Mĩhari ĩyo nĩ yonanĩtie ngumo kenda cia Gĩkristiano, yugĩte ũũ: “Maciaro ma roho nĩ wendo, gĩkeno, thayũ, wetereri, ũtugi, wega, wĩtĩkio, ũhooreri, na kwĩgirĩrĩria.” O na kũrĩ ũguo, tũtiagĩrĩirũo kuona atĩ icio nocio ngumo iria roho wa Ngai ũngĩtũteithia gũkũria.

Mũtũmwo Paulo aandĩkire ũũ thĩinĩ wa mĩhari ĩrĩa ĩrĩ hau mbere: “Ciĩko cia kĩĩmwĩrĩ nĩ . . . ngomanio itagĩrĩire, maũndũ matarĩ matheru, mĩtugo ya rũtũrĩko, ũhoi mĩhianano, maũndũ ma ũgo, ũthũ, ngũĩ, ũiru, marakara manene, ngarari, ngayũkano, ikundi cia nyamũkano, gũcumĩkĩra, ũrĩĩu, maruga makĩrĩtie njano, na maũndũ ta macio.” (Gal. 5:19-21) Kwoguo Paulo nĩ angĩagwetire maũndũ mangĩ marĩ “ciĩko cia kĩĩmwĩrĩ,” ta marĩa marĩ thĩinĩ wa Akolosai 3:5. Ũndũ ũmwe na ũcio, thutha wa kũgweta ngumo kenda njega, ooigire ũũ: “Gũtirĩ watho ũgirĩtie maũndũ ta macio.” Ũguo nĩ kuuga atĩ, Paulo ndaagwetire ngumo ciothe iria roho mũtheru ũngĩtũteithia gũkũria.

No tũtaũkĩrũo nĩ ũndũ ũcio tũngĩringithania maciaro ma roho na maciaro ma ũtheri marĩa Paulo aandĩkire ũhoro wamo akĩandĩkĩra kĩũngano kĩa Efeso, aandĩkire ũũ: “Maciaro ma ũtheri nĩ marĩ mĩthemba yothe ya wega na ũthingu na ũhoro wa ma.” (Ef. 5:8, 9) Ngumo ya “wega” o hamwe na ũthingu na ũhoro wa ma igwetetwo hamwe irĩ “maciaro ma ũtheri,” na ningĩ nĩ gĩcunjĩ kĩa “maciaro ma roho.”

Ningĩ no tũtaũkĩrũo nĩ ũndũ ũcio, tũngĩringithania maciaro ma roho na ngumo ithathatũ iria Paulo eerire Timotheo akũrie, nĩcio “ũthingu, wĩrutĩri Ngai, wĩtĩkio, wendo, ũkirĩrĩria, na ũhooreri.” (1 Tim. 6:11) Ngumo ithatũ tu harĩ icio (wĩtĩkio, wendo, na ũhooreri) nocio igwetetwo irĩ gĩcunjĩ kĩa “maciaro ma roho.” O na kũrĩ ũguo, Timotheo nĩ angĩabatarire roho mũtheru nĩguo ũmũteithie gũkũria ngumo icio ingĩ igwetetwo, nĩcio ũthingu, wĩrutĩri Ngai, na ũkirĩrĩria.—Ringithania Akolosai 3:12; 2 Petero 1:5-7.

Ũguo nĩ gũkiuga atĩ Agalatia 5:22, 23, ndĩonanĩtie ngumo ciothe iria Akristiano magĩrĩirũo gũkũria. Roho wa Ngai no ũtũteithie gũkũria ngumo kenda iria ciumanaga na “maciaro ma roho.” No kũrĩ na ngumo ingĩ tũbataraga gũkũria, o ũrĩa tũragimara kĩĩroho, na ‘tũkehumba ũmũndũ mwerũ ũrĩa wombirũo kũringana na wendi wa Ngai, na ũthingu wa ma na wĩhokeku.’—Ef. 4:24.