1. O na gũtuĩka Jehova nĩwe Mwathani Ũrĩa Mũnene-rĩ, akoretwo akĩnyita ũgeni araika na andũ meke atĩa?

JEHOVA nĩwe Mwathani Ũrĩa Mũnene, Mũũmbi wa indo ciothe, na ũũgĩ na hinya wake itingĩringithanio na kĩndũ o na kĩrĩkũ. Jehova nĩ aateithirie Ayubu agĩtaũkĩrũo nĩ ũndũ ũcio. Thutha ũcio Ayubu oigire ũũ: ‘Nĩndamenya atĩ wee ndũrĩ ũndũ o wothe ũtangĩhota; ndũngĩgirĩka ũndũ waku o na ũrĩkũ ũrĩa wĩthugundĩire.’ (Ayub. 42:2) O na gũtuĩka Jehova no ahote kũhingia ũndũ o wothe ategũteithĩrĩrio nĩ mũndũ-rĩ, nĩ ũndũ wa wendo wake kuuma o kĩambĩrĩria nĩ akoretwo akĩnyita ũgeni araika na andũ marutithanie wĩra nake nĩguo ahingie muoroto wake.

2. Nĩ wĩra ũrĩkũ wa bata Jehova aaheire Jesu?

² Mbere ya kũũmba indo iria ingĩ ciothe Jehova aambire kũũmba Mũriũ wake wa mũmwe. Thutha ũcio nĩ aahũthĩrire Mũriũ ũcio wake akĩmũteithĩrĩria harĩ kũũmba indo iria ingĩ ciothe. (Joh. 1:1-3, 18) Mũtũmwo Paulo aandĩkire ũũ igũrũ rĩgiĩ Jesu: “Ũcio nĩwe mũhianĩre wa Ngai ũrĩa ũtonekaga, nĩwe irigithathi harĩ ũũmbi wothe; tondũ indo iria ingĩ ciothe, iria irĩ igũrũ na iria irĩ thĩ, iria  cionekaga na iria itonekaga, o na angĩkorũo nĩ itĩ cia ũnene, kana ũtongoria, kana thirikari, kana wathani, ciothe ciombirũo kũgerera harĩ we. Indo iria ingĩ ciothe ciũmbĩtwo kũgerera harĩ we na nĩ ũndũ wake.” (Kol. 1:15-17) Nĩ ũndũ ũcio Jehova nĩ onirie Mũriũ ũcio wake gĩtĩo kĩnene na njĩra ya kũmũhũthĩra wĩra-inĩ wake wa kũũmba na ningĩ na njĩra ya kũmenyithia andũ ũhoro wa itemi rĩu rĩa bata rĩa Mũriũ.

3. Jehova aaheire Adamu wĩra ũrĩkũ na nĩkĩ?

³ Ningĩ Jehova nĩ anyitaga ũgeni andũ marutithanie wĩra hamwe nake. Kwa ngerekano nĩ aaheire Adamu wĩra wa gũtua nyamũ marĩĩtwa. (Kĩam. 2:​19, 20) No mũhaka akorũo Adamu nĩ aakenaga mũno akĩĩrorera nyamũ, akona mĩtugo yacio, na agacoka akahe o nyamũ rĩĩtwa rĩrĩa rĩmĩagĩrĩire. Tondũ Jehova nĩwe wombĩte nyamũ, warĩ ũndũ mũhũthũ mũno harĩ we gũcitua marĩĩtwa. Ĩndĩ nĩ ũndũ wa wendo wake nĩ aaheire Adamu wĩra ũcio. Ningĩ Ngai nĩ aaheete Adamu wĩra wa kwararamia mũgũnda wa Edeni nginya thĩ yothe ĩtuĩke Paradiso. (Kĩam. 1:​27, 28) Ũndũ wa kĩeha nĩ atĩ Adamu nĩ aatuire itua rĩa kwaga kũrutithania wĩra hamwe na Ngai na akĩĩrehera we mwene o hamwe na njiarũa ciake thĩna mũnene.​—Kĩam. 3:​17-19, 23.

4. Nĩ na njĩra irĩkũ andũ amwe maarutithanirie wĩra na Ngai harĩ kũhingia wendi wake?

⁴ Thutha ũcio Ngai nĩ aanyitire andũ angĩ ũgeni magĩe na itemi harĩ kũhingia muoroto wake. Kwa ngerekano Nuhu nĩ aakire thabina ĩrĩa yatũmire we na andũ a famĩlĩ yake mahonoke hĩndĩ ya Mũiyũro mũnene. Musa nĩ aahonokirie Aisiraeli kuuma Misiri. Nake Joshua agĩtongoria rũrĩrĩ rũu nginya thĩinĩ wa Bũrũri wa Kĩĩranĩro. Suleimani nĩ aakire hekarũ ĩrĩa yarĩ Jerusalemu. Nake Mariamu agĩtuĩka nyina wa Jesu. Andũ acio ehokeku o hamwe na andũ angĩ aingĩ nĩ maarutithanirie wĩra hamwe na Jehova harĩ kũhingia wendi wake.

5. Nĩ wĩra ũrĩkũ tũkoragwo na itemi thĩinĩ waguo, na hihi no mũhaka Jehova angĩatũheire wĩra ũcio? (Rora mbica kĩambĩrĩria-inĩ gĩa gĩcunjĩ gĩkĩ.)

⁵ Mahinda-inĩ maya Jehova nĩ atũnyitĩte ũgeni tũnyite mbaru biũ Ũthamaki wa Kĩĩmesia. Nĩ kũrĩ na mĩthemba mĩingĩ ya ũtungata mũtheru. O na gũtuĩka ti Akristiano othe mangĩhota gũkorũo na itemi thĩinĩ wa mĩthemba ĩyo yothe ya ũtungata-rĩ, ithuothe no tũhote kũgĩa na itemi harĩ wĩra wa kũhunjia ũhoro ũrĩa mwega. Ũhoro wa ma nĩ atĩ to mũhaka Jehova atũhũthĩre kũruta wĩra ũcio. No ahote kwarĩria andũ gũkũ thĩ arĩ o kũrĩa igũrũ. Jesu ooigire atĩ Jehova no ahote gwatha mahiga mahunjie ũhoro wa Mũthamaki wa Kĩĩmesia. (Luk. 19:​37-40) O na kũrĩ ũguo, Jehova nĩ atwĩtĩkagĩria tũkorũo tũrĩ “arutithania wĩra” hamwe nake. (1 Kor. 3:9) Mũtũmwo Paulo aandĩkire ũũ: “Tũkĩrutithania wĩra hamwe na Ngai-rĩ, ningĩ twamũthaitha atĩ mũtikaamũkĩre ũtugi wake mũnene na mwage kũmenya muoroto waguo.” (2 Kor. 6:1) Kũrutithania wĩra hamwe na Ngai nĩ gĩtĩo kĩnene mũno na ũndũ ũcio nĩ ũtũrehagĩra gĩkeno kĩnene. Rekei twarĩrĩrie itũmi imwe iria iratũma tuuge atĩ ũndũ ũcio nĩ ũtũrehagĩra gĩkeno.

6. Mũriũ wa irigithathi wa Ngai aataarĩirie atĩa ũrĩa aaiguaga akĩrutithania wĩra na Ithe?

⁶ Kuuma o hĩndĩ ya tene ndungata cia Jehova nĩ ikoretwo ikĩgĩa na gĩkeno kĩrĩa kiumanaga na kũrutithania wĩra hamwe na Ngai. Mũriũ wa irigithathi wa Ngai atanooka gũkũ thĩ ooigire ũũ: “Mwathani aanyũmbire o kĩambĩrĩria kĩa wĩra wake . . . Hĩndĩ ĩyo ndakoragwo hakuhĩ na Mwathani, ngĩmũteithĩrĩria gũthondeka maũndũ, ngamũkenagia mũthenya o mũthenya, na niĩ ngakenaga ndĩ harĩ we hingo ciothe.” (Thim. 8:​22, 30, The Holy Bible in Gĩkũyũ Language) Jesu nĩ aakenaga mũno akĩrutithania wĩra na Ithe, agakena nĩ kuona  itemi rĩrĩa aahingagia na agakena nĩ kũmenya atĩ Jehova nĩ aakenagio nĩwe. Ĩ ithuĩ?

7. Wĩra wa kũhunjia ũtũrehagĩra gĩkeno nĩkĩ?

⁷ Jesu oigire atĩ kũheana na kũheo nĩ kũrehaga gĩkeno. (Atũm. 20:35) Nĩ twagĩire na gĩkeno mũno rĩrĩa twamenyire ũhoro wa ma, na nĩ tũgĩaga na gĩkeno rĩrĩa tũraruta arĩa angĩ ũhoro wa ma. Rĩrĩa tũraruta andũ ma cia Bibilia nĩ tuonaga ũrĩa magĩaga na gĩkeno kĩa ma mambĩrĩria gũtaũkĩrũo nĩ ma icio na mambĩrĩria kũgĩa na ũrata na Ngai. Nĩ tũhutagio ngoro mũno rĩrĩa tuona makĩgarũrĩra mwĩcirĩrie na mĩthiĩre yao. Ũndũ ũcio nĩ ũtũmaga tuone wĩra wa kũhunjia ũrĩ wa bata mũno. Nĩguo ũgatũma arĩa mekũiguithanio na Ngai mone muoyo wa tene na tene. (2 Kor. 5:20) Gũtirĩ wĩra ũngĩ ũngĩtũrehera gĩkeno na kũiganĩra gũkĩra wĩra ũcio wa gũteithia andũ mathingate ũtũũro ũrĩa ũgaatũma matũũre tene na tene!

8. Andũ amwe moigĩte atĩa ũhoro-inĩ wĩgiĩ kũrutithania wĩra na Ngai?

⁸ O na gũtuĩka nĩ tũgĩaga na gĩkeno tuona andũ magĩtĩkĩra ũhoro ũrĩa tũhunjagia-rĩ, nĩ tũkenaga ningĩ nĩ kũmenya atĩ nĩ tũrakenia Jehova na atĩ nĩ akenagio mũno nĩ kĩyo kĩrĩa tuonanagia ũtungata-inĩ wake. (Thoma 1 Akorintho 15:58.) Mũrũ wa Ithe witũ Marco ũrĩa ũikaraga Italy oigire ũũ: “Ngoragwo na gĩkeno kĩnene mũno nĩ ũndũ wa kũmenya atĩ ndĩratungatĩra Jehova na ngoro yakwa yothe handũ ha gũtungatĩra mũndũ ũngĩ ũrĩa ũngĩriganĩrũo o na ihenya nĩ maũndũ marĩa ndĩmwĩkĩire.” Nake Franco ũrĩa ũtungataga o bũrũri-inĩ ũcio oigire ũũ: “Jehova nĩ atũririkanagia o mũthenya kũgerera Kiugo gĩake na indo ingĩ cia kĩĩroho iria atũheaga atĩ nĩ atwendete na atĩ maũndũ mothe marĩa tũmwĩkagĩra nĩ ma bata, o na angĩkorũo hihi no tuone ta kĩyo gitũ gĩtarĩ kĩa bata. Nĩkĩo ngenagĩra mũno kũrutithania wĩra na Ngai na ũtũũro wakwa ũkagĩa na muoroto.”

9. Ũkuruhanu wa Jehova na Jesu wakoragwo ũtariĩ atĩa na nĩkĩ?

⁹ Rĩrĩa tũrarutithania wĩra hamwe na andũ arĩa twendete, nĩ tũgĩaga na ũrata mũnene hamwe nao, na tũkamenya ũmũndũ na ngumo ciao. Ningĩ nĩ tũmenyaga mĩoroto ĩrĩa marĩ nayo na ũrĩa mareka nĩgetha mahote kũmĩkinyĩra. No kũhoteke Jesu maarutithanirie wĩra na Jehova mĩaka bilioni nyingĩ na nĩ ũndũ ũcio makĩgĩa na ũrata na wendo mũnene mũno. Jesu akĩaria ũhoro wa ũkuruhanu ũrĩa maakoragwo naguo na Ithe oigire ũũ: “Niĩ na Awa tũrĩ kĩndũ kĩmwe.” (Joh. 10:30) Hingo ciothe maarutithanagia wĩra marĩ na ũrũmwe na ũiguano.

10. Nĩkĩ wĩra wa kũhunjia nĩ ũtũmaga tũkuhĩrĩrie Ngai na tũkuhĩrĩrie Akristiano arĩa angĩ?

¹⁰ Jesu nĩ aahoire Jehova agitagĩre arutwo ake. Aamũhoire ũguo nĩkĩ? Oigire ũũ: “Nĩguo makoragwo marĩ kĩndũ kĩmwe o ta ũrĩa ithuĩ tũrĩ kĩndũ kĩmwe.” (Joh. 17:11) Rĩrĩa tũratũũra kũringana na ithimi cia Ngai cia ũthingu na tũgakorũo na itemi wĩra-inĩ wa kũhunjia, nĩ tũtaũkagĩrũo wega nĩ ngumo ciake cia magegania. Nĩ twĩrutaga bata wa kũmwĩhoka na kũrũmĩrĩra ũtongoria wake. Twamũkuhĩrĩria nake nĩ atũkuhagĩrĩria. (Thoma Jakubu  4:8.) Ningĩ nĩ tũkuhagĩrĩria aarĩ na ariũ a Ithe witũ tondũ tũhiũranagia na maũndũ mahaanaine na ningĩ tondũ tũkoragwo na mĩoroto o ĩmwe. Hatarĩ nganja tũrutithanagia wĩra hamwe, tũgakena hamwe, na tũgakirĩrĩria hamwe. Mwarĩ wa Ithe witũ Octavia ũrĩa ũikaraga Britain oigire ũũ: “Kũrutithania wĩra na Jehova nĩ gũtũmaga nguhĩrĩrie mũno aarĩ na ariũ a Ithe witũ tondũ ũrata witũ rĩu ũkoragwo wĩhocetie harĩ muoroto na mwerekera o ũmwe.” Na githĩ to kũhoteke atĩ o nawe noguo ũiguaga? Na githĩ ndũiguaga ũkĩgucĩrĩrio nĩ Akristiano arĩa angĩ wona ũrĩa marerutanĩria gũkenia Jehova?

11. Nĩkĩ nĩ tũgakuhĩrĩria Jehova na aarĩ na ariũ a Ithe witũ makĩria thĩinĩ wa thĩ njerũ?

¹¹ Wendo witũ harĩ Jehova na harĩ aarĩ na ariũ a Ithe witũ nĩ ũkoragwo na hinya mũno mahinda-inĩ maya, ĩndĩ nĩ ũgaakorũo na hinya makĩria thĩinĩ wa thĩ njerũ. Ta wĩcirie wĩra ũrĩa ũrĩ mbere itũ. Nĩ kũrĩ andũ makaariũkio na nĩ makabatara kũnyitwo ũgeni na kũrutwo njĩra cia Jehova. Thĩ nĩ ĩkaabatara kũgarũrũo ĩtuĩke paradiso. Ũcio ndũgakorũo ũrĩ wĩra mũnini, ĩndĩ nĩ tũgaakena mũno tũkĩrutithania wĩra hamwe, na kahora kahora tũgĩtuĩka akinyanĩru rungu rwa Ũthamaki wa Kĩĩmesia. Arĩa magaatũra thĩinĩ wa thĩ hĩndĩ ĩyo magaathiĩ magĩkuhanagĩrĩria mũno na magĩkuhagĩrĩria Ngai ũrĩa ‘ũkahũnia kĩrĩa gĩothe kĩĩ muoyo kĩrĩa gĩkwenda.’​—Thab. 145:16.

12. Wĩra wa kũhunjia ũtũgitagĩra na njĩra irĩkũ?

¹² Nĩ tũkũbatara kũgitĩra ũrata witũ na Jehova. Tũratũũra thĩinĩ wa thĩ ĩratongorio nĩ Shaitani na tũtirĩ akinyanĩru. Gũkĩrĩ ũguo nĩ ũndũ mũhũthũ kũgĩa na mwĩcirĩrie na mĩthiĩre ta ya andũ a gũkũ thĩ. Roho wa gũkũ thĩ ũtariĩ ta makũmbĩ ma maĩ marĩa maratũtindĩka na kũrĩa tũtarenda gũthiĩ. Nĩguo tũtigathererio nĩmo no mũhaka twĩrutanĩrie biũ gũthambĩra tũrorete na kũrĩa makũmbĩ macio maroima. O ũndũ ũmwe na ũcio, nĩ tũrabatara kwĩrutanĩria mũno nĩguo tũtigathererio nĩ roho wa thĩ ĩno ya Shaitani. Rĩrĩa tũrahunjia ũhoro wa Jehova tũkoragwo tũigĩte meciria maitũ harĩ maũndũ marĩa ma bata na marĩa mega no ti harĩ maũndũ marĩa mangĩtũma tũũrũo nĩ hinya. (Afil. 4:8) Wĩra wa kũhunjia nĩ wĩkagĩra wĩtĩkio witũ hinya mũno tondũ nĩ ũtũririkanagia ciĩranĩro cia Jehova na ithimi ciake cia wendo. Ningĩ nĩ ũtũteithagia gũkorũo na matharaita marĩa tũrabatara nĩguo twĩgitĩre kuumana na Shaitani na thĩ yake.​—Thoma Aefeso 6:​14-17.

13. Mũkristiano ũmwe kuuma Australia aiguaga atĩa igũrũ rĩgiĩ wĩra wa kũhunjia?

¹³ Rĩrĩa tũrĩ na kĩyo wĩra-inĩ wa kũhunjia na thĩinĩ wa mawĩra mangĩ ma kĩĩroho, tũtingĩkorũo na mahinda ma gũtangĩka mũno nĩ ũndũ wa mathĩna marĩa tũrĩ namo na ũndũ ũcio nĩ ũtũgitagĩra. Mũrũ wa Ithe witũ Joel ũrĩa ũikaraga Australia oigire ũũ: “Wĩra wa kũhunjia nĩ ũndeithagia kuona maũndũ wega ũrĩa matariĩ. Nĩ ũtũmaga ndirikane mathĩna marĩa andũ marahiũrania namo na ũrĩa ng’unĩkĩte nĩ ũndũ wa kũhũthĩra mootaro ma Bibilia ũtũũro-inĩ wakwa. Ningĩ nĩ ũndeithagia gũikara ndĩ mwĩnyihia na ũkahe mweke wa kwĩhoka Jehova na kwĩhoka aarĩ na ariũ a Ithe witũ.”

14. Gũkirĩrĩria gwitũ wĩra-inĩ wa kũhunjia kuonanagia atĩa atĩ tũrĩ na roho wa Ngai?

¹⁴ Wĩra wa kũhunjia ningĩ nĩ ũtũmaga tũkorũo na ma biũ atĩ roho wa Jehova ũrĩ hamwe na ithuĩ. Kwa ngerekano-rĩ, ta tua atĩ nĩ waheo wĩra wa kũgaĩra andũ mĩgate mĩega mũno itũũra-inĩ rĩanyu. Gũtirĩ mũndũ ũgũkũrĩha nĩ ũndũ wa wĩra ũcio o na gũtirĩ mũndũ ũgũgũcokeria mbeca iria ũkũhũthĩra. Ũcoke ũmenye atĩ andũ aingĩ matirenda mĩgate ĩyo na atĩ o na amwe nĩ maragũthũra mũno nĩ ũndũ wa kũmĩheana. Hihi no ũhote gũthiĩ na mbere kũruta wĩra ũcio ihinda iraya? No ũkue ngoro nĩ ũndũ wa andũ kũiyũkia wĩra ũcio waku na njĩra njũru ũguo na wage hinya wa gũthiĩ  na mbere kũheana mĩgate ĩyo. Mũgarũ na ũguo-rĩ, aingĩ aitũ tũthiĩte na mbere gũkirĩrĩria mĩaka mĩingĩ wĩra-inĩ wa kũhunjia. Tũkoretwo tũkĩhũthĩra hinya, mahinda, na mbeca citũ o na andũ magĩtũnyũrũragia na makaaga kuonania ngatho nĩ ũndũ wa wĩra ũcio. Na githĩ ũndũ ũcio ndũronania wega atĩ tũteithagio nĩ roho wa Ngai?

15. Wĩra wa kũhunjia ũkonainie atĩa na muoroto wa Ngai harĩ andũ?

¹⁵ Ta wĩcirie ũrĩa wĩra wa kũhunjia ũkonainie na muoroto wa Jehova harĩ andũ. Muoroto wa Ngai warĩ andũ matũũre thĩinĩ wa thĩ mategũkua. O na gũtuĩka Adamu nĩ eehirie-rĩ, Jehova ndaacenjirie muoroto wake. (Isa. 55:11) Ithenya rĩa ũguo aabangire ũrĩa andũ mangĩakũrirũo kuuma ũkombo-inĩ wa mehia na gĩkuũ. Nĩguo muoroto ũcio ũhinge Jesu nĩ ookire gũkũ thĩ na akĩruta muoyo wake nĩ ũndũ wa andũ arĩa athĩki. No nĩguo andũ acio matuĩke athĩki no mũhaka mangĩabatarire kũmenya wendi wa Ngai harĩ o nĩ ũrĩkũ. Nĩ ũndũ ũcio Jesu nĩ aateithirie andũ kũmenya wendi wa Ngai nĩ ũrĩkũ na agĩcoka akĩruta arutwo ake o nao mekage o ũguo. Kwoguo hĩndĩ ĩrĩa tũrateithia andũ arĩa angĩ maiguithanio na Ngai, tũkoragwo na itemi rĩa ĩmwe kwa ĩmwe thĩinĩ wa muoroto ũcio wake wa wendo wa kũhonokia andũ kuuma kũrĩ mehia na gĩkuũ.

16. Wĩra witũ wa kũhunjia ũkonainie atĩa na maathani ma Ngai marĩa manene?

¹⁶ Rĩrĩa tũrateithia andũ mone njĩra ya muoyo wa tene na tene-rĩ, tuonanagia atĩ nĩ tũmendete na nĩ twendete Jehova. Wendi wake nĩ “andũ a mĩthemba yothe mahonokio na magĩe na ũmenyo mũkinyanĩru wa ũhoro ũrĩa wa ma.” (1 Tim. 2:4) Rĩrĩa Jesu ooririo nĩ rĩathani rĩrĩkũ inene harĩ marĩa maaheirũo rũrĩrĩ rwa Isiraeli, aacokirie ũũ: “No mũhaka wende Jehova Ngai waku na ngoro yaku yothe na muoyo waku wothe na meciria maku mothe.’ Rĩu nĩrĩo rĩathani rĩrĩa inene mũno na rĩa mbere. Rĩa kerĩ rĩtariĩ o ta rĩu, na nĩrĩo rĩrĩ: ‘No mũhaka wendage mũndũ ũrĩa ũngĩ o ta ũrĩa wĩyendete wee mwene.’” (Mat. 22:37-39) Tuonanagia atĩ nĩ twathĩkagĩra maathani macio na njĩra ya kũhunjia ũhoro ũrĩa mwega.​—Thoma Atũmwo 10:42.

17. Wee wonaga atĩa gĩtĩo kĩrĩa tũrĩ nakĩo gĩa kũhunjia ũhoro ũrĩa mwega?

¹⁷ Ithuĩ tũrĩ andũ arathime mũno! Jehova nĩ atũheete wĩra ũtũrehagĩra gĩkeno, ũrĩa ũtũmaga tũmũkuhĩrĩrie na tũgakuhĩrĩria Akristiano arĩa angĩ, na ũgatũgitĩra kĩĩroho. Ningĩ wĩra ũcio nĩ ũtũheaga mweke wa kuonania atĩ nĩ twendete Ngai na tũkenda andũ. Ũrĩa kũrĩ nĩ atĩ maũndũ ma andũ a Jehova kũndũ gũtiganĩte thĩinĩ wa thĩ matihaanaine. Ona kũrĩ ũguo, makorũo marĩ ethĩ kana akũrũ, atongu kana athĩni, andũ marĩ hinya kana matarĩ hinya, andũ a Jehova milioni nyingĩ nĩ marerutanĩria biũ gũcaria njĩra cia kũhunjĩria andũ arĩa angĩ. No kũhoteke wĩtĩkanie na mwarĩ wa Ithe witũ Chantel kuuma France. Oigire ũũ: “Ngai mwene hinya wothe Mũũmbi wa indo ciothe, Ngai ũrĩ gĩkeno, anjĩraga ũũ: ‘Thiĩ! Warie! Warie handũ-inĩ hakwa, warie kuuma ngoro. Nĩ ndakũhe hinya wakwa, Kiugo gĩakwa Bibilia, ndakũhe ũteithio kuuma igũrũ, andũ a kũrutithania wĩra nao gũkũ thĩ, gĩthomo gĩa gũthiĩ na mbere gũkũmenyeria, na ũtongoria wa ihinda rĩrĩa rĩagĩrĩire. Nĩ gĩtĩo kĩnene mũno gwĩka ũrĩa Jehova atwĩraga twĩke na kũrutithania wĩra hamwe na Ngai witũ.”