MWAKA ũcio ũrathirire thĩinĩ wa thĩ yothe, ariũ a Ithe witũ ngiri nyingĩ nĩ maramũrirũo marĩ athuri na ndungata cia kĩũngano harĩ andũ a Jehova. Angĩkorũo ũrĩ ũmwe wa ariũ a Ithe witũ acio, no mũhaka ũkorũo nĩ ũrakenera mweke ũcio mwerũ wa ũtungata.

O na kũrĩ ũguo, no gũkorũo hihi nĩ ũraigua kaguoya kanini. Jason ũrĩa wĩrĩgĩte kwamũrũo arĩ mũthuri wa kĩũngano, oigire ũũ: “Rĩrĩa nderirũo atĩ nĩ ndatuĩka mũthuri wa kĩũngano, nĩ ndaiguire ndaritũhĩrũo mũno nĩ wĩra ũrĩa ingĩehokeirũo.” Musa na Jeremia nĩ maaiguire ta matangĩahotire wĩra ũrĩa maaheirũo nĩ Jehova. (Tham. 4:10; Jer. 1:6) Angĩkorũo o nawe nĩ ũiguaga ũguo-rĩ, ũngĩhota atĩa gũtooria ũndũ ũcio na ũthiĩ na mbere? Ta wĩcirie ngerekano ya Timotheo.—Atũm. 16:1-3.

No gũkorũo Timotheo aarĩ hakuhĩ gũkinyia mĩaka mĩrongo ĩĩrĩ kana aakoretwo akinyia rĩrĩa mũtũmwo Paulo aamwĩrire atĩ nĩ marĩthiaga thabarĩ ciake cia ũmishonarĩ. Kĩambĩrĩria-inĩ tondũ Timotheo aarĩ mwĩthĩ no gũkorũo ndeĩtĩkagia na nĩ eetigagĩra kwambĩrĩria wĩra ũcio mwerũ aaheetwo. (1 Tim. 4:11, 12; 2 Tim. 1:1, 2, 7) O na kũrĩ ũguo, thutha wa mĩaka ikũmi, Paulo nĩ eerire kĩũngano kĩa Filipi ũũ: “Ndĩ na mwĩhoko harĩ Mwathani Jesu atĩ ica ikuhĩ nĩ ngũtũma Timotheo kũrĩ inyuĩ . . . Nĩ gũkorũo ndirĩ na mũndũ ũngĩ ũrĩ na mwerekera ta wake.”—Afil. 2:19, 20.

Nĩ kĩĩ gĩatũmire atuĩke kĩonereria kĩega arĩ mũthuri wa kĩũngano? Ta wĩcirie ũhoro wa maũndũ matandatũ ũngĩĩruta kuumana na kĩonereria gĩake.

1. Nĩ aarũmbũyagia andũ biũ. Paulo eerire ariũ a Ithe witũ a Filipi ũũ: “[Timotheo nĩwe] ũkũrũmbũiya maũndũ manyu arĩ na wĩhokeku.” (Afil. 2:20) Nĩ ma Timotheo nĩ aarũmbũyagia andũ. Nĩ eeciragia mũno ũhoro wa maũndũ mao ma kĩĩroho na nĩ eimaga nĩ ũndũ wao.

Wĩtheme gũkorũo ũtariĩ ta ndereba wa mbathi ũrĩa wĩciragia tu mũno ũhoro wa gũkinya thitĩnji ciothe ategũcererũo handũ ha gũkuua andũ. Mũrũ wa Ithe witũ ũmwe ũheetwo gĩtĩo ũrĩa ũtungatĩte arĩ mũthuri wa kĩũngano kwa ihinda rĩa mĩaka 20 ataaraga ariũ a Ithe witũ arĩa maamũrũo ũũ: “Endaga aarĩ na ariũ a Ithe witũ. Wĩcirie ũhoro wa mabataro mao handũ ha kwenda magũtambũre atĩ ũrĩ mũthuri.”

2. Aaigaga maũndũ ma kĩĩroho mbere. Paulo akĩonania ngũrani ya Timotheo na andũ arĩa angĩ oigire ũũ: “Arĩa angĩ othe marũmbũyagia maũndũ mao ene, ti marĩa ma Jesu Kristo.” (Afil. 2:21) Paulo aandĩkaga ũhoro ũcio arĩ Roma. Nĩ onete atĩ ariũ a Ithe witũ kũu maarũmbũyagia o maũndũ mao. Na njĩra ĩmwe kana ĩrĩa ĩngĩ, matieheanaga biũ maũndũ-inĩ ma kĩĩroho. No ũguo tiguo Timotheo eekaga. Rĩrĩa mĩeke ya kwandandũra ũhoro ũrĩa mwega ĩngĩoimĩrire, nĩ aarĩ na mwerekera ta wa Isaia ũrĩa woigire: ‘Niĩ ũyũ haha; ta ndũma arĩ niĩ.’—Isa. 6:8.

Nĩ na njĩra ĩrĩkũ ũngĩiganania maũndũ maku na maũndũ marĩa wĩhokeirũo ma kĩĩroho? O mbere, amba ũmenye maũndũ marĩa wagĩrĩirũo kũiga mbere. Paulo oigire: “Mũkũũranage maũndũ marĩa ma bata  makĩria.” (Afil. 1:10) Iga maũndũ ma Ngai mbere. Wa kerĩ, ikara ũtũũro mũhũthũ. Eheria maũndũ marĩa mangĩtũma wage mahinda. Paulo eerire Timotheo ũũ: “Ũragĩra merirĩria ma wĩthĩ, ĩndĩ ũthingatage ũthingu, wĩtĩkio, wendo, [na] thayũ.”—2 Tim. 2:22.

3. Nĩ eerutanagĩria mũno maũndũ-inĩ ma kĩĩroho. Paulo aaririkanirie Afilipi ũũ: “Nĩ mũĩ [Timotheo] nĩ onanĩtie atĩ nĩ agĩrĩire, na o ta mwana na ithe, we akoretwo agĩtungata hamwe na niĩ gũtheremia ũhoro ũrĩa mwega.” (Afil. 2:22) Ndaarĩ kĩgũũta. Aarutaga wĩra na kĩyo rĩrĩa maakoragwo na Paulo, na ũndũ ũcio ũgĩtũma magĩe na ũrata mũnene.

Ũmũthĩ kũrĩ na wĩra mũingĩ thĩinĩ wa ithondeka rĩa Jehova. Wĩra ũcio nĩ ũtũmaga mũndũ aiganĩre na no ũtũme ũgĩe na ũrata wa hakuhĩ hamwe na aarĩ na ariũ a Ithe witũ. Kwoguo tua itua rĩa ‘gũkoragwo na maũndũ maingĩ ma gwĩka wĩra-inĩ wa Mwathani.’—1 Kor. 15:58.

4. Nĩ aahũthagĩra maũndũ marĩa eerutaga. Paulo aandĩkĩire Timotheo ũũ: “Wee nĩ ũrũmĩrĩire biũ ũrutani wakwa, mũtũũrĩre wakwa, muoroto wakwa, wĩtĩkio wakwa, wetereri wakwa, wendo wakwa, [na] ũkirĩrĩria wakwa.” (2 Tim. 3:10) Tondũ Timotheo nĩ aahũthagĩra maũndũ marĩa eerutaga, nĩ aagĩrĩire kũheo mĩeke ĩngĩ.—1 Kor. 4:17.

Hihi nĩ ũkoragwo na mũndũ ũngĩĩgerekania nake maũndũ-inĩ ma kĩĩroho? Angĩkorũo ndũrĩ no wethe ũmwe. Tom ũrĩa ũkoretwo arĩ mũthuri wa kĩũngano mĩaka mĩingĩ oigire ũũ: “Mũthuri wa kĩũngano warĩ na ũmenyeru wa mĩaka mĩingĩ nĩ onanirie nĩ eendaga kũndeithia na akĩnduta maũndũ maingĩ mũno. Maita maingĩ nĩ ndaamũhoyaga ũtaaro na ngaũhũthĩra. Na ũndũ ũcio nĩ watũmire ngĩe na ũmĩrĩru o na ihenya.”

5. Nĩ aathiaga na mbere kwĩruta. Paulo eerire Timotheo ũũ: “Wĩmenyagĩrie ũrĩ na muoroto wa kwĩrutĩra biũ harĩ Ngai.” (1 Tim. 4:7) Muteng’eri no akorũo na mũndũ ũmũmenyeragia mahenya, no nĩ arabatara kwĩmenyeria arĩ wiki. Paulo aacokire akĩra Timotheo ũũ: “Thiĩ na mbere kwĩrutanĩria gũthoma ũrĩ mbere ya andũ, gũtaarana, na kũrutana . . . Wĩcũranagie igũrũ rĩa maũndũ macio; wĩrutĩre biũ harĩ mo, nĩguo andũ othe mone ũrĩa ũrathiĩ na mbere gũkũra.”—1 Tim. 4:13-15.

O nawe ũrabatara gũthiĩ ũkĩagĩragia ũhoti waku. Korũo ũrĩ mũrutwo ũrĩ na kĩyo na ũthiĩ na mbere ũkĩmenyaga maũndũ ma ica ikuhĩ ma ithondeka. Ningĩ wĩtheme kwĩĩtĩkagia hihi ũgĩciria atĩ ũrĩ na ũmenyeru mũingĩ wa kũhota kũhiũrania na ũndũ o wothe ũtegwĩka ũthuthuria. O ta Timotheo, “wĩmenyagĩrĩre wee mwene na ũrĩa ũrutanaga.”—1 Tim. 4:16.

6. Eehokaga roho wa Jehova. Paulo agĩciria ũhoro wa ũtungata wa Timotheo, aamwĩrire ũũ: “Gitĩra ũndũ ũyũ mwega wĩhokeirũo kũgerera roho mũtheru, ũrĩa ũikaraga thĩinĩ witũ.” (2 Tim. 1:14) Nĩguo Timotheo agitĩre ũtungata wake nĩ aabataraga kwĩhoka roho wa Ngai.

Donald ũrĩa ũkoretwo arĩ mũthuri wa kĩũngano mĩaka mĩingĩ oigire ũũ: “Andũ arĩa mamũrĩtwo no mũhaka makenere ũrata wao hamwe na Jehova. Arĩa meka ũguo megũthiĩ na mbere ‘makĩĩongagĩrĩra hinya.’ Mahoya roho wa Ngai na makũrie maciaro ma roho, megũkorũo marĩ irathimo kũrĩ aarĩ na ariũ a Ithe witũ.”—Thab. 84:7; 1 Pet. 4:11.

Nĩ ũndũ wa gwĩkĩra ngoro mũno kuona ariũ a Ithe witũ aingĩ tawe nĩ maramũrirũo nĩguo matungatĩre Jehova. Jason ũrĩa ũkũgwetetwo kĩambĩrĩria-inĩ gĩa gĩcunjĩ gĩkĩ oigire ũũ: “Kwa ihinda rĩrĩa rĩothe ngoretwo ndĩ mũthuri wa kĩũngano, nĩ ndĩrutĩte maũndũ maingĩ mũno na ngagĩa na ũmĩrĩru. Rĩu nĩ ngenagĩra mũno wĩra ũrĩa heetwo na nĩ nyonaga ũrĩ mweke wa mwanya mũno!”

Hihi nĩ ũgwĩtĩkĩra Jehova athiĩ na mbere gũkũhũthĩra? Tua itua rĩa kwĩgerekania na Timotheo. Weka ũguo o nawe ũgũkorũo ũrĩ kĩrathimo harĩ andũ a Ngai.