1-2. (a) Nĩ kĩĩ gĩtũmaga andũ aingĩ ũmũthĩ maritũhĩrũo nĩ kwĩhoka arĩa maratongoria? (b) Tũkwarĩrĩria maũndũ marĩkũ gĩcunjĩ-inĩ gĩkĩ?

 ŨMŨTHĨ, andũ aingĩ nĩ maritũhagĩrũo nĩ kwĩhoka atongoria. Andũ aingĩ nĩ meyoneire atĩ thirikari na mawatho marĩa maigĩtwo, kaingĩ igitagĩra andũ arĩa atongu na arĩa marĩ na ũnene, no itiheaga arĩa athĩni kĩhooto kĩao. Bibilia yugaga: “Mũndũ akoretwo agĩatha mũndũ agatũmaga one o maũndũ moru.” (Koh. 8:9) Ningĩ, atongoria amwe a ndini nĩ mekaga maũndũ moru, ũndũ ũrĩa ũtũmaga andũ amwe mage mwĩhoko harĩ Ngai. Kwoguo rĩrĩa tũreruta na mũndũ Bibilia, ndũkoragwo ũrĩ ũndũ mũhũthũ kũmũteithia kwĩhoka Jehova na arĩa amũrĩte gũkũ thĩ.

² Ma nĩ atĩ, to arutwo a Bibilia marabatara kwĩruta kwĩhoka Jehova na ithondeka rĩake. O na arĩa makoretwo magĩtungatĩra Jehova kwa ihinda rĩa mĩaka mĩingĩ nĩ magĩrĩirũo gũthiĩ na mbere kwĩhoka atĩ njĩra ya Jehova ya gwĩka maũndũ nĩyo njega biũ. Rĩmwe na rĩmwe, ũndũ no wĩkĩke ũgerie mwĩhoko witũ harĩ Jehova. Thĩinĩ wa gĩcunjĩ gĩkĩ, nĩ tũkuona ũrĩa wĩtĩkio witũ ũngĩgerio maũndũ-inĩ maya matatũ: (1) rĩrĩa tũrathoma icunjĩ imwe cia Bibilia, (2) rĩrĩa tũramũkĩra ũtongoria kuuma ithondeka-inĩ rĩa Jehova, na (3) rĩrĩa tũgaacemania na moritũ ihinda rĩũkĩte.

3. Icunjĩ imwe cia Bibilia ingĩgeria mwĩhoko witũ harĩ Jehova na njĩra ĩrĩkũ?

 ³ Rĩrĩa tũrathoma Kiugo kĩa Ngai, rĩmwe no twĩyũrie ciũria ciĩgiĩ ũrĩa Jehova aahiũranirie na andũ amwe na kĩrĩa gĩatũmire  atue matua mamwe. Kwa ngerekano, thĩinĩ wa ibuku rĩa Ndari, nĩ tũthomaga ũhoro wa Mũisiraeli ũmwe watuĩrĩirũo gĩkuũ nĩ Jehova nĩ ũndũ wa kuuna ngũ mũthenya wa Thabatũ. Na thĩinĩ wa ibuku rĩa Samueli wa kerĩ, nĩ tũthomaga atĩ mĩaka mĩingĩ thutha ũcio, Jehova nĩ ooheire Mũthamaki Daudi thutha wa gwĩka ũtharia na kũũragana. (Ndar. 15:32, 35; 2 Sam. 12:9, 13) No twĩyũrie, ‘Nĩ kĩĩ gĩatũmire Jehova ohere Daudi nĩ ũndũ wa kũũragana na gũtharia, no agĩtuĩra mũndũ ũngĩ gĩkuũ nĩ ũndũ wa rĩhia rĩngĩonekire rĩrĩ inini?’ Nĩguo tũcokie kĩũria kĩu, rekei tuone maũndũ matatũ tũbatiĩ kũririkanaga rĩrĩa tũrathoma Bibilia.

4. Maandĩko ma Kĩambĩrĩria 18:20, 21 na Gũcokerithia Maathani 10:17 matũteithagia atĩa kwĩhoka biũ matua ma Jehova?

⁴ Ti hingo ciothe Bibilia ĩheanaga ũhoro wothe wĩgiĩ ũndũ mũna. Kwa ngerekano, nĩ tũĩ atĩ Daudi nĩ eerirĩte kuuma ngoro nĩ ũndũ wa ciĩko ciake. (Thab. 51:2-4) Ĩ nake mũndũ ũrĩa waagararĩte watho wa Thabatũ, hihi aarĩ mũndũ wa mũthemba ũrĩkũ? Nĩ eerirĩte nĩ ũndũ wa ũndũ ũrĩa eekĩte? Hihi nĩ aagĩte gwathĩkĩra mawatho ma Jehova mbere ĩyo? Hihi nĩ aagire gũtindanĩra kana akĩrega gwathĩkĩra mĩkaana yaheanĩtwo? Bibilia ndiugĩte. O na kũrĩ ũguo, no tũkorũo na ma na ũndũ ũyũ: Jehova “ndarĩ hĩndĩ agaga kĩhooto.” (Gũcok. 32:4) Ngũrani na andũ aingĩ arĩa matuaga matua nĩ ũndũ wa maũndũ marĩa andũ angĩ maroiga, kana nĩ ũndũ wa mũthutũkanio kana ũndũ ũngĩ, Jehova aroraga maũndũ mothe marĩa mahutĩtie ũndũ ũcio atanatua itua. (Thoma Kĩambĩrĩria 18:20, 21; Gũcokerithia Maathani 10:17.) O ũrĩa tũgũthiĩ na mbere kwĩruta ũhoro wĩgiĩ Jehova na ithimi ciake, noguo tũgũthiĩ na mbere gũkũria mwĩhoko harĩ matua make. O na rĩrĩa twakorũo na ciũria ciĩgiĩ Bibilia tũtangĩhota gũcokia ihinda-inĩ rĩrĩ, maũndũ marĩa tũĩ megiĩ Ngai witũ nĩ matũmaga tũkorũo na ma atĩ nĩ “mũthingu njĩra-inĩ ciake ciothe.”—Thab. 145:17.

5. Kwaga gũkinyanĩra kũhutagia atĩa ũhoti witũ wa gũtua ciira? (Ningĩ rora gathandũkũ, “ Kwaga Gũkinyanĩra no Gũthũkie Muonere Witũ wa Maũndũ.”)

⁵ Ti hingo ciothe tũhotaga gũtua ciira wega tondũ tũtirĩ akinyanĩru. Tondũ tũmbĩtwo na mũhianĩre wa Ngai, nĩ twendaga kuona andũ magĩkĩrũo maũndũ na njĩra ya kĩhooto. (Kĩam. 1:26) No tondũ tũtirĩ akinyanĩru no  twage gũtua ciira ũrĩa kwagĩrĩire, o na rĩrĩa tũreciria atĩ nĩ tũĩ maũndũ mothe. Kwa ngerekano, ririkana ũrĩa Jona ataakenirio nĩ itua rĩa Jehova rĩa kuonia andũ a Nineve tha. (Jona 3:10–4:1) No ta wĩcirie maumĩrĩro ma itua rĩu. Andũ makĩria ma 120,000 arĩa meeririre a Nineve nĩ maahonokirio. Nĩ ũndũ ũcio, mawoni ma Jona kwerekera andũ acio nĩmo maarĩ mahĩtanu, no ti ma Jehova.

6. Nĩkĩ Jehova ndarabatara gũtũtaarĩria itũmi ciĩgiĩ matua make?

⁶ Jehova ndabataraga gũtaarĩria itũmi ciĩgiĩ matua make. Mahinda-inĩ ma tene Jehova nĩ eetĩkagĩria ndungata ciake itaarĩrie ũrĩa ciaiguaga igũrũ rĩgiĩ matua marĩa aatuĩte kana marĩa eendaga gũtua. (Kĩam. 18:25; Jona 4:2, 3) Ningĩ rĩmwe nĩ aataaragĩria itua rĩake. (Jona 4:10, 11) O na kũrĩ ũguo, Jehova to mũhaka atũtaarĩrie kĩrĩa kĩratũma atue itua rĩna. Tondũ nĩwe Mũũmbi witũ, ndabataraga gũtũũria mawoni maitũ atanatua itua, kana thutha wa gũtua itua.—Isa. 40:13, 14; 55:9.

7. Nĩ ũndũ ũrĩkũ tũngĩritũhĩrũo gwĩka, na nĩkĩ?

⁷ Tũtikoragwo na nganja atĩ ũndũ wothe Jehova ekaga ũkoragwo ũrĩ mwega. O na kũrĩ ũguo, rĩmwe nĩ tũritũhagĩrũo kwĩhoka arũme arĩa aigĩte matongorie. Rĩmwe no twĩyũrie kana arĩa mehokeirũo gũtongoria maũndũ thĩinĩ wa ithondeka rĩa Jehova mareka maũndũ kũringana na ũtongoria wa Jehova kana wao ene. No kũhoteke andũ amwe matukũ-inĩ ma Bibilia nĩ maarĩ na mwĩcirĩrie ta ũcio. Ta wĩcirie ngerekano iria tuona thĩinĩ wa  kĩbungo gĩa 3. Mũndũ wa famĩlĩ ya Mũisiraeli ũrĩa waagararĩte watho wa mũthenya wa Thabatũ nĩ angĩarigirũo kana hihi Musa nĩ aacarĩtie ũtongoria wa Jehova mũndũ ũcio atanoragwo. Nake mũrata wa Uria Mũhiti, ũrĩa mũtumia wake maatharirie na Daudi, nĩ angĩeciririe atĩ Daudi aahũthĩrire gaturũa gake arĩ mũthamaki nĩguo etheme ituĩro rĩa kũũragwo. Jehova nĩ akoragwo ehokete arĩa aigĩte matongorie thĩinĩ wa ithondeka rĩake, na thĩinĩ wa kĩũngano. Kwoguo angĩkorũo tũtiĩhokete arũme acio, tũtingiuga nĩ twĩhokete Jehova.

8. Nĩ ũndũ ũrĩkũ ũhaanaine gatagatĩ-inĩ ka ũndũ ũgwetetwo thĩinĩ wa Atũmwo 16:4, 5 na ũrĩa kĩũngano gĩa Gĩkristiano gĩtongoragio ũmũthĩ?

⁸ Ũmũthĩ, Jehova atongoragia ithondeka rĩake kũgerera “ngombo ĩrĩa njĩhokeku na njũgĩ.” (Mat. 24:45) Ngombo ĩyo nĩ ĩrũmbũyagia andũ a Ngai thĩinĩ wa thĩ yothe na ĩkamahe ũtongoria kũgerera athuri a ciũngano, o ta ũrĩa kĩama kĩrĩa gĩatongoragia karine-inĩ ya mbere gĩekaga. (Thoma Atũmwo 16:4, 5.) Nao athuri nĩ matigagĩrĩra atĩ kĩũngano nĩ kĩarũmĩrĩra ũtongoria ũcio. Tuonanagia atĩ nĩ twĩhokaga njĩra ya Jehova ya gwĩka maũndũ rĩrĩa twathĩkĩra ũtongoria ũrĩa tũraheo nĩ ithondeka rĩake na athuri a kĩũngano.

9. Nĩ ta rĩ tũngĩritũhĩrũo kũnyita mbaru matua ma athuri a kĩũngano, na nĩkĩ?

⁹ Rĩmwe na rĩmwe, no tũritũhĩrũo kũnyita mbaru matua ma athuri a kĩũngano. Kwa ngerekano, mĩaka-inĩ ya ica ikuhĩ nĩ gwĩkĩtwo mogarũrũku ciũngano-inĩ nyingĩ o hamwe na mĩthiũrũrũko. Kũndũ kũmwe athuri a ciũngano nĩ morĩtie ahunjia mathamĩre ciũngano ingĩ nĩguo Nyũmba cia Ũthamaki ihũthĩrũo wega biũ. Tũngĩũrio tũthamĩre kĩũngano kĩerũ, kwahoteka no tũritũhĩrũo gũtiga arata na andũ a famĩlĩ. Hihi athuri a kĩũngano nĩ makoragwo merĩtwo kĩũngano kĩrĩa o mũhunjia agĩrĩirũo gũthiĩ? Aca. Kũmenya ũguo no gũtũme tũritũhĩrũo kũrũmĩrĩra ũtongoria ũrĩa maratũhe. No Jehova nĩ ehokaga athuri  a kĩũngano rĩrĩa maratua matua ta macio, na o na ithuĩ nĩ twagĩrĩirũo kũmehoka. b

10. Nĩkĩ nĩ twagĩrĩirũo kũnyita mbaru matua ma athuri a kĩũngano kũringana na Ahibirania 13:17?

¹⁰ Twagĩrĩirũo kũnyita mbaru matua ma athuri nĩkĩ o na angĩkorũo matua macio matiratũkenia? Tondũ tweka ũguo, nĩ tũteithagia gũtũũria ũrũmwe gatagatĩ-inĩ ka andũ a Ngai. (Ef. 4:2, 3) Kĩũngano nĩ kĩgaacagĩra rĩrĩa andũ othe maathĩkĩra matua ma kĩama gĩa athuri. (Thoma Ahibirania 13:17.) Na ũndũ wa bata makĩria, nĩ tuonagia Jehova atĩ nĩ tũmwĩhokete rĩrĩa twanyita mbaru andũ arĩa aheete wĩra wa gũtũrũmbũiya.—Atũm. 20:28.

11. Nĩ kĩĩ kĩngĩtũteithia kwĩhoka ũtongoria ũrĩa tũheagwo nĩ athuri a kĩũngano?

¹¹ Kũririkana atĩ athuri a kĩũngano nĩ mahoyaga Jehova roho mũtheru rĩrĩa maratua matua marahutia kĩũngano, no gũtũteithie kwĩhokaga biũ ũtongoria ũrĩa maratũhe. Ningĩ nĩ mathuthuragia na kinyi motaaro ma Bibilia na magacaria ũtongoria kuuma harĩ indo iria ithondeka rĩa Jehova rĩtũheete. Wendi wao nĩ gũkenia Jehova, na kũrũmbũiya andũ ake na njĩra ĩrĩa njega biũ. Arũme acio ehokeku nĩ moĩ atĩ nĩ makoorio nĩ Ngai nĩ ũndũ wa ũrĩa marũmbũyagia andũ ake. (1 Pet. 5:2, 3) Ta wĩcirie ũndũ ũyũ: Thĩinĩ wa thĩ ĩgayũkanĩte nĩ ũndũ wa maũndũ ma gĩĩkabira, kĩndini, na gĩũteti, andũ a Jehova makoragwo na ũrũmwe magĩthathaiya Ngai ũmwe wa ma. Ũndũ ũcio ũhotekaga tu tondũ Jehova nĩ arathimaga ithondeka rĩake.

12. Nĩ maũndũ ta marĩkũ athuri mathuthuragia nĩguo mamenye kana mũndũ nĩ erirĩte?

¹² Jehova nĩ ehokeire athuri a kĩũngano wĩra wa bata mũno wa kũiga kĩũngano kĩrĩ gĩtheru. Mũkristiano angĩka rĩhia iritũ, Jehova nĩ erĩgagĩrĩra atĩ athuri a kĩũngano nĩ megũtua kana mũndũ ũcio nĩ egũthiĩ na mbere gũkorũo arĩ mũrũ kana mwarĩ wa Ithe witũ. Ũndũ ũmwe magĩrĩire gũthuthuria nĩ kana mũndũ ũcio nĩ erirĩte kuuma ngoro nĩ ũndũ wa mehia marĩa ekĩte. No auge atĩ nĩ erirĩte, no hihi nĩ aronania atĩ nĩ athũũrĩte rĩhia rĩu ekĩte? Hihi nĩ atuĩte itua rĩa kwaga gũcokera mahĩtia macio? Angĩkorũo nĩ thiritũ njũru iratũmĩte aingĩre mehia-inĩ macio-rĩ, hihi nĩ ehaarĩirie gũtigana na thiritũ icio? Athuri a kĩũngano nĩ mahoyaga Jehova, magatuĩria maũndũ mothe na ũrĩa Bibilia yugaga, na magatuĩria ũrĩa Mũkristiano ũcio wĩhĩtie araigua igũrũ rĩgiĩ mahĩtia make. Magacoka magatua itua kana mũndũ ũcio nĩ egũthiĩ na mbere gũikara kĩũngano-inĩ kana abatiĩ kweherio.—1 Kor. 5:11-13.

13. Nĩ maũndũ marĩkũ tũngĩĩyũria mũrata kana mũndũ wa famĩlĩ angĩeherio kĩũngano-inĩ?

¹³ Mwĩhoko witũ kwerekera athuri ũngĩgerio na njĩra ĩrĩkũ? Angĩkorũo mũndũ ũrĩa weheretio kĩũngano-inĩ ti mũrata witũ wa hakuhĩ kana mũndũ wa famĩlĩ, no akorũo arĩ ũndũ mũhũthũ gwĩtĩkĩra itua rĩa athuri. No kũngĩthiĩ atĩa angĩkorũo mũndũ ũrĩa weheretio kĩũngano-inĩ nĩ mũrata witũ wa hakuhĩ? No kũhoteke twĩyũrie kana athuri nĩ mararorire maũndũ mothe kana nĩ maratuire itua rĩu na njĩra ya Jehova. Nĩ kĩĩ kĩngĩtũteithia gũtũũria muonere mwega kwerekera itua rĩu rĩa athuri?

14. Nĩ kĩĩ kĩngĩtũteithia rĩrĩa athuri matua itua atĩ mũrata kana mũndũ wa famĩlĩ nĩ ekweherio kĩũngano-inĩ?

¹⁴ Nĩ twagĩrĩirũo kũririkanaga atĩ kweheria mũndũ kĩũngano-inĩ ũkoragwo ũrĩ mũbango wa Jehova, na nĩ ũteithagia kĩũngano na ũgateithia mũndũ ũrĩa wĩhĩtie. Mũndũ ũtarerira angĩtĩkĩrio gũthiĩ na mbere gũikara kĩũngano-inĩ, no akorũo na ũgucania ũtarĩ mwega harĩ andũ arĩa angĩ. (Gal. 5:9) Makĩria ma  ũguo, no age kuona ũritũ wa mehia make, na age kuona bata wa kũgarũrĩra mwĩcirĩrie na ciĩko ciake nĩguo ahote gwĩtĩkĩrĩka rĩngĩ nĩ Jehova. (Koh. 8:11) No tũkorũo na ma atĩ rĩrĩa athuri maratua itua kana mũndũ nĩ ekweherio kĩũngano-inĩ, nĩ moyaga ũndũ ũcio na ũritũ. Nĩ mamenyaga atĩ o ta atuanĩri ciira hĩndĩ ya Isiraeli, ‘matituaga ciira nĩ ũndũ wa mũndũ no nĩ tondũ wa Jehova.’—2 Maũ. 19:6, 7.

15. Nĩkĩ nĩ tũrabatara kwĩhoka ũtongoria wa Jehova ihinda-inĩ rĩrĩ gũkĩra hĩndĩ ĩngĩ o yothe?

¹⁵ O ũrĩa mũthia wa mũtabarĩre ũyũ wa maũndũ ũrakuhĩrĩria, noguo tũrabatara gũkorũo na mwĩhoko makĩria harĩ njĩra ya Jehova ya gwĩka maũndũ. Nĩkĩ? Tondũ hĩndĩ ya thĩna ũrĩa mũnene, kwahoteka nĩ tũkaaheo ũtongoria ũroneka ũrĩ mũritũ gwathĩkĩra. Jehova ndagatwarĩria ĩmwe kwa ĩmwe. Ĩndĩ no kũhoteke njĩra ĩmwe agaatũhe ũtongoria nayo nĩ kũgerera andũ arĩa amũrĩte matongorie maũndũ ithondeka-inĩ rĩake. Rĩu rĩtigaakorũo rĩrĩ ihinda rĩa gwĩkĩrĩra nganja ũtongoria ũrĩa tũraheo kana kwĩyũria, ‘Hihi ũtongoria ũyũ ũrauma kũrĩ Jehova, kana no mawoni ma ariũ a Ithe witũ arĩa maratongoria maũndũ?’ Hihi wee nĩ ũkeehoka Jehova na ithondeka rĩake ihinda-inĩ rĩu rĩa bata? Gwĩciria ũrĩa wonaga ũtongoria wa Jehova ihinda-inĩ rĩrĩ, no gũgũteithie kuona macokio ma kĩũria kĩu. Angĩkorũo nĩ wĩhokaga ũtongoria ũrĩa tũheagwo mahinda-inĩ maya na ũkawathĩkĩra, no kũhoteke nĩ ũkaahota gwĩka ũguo hĩndĩ ya thĩna ũrĩa mũnene.—Luk. 16:10.

16. Nĩ atĩa mwĩhoko witũ harĩ Jehova ũngĩgerio ihinda rĩũkĩte?

¹⁶ Ũndũ ũngĩ twagĩrĩirũo gwĩciria ũhoro waguo nĩ ũrĩa tũkaamũkĩra matua ma Jehova rĩrĩa akaaniina mũtabarĩre ũyũ wa maũndũ. Tũrĩ na mwĩhoko atĩ andũ aingĩ arĩa mataratungatĩra Jehova ihinda-inĩ rĩrĩ, o hamwe na andũ a famĩlĩ citũ arĩa matarĩ etĩkia, nĩ megũtua itua rĩa kũmũtungatĩra mũico ũtanakinya. No hĩndĩ ya Hari–Magedoni, Jehova nĩwe ũkamatuĩra itua rĩa mũico akĩhũthĩra Jesu. (Mat. 25:31-33; 2 Thes. 1:7-9) Ti ithuĩ tũgaatua nũũ wagĩrĩire kuonio tha nĩ Jehova na nũũ ũtagĩrĩire kuonio tha. (Mat. 25:34, 41, 46) Hihi nĩ tũkeehoka matua ma Jehova kana nĩ tũgaatiga kũmũtungatĩra tondũ tũtiretĩkania na matua macio? Hatarĩ nganja, nĩ tũrabatara gwĩkĩra hinya mwĩhoko witũ harĩ Jehova ihinda-inĩ rĩrĩ nĩguo tũkaahota kũmwĩhoka biũ ihinda rĩũkĩte.

17. Tũkaagunĩka atĩa kuumana na matuĩro ma Jehova hĩndĩ ya mũthia wa mũtabarĩre ũyũ wa maũndũ?

¹⁷ Ta hũũra mbica ũrĩa tũkaigua tũrĩ thĩinĩ wa  thĩ njerũ thutha wa Jehova kũhingia matuĩro make. Ndini cia maheeni igaakorũo cieheretio, o hamwe na ahũũri biacara akoroku, na thirikari cia gĩũteti iria ikoretwo ikĩhinyĩrĩria andũ na igatũma manyamarĩke kwa ihinda iraihu. Ningĩ gũtigaakorũo na mathĩna ma mwĩrĩ, ũkũrũ, o na kana gĩkuũ. Shaitani na ndaimono nĩ makoohwo mĩaka ngiri. Maũndũ mothe moru marĩa mekĩkĩte nĩ ũndũ wa ũremi wao nĩ makeeherio biũ. (Kũg. 20:2, 3) Nĩ tũgaakorũo na ngatho mũno nĩ ũndũ wa kwĩhoka njĩra ya Jehova ya gwĩka maũndũ.

18. Tũreruta atĩa kuumana na Aisiraeli thĩinĩ wa Ndari 11:4-6 na 21:5?

¹⁸ Hihi ũtũũro thĩinĩ wa thĩ njerũ nĩ ũgaakorũo na maũndũ mangĩgeria mwĩhoko witũ harĩ njĩra ya Jehova ya gwĩka maũndũ? Kwa ngerekano, ta wĩcirie ũrĩa gwekĩkire ihinda inini thutha wa Aisiraeli gũkũũrũo ũkombo-inĩ bũrũri-inĩ wa Misiri. Aisiraeli amwe nĩ maambĩrĩirie gũteta nĩ ũndũ wa kwĩrirĩria irio imwe iria maarĩaga Misiri, na makĩambĩrĩria kũnyarara irio cia maana iria Jehova aamaheaga. (Thoma Ndari 11:4-6; 21:5.) Hihi nĩ tũkaagĩa na mwĩcirĩrie ta ũcio wa Aisiraeli thutha wa thĩna ũrĩa mũnene gũthira? Tũtiũĩ tũkaabatara kũruta wĩra ũigana atĩa nĩguo tũtherie thĩ na o kahora ĩthiĩ ĩtuĩkĩte paradiso. Kwahoteka ũtũũro ndũgaakorũo ũrĩ mũhũthũ kĩambĩrĩria-inĩ na nĩ gũgaakorũo na wĩra mũingĩ ũkaabatara kũrutwo. Hihi nĩ tũkaanuguna nĩ ũndũ wa kĩrĩa Jehova agaakorũo agĩtũhe ihinda-inĩ rĩu? Angĩkorũo nĩ tũkenagĩra kĩrĩa Jehova atũheaga mahinda maya, nĩ ũgaakorũo ũrĩ ũndũ mũhũthũ gũkenera kĩrĩa Jehova agaatũhee hĩndĩ ĩyo.

19. Nĩ maũndũ marĩkũ manene weruta gĩcunjĩ-inĩ gĩkĩ?

¹⁹ Njĩra ya Jehova ya gwĩka maũndũ ĩkoragwo ĩrĩ njega hingo ciothe. Nĩ twagĩrĩirũo gwĩtĩkia ũguo. Ningĩ nĩ twagĩrĩirũo kwĩhoka andũ arĩa Jehova aigĩte nĩguo matongorie maũndũ. Rekei tũririkanage ciugo ici Jehova aaririe kũgerera harĩ mũnabii Isaia: “Hinya wanyu ũkoimana na inyuĩ gũikara mũhooreire na kuonania mwĩhoko.”—Isa. 30:15.