekano icio cionanĩtie, hingo ciothe Jehova nĩ aatigagĩrĩra atĩ andũ marĩ na ihinda rĩiganu rĩa gwathĩkĩra mĩkaana yake. (Gũcok. 32:4) Muoroto wa Ngai wakoragwo ũrĩ ũrĩkũ agĩka ũguo? Mũtũmwo Petero aataarĩirie atĩ Jehova “ndendaga mũndũ o na ũmwe akaaniinwo no endaga othe merire.” (2 Pet. 3:9) Ũhoro wa ma nĩ atĩ, Ngai nĩ aarũmbũyagia andũ acio mũno. Eendaga merire na mathĩkĩre ũtaaro wake ituĩro rĩake rĩtanoka.—Isa. 48:17, 18; Rom. 2:4.

O na ũmũthĩ, andũ othe no mũhaka mathikĩrĩrie mũkaana wa bata ũrĩa ũraheanwo mahinda-inĩ maya thĩinĩ wa thĩ yothe. Rĩrĩa Jesu aarĩ gũkũ thĩ, nĩ aaheanire mũkaana atĩ mũtabarĩre ũyũ wa maũndũ nĩ ũkaaniinwo hĩndĩ ya “thĩna mũnene.” (Mat. 24:21) Ũhoro-inĩ wĩgiĩ ũndũ ũcio ũgeekĩka, nĩ aaheanire ũrathi ũrĩa ũtaarĩirie wega maũndũ marĩa arũmĩrĩri ake mangĩgacemania namo o ũrĩa mahinda macio mangĩgathiĩ makuhĩrĩirie. Jesu nĩ aagwetire maũndũ manene marĩa mangĩgekĩka thĩinĩ wa thĩ marĩa tũrona mahinda-inĩ maya.—Mat. 24:3-12; Luk. 21:10-13.

Kũringana na ũrathi ũcio, Jehova nĩ aroria andũ othe metĩkĩre kũmũtungatĩra na kũmwathĩkĩra. Jehova endaga andũ arĩa mamwathĩkagĩra makenere ũtũũro ihinda-inĩ rĩrĩ na magaakenera irathimo ingĩ thĩinĩ wa thĩ njerũ ĩrĩa ĩgaakorũo na ũthingu. (2 Pet. 3:13) Nĩguo Jehova ateithie andũ makorũo na wĩtĩkio harĩ ciĩranĩro ciake, nĩ aheanĩte ndũmĩrĩri ya kũhonokia andũ ya ‘ũhoro mwega wa Ũthamaki,’ ũrĩa Jesu aarathĩte atĩ nĩ ‘ũngĩkaahunjio thĩ yothe ĩrĩa ĩikaragwo ũtuĩke ũira kũrĩ ndũrĩrĩ ciothe.’ (Mat. 24:14) Jehova nĩ acokanĩrĩirie athathaiya ake a ma mabũrũri-inĩ ta 240, nĩguo marute “ũira” ũcio, kana mahunjie ndũmĩrĩri ĩyo ya Ngai. Jehova arenda andũ aingĩ o ũrĩa kwahoteka mathĩkĩre mũkaana ũcio nĩgetha makaahonoka hĩndĩ ya “kĩhuhũkanio” kĩrĩa kĩroka gĩa ituĩro rĩake rĩa ũthingu.—Zef. 1:14, 15; 2:2, 3.

Nĩ ũndũ ũcio, kĩũria kĩa bata kĩrĩa tũngĩĩyũria ti kana Jehova nĩ aheaga andũ ihinda rĩiganu rĩa gwathĩkĩra mĩkaana yake. Ũira nĩ wonanĩtie atĩ nĩ ekaga ũguo hingo ciothe. No kĩũria kĩrĩa tũngĩĩyũria nĩ: Hihi andũ nĩ megwathĩkĩra mũkaana wa Ngai ihinda rĩtanathira? Rekei ithuĩ atũmwo a Ngai tũthiĩ na mbere gũteithia andũ aingĩ o ũrĩa tũngĩhota makaahonoka mũthia wa mũtabarĩre ũyũ wa maũndũ.