1. Gwĩtigĩra Ngai nĩ kuuga atĩa, na nĩ kwa bata nĩkĩ harĩ arĩa mendete Jehova?

AKRISTIANO nĩ mendete Ngai, na nĩ mamwĩtigĩrĩte. Andũ amwe no mone maũndũ macio merĩ ta mataratwarana. O na kũrĩ ũguo, gwĩtigĩra kũrĩa tũrarĩrĩria ti kũrĩa mũndũ akoragwo nakuo rĩrĩa arĩ na guoya. Tũkwarĩrĩria gwĩtigĩra kũngĩ ngũrani. Andũ arĩa metigĩrĩte Ngai na njĩra ĩyo makoragwo mamũheete gĩtĩo kĩnene. Matiendaga kũrakaria Ithe witũ wa igũrũ tondũ matiendaga gũthũkia ũrata wao hamwe nake.​—Thab. 111:10; Thim. 8:13.

2. Kũringana na ciugo cia Mũthamaki Daudi iria irĩ thĩinĩ wa Thaburi 86:11, tũkwarĩrĩria maũndũ marĩkũ merĩ?

² Thoma Thaburi 86:11. Ciugo icio nĩ ironania wega atĩ Mũthamaki Daudi nĩ ooĩ bata wa gwĩtigĩra Ngai. Rekei twarĩrĩrie ũrĩa tũngĩhũthĩra ciugo icio Daudi aaririe atongoretio nĩ roho. Wa mbere, tũkwarĩrĩria itũmi imwe ibatiĩ gũtũma twĩtigĩre rĩĩtwa rĩa Ngai. Wa kerĩ, nĩ tũkwarĩrĩria ũrĩa tũngĩonania atĩ nĩ twĩtigĩrĩte rĩĩtwa rĩa Ngai ũtũũro-inĩ witũ.

3. Nĩ ũndũ ũrĩkũ Musa eeyoneire ũngĩkorũo wamũteithirie gũtũũra etigĩrĩte rĩĩtwa rĩa Ngai?

³ Ta wĩcirie ũrĩa Musa aaiguire rĩrĩa aarĩ mwanya-inĩ wa rwaro rwa ihiga na akĩona kĩoneki kĩa riri wa Jehova ũkĩhĩtũka.  Ibuku rĩa Insight on the Scriptures riugaga atĩ “no kũhoteke ũcio nĩguo ũndũ ũrĩa wa magegania mũno woonetwo nĩ mũndũ mbere ya Jesu Kristo gũka gũkũ thĩ.” Musa aacokire akĩigua ciugo ici, iria no kũhoteke ciaririo nĩ mũraika: “Jehova, Jehova, Ngai mũigua tha na mũcayanĩri, ndahiũhaga kũrakara na nĩ aiyũirũo nĩ wendo mwĩhokeku na ũhoro wa ma, onanagia wendo mwĩhokeku harĩ andũ ngiri nyingĩ, akohanĩra mahĩtia o na mehia.” (Tham. 33:17-23; 34:5-7) No kũhoteke Musa agweta rĩĩtwa Jehova nĩ aaririkanaga ũndũ ũcio. Nĩkĩo thutha-inĩ Musa eerire Aisiraeli matikage ‘gwĩtigĩra rĩĩtwa rĩu inene na rĩa magegania.’​—Gũcok. 28:58.

4. Twagĩrĩirũo gwĩcũrania ũhoro wĩgiĩ ngumo irĩkũ nĩguo tũhote kũhe Jehova gĩtĩo o na makĩria?

⁴ Rĩrĩa tũreciria ũhoro wĩgiĩ rĩĩtwa Jehova, nĩ twagĩrĩirũo gwĩcũrania nginya ũhoro wĩgiĩ ũrĩa atariĩ. Nĩ twagĩrĩirũo gwĩciria ũhoro wĩgiĩ ngumo ciake ta hinya, ũũgĩ, kĩhooto, na wendo. Gwĩcũrania ũhoro wĩgiĩ ngumo icio na ingĩ no gũtũteithie kũmũhe gĩtĩo o na makĩria.​—Thab. 77:11-15.

5-6. (a) Rĩĩtwa rĩa Ngai riugĩte atĩa? (b) Kũringana na Thama 3:13, 14 na Isaia 64:8, Jehova atũmaga maũndũ mekĩke na njĩra irĩkũ?

⁵ Rĩĩtwa rĩa Ngai riugĩte atĩa? Athomi aingĩ nĩ maiguithanagĩria atĩ rĩĩtwa Jehova no kũhoteke riugĩte “Nĩ Atũmaga Maũndũ Mekĩke.” Ũndũ ũcio ũratũririkania atĩ gũtirĩ ũndũ ũngĩgiria Jehova eke ũrĩa arenda, na no atũme maũndũ mekĩke. Na njĩra ĩrĩkũ?

⁶ Jehova atũmaga maũndũ mekĩke na njĩra ya gũtuĩka kĩrĩa gĩothe kĩrabatarania, nĩgetha ahingie muoroto wake. (Thoma Thama 3:13, 14.) Nĩ tũririkanagio kaingĩ bata wa gwĩcũrania ũndũ ũcio wa magegania wĩgiĩ Ngai. Jehova ningĩ no atũme ndungata ciake itarĩ nginyanĩru ituĩke kĩrĩa kĩrabatarania nĩguo imũtungatĩre, na ihingie muoroto wake. (Thoma Isaia 64:8.) Jehova nĩ ahũthagĩra njĩra icio kũhingia wendi wake.  Gũtirĩ ũndũ ũngĩmũgiria kũhingia mĩoroto yake.​—Isa. 46:10, 11.

7. Tũngĩka atĩa nĩguo twende na tũtĩe Jehova o na makĩria?

⁷ No twende Ithe witũ wa igũrũ o na makĩria, tũngĩĩcũrania maũndũ marĩa aneka na marĩa anatũhotithia kũhingia. Kwa ngerekano, rĩrĩa twecũrania igũrũ rĩgiĩ indo iria ciothe Jehova ombĩte, nĩ tũkenagio mũno nĩ maũndũ macio ahingĩtie. (Thab. 8:3, 4) Ningĩ nĩ tũiguaga twenda Jehova na tũkamũhe gĩtĩo o na makĩria rĩrĩa twecũrania ũhoro wĩgiĩ maũndũ marĩa mothe anatũhotithia gwĩka nĩguo tũhingie wendi wake. Hatarĩ nganja rĩĩtwa rĩa Jehova nĩ rĩa magegania! Rĩhutĩtie ũrĩa Ithe witũ atariĩ, maũndũ marĩa mothe aneka, na marĩa arĩka.​—Thab. 89:7, 8.

8. Kũringana na Gũcokerithia Maathani 32:2, 3, Jehova akoragwo na mawoni marĩkũ megiĩ rĩĩtwa rĩake?

⁸ Ihinda inini mbere ya Aisiraeli kũingĩra Bũrũri-inĩ wa Kĩĩranĩro, Jehova nĩ eerire Musa andĩke rwĩmbo. (Gũcok. 31:19) Musa aarĩ arute andũ rwĩmbo rũu. Gũcokerithia Maathani 32:2, 3 nĩ ĩronania wega atĩ Jehova ndarahithĩrĩra rĩĩtwa rĩake kana akonania ta rĩtabatiĩ gũtamũkwo atĩ tondũ nĩ itheru mũno. (Thoma.) Endaga rĩĩtwa rĩake rĩmenyeke nĩ andũ othe. Na githĩ to mũhaka akorũo andũ nĩ maakenire mũno kũigua Musa akĩmaruta ũhoro wĩgiĩ Jehova, na rĩĩtwa rĩake itũũgĩru! Maũndũ marĩa Musa aamarutire nĩ maamekĩrire hinya na makĩmacanjamũra o ta mbura ĩroirĩra mĩmera. Tũngĩka atĩa nĩguo ũrutani witũ ũhaane ũguo?

9. Tũngĩteithĩrĩria harĩ gũtheria kwa rĩĩtwa rĩa Jehova na njĩra ĩrĩkũ?

⁹ Hĩndĩ ĩrĩa tũrahunjia nyũmba kwa nyũmba kana kũndũ kwa mũingĩ, no tũhũthĩre Bibilia gũteithia andũ kũmenya atĩ Ngai etagwo Jehova. No tũmahe mabuku maitũ, tũmonie video citũ, na tũmonie maũndũ marĩa makoragwo thĩinĩ wa website itũ tondũ nĩ magoocithagia Jehova. Ningĩ no twethe mĩeke ya kwĩra andũ ũhoro wĩgiĩ Jehova na ũrĩa atariĩ twĩ wĩra-inĩ, cukuru, na rĩrĩa twĩ thabarĩ-inĩ. Rĩrĩa tũrera andũ arĩa twacemania nao ũrĩa Jehova arĩ muoroto mwega harĩ andũ na harĩ thĩ, tũkoragwo tũkĩmateithia kũmenya Jehova na njĩra amwe ao matarĩ meciria. Rĩrĩa tũrera andũ ũhoro wa ma wĩgiĩ Jehova Ithe witũ ũtwendete, tũkoragwo tũgĩteithĩrĩria harĩ gũtheria rĩĩtwa rĩake. Nĩ tũteithagia andũ kũmenya atĩ maũndũ mamwe marutĩtwo megiĩ Ngai nĩ ma maheeni. Maũndũ marĩa tũrutaga andũ nĩ mamekĩraga hinya na makamacanjamũra.​—Isa. 65:13, 14.

10. Nĩkĩ kũruta arutwo a Bibilia o mawatho na ithimi cia Ngai gwiki ti kũiganu?

¹⁰ Rĩrĩa tũraruta arutwo aitũ a Bibilia, twagĩrĩirũo kũmateithĩrĩria mamenye Jehova na mahũthagĩre rĩĩtwa rĩake. Ningĩ nĩ twagĩrĩirũo kũmateithĩrĩria mamenye ũrĩa rĩĩtwa rĩake riugĩte. Tũtingĩhota kũhingia ũndũ ũcio angĩkorũo tũgũthomithia mũrutwo witũ o mawatho na ithimi cia Ngai na mĩtugo ĩrĩa agĩrĩirũo gũkorũo nayo. Mũrutwo mwega wa Bibilia no erute mawatho ma Ngai na nginya amende. No hihi nĩ egwathĩkĩra Jehova nĩ ũndũ wa kũmwenda? Ririkana atĩ o na Adamu na Hawa nĩ mooĩ mawatho ma Ngai no matiamwendete kuuma ngoro. (Kĩam. 3:1-6) Kwoguo kũruta arutwo a Bibilia o mawatho na ithimi cia Ngai gwiki ti kũiganu.

11. Tũngĩteithia arutwo aitũ a Bibilia atĩa kwenda Jehova?

¹¹ Mawatho na ithimi cia Jehova hingo ciothe ikoragwo irĩ cia gũtũguna. (Thab. 119:97, 111, 112) No arutwo aitũ no mage kuona maũndũ na njĩra ĩyo mangĩaga gũtaũkĩrũo  atĩ Jehova aheanĩte mawatho macio nĩ ũndũ wa gũtwenda. Kwoguo no tũũrie arutwo ũndũ ta ũyũ: “Ũgwĩciria Ngai eraga ndungata ciake ciĩke ũndũ ũyũ kana itigeke ũndũ ũyũ nĩkĩ? Ũndũ ũcio ũrakuonia Jehova atariĩ atĩa?” Tũngĩteithia arutwo aitũ gwĩciria ũhoro wĩgiĩ Jehova na mende biũ rĩĩtwa itũũgĩru rĩa Jehova no tũmahutie ngoro. Na njĩra ĩyo, arutwo aitũ nĩ mekwenda to mawatho macio no nĩ nginya ũrĩa ũheanĩte mawatho macio. (Thab. 119:68) Wĩtĩkio wao nĩ ũgũkũra, na nĩ marĩhotaga gũkirĩrĩria magerio maritũ marĩa marĩcemanagia namo.​—1 Kor. 3:12-15.

12. Hĩndĩ ĩmwe Daudi aarekire ngoro yake ĩgayũkane na njĩra ĩrĩkũ, na moimĩrĩro maarĩ marĩkũ?

¹² Ciugo “he ngoro ĩtagayũkanĩte” iria irĩ thĩinĩ wa Thaburi 86:11 nĩ cia bata mũno. Mũthamaki Daudi aatongoririo nĩ roho kwandĩka ciugo icio. Ũtũũro-inĩ wake nĩ eeyoneire atĩ ngoro ya mũndũ no ĩgayũkane na njĩra hũthũ. Hĩndĩ ĩmwe arĩ nyũmba yake igũrũ, nĩ oonire mũtumia wa mũndũ ũngĩ agĩthamba. Ihinda-inĩ rĩu-rĩ, hihi ngoro ya Daudi yarĩ ngayũkanu kana ndĩarĩ ngayũkanu? Nĩ ooĩ atĩ watho wa Jehova woigĩte: “Ndũkanerirĩrie mũtumia wa mũndũ ũngĩ.” (Tham. 20:17) O na kũrĩ ũguo, aathiire na mbere na kũmwĩrorera. Ngoro yake ĩkĩgayũkana tondũ nĩ aambĩrĩirie kwĩrirĩria mũtumia ũcio ũrĩa wetagwo Bathi-sheba, na ningĩ no eendaga gũkenia Jehova. O na gũtuĩka kwa ihinda iraihu Daudi nĩ eendete na agetigĩra Jehova, nĩ aatooririo nĩ merirĩria make. Nĩ ũndũ ũcio, agĩka ũndũ warĩ mũũru mũno. Nĩ aacambithirie rĩĩtwa rĩa Jehova. Ningĩ nĩ aarehire mathĩna nginya kũrĩ andũ arĩa mataarĩ na mahĩtia ta andũ a famĩlĩ yake.​—2 Sam. 11:1-5, 14-17; 12:7-12.

13. Tũmenyaga atĩa atĩ Daudi nĩ aacokire akĩgĩa na ngoro ĩtagayũkanĩte?

¹³ Jehova nĩ aarũngire Daudi, na Daudi agĩcokia ũrata wake hamwe na Jehova. (2 Sam. 12:13; Thab. 51:2-4, 17) Daudi nĩ aaririkanaga mĩtangĩko na mathĩna marĩa oonire nĩ ũndũ wa kũreka ngoro yake ĩgayũkane. Nĩkĩo ooigire ũũ thĩinĩ wa Thaburi 86:11: “He ngoro ĩtagayũkanĩte.” Hihi Jehova nĩ aateithirie Daudi kũgĩa na ngoro ĩtagayũkanĩte? Ĩĩ nĩ eekire ũguo tondũ Bibilia ĩcokete ĩkonania atĩ Daudi aarĩ na ‘ngoro yeheanĩte biũ harĩ Jehova Ngai wake.’​—1 Ath. 11:4; 15:3.

14. Twagĩrĩirũo kwĩyũria atĩa, na nĩkĩ?

¹⁴ Kĩonereria kĩa Daudi nĩ gĩa gũtwĩkĩra ngoro, no ningĩ no gĩtũhe mũkaana. Ũrĩa aagũire mehia-inĩ maritũ nĩ mũkaana harĩ ndungata  cia Ngai matukũ-inĩ maya. Gũtekũmakania kana tũrambĩrĩirie gũtungatĩra Jehova ica ikuhĩ, kana tũkoretwo tũgĩka ũguo kwa ihinda iraihu twagĩrĩirũo kwĩyũria ũũ: ‘Hihi nĩ ndĩrerutanĩria kũregana na Shaitani nĩguo ndakagayũkanie ngoro yakwa?’

15. Gwĩtigĩra Ngai kũngĩtũteithia atĩa tũngĩona mbica itagĩrĩire?

¹⁵ Kwa ngerekano-rĩ, ũngĩona mbica thĩinĩ wa TV kana Intaneti-inĩ ĩngĩarahũra merirĩria moru ũngĩka atĩa? No ũkorũo ũrĩ ũndũ mũhũthũ kũhũthia na gwĩciria atĩ mbica kana video ĩyo ti ya ponografĩ. No hihi no ĩkorũo ĩrĩ njĩra ya Shaitani ya kũgayũkania ngoro yaku? (2 Kor. 2:11) Mbica ĩyo no ĩringithanio na ndaarĩ ĩrĩa mũndũ ahũthagĩra gwatũra mũgogo mũnene. Mũndũ ambaga akahũũrĩra kamũthia ka ndaarĩ mũgogo-inĩ. O ũrĩa ndaarĩ ĩyo ĩrathiĩ ĩkĩingĩraga, mũgogo ũcio ũthiaga ũgĩatũkaga. Mbica itagĩrĩire thĩinĩ wa TV kana Intaneti no iringithanio na kamũthia kau gaceke ka ndaarĩ. Kaũndũ kangĩoneka karĩ kanini na gatangĩthũkia mũndũ, no gatũme eke mehia mangĩgayũkania ngoro yake na matũme athũkie wĩkindĩru wake. Nĩ ũndũ ũcio, ndũgetĩkagĩrie ũndũ o wothe ũtagĩrĩire ũingĩre thĩinĩ wa ngoro yaku. Igaga ngoro yaku ĩtagayũkanĩte nĩguo wĩtigagĩre rĩĩtwa rĩa Jehova!

16. Rĩrĩa twacemania na igerio rĩna-rĩ, twagĩrĩirũo kwĩyũria ciũria irĩkũ?

¹⁶ Shaitani to mbica itagĩrĩire angĩhũthĩra gũtũgeria, no no ahũthĩre njĩra ingĩ nyingĩ. Twagĩrĩirũo gwĩka atĩa? Nĩ ũndũ mũhũthũ gwĩciria atĩ ũndũ mũna ti mũũru. Kwa ngerekano, mũndũ no eĩre ũũ: ‘Ingĩka ũndũ ũyũ ndingĩeherio kĩũngano-inĩ, kwoguo ũndũ ũyũ ti mũũru.’ Mwĩcirĩrie ta ũcio nĩ mũũru mũno. Twagĩrĩrũo kwĩyũria ciũria ta ici: ‘Hihi no gũkorũo Shaitani arahũthĩra igerio  rĩrĩ kũgayũkania ngoro yakwa? Na githĩ ndigũcambithia rĩĩtwa rĩa Jehova ingĩtĩkĩra gũtoorio nĩ merirĩria moru? Hihi ũndũ ũyũ ũgũtũma nguhĩrĩrie Ngai makĩria kana ũgũtũma ndĩmũraihĩrĩrie?’ Wĩcũranagie igũrũ rĩgiĩ ciũria icio. Hoyaga Jehova ũũgĩ wa gũcokia ciũria icio ũrĩa kwagĩrĩire ũtekwĩheenia. (Jak. 1:5) Gwĩka ũguo no gũkũgitĩre. No gũgũteithie kũregana na magerio ũtekwenyenya o ta Jesu rĩrĩa ooigire ũũ: “Thiĩ, Shaitani!”​—Mat. 4:10.

17. Nĩkĩ ngoro ĩgayũkanĩte ndĩngĩtũteithia? Heana ngerekano.

¹⁷ Ngoro ĩgayũkanĩte ndĩngĩtũteithia o na hanini. Ta wĩcirie ũhoro wĩgiĩ timu ya mathaako ĩrĩ na andũ mataraiguithania wega. Athaaki amwe marenda kwĩyonania, arĩa angĩ matirenda kũrũmĩrĩra mawatho, nao arĩa angĩ matirahe mũrutani wao gĩtĩo. Nĩ ũndũ ũrĩ hinya mũno harĩ timu ta ĩyo kũhootana. Ngũrani na ũguo, kũrĩ na ũhotekeku mũnene harĩ timu ĩrĩ na ũiguano kũhootana. Ngoro yaku no ĩhaane ta timu ĩyo njega angĩkorũo meciria maku, ũrĩa ũraigua, na merirĩria maku nĩ inyitanĩire harĩ gũtungatĩra Jehova. Ririkanaga atĩ Shaitani no ende kũgayũkania ngoro yaku. Endaga meciria maku, ũrĩa ũraigua, na merirĩria maku ikorũo irĩ mũgarũ na ithimi cia Jehova. No nĩgetha ũtungatĩre Jehova no mũhaka wĩke ũguo na ngoro yaku yothe. (Mat. 22:36-38) Ndũkanareke Shaitani agayũkanie ngoro yaku!

18. Ũtuĩte itua rĩrĩkũ kũringana na Mika 4:5?

¹⁸ Hoyaga Jehova o ta ũrĩa Daudi aahoire akĩmwĩra: “He ngoro ĩtagayũkanĩte nĩguo ndĩtigagĩre rĩĩtwa rĩaku.” Ĩkaga ũrĩa wothe ũngĩhota gũtũũra kũringana na ihoya rĩu. O mũthenya, tigagĩrĩra atĩ matua maku marĩ manene kana manini, nĩ maronania atĩ nĩ ũtĩĩte na njĩra nene rĩĩtwa itheru rĩa Jehova. Weka ũguo, nĩ ũrĩonanagia atĩ nĩ wagĩrĩire gwĩtwo Mũira wa Jehova. (Thim. 27:11) Na ithuothe nĩ tũrĩhotaga kuuga o ta mũnabii Mika ũrĩa woigire ũũ: “Ithuĩ [tũrĩthiaga] na rĩĩtwa rĩa Jehova Ngai witũ tene na tene.”​—Mik. 4:5.